ئه‌ڤرۆ نيوز:

رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ دياركر كو هه‌رێما كوردستانێ دێ كه‌ڤيته‌ به‌ر فشارێن هه‌ردو ده‌ريايێن ناڤه‌راست و سۆر ل وه‌لاتێ توركيا و دێ به‌ر ب پێله‌كا به‌فر و بارانان كه‌ڤيت.

رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز هنارتيه‌ راگه‌هاند كو ل رێكه‌فتى 2015.2.9، رۆژا دوشه‌مبى هه‌رێما كوردستانێ دێ كه‌ڤيته‌ به‌ر فشارێن نزمێن ده‌ريا ناڤه‌راست و ده‌ريا سۆر و ژ ئه‌نجامێ نزمبوونا ڤان هه‌ردو فشاران ئه‌سمانێ كوردستانێ دێ هه‌موو بيته‌ ئه‌ور و باران باريت و ل ده‌ڤه‌رێن باكوور و باكوورێ رۆژئاڤايێ هه‌رێمێ دێ به‌فر باريت و ب هێمنى ئه‌ڤ كارتێكرنه‌ دێ كه‌ڤيته‌ سه‌ر رۆژهه‌لاى ژى.

ئاماژه‌ ب وێ چه‌ندێ ژى كريه‌ كو پاشان پشتى گوهۆڕينا رێيا فشارێن ده‌ريا سۆر و ده‌ريا ناڤه‌راست دێ باران ب شێوێ جودا ل ده‌ڤه‌رێن جودا يێن هه‌رێمێ باريت و ده‌ڤه‌رێن چيايى ژى به‌فر باريت.

دايه‌ زانين ژى دێ پلێن گه‌رمێ ژى گه‌له‌ك هێنه‌ خوار و هنده‌ك جاران ل گه‌ل باران بارينێ دێ بريسى ژى هه‌بن و مه‌ودايێ ديتنێ ژى دێ گه‌له‌ك كێم بيت.

ل دۆر به‌رده‌واميا ڤان فشاران ژى خويا كريه‌ كو ئه‌ڤ كاتێكرنه‌ دێ ب ره‌نگه‌كێ ڤه‌قه‌تيايى ل سه‌ر هه‌رێمێ مينن هه‌تا كو رۆژا 2015.2.20ێ.

ئه‌ڤرۆ نيوز:

بڕياره‌ هه‌ردو وه‌زاره‌تێن سامانێن سرۆشتى و وه‌زاره‌تا كاره‌بێ بهێنه‌ ژناڤبرن و وه‌زاره‌ته‌كا نوو ب ناڤێ وه‌زاره‌تا وزێ ژێ بهێته‌ دروستكرن و ل جهێ وه‌زيره‌كێ دى بده‌نه‌ يه‌كگرتوو ئيسلامى كوردستان و ئه‌ندامه‌كێ مه‌كته‌با سياسى يا يه‌كگرتوو ژى ئاشكه‌را دكه‌ت كو جارێ ب تنێ ئه‌ڤه‌ هزره‌كه‌ و چو تشتێ فه‌رمى پێ نينه‌.

محه‌مه‌د ره‌ئوف ئه‌ندامێ سه‌ركرداتيا يه‌كگرتوو ئيسلامى كوردستان بۆ باسنيوز ئه‌ڤ نووچه‌ دا زانين و گۆت: “هێشتا ب تنێ وه‌كو هزره‌، دبيت كار ژى ل سه‌ر هات بيته‌ كرن، به‌لێ چو رێكه‌فتن هه‌تا نوكه‌ ل سه‌ر نه‌هاتينه‌ كرن و ئه‌ڤه‌ ل گه‌له‌ك وه‌لاتێن جيهانێ ب ڤى ره‌نگى يه‌”.

ئاماژه‌ ب وێ چه‌ندێ ژى كر كو په‌رله‌مان و حوكمه‌ت و يه‌كگرتوو يێن گه‌هشتينه‌ وێ چه‌ندێ كو كێشا كاره‌بێ ب ڤى ره‌نگى چاره‌ نابيت و ژ به‌ر هندێ ژى باشتره‌ ببنه‌ ئێك وه‌زاره‌ت و هه‌كه‌ سه‌ركرداتيا يه‌كگرتوو ره‌زامه‌ندى ده‌ربڕى چو كێشه‌يه‌ك نابيت.

ئه‌ڤرۆ نيوز:

ئه‌ڤرۆ كۆمبوونا نه‌ئاسايى يا په‌رله‌مانێ كوردستانێ ل هه‌له‌بچه‌ هاته‌ ئه‌نجامدان و پشتى دانوستاندنه‌كا زۆر، بڕيار دا هه‌له‌بچه‌ ژى ب فه‌رمى ببيته‌ پارێزگه‌هـ.

د كۆمبوونا ئه‌ڤرۆ دا ب ئاماده‌بوونا هژماره‌كا زۆر ژ وه‌زير و به‌رپرسێن حكۆمى و ئيدارى و حزبى قانوونا ئيدارا پارێزگه‌ها هه‌له‌بچه‌ هاته‌ په‌سه‌ندكرن و بوو پارێزگه‌ها پێنجێ يا باشوورێ كوردستانێ.

ب گۆره‌يى رێكه‌فتنه‌كێ د ناڤبه‌را ئێكه‌تى و گۆڕان دا، پۆستێن پارێزگه‌ها هه‌له‌بچه‌ و سلێمانێ دێ هه‌ر دو سالان بۆ لايه‌نه‌كى بن، ب ره‌نگه‌كى دو سالێن ئێكێ يێن پارێزگه‌ها هه‌له‌بچه‌ دێ بۆ گۆڕان بن و دو سالێن دويێ دێ بۆ ئێكه‌تى نشتيمانى كوردستان بن.

ب ڤێ چه‌ندێ ژى هه‌رێما كوردستانێ ب بڕيارا په‌رله‌مانێ خوه‌ نه‌خشه‌يێ حوكمه‌تا عيراقێ گوهۆڕى و 18 پارێزگه‌هان بوو 19 پارێزگه‌هـ .

ئه‌ڤرۆ نيوز:

ب مه‌ره‌ما ئێكلاكرنا پۆستێن حوكمه‌تا خۆجهى يا پارێزگه‌ها سلێمانيێ ئه‌ڤرۆ به‌رى نيڤرۆيا رۆژا پێنجشه‌مبى كۆمبوونا وه‌ڤدێ دانوستاندنكارێ گۆڕان و ئێكه‌تيێ ل گه‌ل ليستا خزمه‌ت “كۆمه‌ل و ئێكگرتوو” ل مه‌كۆيا سه‌ره‌كى يا بزاڤا گۆران ده‌سپێكر.

دكتور ئاسۆ مه‌حمود، ئه‌ندامێ وه‌ڤدێ دانوستاندكارێ بزاڤا گۆڕان بۆ سبه‌ى گۆت: “گۆڕانكارى يێ د جۆر و شێوازێن پۆستان دا هاتينه‌ كرن ب ره‌نگه‌كى، لايه‌نێن سياسى د رازى بن د پشكداريكرنا حوكمه‌تا خۆجهيا پارێزگه‌ها سلێمانيێ دا.

زێده‌تر گۆت: “دێ ل گه‌ل هه‌موو لايه‌نان كۆم بيت و د چه‌ند رۆژێن داهاتى دا، دێ به‌رسڤا دووماهيێ يا ناما لايه‌نێن دى ده‌ين”.

وه‌ڤدێ گۆڕان ژ عومه‌ر سه‌يد عه‌لى، جه‌لال جه‌وهه‌ر، دكتۆر ئاسۆ مه‌حمود، ئاسۆ ره‌حيم، د. ئاكۆ حه‌مه‌ كه‌ريم و وه‌ڤدێ ئێكه‌تيێ ژى ژ له‌تيف شێخ عومه‌ر و شوره‌ش ئيسماعيل و حاكم قادر پێكهاتينه‌.

وه‌ڤدێ ليستا خزمه‌تێ ژى پێكهاتينه‌ ژ محه‌مه‌د ئه‌حمه‌د و محه‌مه‌د حه‌كيم و رێبوار حه‌مه‌ و عومه‌ر محه‌مه‌د.