ئه‌ڤرۆ نیوز:
د حه‌فتیا 16 یا لالیگا یاریه‌كا پاشخستى د ناڤبه‌را ریال مه‌درید و سیڤیلیا هاته ئه‌نجامدان و ریال مه‌درید شیا ب دو گولان به‌رامبه‌ر گوله‌كێ سه‌ركه‌ڤیت.
د ڤێ یاریێ دا راموس و رودریگیز تووشى هنگاڤتنێ بوون و مارسیلیوو ژبه‌ر كارتا زه‌ر نه‌شێت یاریا بهێت بكه‌ت و ب ڤێ چه‌ندێ ریال تووشى قه‌یرانه‌كا مه‌زن دبيت د هێلا به‌ره‌ڤانیكرنێ دا ب تایبه‌ت بۆ یاریا بهێت ل گه‌ل یانا ئه‌تله‌تیكو مه‌درید، ژبه‌ر كو كوێنتراو ژى هاتیه هنگاڤتن.
ئه‌ڤرۆ نیوز،زنار توڤى:
مالپه‌رێ عه‌ین یێ عێراقى دیاركریه، بریاره ل روژا پێنجشه‌مبى شاهێ ئوردنێ وه‌كو فروكه‌ڤان به‌شدارى دهێرشێن دژى داعشێ دا دگه‌ل هه‌ڤپه‌یمانان بو سه‌ر جهێن داعشێ دا بكه‌ت،وه‌ك تولڤه‌كرنێ به‌رامبه‌ر سوتنا فروكه‌ڤانێ وى وه‌لاتى.
ل دویف نووچه‌یێن مالپه‌رێن ئوردنى شاه عه‌بدولایێ دووێ شاهێ ئوردنێ، ل روژا پێنجشه‌مبى دێ به‌شدار بیت دبوردومانكرنا جهێن داعشێ دا.
شاه عه‌بدولاى گوتیه: شه‌رێ دژى داعشێ ڤه‌گه‌ران تێدا نینه و دێ ل مولگه‌یێن وان یێن سه‌ره‌كى ده‌ین.
ئه‌ڤ چه‌نده په‌یدا بوو،ژ ئه‌گه‌رێ سوتاندنا فروكه‌ڤانێ ئوردنى مه‌عاز كه‌ساسیبه،كو به‌رى ماوه‌یه‌كێ فروكا وى ل شارێ رقه یێ سورى كه‌فتبوو خوارێ و ژلایێ داعش ڤه هاتبوو گرتن،ئه‌ڤه‌ژى كارڤه‌دان و توره‌بوونا گه‌لێ ئوردن و ده‌سهه‌لاتا وێ دیار دكه‌ت كو ب هه‌مى شیانێن خوڤه دێ ل دژى داعشێ راوه‌ستن
ئه‌ڤرۆ نیوز:
كومپانیا جێبه‌جێكار یا فلمێ Fast & Furious7 ، رابوویه ب به‌لاڤكرنا گرته‌كا ڤیدیویى یا تژى دیمه‌نێن سه‌رانجراكێش و بالكێش كو دهاته چاڤه‌رێكرن ئه‌ڤ فلمه ل ده‌ستپێكا سالێ ب دووماهى بهێت، به‌لێ ژبه‌ر مرنا ئه‌كته‌رێ ب ناڤ و ده‌نگێ ئه‌مریكى ( واكر) ، بوو ئه‌گه‌ر كو فلم گیرو ببیت، ژبه‌ر كو به‌رى هه‌مى دیمه‌ن بهێنه گرتن، واكر چو به‌ردلوڤانیا خودێ.
پشتى ئه‌ڤ ئاریشه بۆ كومپانیا جێبه‌جێكار چێبووى، رابوون برایێ واكر بۆ تمامكرنا دیمه‌نێن مایى ب كار ئینا، ئه‌وژى ب بكارئینانا ته‌كنیكێن سینه‌مایى یێن تایبه‌ت و دهێته چاڤه‌رێكرن هه‌یڤا سێ يا ئه‌ڤ ساله فلم بهێته به‌لاڤكرن كو پترترین جه‌ماوه‌رێ فلمان ل سه‌ر ئاستێ جیهانێ چاڤه‌رێى دیتنا ڤى فلمى دكه‌ن.
پول واركر د روودانه‌كا هاتن و چوونێ دا ل ویلایا كالیفورنیا ل 30 چریا دوێ یا سالا 2013 ێ گیانێ خوه ژ ده‌ست دابوو.
ئه‌ڤه ژى چه‌ند دیمه‌نێن فلمێ Fast & Furious7
ئه‌ڤرۆ نیۆز،بارزان مزوورى
به‌رپرسێ لقا 14 ل مووسل و به‌رپرسێ میحوه‌رێ باشیك ، عصمت ره‌جه‌ب ، بۆ ئه‌ڤرۆ نیوز دیار كر كۆ د بوردومانێن فروكه‌یێن جه‌نكى یێن ئه‌ڤرۆ بۆ سه‌ر باره‌گایێن چه‌كدارێن تیرورستێن داعش ل تاخێ مه‌نصور ل ناڤ باژێرێ مووسل ئه‌بو حه‌فزه به‌رپرسێ دادگه‌ها داعش ل مووسل دهێته كوشتن.
ناڤبرى دیار كر كۆ چه‌كدارێن تیرورستێن داعش رێكا دێرا الساعه ل ناڤ باژێرێ موسل گرت و صه‌لیبێ ل سه‌ر دێرێ ئیناخار ل دوڤ دا دێر په‌قاند .
ژلایه‌كێ دى ڤه ژێده‌ره‌ك ژ رێكخراوا ئازاد ل ناڤ باژێرێ مووسل دیار كر كۆ چه‌كدارێن تیرورستێن داعش 5 كه‌س سێداره‌دان ل تاخێ 17 ته‌مووز چونكۆ نه‌رازیبوونا خوه ل دۆر سوتنا فروكه‌ڤانێ ئوردنى نیشاندابوو .
ئه‌ڤرۆ نیوز، ڤه‌ده‌ر سوبحى:
داعش ل ناڤ بازارێ باژێرێ ره‌قه، بنگه‌هێ سه‌ره‌كیێ وان، جه‌ماوه‌ره‌كێ مه‌زن كۆمكرن ژ بچووك و مه‌زنان و هه‌می نه‌چار كرن كو پێكڤه ته‌ماشای ڤیدیۆیا سۆتنا فرۆكه‌ڤانێ ئوردنی بكه‌ن.
داعش ڤیدیۆیه‌كا نوو به‌لاڤكریه تێدا دیار دبیت كو شاشه‌كا مه‌زن ل نیڤا بازارێ باژێرێ ره‌قه یێ سوری هاتیه دانان و جه‌ماوه‌ر ته‌ماشای سوتنا موعاز كه‌ساسیبه دكه‌ن و ل ده‌مێ ئاگر به‌ردبیته جانێ وی جه‌ماوه‌ر پێكڤه ده‌ستا دقوتن و ب ده‌نگه‌كێ بلند درۆشمێن پشته‌ڤانیكرنا داعش گازی دكه‌ن.
هه‌ر د ڤیدیویێ دا زارۆیه‌كێ 6 سالی د ئاخڤیت و په‌سنا كارێ تیرۆرستێن داعش دكه‌ت پشتی ته‌ماشاكرنا ڤێ ڤیدیۆیا هۆڤانه.
ئه‌ڤرۆ نیوز:
لیوا روكنه‌كێ خانه‌نشینكى یێ ئه‌مریكا د وێ باوه‌رێ دایه كو ده‌وله‌تا ئیسلامى یا به‌رنیاس ب داعش هه‌مان خه‌له‌تیێن ستراتیژی یێن داعش دووباره دكه‌ت، ژبه‌ر هندێ دێ ژ ناڤ چیت.
مارک هێرتلینگ كو نوكه شروڤه‌كاره‌كێ سه‌ربازى كار دكه‌ت بۆ cnn گوتیه: داعش یێ بوویه ئه‌گه‌رێ توره‌بوونا وى خه‌لكێ ل گه‌ل دژین، ئه‌و ل سه‌ر هه‌مان خه‌له‌تى دچن، یێن به‌رى نوكه رێكخراوا قاعیده ئه‌نجام ددان، له‌وما دێ ژ ناڤ چن.
ئه‌ڤرۆ نیوز:
بهایێ نه‌فتێ د بلندبوونێ دایه و ئه‌ڤرۆ بهایێ به‌رمیله‌كا نه‌فتێ د بازارێن جیهانى دا گه‌هشته 58 دولاران و ئه‌و بهایه ده‌ربازكر كو حكومه‌تا عیراقێ د بودجا 2015 جێگر كریه.
د به‌رامبه‌ر ڤێ بلندبوونا بهایێ نه‌فتێ، وه‌زاره‌تا نه‌فتا عیراقێ راگه‌هاند كو ئه‌ڤ چه‌نده ئاماژه‌كا ئیجابى یه و پێشبینى كر كو زێده‌تر بهایێ به‌رمیلا نه‌فتێ بلند ببیت.
حكومه‌تا عیراقێ بودجێ 2015 ب 105 ملیار دولاران ته‌خمین و په‌سه‌ندكریه كو بهایێ به‌رمیلا نه‌فتێ ب 56 دولاران هژمارتى یه.
ئه‌ڤرۆ نیوز:
ژ ئه‌گه‌رێ بڕیاره‌كا حوكمه‌تا سویسرا، ئێدێ ژنێن سعودى ل وى وه‌لاتى ماف نینه ترۆمبێلێ بهاژوون.
حازم كه‌ركه‌تلى بالیوزێ سعودى ل سویسرا راگه‌هاند ل گۆر سیسته‌مێ نوو یێ هاتن و چوونا سویسرا، هه‌ر كه‌سێ ل وه‌لاته‌كێ دى چوبیته سویسرا و ئه‌گه‌ر مافێ په‌نابه‌ریێ ژى هه‌بیت، پێدڤیه موله‌تا شوفێریا وه‌لاتێ خوه بۆ پۆلیسێن هاتن و چوونێ ببه‌ت هه‌تا كو موله‌تا لێخورینا ترۆمبێلێ پێ بهێته دان، به‌لێ ئه‌ڤ بریاره ژنێن سعودیێ ژ لێخورینا ترۆمبێلان ل سویسرا بێ به‌هر دكه‌ت، ژبه‌ر كو ژنان ل سعودیێ مافێ لێخورینا ترۆمبێلان نینه.
ئه‌ڤرۆ نیوز:
تونى مادوكس رێڤه‌به‌رێ CNN دیاركر كو گه‌له‌ك جاران ستافێ كارى ل ته‌له‌فزیونێ، پێدڤى ب هندێ دبن كو وێنه و پارچه‌كا ڤیدیویێ كو خزمه‌تا بابه‌تێ ته‌له‌فزیونى بكه‌ت، به‌لاڤ بكه‌ن، به‌لێ د پرسا سوتنا فرۆكه‌ڤانێ ئوردنى دا ” مه ب فه‌ر دیت چ وێنه و ڤیدیویێن وێ به‌لاڤ نه‌كه‌ین ژبه‌ر كو داعش دخوازیت ب ڤى رێكێ پرۆپاكندێ بۆ خوه بكه‌ت و دڤێت كه‌نالێن راگه‌هاندنێ بنه‌مایه‌ك هه‌بیت بۆ ره‌فتاركرنێ ل گه‌ل كریارێن ب ڤى ره‌نگى.
نيشاندان