ئه‌ڤرۆ نيوز:

لژنا ئاڤه‌دانكرن و بنه‌جهكرنێ ل په‌رله‌مانێ كوردستانێ ب مه‌ره‌ما دانوستاندنێ ل سه‌ر ئه‌و كێشێن روو ب روويێ پرۆژێن بنه‌جهكرنێ دبن، دێ گازى وه‌زيرێ ئاڤه‌ندانكرن و بنه‌جهكرنێ كه‌ت.

فايه‌ق مسته‌فا، سه‌رۆكێ لژنا ئاڤه‌دانكرن و بنه‌جهكرنێ ل په‌رله‌مانێ كوردستانێ بۆ مالپه‌رێ فه‌رميێ په‌رله‌مانێ كوردستانێ دياركر كو ب مه‌ره‌ما ئاگه‌هدار بوون ل سه‌ر كێشێن بنه‌جهكرنێ گازى وه‌زيرێ ئاڤه‌دانكرنێ كريه‌ و د دانوستاندنان دا پێشتر ناڤبرى بۆ راگه‌هانديه‌ كو پلانا راگه‌هاندنێ پێدڤى ب قه‌رێن درێژ هه‌يه‌ بۆ وه‌لاتيێن هه‌رێما كوردستانێ.

گۆتژى: “ب گۆره‌يى گۆتنێن وه‌زيرێ ئاڤه‌دانكرن و بنه‌جهكرنێ، ئه‌و كێشا ئابوورى يا هه‌رێما كوردستانێ ڤه‌گرتى، كارتێكرن ل سه‌ر پرۆژێن وه‌زاره‌تێ نابيت، چونكو ئه‌و پرۆژه‌ ژ لايێ كۆمپانيێن بيانى ڤه‌ دهێنه‌ بجهئينان و قه‌رێن درێژ ب وه‌لاتيێن هه‌رێما كوردستانێ دهێنه‌ دان”.

ئەڤرۆ نیوز:

ب سەرپەرشتیا پارێزگەرێ دھۆکێ فەرھاد ئەترووشی دوھی ١ی خزیرانا ٢٠١٥ێ لژنا خزمەتگوزاری ل پارێزگەھا دھۆکێ د کۆمبوونەکێ دا تەئکید ل سەر دووڤچوونا کاروبارێن خزمەتکاری یێن گرێدایی ژیان و ژیارا وەلاتیان و نەھێلانا کێماسیان کر.
د کۆمبوونێ دا ھەروەسا بەحسێ دیارکرنا جھێ گۆرستانەکا نوو بۆ باژێرێ دھۆکێ ھاتە کرن، کو نوکە کار ل سەر دەستنیشان کرنا جھی دھێتە کرن و رێڤەبەرێ گشتی یێ باژێرڤانیان ل پارێزگەھێ دیارکر کو ھەر دەمێ جە ھاتە دەستنیشان کرن ئەو دێ دەست بجھئینانا کارێن خزمەکاری وەکو رێ و بەرژان و خزمەتێن دی کەن.
ھەروەسا گەنگەشا ڤەگوھاستنا نڤیسینگەھێن کەرەستێن ئاڤاھیان ھاتە کرن بۆ جھەکێ نوو و بەرفرەە و دیارکر کو کار ل سەر دیتنا جھەکێ گونجایی یێ بەردەوامە، دیسا گەنگەشە ل سەر پیشەسازیا بەرۆشکێ و چاوانیا رێکخستن و رێکوپێک کرنا وێ ھاتە کرن.
پارێزگەرێ دھۆکێ تەئکید ل سەر باژێرڤانیێ کر کو بەردەوام سەخبێریا شوستان بکەت و پارک و جھێن گشتی گرنگیێ پێ بدەت و پارکان چێکەت, دیسا بریار ھاتە دان کو لژنەک بۆ بەرھەڤکرنا دانانا نیشانێن ھاتن و چوونێ و ناڤێن گوندان بھێتە پێک ئیانان و ئەڤ لژنە ھەموو ڤەدیتن و بەرھەڤیان بکەت بۆ ڤی کاری, دیسا داکوکی ل چارەکرنا ئاریشا ئاڤا گران ل پرۆژێن وەبەرھێنانێ ھاتە کرن، ھەروەسا داکوکی ل سەر رێکخستنا جادێن گشتی و سەرەکی ل دەرڤەی باژێران ھاتە کرن، تەئکید ژی ھاتە کرن کو ھەر رێڤەبەریەک ژ لایێ خوە ڤە ل دووڤ تایبەتمەندیا خوە دووڤچوونا وان ئاریشان بکەت یێن د کەڤنە درێیا پرۆژێن وەبەرھێنانێ دا.
د کۆمبوونا لژنا خزمەتگوزاری دا ل پارێزگەھا دھۆکێ ھەروەسا تەئکید ھاتە کرن کو ھەڤکاری ل گەل قەزایێن پارێزگەھێ بھێتە کرن بۆ نەھێلانا بیستانێن ب ئاڤا ڤەخوارنێ دھێنە ئاڤدان و دەستپێکرنا ھەوەکا بەرفرەە و مەزن بۆ ھاندنا خەلکێ بێخەمەت ئابووری کرنێ د ئاڤێ دا، ھەروەسا نەھێلانا دانانا کولێن تەرش و کەوالی ل نێزیک پرۆژێن ئاڤێ ب تایبەت بیرێن ئاڤا ڤەخوارنێ.