ھەر 10 کەسان ئێک ژبەر جگارەکێشانێ دمریت

31/05/2015 10:56

684

ئه‌ڤرۆ نيوز:

جگارەکێشان سالانە پێنج ملیون مرۆڤان دکوژیت و ژ ھەر 10 کەسان ئێک ژ ئەگەرێ جگارەکێشانێ گیانێ خوە ژدەست ددەت و ئەو دوکێلا ل جھێن گرتی بەلاڤەدبیت و ھەموو کەس ھلدکێشن دبیتە ئەگەر کارتێکرن ل ھەموو کەسان بھێتە کرن و 37% ژ جگارکێشان دزانن کو جگارە دبیتە ئەگەرێ نەخوشیێن دلی و 17% ب تنێ دزانن کو جگارە جەلتەیا مێشکی پەیدا دکەت.
ژ مەزنترین ھەڤڕکیێن دکەڤنە ل ژێر بەرسینگێ ساخلەمیێ ب درێژیا مێژوویێ بابەتێ جگارەکێشانێ یە و جگارە یا پێکھاتیە ژ چوار ھزار کەرستەیێن کیمیاوی کو دبنە ئەگەرێ پەنجەشێرێ و ل دووڤ پێشھاتێن رێکخراوا ساخلەمیا جیھانی کو 700 ملیون زارۆ ھەوایێ پیسبووی ب دووکێلا جگارەیان ھلدکێشن و 40% ژ دایبابان جگارکێشن، ل سالا 2009ێ سێرڤەک ھاتە ئەنجامدان و تێدا دیاردبیت کو 37% ژ خەلکی دزانن جگارە دبیتە ئەگەرێ نەخوشیێن دلی و ب تنێ 17% دزانن جگارە سکتەیا دلی پەیدادکەن و ھەموو جگارکێش ژی ل وێ ھیڤیێ نە کو رۆژەکێ بھێت جگارەیان بھێلن و ھەکە حکوومەتێ بڤێت ھاریکاریا خەلکی بکەت دڤی واری دا پێدڤیە بھا و باجەیێن جگارەیان بھێنە زێدەکرن و رێکێ نەدەن ب کەیفا خوە ھەر کەسەک جگارەیان بینیت.

بۆچى خه‌لك نارگيلان دكێشن؟

31/05/2015 10:52

451

ئەڤرۆ نیوز:
ل ڤێ دووماھیێ کێشانا نارگیلێ یابەلاڤ بووی ب شێوەکی زۆر بەرفرەە دناڤ کومەلا مە دا و ب تایبەتی دناڤ سنێلا و جحێلا و ژ ھەردو رەگەزا و ب رێژەکا بەرچاڤتر ل دەڤ رەگەزێ نێر، و زۆربەی جحێلێن مە ھزر دکەن کو نارگیلە زیانێ ناگەھینیتە ساخلەمیا مرۆڤی، یانکو زیانێن وێ زۆر کێمترن ژ کێشانا جگارێ، بەلێ ئەو ھەموو د خەلەتن و راستیێن زانستی ڤێ چەندێ دیار دکەن و دوپاتیێ ل ھندێ دکەن کو زیانێن قەلیانێ کێمتر نینن ژ کێشانا جگارا.
د.نورەدین عەبدولا، نوشدارێ تایبەتمەندێ ساخلەمیا جڤاکی دیارکر کو گەلەک راپرسینێن زانستی یێن ھاتینە کرن ل دور ئەگەرێن زێدەبوونا ڤێ دیاردێ و ب تایبەتی ل وەلاتێن دەوروبەرێن مە و زوربەی بەرسڤ ئەڤە بوون کو بەتالی و بێ کاری بوشاتیەکی پەیدا دکەت و دبیتە ئەگەرێ کومبوونا ھەڤالان و کێشانا نارگیلێ و گۆت: ئەڤە چاڤلێکرنە و خەمێن مرۆڤی پێ کێم دبن و بێھنا وێ یا خوشە و تشتێ ژ ھەمیا نەخوشتر ئەوە کو سەمیان و دایک وبابێن وان نەرێنیا (نەرەزامەندیا) خوە دژی نارگیلێ دیار ناکەن و بەروڤاژی ڤێ چەندێ باب و کور یان دایک و کچ یان خێزان ھەموو پێکڤە ب ڤی کاری رادبن وەک دیاردەکا جڤاکی یا ھەڤ چەرخ.
د.نوردەدین دیارکر کو ناڤەرۆک و پێکھاتێن نارگیلێ چ جیاوازی نینە ژ پێکھاتێن جگارا کو نە کێمتر ژ ٤٨٠٠ کەرستێن ژەھراویێن کیمیاوی تێدا ھەنە وەک قەترانێ و زرنیخێ و رساسی و زێدەتر ژ حەفتێ کەرستێن تیشکی و پەنجەشێری وەک نیکوتینی و یەکەم ئوکسیدێ کاربونی و ھەروەسا ھندەک جورێن بویاغا و بێھنا تێدا ھەنە و سوتنا ڤان کەرستا دناڤ پەلا دا دبێتە ئەگەری پەیدابوونا کەرستێن ١٠٠% ژەھراوی و گۆت: ڤەکولینەک ل ئەوروپا ھاتە کرن و دیار بوو کو ھنگڤینێ (معسل) نارگیلێ دھێتە خاپاندن و زۆر کەرستێن سەیر تێدا ھەنە وەک بەلگێن پووچ یێن خەسێ و بەقلی و ھیرکێ دارتراشا و بەرمایکێن چایێ و دارکێن دار قەسپا. و ژبلی ڤێ چەندێ ئەو بوریا ئاڤێ و دووکێلی پر دبیت ژ میکروب و بەرمایکێن ژەھراوی. و تا نوکە ڤەکولینێن زانستی یێ ل دەسپێکێ و زۆربەی خەلکی ھزر دکەن کو دەمێ دووکێل د ناڤ ئاڤێ دا دبوریت دێ پاقژ بیت و زیانێن وی دێ کێم بن، بەلێ ئەڤە ھزرەکا خەلەتە و چ راستی بۆ نینە.
تایبەتمەندێ ساخلەمیا جڤاکی دیارکر کو ل سەر ئاستێ جیھانی ھەر سال ٤.٩ ملیون کەس دمرن ژ ئەگەرێ کێشانا تیتنی و ئەڤ ژمارە چێدبیت بلند بیت تا کو ١٠ ملیون کەسا د ماوێ ٢٠-٣٠ ساڵێن داھاتی دا. و ٧٠% ژ ڤان مرنا ل وەلاتێن پاشکەفتی و ئەوێن نوو ئاڤا دبن پەیدادبن، بۆ نموونە ل وەلاتێ مسرێ ٤٣ ھزار کەس ھەر ساڵ دمرن ژ ئەگەرێ جگارە کێشانی کو سێکەک (١/٣) ژ وان نارگیلە کێشانە و ھەر وەسا ل ڤەکولینەکا زانستی یا رێکخراوا جیھانی یا ساخلەمیێ دیار کر کو د ئێک روونشتنا کێشانا نارگیلی دا رێژا نیکوتینی بەرامبەری کێشانا پاکیتەکا جگارا یە.
د.نورەدین عەبدولا ل دۆر زەرەر و زیانێن کێشانا نارگیلێ دیارکر کو گەلەک کارتێکرنێن خوە ھەنە ژوانژی فێربوون (ادمان) ژ بەر کو نیکوتین ئێکە ژ کەرستین بەرنیاس کو ئیدمانێ پەیدا دکەت و ھەروەسا زیانی د گەھینیتە ئەو کەسێن نەکێشن ژی، دیسا ھەودانا بوریێن ھەناسێ و مێلاکا سۆر یا بەردەوام و دومدرێژ و بێھن تەنگیێ و دیسا نارگیلە رێک خوشکەرە بۆ پەیدا بوونا پەنجەشێرا مێلاکا سۆر و دەڤی و مەعیدێ و میزلدانێ و ھاریکارە بۆ ڤەگوھاستنا نەخوشیێن ڤەگر ژ کەسەکی بۆ ئێکێ دی وەک نەخوشیێن مێلاکا سور وەکی ئێشا زراڤ (سل) و ھەودانا مێلاکا رەش ( وەک خەلکێ مە دبێژیتێ زەرکا رەش)، ھەورەسا کێشانا نارگیلێ ل نک ژنێن دوگیان مایتێکرنەکا ب مەترسی دکەت ل سەر کێشا زاروکی و رێژا شیری و دبیتە ئەگەرێ ژ بەر چوونا زاروکا و زۆر کارتێکرنێ ل سەر ساخلەمیا زارۆیا دکەت وەک پەیدابوونا تەنگ ھەناسێ (رەبو) و ھەودانا گوھا و دیاردا مرنا ب نیشکەکێ ڤە، دیسا دکەت ل سەر توڤێ زەلامینیێ و کێم بوونا خوینرێژیا ھەیڤانە (عادە) ل دەف رەگەزێ مێ.

عه‌بادى و جبۆرى كۆم بوون

31/05/2015 10:39

ئه‌ڤرۆ نيوز:

سه‌رۆكێ جڤاتا وه‌زيرێن حوكمه‌تا عيراقێ حه‌يده‌ر عه‌بادى ل نڤيسينگه‌ها خوه‌ پێشوازى ل سه‌رۆكێ جڤاتا نوونه‌رێن عيراقێ، سه‌ليم جبۆرى، كر.

ب گۆره‌يى به‌ياننامه‌كا سه‌رۆكاتيا جڤاتا وه‌زيران كو ئه‌ڤرۆ نيوز دانه‌ك ل ده‌ست خوه‌ خستيه‌، د ڤێ پێشوازێكرنێ دا، به‌حس ل پێشهاتێن ئه‌منى و سياسى كرن و ته‌كست ل سه‌ر هه‌ڤپشكيا د ناڤبه‌را ده‌سته‌لاتا دانانا قانوونان و بجهئينانێ دا كر و به‌رنامێ حوكمه‌تێ بۆ ئاواران ژى ته‌وه‌ره‌كێ دى يێ كۆمبوونێ بوو.

ئاماژه‌ ب وێ چه‌ندێ ژى كريه‌ كو هه‌ر د ڤێ روونشتنێ دا سه‌ركه‌فتنێن هێزێن ئه‌منى يێن عيراقى و پۆليس و له‌شكرى و حه‌شه‌د شه‌عبى بلند هاتنه‌ نرخاندن و ته‌كست ل سه‌ر هه‌ڤپشكيا نشتيمانى كر و ئێكرێزيا گۆتار و لايه‌نان دا كو ل هه‌ڤدژى هه‌ر هه‌ڤركيه‌كا ل وه‌لاتى هه‌يى ببن.

هه‌ر د ڤێ به‌ياننامێ دا هاتيه‌ كو حه‌يده‌ر عه‌بادى يێ سه‌رۆك وه‌زير و سه‌ليم جبۆرى يێ سه‌رۆكێ جڤاتا نوونه‌ران به‌حس ل گرنگيا پشته‌ڤانيا نێڤده‌وله‌تى كريه‌ ل دژاتيكرنا چه‌كدارێن تيرۆرستێن داعش دا.

لژنا ئەوقافێ ھەلویستێ خوە ل سەر قەرێن دێ حوکمەت کەت دیار کر

31/05/2015 10:18

273

ئەڤرۆ نیوز:
سەرۆکایەتیا جڤاتا وەزیرێن ھەرێما کوردستانێ‮ ‬پڕۆژەیەک بەرھەڤکریە و ھنارتیە پەرلەمانێ‮ ‬کوردستانێ،‮ ‬ھەتا رێکێ‮ ‬بدەت حوکمەت بۆ دەربازکرنا ڤێ‮ ‬قەیرانا دارایی‮ ‬بشێت قەڕی‮ ‬ل وەلاتێن بیانی‮ ‬وەربگریت،‮ ‬ئەندامەکێ‮ ‬لیژنا ئەوقاف و کاروبارێن ئاینی‮ ‬ژی‮ ‬دبێژیت،‮ ‬ئەم دژی‮ ‬وەرگرتنا قەڕینە ئەگەر زێدەھی‮ ‬بچیتە سەر و دبیتە ریبا،‮ ‬د ھەمبەرا لیژنا دارایی‮ ‬و ئابووری رادگەھینیت،‮ ‬ئەف قەڕێ‮ ‬دھێتەکرن‮ ‬٥٠٠ ملیۆن دۆلارە و بۆ گەشەپێدانا ژێرخانا ئابووریا ھەرێمێ‮ ‬یە،‮ ‬ئەگەر دەنگ ئینا دێ‮ ‬پڕۆژە ھێتە پەسەندکرن‮.‬
مەدینە ئەیوب،‮ ‬ئەنداما لیژنا دارایی‮ ‬و ئابووریا پەرلەمانێ‮ ‬کوردستانێ‮ ‬بۆ رۆژناما ئەڤرۆ دیارکر،‮ ‬بڕیارە حوکمەتا ھەرێما کوردستانێ‮ ‬بۆ پتر گەشەکرنا ژێرخانا ئابووریا ھەرێمێ‮ ‬قەڕی‮ ‬بکەت و گۆتژی‮” ‬ئەف قەڕە پێنج ملیۆن دۆلارن و ل دو بانکا دێ‮ ‬ھێتە وەرگرتن،‮ ‬کو ئێک ژوانا بانکەکا ئورۆپی‮ ‬و‮ ‬یا بانکەکا ئەمریکیە،‮ ‬خواندنا ئێکێ‮ ‬بۆ پڕۆژەی‮ ‬ھاتیە کرن ل حەفتیا بۆری‮ ‬و بڕیارە ڤێ‮ ‬حەفتیێ‮ ‬خواندنا دویێ‮ ‬بۆ بھێتەکرن وبھێتە پەسەندکرن،‮ ‬راستە لیژنا ئەوقافێ‮ ‬تێبینی‮ ‬ل سەر وەرگرتنا قەڕی‮ ‬ھەبوو،‮ ‬بەلێ‮ ‬دێ‮ ‬رەتکرنا قەڕی‮ ‬مینیت سەر ئەندامێن پەرلەمانی،‮ ‬ئەگەر د کۆمبوونا داھاتی‮ ‬دەنگێ‮ ‬قانوونی‮ ‬بدەستڤە ئینانا،‮ ‬ئەڤە دێ‮ ‬پڕۆژە ھێتە دەربازکرن و بەرۆڤاژی‮ ‬ئەگەر دەنگ نە ئینا ئەڤە دێ‮ ‬ھێتە رەتکرن،‮ ‬پتریا وەلاتێن جیھانێ‮ ‬قەڕی‮ ‬دکەن و تشتەکێ‮ ‬ئاسایە،‮ ‬ژبەرکو ئەمریکا بخوە‮ ‬یا قەڕدارە و نێزیکی‮ ‬٢٠٠ وەلاتێن جیھانێ‮ ‬قەڕکرینە،‮ ‬ھەتا عێراقێ‮ ‬بخوە چەندین قەڕکرینە ل بانکێن جیھانی‮ ‬و ئیسلامی،‮ ‬بابەتێ‮ ‬قەڕی‮ ‬بابەتەکێ‮ ‬جیھانیە،‮ ‬مەرج نینە زێدەھیا راستەوخۆ بچیتە سەر وەلات ھەیە بۆ‮ ‬٤٠ سالا قەڕکریە،‮ ‬دبیت حوکمەتا ھەرێمێ‮ ‬بێژیت ڤان بانکا دێ‮ ‬وی‮ ‬دەمی‮ ‬زێدەھیێ‮ ‬بدەین،‮ ‬دەمێ‮ ‬قەیرانا دارایی‮ ‬دوماھی‮ ‬دھێت،‮ ‬ڤێ‮ ‬رەوشێ‮ ‬دا نەچارین قەڕی‮ ‬بکەین،‮ ‬چونکو بودجە نینە،‮ ‬ئەڤەژی‮ ‬بۆ موچەی‮ ‬نینە،‮ ‬ئەگەر بۆ موچەی‮ ‬قەڕی‮ ‬بکەین،‮ ‬چو مفا نابیت ژبۆ ھەرێما کوردستانێ‮”.‬
‮ ‬مەلا ئەنەس دۆسکی،‮ ‬ئەندامێ‮ ‬لیژنا ئەوقاف و کاروبارێن ئاینی‮ ‬ل پەرلەمانێ‮ ‬کوردستانێ‮ ‬بۆ رۆژناما ئەڤرۆ گۆت‮” ‬پشتی‮ ‬ھاتنا قەیرانا دارایی‮ ‬بۆ ھەرێما کوردستانێ‮ ‬و عێراقێ،‮ ‬حوکمەتێ‮ ‬پێشنیاز کریە پڕۆژە قانوونەک ژلایێ‮ ‬پەرلەمانی‮ ‬بھێتە پەسەندکرن،‮ ‬ئەوژی‮ ‬بۆ وەرگرتنا قەڕی‮ ‬ل وەلاتێن دەرڤە،‮ ‬بەلێ‮ ‬مە وەکی‮ ‬لیژنا ئەوقاف و کاروبارێن ئاینی‮ ‬تێبینی‮ ‬ل سەر ئەڤی‮ ‬قەڕی‮ ‬ھەنە،‮ ‬چونکو راستە بەغدا بودجە و مووچێ‮ ‬ھەرێما کوردستانێ‮ ‬بڕیە و نەچارین چارەسەریەکێ‮ ‬ڤەبینین،‮ ‬بەلێ‮ ‬ھەر وەلاتەکێ‮ ‬قەڕی‮ ‬بدەتە ھەرێما کوردستانێ‮ ‬کەس‮ ‬یێ‮ ‬بەرھەڤ نینە بێ‮ ‬زێدەھی‮ ‬ئەڤی‮ ‬قەڕی‮ ‬بدەت،‮ ‬ئەڤەژی‮ ‬دێ‮ ‬بیتە ئەگەرێ‮ ‬حەرامبوونا قەڕی‮ ‬و دچیتە چوارچوڤێ‮ ‬ریبایێ‮ ‬د ئیسلامێ‮ ‬دا،‮ ‬لەوڕا ئەم ب ھەموو شێوەیەکی‮ ‬دژی‮ ‬وەرگرتنا قەڕینە ژلایێ‮ ‬حوکمەتا ھەرێما کوردستانێ‮ ‬ڤە،‮ ‬ئەگەر زێدەھی‮ ‬ل سەربیت و ببیتە ریبا،‮ ‬دگەل ڤێ‮ ‬چەندێ‮ ‬مە چەند رێیەک پێشنیارکرینە،‮ ‬ژوانا فرۆتنا پتڕۆلێ‮ ‬ب قەر ژلایێ‮ ‬ھەرێمێ‮ ‬ڤە،‮ ‬دشێت پتڕۆلا خوە بقەر بفرۆشیت و چو ئاریشە تێدا نینە،‮ ‬ھەروەسا نەھێلانا موچێن فەرمانبەرێن بندیوار و کەسێ،‮ ‬پتری‮ ‬ئێک موچەی‮ ‬ھەی،‮ ‬زۆر رێکێن دی‮ ‬ھەنە و حوکمەت دشێن بەدیلێ‮ ‬قەڕی‮ ‬مەزاختیێن خوە کێم بکەت‮”.‬

باران دێ باريت

31/05/2015 10:18

457

ئه‌ڤرۆ نيوز:

رێڤەبەریا گشتیا کەشناسیێ ل ھەرێما کوردستانێ راگەھاند کو سوبه‌هى ئه‌سمان دێ ژ ئه‌وره‌كێ كێم هێته‌ گوهۆڕين بۆ ئه‌ورێن تمام و ل هنده‌ك ده‌ڤه‌رێن پارێزگه‌هێ، ئه‌گه‌رێن باران بارينێ يێن هه‌ين.

پشکا پێشبینیان ل رێڤەبەریا گشتیا کەشنایا ھەرێمێ راگەھاند کو ژ ئه‌نجامێ فشارێن نزمێن ده‌ريا سۆر و فشارێن نزمێن گزيرتا عه‌ره‌بى بۆ سەر ھەرێما کوردستانێ ئەو پێشبینی دکەن کو سوبه‌هى رێكه‌فتى 1ى خزيرانا 2015ێ دێ ئه‌سمان دێ ژ ئه‌وره‌كێ كێم هێته‌ گوهۆڕين بۆ ئه‌ورێن تمام و ل هنده‌ك ده‌ڤه‌رێن پارێزگه‌هێ، ئه‌گه‌رێن باران بارينێ يێن هه‌ين.

رێڤەبەریا گشتیا کەشناسیێ ل ھەرێما کوردستانێ ئاشکەرا ژی کریە کو پلا گەرماتیێ دێ يا هه‌ڤبه‌ركرى بيت ل گه‌ل رۆژێن به‌رى نوكه‌ ب رەنگەکی د ناڤبەرا 20 بۆ 35 دا.

ل دۆر پێشبینیا رێژا ھەوایی و مەودایێ دیتنێ ژی دایە زانین کو دێ ئاراستەیێ وی دێ باكوورێ رۆژهه‌لات بیت ب رەنگەکی دێ ل سه‌ر خوه‌ و ناڤه‌ندى بیت د ناڤبەرا 5 بۆ 15 کلم د دەمژمێرەکێ دا، ماوێ دیتنێ ژی دێ 8 بۆ 10 کلم بیت.

داعش ھێزەکا مەزن ل میحوەرێ باشیک کۆمکر

31/05/2015 10:11

209

ئەڤرۆ نیۆز، قائید میرۆ:

ل میحوەرێ باشیک تیرۆرستێن داعش ھێزەکا مەزن ل دەڤەرێ کۆمکریە و فەرماندەکێ پێشمەرگەی ژی رادگەھینيت، پێشبینیا ھێرشا ژ لایێ داعش دھێتەکرن و پێشمەرگە یێ بەرھەڤە بۆ بەرسیڤدانێ.

بەھره‌م عریف یاسین، فەرماندێ ھێزێن پێشمەرگەی ل میحوەرێ باشیک بۆ ئەڤرۆ نیۆز گۆت: “ئەڤە بۆ دەمێ چەند رۆژانە چەکدارێن تیرۆرستێن داعش ل میحوەرێ باشیک دەست ب لڤینان کریە و ھاتنوچوونا داعش ل دەڤەرا یا ئاسایی نینە وەک بەرێ و ھێزەکا مەزن ژی ئینایە دەڤەرا باشیک”.
بەھره‌م گۆتژی: “مە گومان ل ئینانا ئەڤێ ھێزا تیرۆرستێن داعش بۆ دەڤەرا باشیک ھەیە و پێشبینی دکەین، د دەمێ رۆژێن داھاتی دا، داعش دەست ب ھێرشێن خوە بکەتەڤە بۆ سەر ھێزێن پێشمەرگەی و بۆ ڤێ مەرەمێ ھێزێن پێشمەرگە کەفتینە د حالەتێ ئامادە باشیێ دا و د بەرھەڤن بۆ بەرسیڤدانا ھەر ھێرشەکا داعش”.

ئەمریکا و روسیا دخوازن رۆژئاڤا کوردستانێ ببیتە ھەرێما دژە فرینێ

31/05/2015 09:33

432

ئەڤرۆ نيوز:

ئەمریکا و روسیا ل سەر دروستکرنا ھەرێمەکا پاراستی ل سووریێ ل ھەڤکرن و د ڤێ چارچۆێ دا ھێزێن ھەڤپەیمانان داخواز ژ YPG و بورکان فراتێ کرینە کو لەزێ بکەن د ئازادکرنا گرێسپی و جەربالوسێ دا و ئۆپەراسیۆنا ئازادکرنا ھەردو باژێرکان ب پشتەڤانیا فرۆکێن ھەڤپەیمانیا نێڤدەولەتی دەستپێکریە.
ئاڤرەش ئێزیدی رۆژنامەڤان و چالاکڤانێ سیاسی ل روسیا د داخۆیانیەکی دا بۆ رۆژناما ئەڤرۆ راگەھاند کو د کۆمبوونا ل مۆسکۆ دا شاندێ ئەمریکا ب سەرۆکاتیا جۆن کێری وەزیرێ دەرڤە و شاندێ روسیا ب سەرۆکاتیا سیرگێی لاڤرۆڤ وەزیرێ دەرڤە یێ روسیا ل سەر رەوشا سووریێ و بەلاڤبوونا داعشێ ل رۆژھەلاتا ناڤین گەنگەشە کرن و د کۆمبوونێ دا باشورێ کوردستانێ وەک ناڤەندەکا ئارام ھاتە بناڤ کرن و پشتەڤانی بۆ ئاڤاکرنا ھەرێمەکا خوەسەر ل رۆژئاڤایێ کوردستانێ ھاتە کرن.
ئاڤرەش دیار ژی کر کو د کۆمبوونێ دا ھەردو شاندێن ئەمریکا و روسیا ل سەر راگەھاندنا رۆژئاڤایێ کوردستانێ وەک ھەرێمەکا دژە فرینێ ل ھەڤکرن و بۆ ڤێ چەندێ ژی بریار دان پشتەڤانیا کوردان د شەرێ ل دژی داعشێ دا بکەن و ھەڤکاریا ھێزێن کوردان د ئازادکرنا گرێسپی (تل ئەبیەد) و جەرابلوسێ دا بھێتە کرن و گۆت: (پشتی کۆمبوونا شاندێن ئەمریکا و روسیا ھەڤدیتنەک ل گەل شاندێ کانتۆنا جزیرێ یا رۆژئاڤا ھاتە کرن و ژ وان ھاتە خواستن کو د ئازادکرنا گرێسپی و جەرابلوسێ دا لەزێ بکەن و د ڤێ چارچۆڤێ دا کانتۆنا جزیرێ فەرمان دایە YPG و بورکان فرات کو دەسا ب ئازادکرنا ڤان ھەردو باژێرکان بکەن و ئۆپەراسیۆنەکا گەلەک دژوار ژ ئالیێ سەرێکانیێ و کۆبانێ ڤە بۆ ئازادکرنا گرێ سپی و جەرابلوسێ ھاتە دەستپێکرن).
ل ئالیێ دی فەرماندارێ YPG مەحمود بەرخوەدان ژی راگەھاند کو ئۆپەراسیۆنا وان بۆ ئازادکرنا ھەموو دەڤەرێن ل ژێر کۆنترۆلا داعشێ دەستپێکرینە و گۆت: (ئۆپەراسیۆن ب پشتەڤانیا فرۆکێن ھەڤپەیمانان دەستپێکریە و دیسان ل رەخێ کۆبانێ ھەڤالێن بورکان فرات و ل جزیرێ ژی ھێزێن مە ئەڤ دو رۆژن دەست ب ئازادکرنا گرێسپی و جەرابلوسێ کرینە و ھەکە پێدڤی بھێتە دیتن دێ ھێزێن کانتۆنا عەفرینێ ژی د ئازادکرنا جەرابلوسێ دا جھێ خوە بگرن و ئەم دخوازین د دەمەکی کورت دا ھەم رۆژئاڤا بکەینە ژێر کۆنترۆلا خوە و ھەرسێ کانتۆنێن خوە ب ھەڤدو را گرێ بدەین).
ل سەر بریارا راگەھاندنا رۆژئاڤایێ کوردستانێ وەک ھەرێما دژە فرینێ ژی فەرماندارێ YPG راگەھاند کو ئاگاھیێن وی یێن تەمام د ڤی واری دا نینن و گۆت: (ئەم ھێزا پاراستنا رۆژئاڤایێ کوردستانێ نە و ئەرکێ مە پاراستنا دەستکەڤت و ئازادکرنا دەڤەرێ داگرکری یێن رۆژئاڤا کوردستانێیە).

دستوور د ماوێ خوە یێ قانونی دا بەرھەڤ نابیت

31/05/2015 09:28

ئەڤرۆ نیوز:
ئەندامەکێ پەرلەمانێ کوردستانێ راگەھاند، مە ھەر چار فڕاکسیۆنێن پەرلەمانی بڕیاردایە، خالەکا پێکئینانا لژنا بەرھەڤکرنا دستوورێ ھەرێمێ بھێتە راستڤەکرن و تێدا ھژمارا ئەندامێن لژنێ بھێنە زێدەکرن، بەرۆڤاژی پشکداریێ ناکەین و دێ بیتە دستوورەکێ حزبی، خوەیاکر، ددەمێ سێ ھەیڤان دا چو دستوور ناھێنە بەرھەڤکرن و پەسەندکرن.
باپیر کاکەمەلا، سکرتێرێ پارتی کرێکاران و رەنجدەرانی کوردستان و ئەندامێ پەرلەمانێ کوردستانێ بۆ رۆژناما ئەڤرۆ گۆت” ئەم چار فڕاکسیۆنێن پەرلەمانی کۆمبووینە و دووماھی بڕیارا خوە ل دۆر پشکداریا مە د لیژنا بەرھەڤکرنا پڕۆژێ دستوورێ ھەرێمێ دا ھاتیەدان، کو بەری نوکە نوونەرەک بۆ چار فڕاکسیۆنان ھاتبوو دیارکرن و مەژی ئەڤ چەند رەتکریە و د بەرھەڤ نینین پشکداریێ د ڤێ لیژنێ دا بکەین، تنێ ب مەرجەکی ھەر فڕاکسیۆنەکێ نوونەرەک ھەبیت د لیژنێ دا، مە دخوازکریە ئەڤ بڕگە بھێتە راستڤەکرن یا بەحسێ ھژمارا ئەندامێن لیژنا بەرھەڤکرنا دستووری دکەت کو ژ ٢١ کەسان پێک دھێت، باشە بۆچی ٢١ کەس بن و پتر نەبن؟ ھەکە پێشنیارامە ھاتە قەبوولکرن، دێ پششکداربین، ھەکە نە پشکدارنابین و وی دەمی دێ دستوورێ ھەرێمێ بیتە دستوورەکێ حزبی”.
ڤی پەرلەمانتاری گۆت ژی” حزبێن سیاسی د ھەوێن ھەلبژارتنان دا گەلەک سۆز داینە جەماوەرێ خوە و نوکە دخوازن پڕۆژێ دستووری بەرھەڤ بکەن، بەلێ ب دیتنا من دستوورەک ل سالا ٢٠٠٨ێ ھاتبیتە بەرھەڤکرن و ھەتا نوکە نەشیابن چو بۆ بکەن، ددەمێ ڤان سێ ھەیڤێن بۆ دیاریکرین دا نەشێن چو پێنگاڤێن وەسا پاڤێژن کو ئەم ببینە خوەدی دستوو”.
کاکەمەلا دیارکر، نوکە بۆچوونەک ھەیە دبێژیت نابیت بازاڕێ ھەرێمێ بازاڕەکێ ئازادبیت و قورغکاری تێدا بھێتەکرن، ھەروەسا من داخۆیانیەکا ئەندامەکێ ئێکگرتوویا ئیسلامی دیت دبێژیت، خەیالە ھەکە کەسەک بێژیت ئایینێ ئیسلامێ ژێدەرێ دستووری نابیت، دبەرامبەر دا خەلکەکێ علمانی دبێژن پێدڤیە دین و سیاسەت بھێنە جوداکرن، یا ژ ھەموویێ گرنگتر ئەوە، دستوورەک ب سازدانبیت ناھێتە بەرھەم، چونکی ھەکە کەسەک ژ وێ لیژنێ یێ رازی نەبیت ئەڤە سەرناگریت، ب دیتنا من گەلەک ب زەحمەتە بگەھنە ئەنجامەکی، دبیت ل سەر تشتێن گشتی ئێک بن، بەلێ گەلەک ناکۆکی ل سەر ھووردەکاریان یێن ھەین”.