ئەڤرۆ:

حەبیب سەید کو بۆ ئاڤاکرنا کابینا نوو یا حوکمەتا تونس ژ ئالیێ سەرۆک کۆمارێ وی وەلاتی ڤە ھاتیە راسپاردن د دیدارەکێ ل گەل ئاژانسا فرانس پرێس ئاخڤی و دیار کر کو پارتا مە (نیدا تونس) شیا د ھەلبژارتنێن پەرلەمانی دا پرانیا کورسیان بدەستڤە بینیت و پشتی گەنگەشەکا بەرفرەە ل گەل سەرکردایەتیا پارتیا مە ئەم گەھشتینە ڤێ بریارێ کو ل گەل پارتێن عەلمانی و ھندەک پارتێن دی یێن بچویک کو ئەندامێن وان ژی ل پەرلەمانی دا ھەنە کابینا نوو ئاڤا بکەین و گۆت: (ب رەنگەکێ ئاشکرا بێژم کو مە نەڤێت نھا ل گەل پارتێن ئیسلامی ھەڤپەیمانیێ دروست بکەین، چونکو مە بەرنامەکا بەرفرەە بۆ ئاڤەدانی و پێشڤەبرنا وەلاتێ خوە دارێتیە و ئالیێن ئیسلامی ژی پشتەڤانیێ ل بەرنامێ مە ناکەن و ژ بەر ھندێ ژی مە دڤێت ل گەل ھندەک پارتێن دی کابینا نوو ئاڤا بکەین).
ل گۆر راپۆرتەکا ئاژانسا رویترز یا نووچەیان ژی بەری نھا چەندین جاران پارتا نەھزە یا ئیسلامی ل تونس بزاڤ کر کو ل گەل پارتیا نیدا تونس کابینا نوو ئاڤا بکەت، لێ پرانیا ئەندامێن سەرکردایەتیا وێ پارتیێ دژی ڤێ یەکێ بوون کو ئالیێن ئیسلامی د کابینا نوو دا جە بگرن و ژ بەر ڤێ یەکێ ژی وان ئەو بریار دا کو بێی ئالیێن ئیسلامی کابینا نوو ئاڤا بکەن و گەلەک وەلاتێن رۆژئاڤایی ژی پشتەڤانیا وێ پێنگاڤا سەرکردێن پارتیا نیدا تونس دکەن.
چاڤدێرێن سیاسی دیار دکەن کو پشتی ئەزموونا خراب یا ئالیێن ئیسلامی ل مسر و لیبیا بەرپرسێن تونس ناخوازن کو ئەو ئەزموون ل وەلاتێ وان ژی دووبارە ببیت و ل ئالیێ دی ل تونس دو جاران ھەلبژارتن ھاتیە کرن کو یەک ژ وان یا پەرلەمانی و یا دی بۆ سەرۆک کۆماریێ بوو و ھەر دو جاران ژی ھێزێن ئیسلامی نەشیان دەنگێ پێدڤی بدەستڤە بینن و ئەڤە ژی نیشا ددەت کو پرانیا خەلکێ تونس پشتەڤانیێ ل پارتێن عەلمانی دکەن و ژ بەر ھندێ ژی سەرکردێن پارتیا نیدا تونس دبینن ھەکە بشێن د کابینا نوو دا خزمەتێن باش بۆ خەلکێ خوە بکەن دێ بشێن بۆ ماوەیەک درێژ ل سەر دەستھەلاتێ بن و پرانیا وەلاتێن رۆژئاڤا ژی دێ پشتەڤانیێ ل حوکمەتا وان بکەن و ژ بەر ڤێ یەکێ ژی وان نەڤێت د کابینا نوو دا پارتێن ئیسلامی چو دەستھەلاتەکێ وەربگرن.

ئەڤرۆ:

ھەیسەم یوسف ئەمیندارێ گشتیێ جڤاتا راگەھاندنا عەرەبی ل دوبەی بۆ ئەڤرۆ دبێژیت، ژیێ دەولەتا ئیسلامی ل عیراقێ و شامێ (داعش) گەلەک یێ کورتە و تنێ سالەک و نیڤە، لێ یا شیای دەولەتەکێ ژ چەندین پارچێن دو دەولەتان ئاڤابکەت و ئەمریکا رەتکر ناڤێن (کۆمەلە، میلیشیا یان گرۆپ) ل سەر داعشێ بدانیت، بەلکو ب لەشکر ناڤکر و نوکە دبێژیت (لەشکرێ دەولەتا ئیسلامی).

ل دۆر کاریگەریا ھێرشێن ئەسمانی یێن ھێزێن ھەڤپەیمانان ل سەر تیرۆرستێن داعشێ، ھەیسەمی گوت”ئەم دروستیا لێدانا ئارمانجان و زیانێن وان ھێرشان ژی نزانین و ئەمریکا ب خوە راگەھاندیە کو سێ سال پێدڤینە بۆ ژناڤبرنا لەشکرێ دەولەتا ئیسلامی و ئەڤە ب خوە ئاماژەکە بۆ ب ھێزا وی لەشکری و شیانێن ھەین”.

سەبارەت بەرفرەھبوونا داعشێ بەر ب ئوردنێ و سعودیێ و لوبنانێ، ناڤبری گوت” ب زەحمەتە پێشبینی ل دۆر ڤێ چەندێ ل گەل ھەبوونا بەرەیەکێ شەرٍی د ناڤبەرا ھەڤپەیمانان و داعشێ، لێ بێگۆمان ڤێ رێکخستیێ پشتەڤانێن خوە یێن ھەین کو باوەری ب حوکمەتێن خوە نەمایە ( ل ھندەک وەلاتێن عەرەبی و ئورۆپا ژی) و ھژمارەکا مەزن یێن گەھشتینە داعش ژ وەلاتێن ئورۆپی نە و ئەڤێ چەندێ ژی حوکمەتێن گەلەک وەلاتان تووشی ترسێ ل سەر پاشەرۆژێ کرینە کو ھژمارا پشتەڤانێن داعشێ بەر ب زێدەبوونێ ڤە بچن و دبیت ئەڤ دیاردە ھەبیت ژی وەکو (شانێن نڤستی) و داعش تەکنولۆژیایێ و بەرپەرێن جڤاکی ل سەر تۆرا ئەنترنێتێ بکاردئینیت و چو تشت نابیت رێگر ل بەردەم وێ کو بگەھیتە پتریا گەنجان ل دەڤەرێ و جیھانێ”.

ب دیتنا ھەیسەم یوسفی، پێدڤیە داعش بھێتە ژناڤبرن و ھندێ دەمێ ژناڤبرنا وێ گیرو ببیت، ئەڤ رێکخستیە پتر بەرفەرھتر دبیت و دووپاتیێ ل وێ چەندێ ژی دکەم کو شەڕێ ئەلکترونی یێ داعش بکاردئینیت کاریگەریا خوە یا دەروونی یا ھەی ب رێیا وان پارچێن ڤیدیویی ئەوێن بەلاڤەدکەت و خوە پێ ددەنە نیاسین کو ھەر کەسێ دژی باوەریا وان بیت دێ سەرێ وی بڕن.