ئەڤرۆ:
ئەندامەکێ بەرێ یێ پەرلەمانێ عیراقێ دبێژیت حوکمەتا عەبادی نە ل دووڤ حەزێن پێکھاتێن عیراقێ بوو، چاڤدێرەکێ سیاسی ژی د وێ باوەریێ دایە کو ھەر ل دەستپێکێ حوکمەتا عیراقێ یا لەنگ بوو و ل سەر بنیاتەکێ نەساخلەم ھاتیە ئاڤاکرن و ئەڤە دێ بەردەوام بیت و چ پێکھات نەشێن ل گەل ھەڤدو بژین. د.عەبدولحەمید باڤی، ئەندامێ بەرێ یێ پەرلەمانێ عیراقێ بۆ رۆژناما ئەڤرۆ گۆت” حوکمەتا عەبادی نە ل دووڤ داخوازێن خەلکێ عیراقێ بوو، چێبوونا وێ ب رەنگەکی بوو و نەل دووڤ حەزا خەلکی بوویە و نەشێت حوکمرانیێ ل عیراقێ بکەت و دەستێن دەرەکی تێدا ھەنە وەکو ئیرانێ و ئەمریکا و ئەو ل دووڤ بەرژەوەندیێن خوە سەرۆکێن کۆماری و وەزیران د ھەلبژێرن”. باڤی گوت ژی” ھندەک لایەن ل عیراقێ دژی رێکەفتنا بەغدا و ھەولێرێ بوون و ھەموو بزاڤان دکەن ئالۆزیان پەیدا بکەن و سەر نەگریت، نەپێگریکرن ب رێککەفتنێ دێ عیراق ژێ یا زیانداربیت و خورتبوونا پەیوەندیێن ھەرێما کوردستانێ ل گەل کۆمپانیان رێیێن باش ھەنە بۆ برێڤەبرنا خوە، دیسان ئەو رێککەفتنە ل دووڤ دستووری و قانوونا بۆدجا ٢٠١٥ یا ھاتیە کرن و نەشێن خوە دوور بکەن و ھەر دەمێ دوور کەڤتن ژ رێکەفتنێ ئەڤە وێ چەندێ دیاردکەت کو ل دژی ھەر قانوونەکێ نە”. خۆیاکر ژی” حوکمەتا شیعان نەشێت کونترۆلێ ل سەر عیراقێ بکەت و کورد و سونە رێ نادەنێ دەستھەلاتێ ل ھەموو عیراقێ بکەت و ب شێوەکێ تاکرەوی رەفتارێ ل گەل ھەر تشتەکی بکەن”. د.باڤی ب گرنگی زانی کورد ئێکرێزیێ بپارێزن و گۆت” پێدڤیە خەلکێ کوردستانێ خوە بەرھەڤ بکەت بۆ راگەھاندنا سەربەخوەیا ئابووری”. ژلایێ خوەڤە چاڤدێرێ سیاسی (مالک رەمەزان) ی گۆت” پێکئینانا حوکمەتا عیراقێ یا لەنگ بوو و ھەر ل دەسپێکێ ل سەر بنیاتەکێ لاواز و پری گرفت و قەیران ھاتە دروستکرن و ئەڤە دێ بەردەوامی ھەبیت و چو پێکھات نەشێن ئارام بژین، چونکە ھەر لایەنەکێ دەستھەلاتێ وەربگریت، چاڤ ل تولڤەکرنێ یە ل سەر لایەنێ دی و ھەتا نوکە نە ل گەل عەرەبێن سونە و نە شیعە، کورد نەشیاینە ئارام بژین”. ھێشتا ژی گۆت” تەناھی ل عیراقێ پەیدا نابیت تاکو پارچەبوون نەھێتەکرن و کورد ژی وەکو مافەکێَ نەتەوی بگەھنە ئارمانجا خوە ئەوژی دەولەتبوونە، لێ ھەکە ھەر ب ڤی رەنگی بیت، دێ قەیران و شەڕ ھەر ھەبن”. ب دیتنا خدر دوملی، تایبەتمەند دوارێ چارەکرنا ململانێ و ئاڤاکرنا ئاشتیێ دا، ململانێ و ھەڤڕکیا د ناڤبەرا بەغدا و ھەرێمێ دا، یا ئەڤرۆ نینە، بەلکو نیشانا نە رێکخستنا پەیوەندیایە د ناڤبەرا ھەرێمێ و بەغدا، ب تایبەت نەبوونا نڤیسنگەھەکا ب ھێز و خودان شیان و بشێت بریارێ ل سەر موکمکرنا پەیوەندیان بدەت ئێک ژ ئەگەران بوو، دیسا ل ٢٠٠٣ ھەتا ٢٠٠٦ ھەرێما کوردستانێ نەشیا خوە ل بەغدا موکم بکەت، چونکی لایەنێن سیاسی مژولی ھەڤڕکیا د ناڤبەرا ھەڤدوو دا بوون و ھەر لایەنەکی پتر گرنگیێ ددا بەرژەوەندیێن خوە پتر ژ یێن وەلاتی و پاشەرۆژا مللەتی. ل دووڤ بوچوونا دوملی، ئەو کەسێن ل حوکمەتا بەغدا کاری دکەن بۆ ڤێ بادەکێ، گەلەک ژ یێن مە خودان شیانترن، و پەرلەمانتار و وەزیرێن کورد نەشیان لوبیێ پشتەڤانیێ ل بەغدا دروست بکەن ونەشیان بۆ خوە ھەڤپەیمان و پشتەڤانان پەیدا بکەن، چونکی پەیاما مە یا سیاسی گەلەک یا ب ھێز نەبوو .