ئه‌ڤرۆ نيوز، بێستير دهۆكى:

تیما تەپا پێ‌ یانا دهۆك شیا بەردەوامیێ‌ بدەتە هەڤركیا دەستڤە ئینانا ناسناڤێ‌ خولا هەرێمێ‌ پشتی شیای سەركەفتنێ‌ ل سەر یانا برایەتی تومار بكەت ب ئەنجامێ‌ سێ‌ گۆلان بەرامبەر دو گۆلان د چارچوڤێ‌ یاریێن گەرا 23 ژ خولا هەرێما كوردستانێ‌ یا تەپا پێ‌ بۆ یانێن نایاب، د وێ‌ یاریێ‌ دا ئەوا ل یاریگەها یانا دهۆك یا وەرزشی هاتیە كرن.

د نیڤا ئێكێ‌ دا ئاستێ‌ یاریكەرێن یانا دهۆك باشتر هاتە دیتن و شیان كونترولا یاریێ‌ بكەن چەندین هێرشان ل سەر گۆلا تیما مێڤان پەیدا بكەن بەرامبەر یاریكەرێن تیما برایەتی پشتبەستن ل سەر هێرشێن هەڤدژ دكر و گولچیێ‌ تیما برایەتی عەگید موسا شیا تیما خوە ژ دو گۆلێن مسوگەر قورتال بكەت بەرامبەر یاریكەرێن برایەتی ژی شیان بەرسڤا ڤان هەردو هێرشان بدەن ب رێكا هێرشبەرێ‌ خوە لێ‌ گولچیێ‌ یانا دهۆك كاوە دینو شیا ب شیانێن خوە یێن تایبەت گۆلا خوە قورتال بكەت، نیڤا ئێكێ‌ ب ئەنجامێ‌ بێ‌ گۆل ب دووماهی هات.

د نیڤا دویێ‌ دا یاریكەرێن برایەتی باشتر یاری ئەنجامدا و شیان گۆلەكێ‌ ب رێكا یاریكەرێ‌ خوە عەبدولقادر تەها تومار بكەت ل دەقیقەیا60 ژ یاریێ‌، پشتی ڤێ‌ گۆلێ‌ راهێنەرێ‌ دهۆك نە چاربوو چەند گوهۆرینان بكەت بۆ راستڤەكرنا ئەنجامێ‌ یاریێ‌ و ئەڤان گوهۆرینە ب سەركەفتی هاتنە پێش پشتی یاریكەر جاسم سلێمان هاتیە د یاریێ‌ دا و شیای گۆلا وەكهەڤیێ‌ ل دەقیقا 80 توماربكەت لێ‌ پشتی بورینا دو دەقیقا عەبدولقادر تەها شیا گۆلا دویێ‌ بۆ برایەتی تومار بكەت پشتی ڤێ‌ گۆلێ‌ یاریكەرێن دهۆك شیام زوو بەرسڤا ڤێ‌ گۆلێ‌ ژی بدەن ب رێكا یاریكەرێ‌ خوە كامیران خالد ل دەقیقەیا 85 پشتی ڤێ‌ گۆلێ‌ یاریكەرێن دهۆك بەردەوامی دا ئاستێ‌ خوە یێ‌ باش و یاریكەرێ‌ پێگوهۆر وەلید سەلمان ل دەقیقەیا 89 شیا گۆلا سیێ‌ و سەركەفتنێ‌  ب جوانترین شێوە ژ دەرڤەی دەڤەرا پەنەلتیێ‌ توماربكەت و تیما خوە بەر ب سەركەفتنێ‌ بەت ب سێ‌ گۆلان بەرامبەر دو گۆلا.

ب ڤی ئەنجامی دهۆك بەردەوامی دا هەڤركیا دەستڤە ئینانا ناسناڤێ‌ خولێ‌ ب 44 خالان ل رێزا دویێ‌.