ئه‌ڤرۆ:

سەندێکا نوشداران لقێ دھۆکێ ل ھەیڤا بۆری د بریارەکێ دا داخوازی ژ ھەموو نوشداران کر بھایێ کلینیکێن خوە کێم بکەن، ھەر نوشدارەک پێنچ ھزار دیناران ژ بھایێ پلێتا خوە کێم بکەن، لێ ھەتا نوکە ئەڤ بریارە نەچوویە د وارێ بجھئینانێ دا. سەرۆکێ لقێ دھۆک یێ سەندیکایێ دبێژیت: وەلاتی دشێن سەرا مە بدەن دەمێ دبینن نوشدارەکی پێگیری ب بریارێ نەکریە.

وەلاتی سالح بوسی دیار کر، بەری بریار بھێتە دان وی سەرەدانا نوشدارەکی کریە و ٢٠ ھزار دینار دان، پشتی بریار ژی ھاتیە دان جارەکا دی سەرەدانا وی نوشداری کریە ھەر ٢٠ ھزار دینار داینە و گۆت: باردوخی ئەڤرۆ خەلکێ تێدا یێ ئابووری د بەرامبەر دا بھایێ نوشداران و دەرمان و تیشک و سونارێ و چارەسەری یا گرانە، پێدڤیە دەمێ بریارەک ژی دھێتە دان لیژنێن دووڤچوونێ ل سەر بگەرن، دا کو بریار بکەڤیتە د وارێ بجھئینانێ دا.

بوسی گۆت ژی: ژبلی کێمکرنا بھایێ پلێتێن خوە، ھندەک نوشدار گەلەک نەخۆشان برێڤەدبەن دگەھنە ١٠٠ نەخۆشان د رۆژەکی دا، ھەکە ب تنێ ب خێرھاتنا نەخۆشی بکەت ناگەھیت چارەسەریا ھەموو نەخۆشان بکەت، ئەڤە ژی پێدڤیە بھێتە رێکخستن وەکو وەلاتێن بیانی، دێ ب تنێ ٢٠ نەخۆشان د رۆژێ دا برێڤەبەن، ئەو ژی ھەموو ژڤان و رێکخستی ئەم داخوازێ دکەین سیستەمێ وان ل کلینیکێن مە ژی بھێتە بجھئینان.

ناڤبری ئەو ژی دیار کر، پێدڤیە سەندیکا نڤیسارەکا فەرمی ئاراستەی ھەموو نوشداران بکەت و ب دیوارێن ھەموو کلینیکێن نوشداران ڤە بھێتە ھەلاویستن ل سەر نڤیساری ھاتبیتە نڤیسین بھایێ ھاتیە کێمکرن، ھەر نوشدارەک دێ پێنچ ھزار دیناران وەکو ھاریکاری بۆ نەخۆشی ژ بھایێ خوە ئینیتە خارێ دەمێ ئەم سەرەدانا نوشداری دکەین مە دیت نڤیسار یا ب دیواری ڤە ھەلاویستە یا سەندیکایێ، دێ نەخۆش ب خوە بێژیتە نوشداری بھایێ ھاتیە کێمکرن ئەڤە ژی تشتەکێ باشە بھێتە کرن.

د. ئەحمەد موختار سەرۆکێ لقێ دھۆک یێ سەندێکا نوشداران دیار کر، ژ بەر رەوشا نوکە خەلکێ مە تێدا وەکو پشتەڤانیی بۆ وەلاتیان سەندێکایێ د بریارەکێ دا داخوازی ژ ھەموو نوشداران کر بھایێ کلینیکان کێم بکەن و نوشدارێن دھۆکێ بۆ ھەر نەخۆشەکێ سەرەدانا کلینیکێن وان بکەن پێنچ ھزار دینار ژ بھایێ پلێتێ کێم بکەن، لێ ھەتا نوکە ھەموو نوشداران پێگیری پێ نەکریە و ھندەک نوشداران پێگیری ب بریارێ یا کری، لێ ھندەک نوشداران پێگیری پێ نەکریە.

د. ئەحمەد موختار گۆت ژی: مللەتێ مە دێ دووڤچوونێ ل سەر بجھئینانا بریارێ کەت، ئەو ژی دەمێ نەخۆشەک سەرەدانا نوشدارەکی دکەت، ھەکە دیت نوشداری پێگیری نەکریە، دشێت قەستا سەندیکایێ بکەت، ئەم دێ دووڤچوونێ کەین، لێ ئەندامێن سەندێکایی ب خوە دکێمن و دۆرێن دو ھزار کلینیکان ھەنە یا ب زەحمەتە ئەم ل سەر ھەموویان بگەرین، پێدڤیە وەلاتی ھەڤکار بن، ھەروەسا ژی کارێ نوشداری ژی کارەکێ مرۆڤاتیە و پێنچ ھزار دیناری ژی چو قیمەتی خوە نینە، داخوازێ ژ ھەموو نوشدارێن خوە دکەین پێگیریێ ب بریارێ بکەن و ھەر ئێک پێنچ ھزار دیناران ژ بھایێ خوە کێم بکەت.

سەرۆکێ لقێ دھۆک یێ سەندیکا نوشداران بۆ ئەڤرۆ دیارکریە کو نوشدارێن شیرەتکار بھایێ پلێتێن وان ٢٥ ھزار دینار بوون دێ بنە ٢٠ ھزار دینار، نوشدارێن تایبەتمەند ژ ٢٠ ھزاران دێ بنە ١٥ ھزار دینار و نوشدارێن پیشەکار ژ ١٥ ھزار دیناران دێ بنە ١٠ ھزار دینار.

د. ئەحمەد دیار کر کو بەری نوکە ژی ھژمارەکا زۆرا نۆشداران سەرەدانا بەرۆکێن شەری کرینە و خزمەت ئەنجامداینە و گۆت: ھژمارەکا نوشداران ل کلینیکێن خوە چارەسەریا ئاوارە و ھەژاران ب ھەروە کرینە و ھەڤکاریا ھێزێن پێشمەرگێ کوردستانێ کرینە.