ئەڤرۆ نیوز:
د دیدارەکێ دا کو سەرجان مەحمود بۆ رۆژناما ئەڤرۆ ئەنجامدایە، ئدریس بالوکەن جێگرێ ھەڤسەرۆکێن پارتا دیمۆکراسیا گەلان HDP ل سەر رەوشا تورکیا و باکورێ کوردستانێ و گرتنا لاوێن کورد و چاوانیا برێڤە چوونا قۆناغا ئاشتیێ راگەھاند د دەمەکی دا کو شاندێ مە ل گەل حوکمەتا تورکیا بۆ سەرخستنا قۆناغا ئاشتیێ و چارەکرنا پرسا کورد د دانوستاندنان دایە، گرتن، کوشتن و زۆرداریا ل سەر گەلێ کورد ناھێتە قەبوولکرن و گۆت: (دڤێت حوکمەت بریارا خوە بدەت و مە د ھەڤدیتنا ل گەل یالچن ئاکدۆگان جێگرێ سەرۆک وەزیرێن تورکیا دا دوپات کر کو ئەم گرتن و کوشتنا لاوێن کورد ب چو رەنگەکی قەبوول ناکەین و سیاسەتا حوکمەتێ ل ھەمبەر گەلێ مە ئالۆزیا دروست دکەت و قۆناغا ئاشتیێ د مەترسیێ دایە و ھەکە حوکمەت کریارێن خوە یێ شاش بەردەوام بکەت دێ رەوش ئالۆز بیت و کەس نەشێت ئێدی گەل راوەستینیت).
ئدریسی ھەروەسا دیار کر ئەو دێ ئەنجامێن ھەڤدیتنا ل گەل حوکمەتێ ب سەرکردایەتیا کۆما جڤاکێن کوردستانێ را گەنگەشە بکەن و ئەنجامێن گەنگەشێ ژ بەرێز ئۆجەلان و بەرپرسێن حوکمەتێ را راگەھینن و پاشی ئەم دشێین بەحسێ خالێن لھەڤکرنێ بکەین و گۆت: (ھەتا نھا ھندەک ئاستەنگی ھەنە لێ ھەڤدیتنێن مە یێن ل گەل حوکمەتێ ب رەنگەکی ئەرەنی برێڤە دچن و ھژمارا ئەندامێن شاندێ مە یێ دانوستاندنێ بوویە پێنج کەس و ھەکە پێدڤی کر دێ ھێشتا بھێتە زێدەکرن و د ناڤا چەند رۆژان دا دێ چاوانیا برێڤەچوونا قۆناغا ئاشتیێ و خالێن کو مە لھەڤکرینە، یەک ئالی بیت).
ئەندامێ شاندێ دانوستاندنێن ل گەل حوکمەتێ د پشکەکا دی یا ئاخڤتنا خوە دا ژی راگەھاند کو سیاسەتا ئێمناھیا تورکیا ل باکورێ کوردستانێ سەدەمێ سەرەکی یێ ئالۆزیانە و رۆژانە گرتنا لاوێن کورد و ھەری داوی کوشتنا لاوەکی کورد رەوشا باکورێ کوردستانێ ئالۆز کریە و بەرپرسێ ئالۆزیان حوکمەتا تورکیایە.
ل ئالیێ دی جەمیل بایک بەرپرسێ دەستەیا سەرۆکاتیا KCK ژی د داخۆیانیەکی دا راگەھاند کو حوکمەتا تورکیا قۆناغا ئاشتیێ دکەتە مەترسیێ و کریارێن حوکمەتێ نە ل دووڤ قۆناغا ئاشتیێ نە و گۆت: (مە بەری نھا ژی راگەھاند و ئەم جارەکا دی ژی دبێژین ب چو رەنگەکی گرتن و کوشتن و زۆرداریا ل سەر گەلێ خوە دا قەبوول ناکەین و دڤێت ھەموو گەلێ مە ل دژی سیاسەتا گرتن و کوشتنا لاوێن کورد ھشیار بن و ئەم نەچارین کو بەرسڤا کریارێن حوکمەتێ بدەین).
بەرپرسێ دەستەیا سەرۆکاتیا KCK ھەروەسا راگەھاند ل ئالیەکی دێ بەحسێ قۆناغا ئاشتیێ ھێتە کرن و ل ئالیەکی ژی لاوێن کورد بھێنە کوشتن و گرتن، ئەم ڤێ سیاسەتا حوکمەتێ رەت دکەین و دوپات دکەین کو مە ئەو ھێز ھەیە خەلکێ خوە ب پارێزین و بەرپرسیارێ ھەر ئەنجامەکی نەخواستی حوکمەتا تورکیا ب خوەیە، ئەز جارەکا دی ژ رایا گشتی یا کوردستانێ و تورکیا را دبێژم کو حوکمەت د چارەکرنا پرسا کوردی دا جدی نینە و بزاڤێ دکەت کەسایەتی، سیاسەتمەدار و لاوێن کورد ب گرتن و کوشتنان ژناڤ ببەت و بزاڤا گەلێ کورد لاواز بکەت، ژ بەر ڤێ چەندێ ژی ئەم نەچارین کو بەرسڤا حوکمەتێ بدەین).
نووترين نووچه
- مەسرور بارزانی و مستەفا كازمی رەوشا گشتی یا ئیراقێ و دەڤەرێ گەنگەشە كر
- بەختیار تالەبانی: بارەگەهێ بارزانی یێ بوویە ناڤەندا بڕیارا كوردی
- چارەنڤیسێ ئیراقێ ب هنارتنا پەترۆلا كوردستانێ و راگرتنا كڕینا غاز و كارەبا ئیرانێ ڤە یێ گرێدایە
- حەشدا شەعبی رێگرە ل پێشبەری ئیمزاكرنا رێككەفتنەكا نوو د ناڤبەرا ئیراقێ و ئەمریكا دا
- سەرۆك بارزانی ل سالڤەگەڕا 34 یا سەرهلدانا پیرۆز: سەرهلدان پەیامەكا رۆهن بوو كو گەلێ كوردستانێ ئازادی و سەربەستی دڤێت
- نێچیرڤان بارزانی: فیدرالی و دەستكەفتێن دستووری و كاریگەرییا ئەڤرۆ یا كوردستانێ بەرهەمێن سەرهلدانێ نە
- مەسرور بارزانی: سەرهلدان ئێك ژ سەروەریێن مەزن یێن گەلێ كوردستانێ یە كو هەردەم جهێ شانازییا مەیە
- دوپاتیێ ل رێكخستنا ناڤمالا كوردی دكەین
- سەرۆك بارزانی ل گەل شاندەكێ هەڤپشكێ سێ پارتێن باكوورێ كوردستانێ پرۆسەیا ئاشتیێ ل توركیا گەنگەشە كر
- سەرۆك بارزانی و ئەیاد سامەرائی دوپاتی ل پێگیریبوونێ ب بنەمایێن هەڤپشكیێ كر
سهرهكى Facebook
قۆناغەکا نوو ل رۆژئاڤایێ کوردستانێ دەست پێ دکەت
ئەڤرۆ نیوز:
د راپۆرتەکێ دا کو ھۆشەنگ تاجر بۆ رۆژناما ئەڤرۆ ئامادە کریە ھاتیە کو پشتی رێککەڤتنا باژارێ دھۆکێ یا د ناڤبەرا پارتێن رۆژئاڤایێ کوردستانێ نھا ھەر دو جڤاتێن کوردی ئەندامێن خوە بۆ رێڤەبەریا رۆژئاڤایێ دیار کرینە و سەرکردێن ھەر دو جڤاتێن کوردی دیار دکەن کو ئەو گەشبینن بشێن پێکڤە کار بکەن و ھەکە ھێزێن کوردی ل رۆژئاڤایێ کوردستانێ نەبنە ئێک ئەمریکا و وەلاتێن رۆژئاڤا ژی ھاریکاریا وان ناکەن و سەرۆک بارزانی ژی بەردەوام پشتەڤانیا ئێکەتیا کوردان ل رۆژئاڤایێ کوردستانێ دکەت.
د. کاوە عەزیزی ئەندامێ سەرکردایەتیا پارتی دیموکراتی کوردستان-سووریا بۆ رۆژناما ئەڤرۆ دیار کر کو پشتی رێککەڤتنا دھۆکێ یا کو د ناڤبەرا ھەر دو جڤاتێن کوردی ھاتیە ئیمزاکرن گەنگەشە بۆ چاوانیا رێڤەبەریا رۆژئاڤایێ کوردستانێ بەردەوامن و مە وەک ئەنجوومەنێ نیشتمانی کورد ل سووریێ مە ١٢ کەس بۆ رێڤەبەریا رۆژئاڤایێ کوردستانێ دیار کرینە و ئەم چاڤەرێ دکەن کو ھەڤالێن مە یێن جڤاتا رۆژئاڤا ژی نوونەرێن خوە دیار بکەن و گۆت: (ژ بلی رێڤەبەریا مەدەنی کو ئەم بێژن وەک حوکمەتەکا بەروەخت ل رۆژئاڤایێ کوردستانێ پرسا ھێزێن سەربازی ژی ھەیە و ئەم گەنگەشە دکەین کو پێشمەرگێن رۆژئاڤایێ کوردستانێ یێن کو دەمەکە ل ھەرێما کوردستانێ پەروەردە دیتنە و بەرھەڤن ئەو ژی دڤێت بچنە رۆژئاڤایێ کوردستانێ و شەرێ داعشێ بکەن).
ئەندامێ سەرکردایەتیا پارتی دیموکراتی کوردستان-سووریا ئەو یەک ژی دیار کر کو سەرۆک بارزانی رۆلەک سەرەکی بۆ ئێکەتیا ھێزێن کوردی ل رۆژئاڤایێ کوردستانێ گێرایە و دگێریت ژی و نھا ژی بەردەوام پشتەڤانیا ئێکەتیا کوردان دکەت و ھەڤالێن مە یێن جڤاتا رۆژئاڤایێ کوردستانێ ژی باش دزانن کا سەرۆک بارزانی چو رۆلەک بۆ چووینا پێشمەرگەی بۆ کۆبانێ و گەھاندنا چەکی گێرایە و ژ بەر ڤێ یەکێ ژی دڤێت ھەموو ئالی ل گۆر رێککەڤتنا دھۆکێ بزاڤێ بکەن و گۆت: (ھەکە رێککەڤتنا دھۆکێ بھێتە بجە ئینان دێ ھەموو پرسێن رۆژئاڤایێ کوردستانێ ھێنە بجە ئینان و شاندێن ئەمریکا ژی ب جاران دیار کرینە کو ئەو ب تنێ ھاریکاریا چو ئالیەکێ ناکەن و دڤێت ھێزێن کوردی ل رۆژئاڤایێ کوردستانێ ببنە ئێک و پشتی رێککەڤتنا دھۆکێ گوھۆرینێن باش د ھەلویستێ ئەمریکا دا دروست بووینە و مە چو رێ نینن دڤێت ئەم پێکڤە رۆژئاڤایێ کوردستانێ ب پارێزین و برێڤە ببەین).
ل ئالیێ دی عەبدولکەریم عومەر ئەندامێ سەرکردایەتیا تەڤگەرا جڤاکا دیموکراتیک یا رۆژئاڤایێ کوردستانێ ژی بۆ دەنگێ ئەمریکا دیار کر کو وان ١٢ کەس وەک ئەندامێن رێڤەبەریا رۆژئاڤایێ کوردستانێ دەستنیشان کرینە و دێ د دەمەکێ نێزیک دا جارەکا دی ل گەل ھەڤالێن ئەنجوومەنێ نیشتمانیا کورد ل سووریێ کۆم ببن و گۆت: (ئەم ب ھەموو رەنگەکێ بزاڤێ دکەین کو رێککەڤتنا دھۆکێ بھێتە بجە ئینان، چونکو مەترسیێن گەلەک مەزن ل سەر پاشەرۆژا گەلێ مە ل رۆژئاڤایێ کوردستانێ ھەنە و ھەکە ئەم پێکڤە کار بکەین دێ بشێن وەلاتێ خوە ب پارێزین و ژ بۆ ڤێ یەکێ ئەم دێ ئەرکێن سەر ملێن خوە بجە ئینین).
به‌ربژارێن كه‌ساتیا ساڵا (2014)یه
كۆڤارا (تایم) یا ئه‌مریكی كو ئێكه ژ كۆڤارێن ب ناڤوده‌نگێن جیهانێ یه و ناڤێ به‌ربژێرێن كه‌سایه‌تیا سالێ ئاشكرا كرن و سه‌روَكێ هه‌رێما كوردستانێ ژی ئێكه ژ وان به‌ربژاران، ئهڤه ژی شانازیه‌كا مهزنه بوَ گه‌لێ كوردستانێ، هه‌لبه‌ت كۆڤارا تایم هه‌شت كه‌ساتیێن جیهانی ده‌ست نیشانكرینه بوَ ڤی نازناڤێ كو د رێورسمه‌كێ دا دوهی روَژا چارشه‌مبیێ و ل 10/كانوونا ئێكێ ل باژێرێ نیوورك یێ ئه‌مریكی نازناڤ هاتنه ئاشكراكرن، یا گرنگ ئهوه بارزانی كو ژ به‌ربژارانه ومل ب ملێ فلادمیه‌رپوتنی سه‌رۆكێ رۆسیا، تیم كوكی رێڤه‌به‌رێ جێبه‌جێكارێ كۆمپانیا ئه‌پل، جاك مای دامه‌زرێنه‌رێ كۆمپانیا بازرگانی چینی، عه‌لی بابا رێڤه‌به‌رێ گشتی یێ خولا توپا پێ ئه‌مریكی روَجه‌ر گودێل و كچه سترانبێژی ئه‌مریكی تایله‌ر سۆیفت. .. . دیسا دو گرۆپێن دی ژی هاتنیه ده‌ست نیشانكرن بوَ ڤێ نازناڤێ كو ئهو ژی خۆنیشانده‌رێن باژێرێ فراگسیۆنی ئه‌مریكی كو یا تایبه‌ت بۆ ب نه‌رازیبوونا ڤی باژێری به‌رامبه‌ر ب سیسته‌مێ دادگه‌ها ئه‌مریكی سه‌باره‌ت ب كوشتنا گه‌نجه‌كێ ره‌ش پیستێ ئه‌مریكی ب ناڤێ مایكل براون و ژ لایێ پۆلیسه‌كێ سپی پیسته‌ڤه كو دادگه‌ها وی باژێری ئهو بێ تاوان ل قه‌له‌م دا، گرۆپێ دویێ ژی پێكدهێت یه ل وان كهسان ئه‌وێن هاریكاری و پالپشتیا تووشبوونێن نه‌خۆشیا ئیبۆلایان كری كو ئهڤ نه‌خۆشیا كوشنده و ئهڤ ساڵه ل چه‌ندین وهلاتێن كێشوه‌رێ ئه‌فریقیا په‌ره سه‌ندی و ب هزاران تووشبووی و هاتینه كوشتن، لێ فه‌ره ئهم بزانین كو ئه‌رێ ئهو چ مه‌رجێن كو كۆڤارا تایم یا ئه‌مریكی دانایی و كه‌ساتیا ساڵان ل جیهانێ ده‌ستنیشان كری و كه‌س و گرۆپ بهێنه به‌ربژاركرن؟ نانسی گێبس ئێك ژ ده‌سته‌یا رێڤه‌به‌ریا نڤیسه‌رێن ڤێ كۆڤارێ دبێژیت: بهربژار ل سهر ڤان بنه‌مایان دهێنه ده‌ست نیشانكرن ژ لایێ كۆڤارا تایم كو نك وان وه‌ها دگه‌هینیت كاریگه‌ریه‌كا مهزن ل سهر روودا و هه‌والێن ئیسال ل جیهانێ هه‌بوویه و گێتسی ئهڤه ژی گۆتی یه ئهو كهسێ ڤێ ناسنامێ دبه‌ت ژ لایێ ده‌سته‌یا رێڤه‌به‌ریا نڤیسینا كۆڤارێ دئێته ده‌ست نیشانكرن، ئهڤ ناسنامه‌یه ژی ل سهر ئاستێ جیهانێ ناڤ و بانگه‌كێ زۆر هه‌یه و هه‌مه ساڵی ژی كۆڤارا تایم كه‌سایه‌تیه‌كێ جیهانی بوَ ڤێ ناسناڤێ ده‌ستنیشان دكهت، ئه‌وێ سالا پار بری فرانسیس پاپای فاتیكان بوو و دو ساڵ ل بهر یا نوكه باراك ئوبامای سه‌رۆكێ ئه‌مریكا بوو، كۆڤارا تایم ل سالا (1927)ڤه ئهڤ ناسناڤه دابه‌ش دكهت و ههتا نوكه چه‌ندین كه‌ساتیێن ب ناڤوده‌نگ ل وهلاتێن جیهانێ ئهڤ ناسناڤه بری یه و ب ده‌ستڤه‌ئینایه و ل وانه ژی مه‌هاتما گاندی سه‌رۆك و رابه‌رێ دیرۆكی یێ هندستانێ، فرانكلن روَسفولتی ئێك ژ سه‌رۆكێن سه‌ركه‌فتیێن ئه‌مریكا بوویه، وینستن چیرچلی سه‌رۆك وه‌زیرێن به‌ریتانیا بوویه.
ئیمپراتۆریه‌تا مافێن مرۆڤی
دوهێ، 66 ساڵ ب سهر راگه‌هاندنا ئێكه‌مین گرێبه‌ند و به‌ڵگه‌نامه‌یا مافێن مروَڤی ل جیهانێ ده‌ربازبوون، كو ل 10ێ چریا ئێكێ ساڵ 1948 ێ ل گه‌رمه گه‌رما شه‌ڕێ جیهانیێ ئێكێ ژ لایێ كوَمه‌ڵه‌یا گشتی نه‌ته‌وه‌یێن ئێكگرتی ب بریارا هژمار 217 هاتیه راگه‌هاندن، شه‌نگسته و بنه‌ماێن سه‌ره‌كیێن ئهڤێ گرێبه‌ندێ لسه‌ر هه‌رچار جورێن ئازادیێ هاتینه نڤیسین، ئازادیا راده‌ربیرنا بیروبوچونان، ئازادیا كۆمبوون و خرڤه‌بوونێ، ده‌ربازبوون ژ ترسێ، دابینكرنا پێدڤیان. چ ده‌وله‌تێن ئه‌ندام د كوَمه‌ڵه‌یا گشتیا نه‌ته‌وه‌ێن ئێكگرتی دژی ڤێ راگه‌هاندنێ نه‌بوون، لێ به‌لێ 8 ده‌وله‌ت كو پرانیا وان ژ كوَمارێن ئێكه‌تیا سوَڤیه‌تا به‌رێ و باشۆرێ ئه‌فریقیا و شاهنشینا سعودیێ بوون ده‌نگ بۆ ئهڤێ دیكیوَمێنتێ نه‌دا. ب ڤێ هه‌لكه‌فتێ هه‌رساڵ نه‌ته‌وه‌یێن ئێكگرتی و چالاكڤانێن بیاڤێ مافێن مروَڤی، هژماره‌كا به‌رچاڤ چالاكی و بزاڤ و جڤینێن سیاسی و ره‌وشه‌نبیرێن گرنگ ئه‌نجام دده‌ن، خه‌لاتێ نوَبل و نه‌ته‌وه‌ێن ئێكگرتی د ڤی بیاڤیدا دهێنه به‌ڵاڤكرن، هه‌روه‌سا راپوَرته‌ك گشتی وگشتگیر ل سهر ئاستێ جیهانێ به‌رهه‌ڤ دكه‌ن كو تێدا هیرۆ گرێن زێده‌گاڤی و پێشێلكرنان هه‌مبه‌ری مافێن مروَڤی ل سه‌رتاسه‌رێ جیهانێ خۆیا دكه‌ن، ب سه‌دان باده‌ك و دیكیوَمێنتێن نڤیسین و وێنه‌دار و به‌ڵگه‌نامه‌یێن زێندی و راسته‌قینه د كه‌ناڵێن جوَراوجورێن راگه‌هاندنا دونیایێ په‌خش و به‌ڵاڤ دبن، گهلهك حوكمه‌ت و ده‌سته‌ڵات ریسوا و مه‌حكوم دبن، ب تایبه‌ت ل هه‌ردوو كیشوه‌رێن ئاسیا و ئه‌فریقیا، له‌وا سه‌رباری واژوَكرنا هندهك ده‌وله‌تان ل سهر ڤێ به‌ڵگه‌نامێ به‌لێ نه‌دخوَشحالن دهمێ ناڤێ وان د لیستێن وه‌ڵاتێن پێشێلكار و زێده‌گاڤدا دهێته توماركرن، نه‌خاسمه حوكمه‌تێن ل دووڤ ده‌ستوورێن ئولداریێ حوكمرانیێ دكه‌ن، ئهو دبێژن ئالیێن ئولی د ڤێ راگه‌هاندنێ دا ل به‌رچاڤ نه‌هاتینه وه‌رگرتن، ب تایبه‌ت ئیسلامیه‌ت، له‌وا ل مه‌ها ته‌موزا ساڵا 2000ێ ل قاهیره، پرانیا ده‌وله‌تێن ئه‌ندام ل رێكخراوا كوَنگره‌یا ئیسلامی ب شێوه‌كێ فه‌رمی داخوانیه‌ك ب ناڤێ مافێن مرۆڤێ بوسلمان راگه‌هاند، به‌لێ چونكی چ هێزه‌كا یاسایی و پشتگیریه‌كا نێڤده‌وڵه‌تی نهبوو، نه‌شیان ناڤه‌روَك و مادده و برگه‌هێن وێ ب سهر ده‌وله‌تێن واژوكه‌ردا بسه‌پینن، ب تایبه‌ت سعودیه و ئیران و حوكمه‌تێن كه‌نداڤێ. پشتی شه‌رمه‌زاربوونا بوهارا عه‌ره‌بی و شكه‌ست و ب هه‌ڵمبوونا فه‌لسه‌فه‌یا ئیخوان و دژواربوونا شه‌رێن ئول و رێبازێن ئولی و فابریقه‌كرنا رێكخراوه‌كا تیروَریستا مینا داعش، پێدڤیه نێرین و تێگه‌هشتنێن نێڤده‌وله‌تی بۆ مافێن مرۆڤی گوهرینێن گرنگ و مهزن و به‌رچاڤ بخوه‌ڤه بگرن و كوَمه‌ڵه‌یا گشتیا نه‌ته‌وه‌یێن ئێكگرتی و رێكخراوێن جیهانیێن مافێن مروَڤی و هیۆمان رایتس و ته‌ڤایا ئالیێن گرێدایی ب بابه‌تێ مافێن مروَڤی دووڤچوونه‌ك تازه و نوو بكه‌ن و جاره‌كا دن هه‌رهه‌می مادده وبرگه‌هێن راگه‌هاندنا جیهانیا مافێ مروَڤان بهێته گه‌نگه‌شه‌كرن و دارشتنه‌ك هه‌ڤچه‌رخ و سه‌رده‌میانه بۆ بهێته‌كرن و پرانیا دیكیۆمێنتا ساڵا 1948ێ بهێته ده‌ستكاری كرن، چونكی كه‌ڤناربوونا وێ كریز و قه‌یران و ئاریشه‌یێن زوَر بو كوَمه‌ڵگه‌ه و جڤاكا نێڤده‌وله‌تی چێكرینه و ب سه‌دان تاوانبار و تاوانێن مروَڤایه‌تیێ هاتینه پشتگوه ئێخستن و ده‌رگه‌هێن دادگه‌هێن نێڤده‌وله‌تیێن مافێن مروَڤی هاتینه دائێخستن جیهان و جڤاكا وێ ل سهر لێڤارا هه‌رفینه‌كا مرۆڤاتیێ یه، مخابن ئهڤ ههمی نه‌خشه‌رێكێن چاره‌سه‌ریێ ژی، تنێ و تنێ خاپاندنا مرۆڤانه.
نها ده‌لیڤه هات گۆتارا كوردی پێكبهێت
دیاره و مرۆڤاتیا ئهڤرۆ هه‌یه ب هێزتره ژ ئه‌وێ بێده‌نگیا دوهی كو ب كه‌یفا خوه سه‌ره‌ده‌ریا خوه سه‌پاندن و ڤاریكرنا گه‌لێ كورد كریه چونكو ڤێ زۆرداریێ ئیكا وهسا نیشا گه‌لێ مه دا هه‌رده‌م دڤیا ژێ بره‌ڤن ژبهر كو دیتنا وان بێ بهای و گڤاشتن و زمانێ ئاگر و ئاسنی بكارئینایه، لێ نه‌شیان گه‌لێ مه بشكینن و بێزار بكه‌ن بۆ هندێ و ده‌ست ژ ماف و ئارمانجێن خه‌و بهردهن لێ به‌روڤاژی كوردان كاروانێ خه‌بات و به‌رخودانێ هاژۆتینه بۆ گه‌هشتنا قووناغێ د چه‌په‌رێن مانونه‌مانا گه‌لێ خوه دا بووینه، هه‌روه‌سا كار ل سهر وێ چه‌ندێ كرینه وان شوونوارێن هه‌رشاندن و زۆرداریێ ل سهر گه‌لێ مه نه‌مینن و بێگومان ل سهر ڤێ ماندی بوون و قوربانیدانێ په‌شیمان نه‌بوونه هه‌روه‌سا نه‌ره‌ڤینه ژ بهر كو پێخه‌مه‌تی سه‌رفه‌رازی و ئازادیا گه‌لێ كورد بوویه لێ ههكه دوژمنان جارنا هندهك سه‌ركه‌فتنێن ده‌مكی بۆ خوه بده‌ستڤه‌ئینابان ئهو ژی زڤری ئه‌وی كرین فرۆتنا بۆ خوه بگه‌لێ كورد دكرن كو بكه‌ن پێژان داكو ده‌سهه‌لات و كورسیێن وان بهێنه پاراستن، ئه‌كید هه‌رده‌م كارێ دوبه‌ره‌كی ل ناڤ كوردان په‌یداكرینه كو به‌ربنه ئێك داكو ئهو بخوه بچن سهرێ گۆپیتكێن بلند ب گه‌لێ كورد بكه‌نن و هه‌روه‌سا بۆ خوه یاریا ل گۆر ڤان كاودانێ نوكه وهسا دهێته خۆیاكرن و ره‌نگه دهێته چاڤه‌رێكرن كو هندهك گوهۆرینێن ب له‌ز ل سهر نه‌خشه و تێكه‌لكرنێن جودا جودا بۆ رۆژهه‌لاتا ناڤین برێڤه‌بن و راستیا وێ ل دووڤ دیتنا شرۆڤه‌كه‌رێن سیاسی ئاماژه بۆ وێ چه‌ندێ ههنه كه هندهك بهر ب هه‌ڤپه‌یمانێن نوو ل ده‌ڤه‌رێ په‌یدابین و دیار دبیت راستیا ڤێ ته‌رازۆیا ئهڤرۆ كێشان و پیڤان تێدا دهێنه‌كرن د به‌رژه‌وه‌ندی ئالێ گه‌لێ كوردان بهێته خارێ و پێنه‌ڤێت بزاڤێن به‌رچاڤ ههنه ل سهر گوهۆرینێن نه‌چاڤه‌رێكری هه‌ین چونكو ئهڤرۆ وه‌كو هه‌زه‌یه‌كێ رۆژهه‌لاتا ناڤین ڤه‌گرتیه و شێلی بوونێن سیمایێ وێ گرتینه و ژ ڤێ ئێكێ دهێته خواستن و ده‌م ژی وێ دخوازیت گه‌لێ مه ب ههمی لایه‌نێن خوه یێن سیاسی ڤه بیر ل ئاینده و سوبه‌هیه‌كا دی بۆ خوه بكه‌ن داكو ئێدی نه‌بن كۆله و ته‌پا یارێن دوژمن و كه‌دخوارێن ملله‌تێ كورد ئهو ژی ئهڤه یه پرا پێ بگه‌هیت وان ئارمانجێن ل مێژووی لێ هاتینه ڤه‌شارتن كو مه قوربانی بۆ داین ب تنێ پێدڤی گۆتاره‌كا ئێكگرتی هه‌یه ژبۆ قورتالكرنا گه‌لێ مه ژبۆ راستیا ئه‌وان په‌رده‌ێن زۆرداریا جاران كو گه‌لێ مه د ناڤدا هاتین پێجان د وارێ پراكتیكی دا بۆ دوست و رایا جیهانا ئهڤرۆ یێن راستی، چونكو ههمی بزاڤێن دوژمنان ئه‌وبوون د وێ مێژوویا ره‌شا خوه دا دڤیا گه‌لێ كورد بێده‌نگ بكه‌ن و ژ رێیا ده‌سهه‌لاتێن خوه دا راكه‌ن و ئه‌كید ئهڤه ژی بوویه خه‌ون و نه‌شیان وان مه‌ره‌مێن خوه بجهبینن و بێگومان ناهێنه ڤه‌شارتن هه‌رچی پێڤه هاتی هه‌مبه‌ر گه‌لێ مه بكارئینایه داكو نه‌بن خودانێن كیان و پێناسا خوه هه‌بیت چونكو نیازێن دوژمنان ل قركرن و هنداكرنا گه‌لێ مه بوویه، لێ ئهڤرۆ ئێدی ئه‌وا دوهی ب سهرێ گه‌لێ مه ئینایه ئهڤرۆ نهما ئانكو ئهو ئاورێن خراب بهری خودانێ و ئێدی جهێ خوه ناگرن ژ بهر كو ئهڤ دیتن، چاره‌نڤیسێ كوردان بكه‌ن و ره‌نگه جاران كه‌یفخۆش بین ب هندهك شكه‌ستن و لاوازكرنا شۆره‌ش و به‌رخودانێن كوردی به‌لێ راستیا ههمی پیلان و ده‌ستێوه‌ردانێن دوژمنان ئهڤرۆ بۆ جیهانێ دیاربوویه ل سهر ههمی زۆرداریا بكارئینای ل سهر گه‌لێ كورد و بێ به‌هركرنا وی ژ ماف و ئازادیێ ل گۆر ئهو فشار و بنده‌ستیا دیتی گه‌لێ مه په‌نا دبرنه خه‌بات و به‌رخودانی داكو ئهو ژی بژین وهكی ههمی گه‌ل وهلاتێن جیهانی و ژ بهر هندێ به‌ره‌ڤانی ژ هه‌بوونا خوه كرینه، چونكو ئهو نه‌هامه‌تێن بێ وێنه ل ژێر سیبه‌رێن كه‌دخوارێن ملله‌تێ كورد دیتنه به‌لێ ل سهر وێ خوراگری و سهر بلندیا گه‌لێ مه و ل سهر ڤێ دیار بوویه كو هه‌رێما كوردستانێ ئیرۆ وه‌كو نموونه‌كا به‌رچاڤ ل رۆژهه‌لاتا ناڤین هاتیه ناسكرن و چوویه پێش ئهڤه ژی ل سهر راستیا شه‌ڕێ دژی داعشێ یه و پشته‌ڤانیا جڤاكێ نێڤده‌وله‌تی بۆ هه‌یه و دیار دبیت وه‌كو هه‌ڤال به‌ندێ خوه‌دایه زانین و ژمارتن÷، چونكو هندهك راستیێن گه‌لێ كورد ل ڤێ قووناغێ ل سهر شه‌ڕێ دژی داعش بۆ هێزا نێڤده‌وله‌تی دیاربووینه و ژبهر ڤێ ده‌ست ژ گه‌لێ كورد به‌رنادن و دبینن نیازین گه‌لێ كورد و هه‌رێما كوردستانێ به‌رامبه‌ر مرۆڤاتیێ زه‌لال خوه‌یا دكه‌ن، چونكو ل وێ دیمۆكراسی و دادپه‌روه‌ری وه‌كهه‌ڤیا وی دیار دبن ل سهر پارڤه‌كرنا مافێن ههمی نه‌ته‌وه و پێكهاته‌یا هه‌رێما كوردستانێ بێ جودا له‌وا هه‌رێما كوردستانێ جهێ خوه ل ناڤه‌ندوسازێن نێڤده‌وله‌تی دا كرییه به‌لێ ئیرو ئه‌ڤا هه ژ گه‌لێ كورد تێته خواستن ل ههمی پارچه‌یێن كوردستانێ هه‌ولێن ئێكرێزی و برایه‌تیا كوردی بكه‌ن و كار ل سهر پشته‌ڤانیا ئێكودو بكه‌ن، چونكو ئهڤرۆ گه‌لێ كورد كه‌فتیه بهر هندهك ئاورێن رزگاركرنێ و پێنه‌ڤێت كو به‌حس و ڤه‌كۆلین ل سهر ههنه و هه‌لبه‌ت خواندنێن باش ژی بۆ دهێنه‌كرن ژ به‌ركو كوردان ب شاره‌زای و دپلۆماسی و باوه‌ریا خوه شیایه بۆچوونا پرانیا وهلاتێن جیهانی بۆ خوه راكێشیت ئهڤه ژی ل ئه‌گه‌رێن ئێكده‌نگ و هه‌لویستێا كوردیه، ره‌نگه زه‌مینه ژی بۆ هاریكاره كو ئهڤ پشته‌ڤانیا نێڤده‌ولی بۆ دهێته‌كرن و ئه‌كید خۆراگری و مێرانیا پێشمه‌رگه‌ی ئهڤرۆ ملله‌تێ كورد بره پێش و هه‌روه‌سا چه‌ته‌یێن داعش ل سهر ده‌ستێن گه‌لێ مه هاتن شكاندن و ل سهر ڤێ ئێكێ ئهڤرۆ ژ ههر كورده‌كێ دهێته خواستن كو ده‌لیڤه یه په‌یام و گۆتارا خوه بكه‌ن ئێك داكو ههمی ئالیه‌كێ حساب بۆ گه‌لێ مه بهێته كرن ئه‌كید بۆ ئێكهه‌لویستیا مه دێ كورد بهر ب ئاینده‌كێ مسۆگه‌ر ڤه بن دێ ژ وان ئازارێن مێژووی قورتال بیت داكو ههر داعشه‌ك بۆ مه ده‌رنه‌كه‌ڤیت و ئهم ژی ب ماف ده‌وله‌تبوونا خوه شاد بین.
ژنا كورد سه‌مبولا ژیان و به‌رخودانی یه
ئهڤرۆ ژنا كورد ل قووناغه‌كا نوو هه‌ستیار دژیت وژدان و هه‌ستا پرانیا جیهانێ هه‌ژاندیه، ب به‌رخودانا خوه، ل سهر ئاخا كوردستانی ئهڤرۆ ره‌چه‌لكی نوو ژدایك دبن، یێن بووینه ئه‌فسانه، رۆژانه ناڤێ وان بووینه مانشیتێن مهزن ل سهر لاپه‌رێن كۆڤار و رۆژنامه‌یین دنیایێ، په‌سنا به‌رخودانا وان دهێته كرن، جهی داخی یه ل وه‌لاتی مه كو لاندكا وان قه‌هرمانایه، ئهڤرۆ دهێنه سۆتن و كوشت، ل دنیایێ په‌یكه‌رێن زێری بۆ قه‌هرمانان دهێنه چێكرن لێ ل وهلاتێ من ب گوله‌كێ یان چریسكه‌كا ئاگری یان بلۆكه‌كی دهێنه ژناڤبرن.
ئه‌رێ ما ده‌م نه هاتیه ئهم ژی وهكی ههمی دنیایێ ره‌فتاران بكهین؟
ژبهر هندێ ژی پێدڤی یه ل ڤی ده‌می ده‌ستهه‌لات، ئاوریه‌كێ و بهایه‌كی باشتر بده‌ته ڤی كه‌سی كو بوویه ئه‌فسانه ل ده‌رڤه‌ی سنۆرێن مه. ژ بلی ڤێ چه‌ندێ ژی ئهو قه‌هره‌مانی ئهڤرۆ د به‌رگریێ دانه و ئاخا كوردستانێ دپاریزیت ههر ژ كێله‌كا وێ ژنێ ژ دایك بووینه، له‌ورا دڤێت سیسته‌مه‌كێ نوو بهێته پیاده‌كرن بۆ خۆشكرنا ڤی (مخلۆقێ) هه!!
ژ بۆ پاشه‌رۆژه‌كا گه‌شتر و خۆشتر ل سهر بنیاته‌كێ موكم و دیسا یێ سیاسی و ئاڤاكرنا ژنه‌كا پڕ شیان و هزرێن ئه‌كادیمی و مودرن، گهلهك جاران دهمێ به‌حسێ ژنێ و پشكداریێ دكهت ئێكسه‌ر بابه‌ت دچیت خالێن لاواز و به‌حسێ كه‌ساتیا ئافره‌تێ دهێنه‌كرن و تشتێ گرێدایی ره‌وشت و كه‌لتوور و پرسا جڤاك و ده‌روون و گهلهك خالێن دی یێن كو مێشكێ خه‌لكی پێڤه مژوول بن دهێنه پێش، ل به‌راهیا ڤێ هزرێ هه‌میێ ب سه‌دان هزرێن شاش ل دۆر ژنێ دهێنه ئاڤاكرن كرن، ههتا ئێك خالا ئه‌رێنی یا وێ دهێته دیتن، یا جهێ پسیارێ یه ژن دشێن ڤێ دیتنێ بگوهۆرن، ئهڤ پرسه دبیت ل جه‌م ژنان بیت، به‌لێ خالا سه‌ره‌كی ئهوه كو پێدڤیه ژن ئه‌ڤا روودایی ل ڤێ دووماهیێ بكه‌نه ده‌سپێشخه‌ریه‌ك ژ بۆ گوهارتنا هندهك بابه‌تێن دی یێن پرسا ژنێ ئهو ژی بیاڤێ سیاسی و به‌گره‌وه‌ندێ ژنێ یێن سیاسی پێدڤی رێخستنێ یه كو ڤه‌كرنا لاپه‌ره‌كێ نووتره، نموونه تشتێ سه‌رسورمان بێی هزر ل ئافره‌تا باكۆر و باشۆر بهێته كرن ئهڤ بابه‌ته دهێته تێكه‌ل كرن، ئانكو جوداهی هه‌یه و ژنێن باكۆر شیانه ببنه سومبولا به‌رخودانێ و ببنه نموونه بۆ گهلهك ژنێن دی ل ده‌ڤه‌رێن مه كو سهرێ خوه ژ كه‌ڤلوژانكێ خوه یێ رۆتینی و ژیانا گرێدایی نه‌ریتان بینن ده‌رو ئێدی ب ئه‌واچووی بهس نه‌بیت، نموونه ههكه به‌حسێ هندێ بكهین ژن د جڤاكێ مه دا كهسێ ل دۆر خوه نابینیت كو لێ باوه‌ر بیت، ئانكو هێزه‌ك نینه ژبلی هه‌ڤژینێ وێ كو رێكخراوێن ئافره‌تان نه‌شێن ل جهێ وێ باوه‌ریێ بن ئه‌وا ژنێ دڤێت بهردهوام ئهو ل جهێ گازندێ دبینن چونكی دڤێن بۆ ههر هیڤیه‌كا وێ ببنه پشته‌ڤان، زێده‌باری ڤێ چه‌ندێ ژی ده‌ستهه‌لاته كا باورپێكری نینه كو ده‌ما ژن ل دووڤ ئارمانجێن خوه دچیت پشته‌ڤانیا وێ بهێته كرن، نه‌خاسمه دهمێ زه‌لامێ وێ لێ رابوو یان جڤاك، ئه‌ڤجا ئهو ده‌ستهه‌لاته یان رێكخراوه بیته پشته‌ڤان، ههر ل گه‌ل ڤێ ئێكێ ژی په‌روه‌رده‌یه‌كا ژن ل سهر رادبیت یا كلاسیكه ههكه خوه ل زانكۆیێ ژی خلاس بوو هزر دكهت و ئهو باوه‌ریا بۆ چیبووی ههر مولكێ زه‌لامی یه، كو دهمێ شوو دكهت نابیت ژ چارچووڤێ خواسته‌كێن زه‌لامی ده‌ربكه‌ڤیت.
به‌لێ ل گه‌ل ڤێ ژی خالا گرنگ ژی ئهوه ژنا نها خودان ئابووریه‌كا سه‌ربخوه نینه وه دیسا ئازادیا تاكه كه‌سی قه‌بوول ناكهت، تایبه‌ت ههكه ژنێ ڤیا ب تنێ بژیت بهلكو ههر یا چارچووڤه‌كریه د مالێ دا و دۆرپێچكریه د ناڤ خێزانێ دا.
به‌لێ ل به‌رانبه‌ر ڤێ ژن ل باكۆر خودان هێزه‌كا له‌شكری یه و خودان فه‌رماندار و رێڤه‌به‌ریه‌كا سهر بخوه‌یه بهلكو دشێت بێ زه‌لامی به‌رده‌وامیێ بده‌ته خواسته‌كێن خوه، به‌لێ ئهڤه بوویه میناك بۆ ههمی ژنێن دونیایێ، نه‌وال سه‌عداوی دگۆتنه‌كا خوه‌دا دبێژیت (ژنا كورد به‌ره‌ڤانیێ ژ راسته‌قینه‌یا جیهانێ دكهت) ل گه‌ل هندێ ژی نابێژم ل باشۆر ژنه‌كا بێ هه‌لویسته نه‌خێر ژن ههنه خودان رابردوویه‌كێ باش و دشێت رۆلێ خوه بینیت لێ ئهو ژی گهلهك جاران تێكه‌لی وان ئاتافان دبیت یێن ناڤ مالێ، نموونه ژی پتریا بابه‌تێن ژنان ههكه نموونێن كوشتن و سۆتن و قوربانیان نه‌هێته كرن كێمه، د ڤێ قووناغا كو ژن ئێدی هزر ل سیمایه‌كێ دی بكه‌ت باشتره هندهك پرانسیپ و ئه‌ته‌كێتێن ژیانێ یێن گرێدایی ژنێ بهێنه شرۆڤه‌كرن و مژار ل سهر بهێته كرن.
شه‌ڕ و گڕڕ نه ب ده‌‌ستێ مرۆڤی یه!
باشی و خرابی ب ده‌‌ستێ مرۆڤییه، لێ ئهو ههر دووێن دی مرۆڤ نه‌‌شێت براوه‌‌ستینیت!، هندیكه شه‌ڕه ئهو بخوه دهێته بهر ده‌‌رێن مه و ئهم نه‌‌چاركرین شه‌ڕی بكهین، هندیكه تڕه یا ب ده‌‌نگه! و یا ب شه‌‌رمه، هندهك جاران یا مهزنه و هندهك جاران ژی یا بچووكه!هه‌‌لبژارتن) ژی بابه‌‌ته‌‌كه ههر چهند سالان ده‌‌ردكه‌‌ڤیت و نه ب ده‌‌ستێ كهسێ یه براوه‌‌ستینیت! ده‌‌نگێ وێ دگه‌‌هیته گوهێن ههمی مرۆڤان! هنده‌‌كان دگۆتن ئهم دێ باژێرا ل پشت چیایێ دهۆكێ ئاڤاكه‌‌ین. هنده‌‌كا ژی دگۆتن ئهم دێ كه‌‌رتێ چاندنێ ڤه‌‌ژینین كو باجان هند یا مهزن بیت سێ بچنه د سندوقه‌‌كێ دا، جامێره‌‌كێ دگۆت ئهم دێ بارانێ ژ عه‌‌وران بارینین ههكه هشكاتی ب سهر ملله‌‌تی دا هات، به‌‌رێزه‌‌كی هه‌‌وار دكر: بهس من به‌‌ردن دا ئاڤاكرنێ بكه‌‌م ئه‌‌ز و ملله‌‌ت مرین ژ به‌‌تالیێ بهس من بهردهن!. هنده‌‌كان دگۆت ئهم دێ مووچا زێده‌‌كه‌‌ین خوزی وه‌‌نه‌‌گووتبا هه‌‌ما مووچه ژبنی نه‌‌مان. به‌‌ربژاره‌‌كێ دیتر دگووت ئه‌‌ز دێ بارا په‌‌ترۆلێ بۆ ههر تاكه‌‌كێ كورد كه‌‌مه د به‌‌ریكا وی دا! ئینا چپكا پانزینی ل پانزیخانا نهما. ئهڤێ گۆتی دێ جادا و پرا چێكه‌‌م به‌‌رسڤا وی دێ ل ڤێ زڤستانێ دێ هێت و دیار بیت. ئه‌‌ڤێن گۆتین و گتین و گوتین ئهڤرۆ ههمی وهسا نینه! بودجه ژی بهێت هه‌‌مجارا وهسا نابیت! گهلهك باشتربوو مه گوه لێ نه‌‌با لێ نه ب ده‌‌ستێ وان بوو! ئهڤه بوهاره‌‌ك بوو ل بهر دلێ مه‌‌دای، به‌‌ختێ مه‌‌یه ئهم راستیا سۆزا نه‌‌بینین. (شه‌ڕی و بودجه‌‌ی) خوه دا بهر سهرێ هنگۆ! وهكی دی چ ژ هنگو چێنه‌‌دبوو، ما ئه‌‌ڤێن بهری هه‌‌وه ژی د شهرێ داعشدا بوون؟ یان بودجه نهبوو؟ ههتا پاس و تونه‌‌ل و هێلێن شه‌‌مه‌‌نده‌‌فران چێنه‌‌كرین، ئهم دێ كه‌‌نگی وهلاتێ خوه ئاڤاكه‌‌ین؟ پانێ گهلهك وهلاتێن جیهانێ ههر سال یێن د شه‌‌ڕكی دا و وهلاتێن وان بهردهوام یێ پێشدكه‌‌ڤن و ئاڤا دبن. شه‌ڕێ مه‌‌یێ ئهڤ جاره ب پشته‌‌ڤانییا 40 ده‌‌وله‌‌تایه! ئه‌‌ڤـ شه‌ڕه نابیته ئه‌‌گه‌‌ر كۆ چاندنێ نه‌‌كه‌‌ین و گه‌‌نم و جه‌هێ جۆتیاران بهێلنه بهر بارانێن پائیزێ و دارا نه‌‌چینین، پرۆژا براوه‌‌ستینین، قوتابخانا بگرین، و.. . ئه‌‌ڤـ شه‌ڕه دێ ڤه‌‌كێشیت بهلكو ب سالان، ما ئهم ژی دێ ڤه‌‌مینین ب سالا؟ خه‌‌ما ملله‌‌تی ئهوه كو ئه‌‌ڤـ شه‌ڕه كارتێكرنێ بكه‌‌ته سهر ههلبژارتنێن بهێت دا! ژبهر كو گهلهك دهمهكێ خشه هه‌‌لبژارتن، هه‌‌ما تو چ داخواز بكه‌‌ی دێ ب سهرێ ته‌‌ڤه ماچیكه‌‌ن، مرۆڤ هه‌‌ست ب دلۆڤانیێ دكهت كو كهسان ههنه ملله‌‌ت په‌‌رست و نشتیمان گوری.. بیرا مه ب دلۆڤانیا ده‌‌یبابا هینا دهمێ داخوازێن مه بجهدئینان.. مه ب سهرێ به‌‌ربژارێ خوه سووند دخوار.. سلاڤی مه دكرن! پسیارا ساخله‌میا مه دكرن كا چ جه‌‌لته نه‌هاتینه مه؟! كارتێن ته‌‌له‌‌فوونێن مه تژی دكرن! ئێك ژ مه مربا دا بوو مه كه‌‌نه گری! هه‌‌ما بهربژار ب ره‌‌حم بوون، روح شرین و دار سڤك بوون! وهكی (كه‌‌وا) بوون دقه‌‌بین. مه دگووته ئێك و دوو: یێن (چێبووین) ئێدی ل مه زڤرین دێ ژیانێ ل مه خۆشكه‌‌ن. ب خودێ ئهم یێن ژ هه‌‌وه خه‌‌ریب بووین دێ خوه دیاركه‌‌ن مالا هه‌‌وه! مه دڤێت بزانین كا هوون دباشن ب سلامه‌‌تن؟ پێدڤی چ نینن؟ ههكه ئهم ڤه‌‌گه‌‌رین بۆ دوورشمێن وان وێنه‌‌یان 50% پێویستی ب پاره‌‌ی و بودجه ناكهت! ئهڤه (ساله‌‌ك) چوو! سێ یێن ماین هوون دێ چ كهن؟
عه‌بادی ده‌ستپێكه‌كا باش.. لێ دووماهی خێربیت!
ههر چه‌نده ژ ئه‌نجامێ هه‌لبژاردنێن جڤاتا نوونه‌رێن عیراقا فیدرال یێن 30/4/2014 ل 8/9/2014 ب ره‌نگه‌كێ شه‌پرزه‌یی و ب له‌زوبه‌ز كابینا نوو یا حوكمه‌تا عیراقێ ب سه‌رۆكاتیا حه‌یده‌ر عه‌بادی هاته پێكئینان ، لێ به‌راوردكرن ل گه‌ل ههلبژارتنێن به‌رتر د دهمهكێ كورت دا حوكمه‌ت هاته پێكئینان، لێ بۆ كوردان ههتا راده‌یه‌كی پێكئینانا حوكمه‌تا نوو یا عیراقێ ب نه ژ خافلی بوو، چونكی ب تنێ چهند ده‌مژمێره‌ك بووری بوون ل سهر بریارا كوردان بۆ پشكداریكرنێ د ڤێ كابینا حوكمه‌تێ دا و هێشتا كورد د ناڤ خوه دا نه‌گه‌هشتبوونه‌كێ رێكه‌فتنه‌كێ بۆ ده‌ستنیشانكرنا به‌هرا خوه تێدا، لێ عه‌بادی یێ رژد بوو ل سهر پێشكێشكرنا پێكهاتا حوكمه‌تا نوو د دهمێ خوه دا و خوه ل به‌ندا كوردان نه‌گرت، ئهڤێ چه‌ندێ وه‌كر زۆر ژ كوردان چ ل سهر ئاستێ جادێ یان ل سهر ئاستێ نڤیسكار و ره‌وشه‌نبیران وهسا هزر بكه‌ن حوكمه‌تا نوو یا عیراقێ درێژه‌پێده‌را كابینا به‌رتر بیت ب سه‌رۆكاتیا نوری ئه‌لمالكی بۆ دژایه‌تیكرنا هه‌رێما كوردستانێ و زالبوون ب سهر سازیێن ده‌وله‌تێ. لێ هێشتا سێ مه‌ه كێمتر بوورینه ب سهر ژیێ حوكومه‌تێ دا، لێ نیشانێن باشیێ لێ دیاربوون و دیاره عه‌بادی حه‌زا چاره‌سه‌ركرنا كێشه و قه‌یرانا ههنه نه‌ك په‌یداكرنا وان مینا مالكی. .. ! ژ وان بریارا ره‌وانه‌كرنا بۆدجه و مۆچێ هه‌رێما كوردستانێ ب رێژه‌یا 17% پشتی ل گه‌ل هه‌رێما كوردستانێ گه‌هشتینه رێكه‌فتنه‌كێ دیسا ره‌وانه‌كرنا پێدڤی و هاریكاریێن پێشمه‌رگه‌ی، ل سهر ئاستێ ناڤخوه‌یی حوكمه‌تێ وهكی حوكمه‌تا فیدرال ئاشكراكرن و ده‌ستنیشانكرنا هژماره‌كا زۆرا فه‌رمانبه‌ر و پۆلیس و سه‌ربازێن بن دیوار و ئاشۆپ و كێمكرنا رێژه‌یه‌كا به‌رچاڤ ل مۆچێ پله‌دارێن بلند، فاكته‌رێن حه‌زا گورانكاری و چاكسازیانه د حوكمه‌تا عیراقا فیدرال دا و نابیته درێژه‌پێده‌را كابینێن به‌رتر به‌لكی به‌رۆڤاژی وان گاڤێن باشن بۆ به‌رنگاربوونا گه‌نده‌لیێ. دبیت ره‌وشا سیاسی و ئه‌وله‌هی و دارایی ل عیراقێ سه‌رۆكێ حوكمه‌تا عیراقێ نه‌چار كربیت ڤان گاڤان بهاڤێژیت، یان ل بن گڤاشتنێن نیڤده‌وله‌تی بیت، چونكی هه‌رێما كوردستانێ به‌روڤاژی به‌شێن دیتر یێن عیراقێ شیان نه تنێ رێكێ ل پێشڤه‌چوونێن هێرشێن (داعش) بگرن، به‌لكی بهردهوام د پێشڤه‌چوونێ دانه و دربێن هه‌ره مهزن ل ڤێ هێزا تیرۆرستیا پڕ چه‌ك دان و ژ ئالیێ سیاسی ژی پشتی شهرێ دژی ڤان تیرۆرستێن (داعش) هه‌رێما كوردستانێ سه‌ركه‌فتنێ، مهزن بده‌ستڤه‌ئینان و پشته‌ڤانیه‌كا نێڤده‌وله‌تی دابینكرن. ب ههر حال ئه‌كه‌ر حه‌یده عه‌بادی سه‌رۆكێ حوكمه‌تا عیراقا فیدرال به‌رده‌وامیێ ب ڤێ سیاسه‌تا خوه بده‌ت بۆ چاره‌سه‌ركرنا كێشه‌یێن د ناڤبه‌را هه‌رێما كوردستانێ و حوكمه‌تا ناڤه‌ند و كێشه‌یێن د ناڤبه‌را پێكهاتێن دیتر یێن جڤاكێ عیراقی دا مینا (شیعه و سونه) و به‌رهنگاربوونا گه‌نده‌لیێ. ره‌وشا عیراقێ و عیراقیان یا ئه‌وله‌كاری و ئابووری گوهۆرینێن باش دێ بسه‌ردا هێن و كه‌ربوكین و دو به‌ره‌كی د ناڤبه‌را واندا نامینیت. لێ هێشتا ئهڤ گاڤه نه‌كه‌هشتینه وی ئاستی كو ئهم وهكی كورد لێ پشتراست ببین و وهسا هزر بكهین عه‌بادی دێ كێشه و ئاریشه‌یێن مه چاره‌كه‌ت و دڤێت خوه ل هیڤیا ده‌می بگرین. چونكی د كه‌ڤندا كوردان گوتیه (پیرێ دووماهی خێربیت) و ههكه عه‌بادی د ڤان چار سالێن داهاتی دا شیا ره‌وشا عیراقێ ب ره‌نگه‌كێ ئه‌كتیڤ بگوهۆڕیت ب تایبه‌ت ژلایێ گه‌نده‌لیا ئیداری و دارایی پێدڤیه حوكمه‌تا هه‌رێما كوردستانێ مفای ژ سه‌ربۆڕا وی وه‌ربگریت و خوه بریارا سزادانا گه‌نده‌لكاران بده‌ت و بێ دو دلی قانوونێ ب سهر بسه‌پینیت.
بۆ كوردستانه‌كا سه‌ربخوه
ژ بۆ كوردستانه‌كا سهر بخوه پیدڤیه كورد ل سهر سێ به‌ره‌یان كاربكه‌ن. كوردستان ب ههمی پیكهاتێن خوه‌ڤه ئهڤه سه‌دان ساله تووشی دڕنده‌ترین هێرش بوویه ژ لایێ دوژمنێن كوردستانێ ڤه ل به‌رانبه‌ر ئهڤێ چه‌ندێ گه‌لێ كوردستانێ ب دریژاهیا میژوویێ به‌رگری ژ مافێن خوه‌یین ره‌وا كریه ههتا وی راده‌ی ئهڤرۆ سه‌ربه‌خوه‌یا كوردستانێ نێزیك بوویه، له‌ورا ژبۆ سه‌رگرتنا ئهڤێ پرۆسێ پێدڤیه كورد ل سێ به‌ره‌یان د سه‌ركه‌فتی بن. ئهو ژی
1ـ موكومكرنا به‌ره‌یێ ناڤخوه‌یی و پاراستنا نافمالا كوردی. ژ بۆ ڤێ چه‌ندێ پێدڤیه مه‌رجه‌عیه‌ته‌كا سیاسی ل كوردستانێ بهێته دامه‌زراندن و پێدڤیه كۆنگرێ نه‌ته‌وی بهێته ئه‌نجامدان و په‌یره‌وه‌ك بهێته نڤیسین كو ههمی لایه‌ن پێ پابه‌ند بن وهكی ده‌ستووره‌ك ره‌فتار ل گه ل بهێته‌كرن. ههر وهسا پێدڤیه سه‌رۆك بارزانی سه‌ركردایه‌تیا ڤێ قووناغێ بكه‌ت ژ بهر كو خودان سه‌نگه‌كا مهزنه د مه‌یدانا سیاسی و نێڤده‌وله‌تی دا و ههر وهسا خودان كه‌ساتیه‌كا ب هێزه و خودان جه‌ماوه‌ره كێ ئیكجار زۆره ل سه‌رانسه‌ری وه‌لاتی. 2. رازیكرنا ده‌وله‌تێن ئه‌قلیمی. ژ بۆ ڤێ چه‌ندێ ب بۆچوونا من پێدڤیه كورد بشین به‌رژه‌وه‌ندیین ئابووری و سیاسی ل گه‌ل ده‌وله‌تێن جیران ب هێز بیخن كو چاره‌نڤیسێ سیاسی و ئابووری ده‌ڤه‌رێ بكه‌ڤیته سهر موكمیا ڤان په‌یوه‌ندیان، هه‌روه‌سا كار ل سهر وێ چه‌ندێ بكه‌ن ئاشتیا ده‌ڤه‌رێ بپاریزن كو ده‌وله‌تێن جیران هزر د وێ چه‌ندێ دا نه كهن كو كورد دێ بنه مه‌ترسی ل سهر.
3. كێشانا عه‌تفا جڤاكێ نێڤده‌وله‌تی. ژ بۆ ڤێ چه‌ندێ پێدڤیه كورد ل سهر سیاسه‌تا نها د بهردهوام بن د خۆشكرنا په یوه‌ندیێن خوه ل گه‌ل وهلاتێن جیهانێ و ب تایبه‌ت وهلاتێن زلهێز مینا و یلایه‌تێن ئێكگرت یێن ئه‌مریكی و بریتانی
ئاھەنگا دەرچوونێ بۆ قوتابيێن پەیمانگەھا تەکنیکی يا بەردەرەش ھاتە سازکرن
ئەڤرۆ نیوز، رەزوان رۆژبەیانی:
ئەڤرۆ د رێورسمەکێ فەرمی دا ل ژێر درويشمێ “ئەم ھەموو پێشمەرگەینه”، ٧٧ قوتابی ژ پەیمانگەھا تەکنیکی يا پەردەرەش دەرچوون و خواندنا خوە ب دووماھى ئینا و باوه‌رناما دبلۆم وەرگرتن.
ئەڤرۆ ل رێکەفتێ 1/\12\2014 ب ئامادەبوونا هژماره‌كا بەرپرسێن میری و حکومی ل قەزا بەردەرەش 77 قوتابی ل بەشێن کاگیری و کار و سیتەمێ کۆمپیۆتەر و بەشێن پەرستاری خواندنا خوە ب دووماھى ئینا و باوه‌رناما دبلۆم وەرگرتن.
پەیمانگەھا تەکنیکی بەردەرەش ل رێکەفتێ 1\7\2009 ھاتیە ڤەکرن و ھەتا نوکە 517 قوتابی ژێ دەرچووينه و باوه‌رناما دبلۆم وەرگرتینە و ئهڤه خولا وێ يا چارێ يا ده‌رچوونێ بوو هاتيه گێران.
نيشاندان
WP Facebook Auto Publish Powered By : XYZScripts.com