ئه‌ڤرۆ نيوز:
پشتى د ياريا به‌رى ده‌مه‌كێ كێم دا ژ حه‌فتيا 29 يا خۆلا ئسپانى دا، كرستيانۆ رۆنالدۆيێ ستێرا ريال مه‌دريد و ياريێ نمره‌كا نوو شكاند پشتى شيايى پێنج گۆلان د ئێك يارى دا تۆمار بكه‌ت و ب ڤێ چه‌ندێ بۆ جارا ئێكێ بشێت پێنج گۆلان د ياريه‌كێ دا تۆمار بكه‌ت ل گه‌ل يانا ريال مه‌دريد و ب ره‌نگه‌كێ به‌رچاڤ ژى كه‌فته پێشيا گۆلكارێن خولا ئسپانى ب 36 گۆلان ب جوداهيا چار گۆلان ژ ليۆنێل ميسى.
د ڤێ ياريێ دا ريال مه‌دريد سه‌ركه‌فتن ل سه‌ر گه‌رناته تۆماركر ب 9 گۆلان به‌رامبه‌ر گۆله‌كێ.
ئەڤرۆ نیۆز، سالار دۆسکی:
ئەندامەکێ پەرلەمانێ عیراقێ دیارکر کو دوھی 3ى نيسانا 2015ێ ژ ئەنجامێ توبارانکرنا فرۆکێن ھەڤپەیمانان ل سەر داعش، پێنچ کەس ژ ئێک خێزانا ل گوندەکێ شەبەکان، ژ ئەنجامێ شاشیەکێ بووینە قوربانی.
سالم شەبکە نوونەرێ شەبەکان و ئەندامێ پەرلەمانێ عیراقێ، د فەیسبووکێ خوە یێ تایبەت دا، نووچە بەلاڤ کریە و ئاشکرا کریە کو ژ ئەنجامێ شاشیەکێ ھێزێن ھەڤپەیمان ب فرۆکان ل گوندێ “فازلیێ” مالەکا شەبەکان توبارانکریە و د ئەنجام دا پێنج شەبەک ژ ئێک خێزان بووینە قوربانی.
ھەڤدەم، نوونەرێ شەبکان ل تورا جڤاکی یا فەیسبووکێ، ناڤێن ئەوان ھەر پێنچ كه‌سان بەلاڤەکرینە و ئەڤێن خوارێ نە، “حازم عەبدولا شاھین، نادیا نوری، له‌یس حازم، ھه‌نا عەلی عەبدولا، دانیا له‌یس”.
ل دووماھیێ سالم شەبک ژ ھێزێن پێشمەرگێ کوردستانێ خواست کو گوندێن شەبکان ئازاد بکەن.
ئه‌ڤرۆ رۆژا ئێكشه‌مبى رێكه‌فتى 5ى نيسانا 2015 ل سەلاحەدین مەسعود بارزانی سەرۆکێ ھەرێما کوردستانێ ل گەل د. یوسف محه‌مەد سەرۆکێ په‌رلەمەنا کوردستانێ و جەعفەر ئێمینکی جێگرێ سەرۆکێ په‌رلەمەنى و فەخرەدین قادر سکرتێرێ په‌رلەمەنى كۆمبوو.
د ڤێ کۆمبوونێ دا رەوشا مەیدانیا بەرەیێن شەرێ دژی تيرۆریستێن داعش ھاتە نرخاندن و بەحسا رۆلێ بلندێ قوربانیدان و قەھرەمانیا ھێزێن پێشمەرگەیێن کوردستانێ د پاراستنا کوردستان و شکەستدانا تيرۆریستان دا کرن. ھەروه‌سا د دەربارێ رەوشا سیاسی و ئەمنییا عيراق و ده‌ڤه‌رێ و سەرکەفتنا ھێزێن عيراقیان ل تکریت ژی به‌حس کرن.
د پشكه‌كا دى يا ڤێ کۆمبوونێ دا پرسا دستوور و بابەتێ سەرۆکایەتیا ھەرێمێ خستن بەر بەحس و دانوستاندنان و ژ بلی وێ بالکشاندن ل سەر وان گه‌فێن کو ل بەر ھەرێما کوردستانێ ھەنە و تەکەز ل وێ یەکێ کرن کو پێدڤيه د ھەموو رەوشەکێ دا ئێکرێزیا ناڤ مالا کوردستانێ بێته پاراستن. د جڤینێ دا ئه‌و ئێك ژى ته‌كست كر كو چارەسەرکرنا کێشەیان پێدڤيه د رێیا کۆمدەنگیا نیشتیمانی و بەر چاڤ گرتنا بنگەھێن قانوون و بەرژەوەندیێن بلندێن ھەرێما کوردستانێ بيت.
بەشداربوویێن کۆمبوونێ راگه‌ھاندن کو دێ د بزاڤێن بەردەوام دا بن ژ بۆ گه‌ھیشتنا چارەسەریەکا نیشتیمانی و ژ بۆ ڤێ مەبەستێ ل شێورین و پەیوەندیێن بەردەوام دا دبن.
ئەڤرۆ نیۆز، قائید میرۆ:
ئەڤرۆ کۆمبوونا لژنا قانوونی یا پەرلەمانێ کوردستانێ ل دۆر دانوستانێن پرۆژێ قانوونا دستوورێ ھەرێما کوردستانێ ھاتە پاشخستن بۆ چوار شەمبیا داھاتی.
ڤەمان فەیسەل، ئەندامێ لژنا قانوونی بۆ ئەڤرۆ نیۆز گۆت: “ئەڤرۆ ئەم وەکو لیژنا قانوونی یا پەرلەمانی کۆمبووین ھەتا بگەھینە ئەنجامەکی بۆ دەستپێکرنا دانوستانان ل دۆر پڕۆژێ قانوونا دستوورێ ھەرێما کوردستانێ”.
ڤەمان گۆتژی: “سەرۆکایەتیا ھەرێمێ ب رێیا سەرۆکایەتیا پەرلەمانی داخواز ژ لیژنێ کر، ئەف پڕۆژە بھێتە راگرتن بۆ چەند رۆژێن بھێت ھەتا د گەل لایەنێن سیاسی کۆمببن و بگەھنە رێکەفتنێ بەری پەرلەمان دانوستانان ل دۆر بکەت، ئەڤەژی بۆ ئەگەر ئەم کۆمبوونێ پاش پێحین بۆ رۆژا چوارشەمبیا داھاتی”.
ئه‌ڤرۆ نيوز:
دەمێ مرۆڤ تشا باش نەبیت ب شەڤێ دبیتە ئەگەرێ پەیدابوونا ئاستەنگان د ژیانێ دا، ب تایبەت ژی ھەکە مرۆڤی ل بەربیت گەشتێ بکەت یانژی کارەکێ ب شەڤێ ئەنجام بدەت، ھەروەسا ئاریشێن مەن بۆ دیتنێ ژی پەیدادکەت، لەورا پێدڤیە ھزر ل چارەسەریا وێ بھێتە کرن.
فاکتەرین نەدیتنا ب شەڤپێکھاتینە ژ گەلەک خالان ژوانژی:
- چاڤێن کو بەرئاتافی تیشکا رۆژێ دبن: ھەکە ب شەڤێ دیتنا چاڤێن تە شێلی دبیت، رەنگە ئەگەر ئەو بیت کو چاڤێن تە گەلەک بەرئاتافی تیشکا رۆژێ بووینە، و ھەکە تو پشتی نیڤرۆیا گەلەک بچیە بەر تیشکا رۆژێ دێ چاڤێن تە شێلی بن و ئەڤ چەندە بۆ دەمێ دو رۆژا بتنێ ڤەدکێشیت، ھەکە پتر ڤەکێشا پێدڤیە شیرەتا ژ نوشدارەکی وەربگری، و ب رۆژێ بەرچاڤکێن دژی تیشکا رۆژێ ب کاربینی داکو راستەوخو تاڤ ل چاڤێن تە نەدەت.
- ئاڤا سپی: رەنگە ئەڤو ئەگەرێ دوێ بیت کو تو ب شەڤێ باش تشتا نەبینی، ئەڤە پتر ل دەڤ کەسێن دانعەمر و ناڤنحی پەیدادبیت، دبیتە ئەگەر وەکو شێلیبوونەکێ بکەڤیتە بن عەدەسا چاڤی دناڤدا و سپییاتیەک ژێ پەیدادبیت و عەدەسێ شێلی دکەت و دبیت ژی مرۆڤ ھندەک جارا وەکو ھندەک خالێن رەش ل بەرچاڤێن خوە ببینیت و ھندەک جارا ھەستداری بۆ مرۆڤی ژ روناھیا راستەوخو پەیدادبیت.
- نێزیک بینی: تێکچوونەکە د چاڤی دا، ل دەڤ وان کەسێن کو تشتێن نێزیک دبینن و ب زەحمەتە بۆ وان تشتێن دوور ببینن، پشتی دەمەکی مرۆڤ نەشێت ھەتا مرۆڤ و تشتێن مەزن ژی ژ دوورڤە بنیاسیت.
- تێکچوونا شەبەکا چاڤی یا شەکرێ: ئەوژی ژ ئەنجامێ بلندبوونا ئاستێ شەکرا ب زیان ل مودەمارێ، خوینێ و شەبەکا چاڤی پەیدادبیت، سەربارکا بۆ چاڤی پەیدادکەت و دھندەک دەمێن دژواردا خوینبەربوون دکەڤیتە شەبەکا چاڤی و تشتا ب زەلالی نابینیت و ئەم دشێ]ن بێژین کو نەخۆشێن شەکرێ دگەلەک دەمان دا نەنخۆشیا خوە ژ رووناھیێ دبینن.
- شقە سەر: ھندەک راپۆرت وەسا ددەنە خویاکرن کو نێکچوونا دیتنێ ب شەڤێ ژ ئەگەرێ نەخۆشیا شەقەسەرێ یە، ئەڤ جورێ سەرئێشانێ پتریا جاران ل رەخەکێ سەری پەیدادبیت و مرۆڤ گەلەک ئالوزیا خوە ژێ دبینیت و دبیتە ئەگەرێ تێکچوونا دیتنا چاڤی.
- زنک و کێماسیا ڤیتامین ئەی: رەنگە پتریا ئاریشێن دیتنێ دچاڤی دا پەیوەندی ب کێماتیا ھندەک ڤیتامینان ھەبیت، و ئێک ژ پێکھێنەرێن سەرەکی بو پەیدابوونا دیتنەکا باش پێدڤیە مرۆڤ ڤیتامین ئەی وەربگریت، ڤیتامین ئەی دیسا بەرپرسە ژ کووراتیا شەڤێ و نەبوونا ڤان کەرستێن خوارنێ دبیتە ئەگەرێ شێلیبوونا چاڤا.
ئەڤە ھندەک ژ ئەگەرێن شێلبوونا چاڤان بوون ب شەڤێ، دبیت ھندەک ئەگەرێن دی یێن نەراستەوخو ژی ھەبن، وەکو نەخۆشیێن چاڤا و ھەودانێن دەمارا چاڤی، بۆ چارەسەریێ پێدڤیە ئێکەم جار ئەگەر بھێتە زانین و ھەکە ئاڤا سپی بیت پێدڤیە چارەسەریا عەدەسا چاڤی بھێتە کرن و عەدەسەکا دی ل جھێ وێ دناڤ چاڤی دا بھێتە دانان، ھەکە ژ ئەگەرێ نەخۆشیا شەکرێ بیت، پێدڤیە ئاستێ شەکرێ د خوینا خوەدا ب پارێزی و خوارنا زنکی و ڤیتامین ئەی رێیەکا کاریگەرە بۆ دیتنەکا زەلال، و ل دووماھیێ پێدڤیە بزانین کو دووڤچوونا بەردەوام و رێکخستی دبیتە ئەگە مرۆڤ چارەسەریەکا دروست وەربگریت.
ئه‌ڤرۆ نيوز:
تله‌ڤزيۆنا رووداو ژ زارێ ژێده‌ره‌كى به‌لاڤكريه كو سوبه‌هى 6ى نيسانا 2015ێ، سه‌رۆك وه‌زيرێن عيراقێ حه‌يده‌ر عه‌بادى دێ سه‌ره‌دانا هه‌رێما كوردستانێ كه‌ت.
ب گۆره‌يى زانياريێن ب ده‌ست ئه‌ڤرۆ نيوز كه‌فتين دێ ل گه‌ل سه‌رۆكێ هه‌رێمێ كوردستانێ به‌حس ل شێوازێ ئازادكرنا مووسل كه‌ن و ره‌وشا ئه‌منى يا عيراقێ و داهاتيێ عيراقێ و كوردستانێ كه‌ن.
ئەڤرۆ نیۆز، قائید میرۆ:
ئەفسەرەکێ ھێزا پێشمەرگەی ئاماژە ب ڤێ چەندێ دکەت، نوکە لڤینێن داعش زۆر کێمبووینە و پێشبینی دکەین ھژمارا چەکدارێن وان ژی وەک بەرێ نەمابن و شیانێن بەرێ نەماینە.
رائید رەقیب شوکری، ئەفسەرێ پێشمەرگەی ل میحوەرێ باشیک بۆ ئەڤرۆ نیۆز راگەھاند: “نوکە چالاکیێن داعش زۆر کێمبووینە و بۆ دەمێ چەند رۆژانە ھەمبەر ھێزێن پێشمەرگەی لڤینێن وان یێن کێمبووین، بەری دو شەڤا بزاڤا ھێرشکرنێ دکر، بەلێ ھەر زوو ژ لایێ ھێزێن پێشمەرگەی ڤە ھاتنە بێدەنگکرن”.
رەقیب شوکری گۆتژی: “بەری نوکە بەردەوام چەکدارێن داعش ب قەناسێ ھێزێن پێشمەرگەی دکرنە ئامانج و لڤین ھەبوون، بەلێ نوکە ئەو لڤینێن بەرێ نەماینە و زۆر لاوازبووینە، لەوڕا ئەم وەسا دبینین ھژمارا چەکدارێن وانژی یا کێمبووی”.
ئه‌ڤرۆ نيوز:
ب گۆره‌يى راپۆرته‌كێ كو رۆژناما سه‌به‌ق يا سعودى به‌لاڤكريه، هه‌تا نوكه د شه‌رێ باهۆزا دۆرپێچكرنێ دا ل گه‌ل حوسيێن كۆده‌ته‌يا له‌شكرى ئه‌نجام داين 400 كه‌س ژێ كوشتينه.
ئاماژه ب وێ چه‌ندێ ژى كريه كو 28 كه‌س ژ ڤانه سه‌ركردێن پلا ئێكێ يێن چه‌كدارێن حوسى بووينه ئه‌وێن ب نه‌خشێ كۆده‌ته‌يا له‌شكرى رابووين.
دايه زانين ژى كو هنده‌ك ژ ڤان كه‌سان ژ لايێ به‌هه‌لستكارێن دژى حوسيان ژى يێن يه‌مه‌نى هاتينه كوشتن و هنده‌ك ژى ژ لايێ هێزێن ئه‌سمانى يێن هه‌ڤپه‌يمانێن سعودى ڤه.
ئه‌ڤرۆ نيوز:
د رێيه‌كا نوو دا بۆ دژاتيكرنا كوردان، عاليا نوسه‌يف، ئه‌نداما جڤاتا نوونه‌ران ژ ده‌وله‌تا قانوونێ و كه‌ساتيا نێزيكا مالكى 25 ئيمزا كۆم كرينه دا كو كۆژمێ هنارتنا په‌ترۆلا هه‌رێما كوردستانێ بهێته ره‌وانه كرن ب به‌هانه‌يا وێ چه‌ندێ كو هه‌ر ماوه ماوه كۆژمه‌كێ پاره‌يى يێ بۆ هه‌رێمێ دهێته ره‌وانه‌كرن ب به‌هانه‌يا بودجا سالا 2015 يا هه‌رێما كوردستانێ.
نوسه‌يف ب پشت به‌ست ب مادێن 111 و 115 و ب ئيمزايا 25 په‌رله‌مانتاران داخوازيه‌ك راده‌ستى سه‌رۆكاتيا جڤاتا نوونه‌ران كريه بۆ دروستكرنه‌كا لژنه‌كێ بۆ دووڤچوونا رێژا هنارتنا په‌ترۆلا هه‌رێما كوردستانێ ب تايبه‌ت پشتى ده‌نگويێ وێ چه‌ندێ كو حوكمه‌تا هه‌رێما كوردستانێ هنده‌ك بۆريێن په‌ترۆلا كه‌ركووك ل عيراقێ ڤه‌شارتينه.
ئه‌ڤرۆ نيوز:
سه‌رۆكێ جڤاتا نوونه‌رێن عيراقێ، سه‌ليم جبۆرى، ئه‌ڤرۆ رۆژا ئێكشه‌مبى 5ى نيسانا 2015ێ گه‌هشته پارێزگه‌ها نه‌جه‌ف.
ژێده‌رێن ده‌نگوباسان راگه‌هاند كو جبۆرى گه‌هشته نه‌جه‌ف و هنده‌ك به‌رپرسێن پارێزگه‌هێ و نوومه‌رێن پارێزگه‌هێ يێن جڤاتا نوونه‌ران ل پێشوازيا وى بوون و به‌ر ب جڤاتا پارێزگه‌هێ چوو.
هه‌ر ب گۆره‌يى ژێده‌ران دێ چاڤ ب موقته‌دا سه‌در، سه‌رۆكێ ته‌ڤگه‌را سه‌در، كۆم بيت و پاشان كۆنگره‌كێ رۆژنامه‌ڤانى ئه‌نجام ده‌ت بابه‌تێ روونشتنا وان دێ گه‌له‌ك ته‌وه‌ران ب خوه ڤه گريت و ژ وان ژى ره‌وشا نوكه يا ئه‌منى بيت.
نيشاندان