ئەڤرۆ نیوز،زنار وڤی:
ژێدەرێن نووچەیێن عێراقی دانە زانین کو ئەڤرۆ 31.3.2015 هێزێن سوپایێ عێراقێ و پولیسێن فیدرالی پشتی روو ب روو بونەکا دژوار دگەل تیرورستێن داعش شیان بچنە دناڤا باژێرێ تکریت دا،دڤێ روو ب روو بونێ دا هێزێن عێراقی شیاینە تاخێن ئەربەعین و زهور و ئاڤاهیێ قائمقامیا تکریتێ و هەروەسا فەرمانگەها ساخلەمیێ بێخنە بن کونترولا خوە و زیانێن مەزن گەهاندینە تیرورستێن داعش.
هه‌ڤده‌م حه‌یده‌ر عه‌بادى سه‌رۆك وه‌زیرێن عیراقێ وه‌كو مزگینیه‌ك راگه‌هاند كو هێزێن ئێمناهیێ یێن عیراقێ ب هه‌ڤكاریا فرۆكێن هه‌ڤپه‌یمانان چووینه ناڤه‌ندا تكریت و ئاڤاهیێن حكومى كونترلكرینه.
ئه‌ڤرۆ نیوز:
رێكخه‌رێ گشتى یێ بزاڤا گۆڕان نەوشیروان مستەفا راگه‌هاند: پرسا پوستێ سه‌رۆكێ هه‌رێمێ و دستوورێ هه‌رێما كوردستانێ، دڤێت ل ده‌ستپێكێ د ناڤبه‌را حزبێن كوردستانى دا رازیبوون ل سه‌ر بهێته كرن، پاشى بچیته په‌رله‌مانى.
پشتى كو ئه‌ڤرۆ شانده‌كێ بلندێ مه‌كته‌با سیاسى یا پارتى دیموكراتى كوردستان، سه‌ره‌دانا نه‌وشیروان مسته‌فا رێكخه‌رێ گشتى یێ بزاڤا گۆران كرى، دداخویانیه‌كا رۆژنامه‌ڤانى دا، نه‌وشیروان مسته‌فا راگه‌هاند: مه سه‌باره‌ت پرسا دستوورى و پۆستێ سه‌رۆكێ هه‌رێما كوردستانێ، حزب دانوستاندن یێن ل سه‌ر كرى، به‌لێ نه‌گه‌هشتینه بوچوونه‌كا هه‌ڤپشك، له‌وما دڤێت ئه‌ڤ دو پرسه د ناڤبه‌را حزبان دا بهێته ئێكلاكرن، پاشى بچیته په‌رله‌مانى.
ئه‌ڤرۆ نیوز:
سەفین دزەیی په‌یڤدارێ حوكمه‌تا هه‌رێما كوردستانێ بۆ مالپه‌رێ فه‌رمى یێ حوكمه‌تێ راگه‌هاند ل دووڤ قانوونێن په‌رله‌مانێ كوردستانێ كو سه‌باره‌ت رێكخستنا بهێنڤه‌دانێن فه‌رمى ده‌رێخستى یه، د هه‌یڤا 4 دا، رۆژا 9 نیسانێ ب هه‌لكه‌فتا ژناڤچوونا رژێما به‌رێ و 15 نیسانێ ب هه‌لكه‌فتا جه‌ژنا چوارشه‌مباسوور یا برایێن ئێزدى دێ بیته بهێنڤه‌دان.
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ سپێدێ 31\3\2015 په‌رله‌مانێ كوردستانێ روونشتنه‌كا دى يا خوه يا ئاسايى ژ خولا چارێ وه‌رزێ بهايێ گرێدا و تێدا بڕيار بوو به‌رده‌وامێ بده‌ته دانوستاندنێ ل سه‌ر پرۆژێ سندوقا داهاتێن هه‌رێمێ و خواندنا ئێکێ بۆ پرۆژێ پارێزگه‌هبوونا قەزا کۆیە یە بكه‌ت و باوه‌ريێ ژى بده‌ته وه‌زيره‌كێ نوو يێ حوكمه‌تا هه‌رێمێ.
نازم كه‌بير هه‌ركى، ئه‌ندامێ لژنا قانوونى و فراكسيۆنا پارتى ديموكراتى كوردستان ل په‌رله‌مانێ كوردستانێ بۆ ئه‌ڤرۆ نيوز گۆت: “ئه‌ڤرۆ ب تنێ گه‌نگه‌شه ل سه‌ر پرۆژێ سندوقا داهاتێن هه‌رێمێ هاته كرن و چه‌ند ماده‌ك ژێ هاتنه په‌سه‌ندكرن.”.
ئه‌ندامێ لژنا قانوونى زێده‌تر گۆت: “روونشتنا په‌رله‌مانى بۆ سوبه‌هى هاته پاشخستن بێى كو قانوون ب ته‌مامى بهێته په‌سه‌ند كرن و خواندن بۆ پرۆژێ قانوونا پارێزگه‌هبوونا كۆيه و باوه‌رى دان ب وه‌زيرێ هه‌رێمێ نه‌هاته دان كو ژ بڕگێن دويێ و سيێ يێن كارێ په‌رله‌مانى بوون”.
ئه‌ڤرۆ نيوز، نيوار محه‌مه‌د سه‌ليم:
ئه‌و لژنا بۆ ڤه‌كۆلينێ د روودانا په‌رله‌مانى دا هاتيه پێكئينان نه‌يا قانوونيه و ئه‌ندام په‌رله‌مانتارێن پارتى نه د ئاماده‌نه بچنه به‌ر سينگێ لژنێ و سه‌رۆكێ په‌رله‌مانى ژى وه‌كو ئه‌ندامه‌كێ گۆڕان سه‌ره‌ده‌ريێ ل گه‌ل ڤێ روودانێ دكه‌ت.
مه‌ردان خدر، ئه‌ندامێ په‌رله‌مانێ كوردستانێ ژ فراكسيۆنا پارتى ديموكراتى كوردستان، بۆ ئه‌ڤرۆ نيوز گۆت: “سكرتێرێ په‌رله‌مانێ كوردستانێ په‌يوه‌ندى ب مه كريه دا كو بچينه به‌ر سينگێ لژنا ڤه‌كۆلينێ، به‌لێ ئه‌م د ئاماده نينين بچينه به‌ر وێ لژنێ چونكو نه‌يا قانوونى يه”.
زێده‌تر گۆت: “سه‌رۆكێ په‌رله‌مانى ب ره‌نگه‌كێ حزبانه هزر دكر و وه‌كو ئه‌ندامه‌كێ گۆڕان سه‌ره‌ده‌ريێ دكه‌ت و تووشى وێ خه‌له‌تيێ بوويه، ئه‌و لژنه ب گۆره‌يى ماددێ 17 ژ په‌يره‌وێ ناڤخۆ هاتيه پێكئينان ئه‌و مادده ژى يێ تايبه‌ته ب ده‌سته‌لاتێن سه‌رۆكێ په‌رله‌مانى و د ناڤ ڤى مادده‌يى دا نه‌هاتيه كو سه‌رۆكێ په‌رله‌مانى دشێت لژنا ڤه‌كۆلينى پێكبينيت و لێپرسينێ ل گه‌ل په‌رله‌مانتاران بكه‌ت.
دا زانين ژى كو ئه‌و نه‌يێ په‌شيمانه ل هه‌مبه‌ر ئه‌و كارێ وى كرى و گۆت: “هه‌ر ده‌ما عه‌لى حه‌مه سالح په‌شيمان بوو و داخوازا لێبۆرينێ ژ كوردستانيان و پارتى كر، وى ده‌مى ژى په‌شيمان نابم، به‌لێ دێ من گۆتنا خوه هه‌بيت”.
نه‌ڤه‌شارت ژى كو ل ده‌ف وان ره‌خنه‌گرتن ل ده‌سته‌لاتێ تشته‌كێ ئاسايى يه، به‌لێ به‌رامبه‌ر سه‌رۆك بارزانى هێلا سۆره و قه‌بوول ناكه‌ن، نه سه‌رۆكێ هه‌رێمێ و نه‌ژى پارتى نه‌خواستيه ده‌مێ سه‌رۆكاتيا بارزانى بهێته زێده‌كرن.
پشتى ل رۆژا 25ى ئادارا 2015ێ به‌رى ده‌سپێكرنا روونشتنا په‌رله‌مانى يا ئاسايى، ژ ئه‌نجامێ وێ چه‌ندێ كو عه‌لى حه‌مه سالح به‌حسێ درێژكرنا ماوێ سه‌رۆكاتيا مه‌سعود بارزانى كر بوو، هه‌ردو په‌رله‌مانتارێن پارتى نازم كه‌بير هه‌ركى و مه‌ردان خدر هێرش كره سه‌ر.
ئه‌ڤرۆ نيوز، نيوار محه‌مه‌د سه‌ليم:
نوكه ئاهێن خوارنێ يێن هه‌موو قه‌زا و ناحيێن دكه‌ڤنه د چارچۆڤێ ماددێ 140 يێن نوكه ب ره‌نگه‌كێ فه‌رمى سه‌ر ب پارێزگه‌ها نه‌ينه‌وا ڤه، كه‌فتنه سه‌ر پارێزگه‌ها دهۆك و ئێدێ ژ مووسل وه‌رناگرن.
موزاحم سه‌عدون، رێڤه‌به‌رێ ناحيا زۆمار بۆ ئه‌ڤرۆ نيوز گۆت: “هه‌تا نوكه ئاهێن خوارنێ يێن قه‌زا زۆمار مابوون و هێشتا ژ سه‌ر ب مووسل ڤه بوون و ئه‌ڤه 9 هه‌يڤه ژى ل وێرێ ناهێنه دان”.
زێده‌تر گۆت: “مه‌شيايه ژ هه‌يڤا دو وه‌ره ئاهێن خوارنێ يێن زۆمار ژى ڤه‌گه‌رينينه سه‌ر پارێزگه‌ها دهۆك و ئێدى يێن وێ ده‌ڤه‌رێ ژى دێ ژ لايێ پارێزگه‌ها دهۆكێ ڤه هێنه دان”.
زێده‌تر گۆت: “پشتى ڤه‌گه‌ريانا ئاهێن خوارنێ يێن شنگال و ره‌بيعه و زۆمار، نوكه يێن هه‌موو وان ده‌ڤه‌رێن دكه‌ڤنه د چارچۆڤێ ماددێ 140 دا يێن ئێخستينه سه‌ر پارێزگه‌ها نه‌ينه‌وا، نوكه دێ ژ لايێ پارێزگه‌ها دهۆك ڤه دان”.
دا زانين ژى كو ئه‌ڤه پێنگاڤه‌كا گه‌له‌ك گرنگه بۆ ڤه‌گه‌ريانا ڤان ده‌ڤه‌ران بۆ سه‌ر هه‌رێما كوردستانێ كو ئه‌ڤه خه‌ونا هه‌موو خه‌لكێ ده‌ڤه‌رێ يه هه‌ر وه‌كو رێڤه‌به‌رێ ناحيا زۆمار دايه زانين.
ئه‌ڤرۆ نيوز:
مه‌سعود بارزانى، سه‌رۆكێ هه‌رێما كوردستانێ ب هه‌لكه‌فتا هاتنا سه‌رێ سالا ئاشوورى و بابلى و جه‌ژنا ئه‌كيتۆ په‌يامه‌ك به‌لاڤكر و تێدا پيرۆزباهيێن خوه ئاراسته‌يى هه‌موو ئاشوورى و كلد و سريانيێن هه‌رێما كوردستانێ و عيراق و جيهانێ كرن.
د ڤێ په‌يامێ دا سه‌رۆك بارزانى جاره‌كا دى داخواز ژ ئاشورى و كلد و سريانيان كر كو هزر د هێلانا وه‌لاتێ خوه نه‌كه‌ن و پشت راست دكه‌ت كو پێشمه‌رگێن قه‌هره‌مانێن كوردستانێ وه‌كو چاوان به‌رى نوكه تيرۆرست ژ ناڤ برينه و پتريا ده‌ڤه‌رێن بن ده‌ستێ دۆژمنێن مرۆڤاتيێ پاقژ كرينه و به‌ره‌ڤانى ژ هه‌موو پێكهاتێن ده‌ڤه‌رێ ئازاد كرينه، د داهاتى دا كوردستانێ دێ هه‌روه‌سا سه‌رومال و وه‌لاتيان پارێزيت.
ده‌قێ په‌ياما سه‌رۆك بارزانى:
به‌ناوی خوای گه‌وره و میهره‌بان
به بۆنه‌ی سه‌ری ساڵی ئاشووری بابلی و جەژنەکانی ئەکیتۆ، پیرۆزباییه‌كی گه‌رم ئاراسته‌ی خوشك و برا ئاشووری و كلدانی و سریانییه‌كانی كوردستان و عێراق و جیهان ده‌كه‌م.
ئەمساڵ لەکاتێکدا بەشداریی لەو جەژنەی ئێوەی خۆشەویست دەکەین کە گەلەکەمان بە هەموو پێکهاتە ئایینی و نەتەوەییەکانییەوە بەورڕووی شەڕێکی داسەپاوی تیرۆریستانی دڕندە و هەڵگرانی بیری نکۆڵیکاری و شۆڤینیزم بۆتەوە و بەهۆیەوە ژمارەیەکی زۆر لە خوشک و برایانی کریستیانی پارێزگای موسڵ لەگەڵ پێکهاتەکانی دیکەی ئەو پارێزگایە ناچار بوونە ماڵ و موڵکی خۆیان بەجێ بهێڵن و ڕوو لە هەرێمی کوردستان بکەن و هەرێمی کوردستانیش وەک هەمیشە نەوایەکی ئارام و ماڵی هەموو لێقەوماوانە و ئەو بەها بەرزانەی گەلەکەمان لە هەموو ناوەندە نێودەوڵەتییەکاندا بۆتە جێی ستایش و پێزانین.
لێرەوە جارێکی دیکە داوا ئێوەی خۆشەویست دەکەم بیر لە بەجێهێشتنی وڵات نەکەنەوە و دڵنیاتان دەکەمەوە کە پێشمەرگە قارەمانەکانی کوردستان وەک چۆن ئێستا تیرۆریستان تێک دەشکێنن و زۆربەی ناوچەداگیرکراوەکانیان لە دوژمنانی مرۆڤایەتی پاک کردۆتەوە و بەرگرییان لە هەموو پێکهاتەکانی ناوچە ئازادکراوەکان کردووە، لە داهاتوویشدا هەروا کوردستان سەروماڵی ئێوە و هەموو هاونیشتیمانییان دەپارێزێت و تیرۆریستانیش هیچ داهاتوویەکیان نییە و هەموو ئەوانەی ناچاربوونە ناوچەکانی خۆیان بەجێ بهێڵن، بە سەربەرزی دەگەڕێنەوە سەر ماڵ و موڵکی خۆیان.
هیوادارم ئێوەی ئازیز هه‌موو ساڵێك له‌ژێر سایه‌ی ئارامی و ئاسووده‌ییدا جه‌ژن و شادییه‌كانتان به خۆشی بگێڕن.
مسعود بارزانی
سه‌رۆكی هه‌رێمی كوردستان
31/3/2015
نيشاندان