ئه‌ڤرۆ نيوز:
ره‌وانگه‌ها مافێن مرۆڤى ل سوريا ئه‌ڤرۆ رۆژا ئێكشه‌مبى توركيا تۆمه‌تبار كر كو رێ يا دايه چه‌كدارێن داعش هێرشێ د سه‌ر ئاخا وێ را بكه‌ته سه‌ر كۆبانێ يا هه‌ڤسنور ل گه‌ل توركيا و ژ لايێ خوه ژى ڤه توركيا ڤان تۆمه‌تان ره‌تدكه‌ت.
ره‌وانگه‌ها مافێن مرۆڤى ئاشكه‌را كر كو ترۆمبێله‌كا مينرێژكرى ل “ده‌رگه‌هێ پينار” يێ سنورێ كۆبانێ ل رۆژا شه‌مبى ته‌قى و ئه‌ڤ ته‌قينه‌يه توركيا پشت راست كرى كو يا ل وێرێ روودايى، به‌لێ ره‌تكر ژى كو ل سه‌ر ئه‌ردێ وان هاتبيته ئه‌نجام دان. سه‌رۆكێ ره‌وانگه‌هێ رامى عه‌بدولره‌حمان توركيا ب “دره‌وين” وه‌سفكر و گۆت: “داعش د رێيا سنورێن وێ را ئه‌ڤ كرياره ئه‌نجام دايه”.
رامى زێده‌تر گۆت: “گه‌لێ سوريا بۆ دو كاران د ناليت؛ ئيران رێ دده‌ته چه‌كداران پشته‌ڤانيا رژێما سوريا بكه‌ن و توركيا ژى رێ ب كه‌سانێن بيانى دده‌ت هه‌ڤكاريا داعش بكه‌ن”.
د هه‌مان ده‌م دا ئه‌ڤ تۆمه‌ته ئاخفتنكه‌رێ ب ناڤێ PYD ژى، نه‌واف خه‌ليل، خستنه پال توركيا و گۆت: “چه‌كدارێن داعش هێرش ژ دو لايان ڤه دكر، به‌لێ ل رۆژا شه‌مبى ژ چار جهان ڤه كر”.
د به‌رامبه‌ر ڤێ چه‌ندێ دا، به‌ياننامه‌كێ ژ حوكمه‌تا توركيا راگه‌هاند كو ئێك ژ هێرشێن خوه‌كوژى ب ترۆمبێله‌كا پرى مين ل لايێ سنورى په‌قى يه، به‌لێ ره‌تكر كو ئه‌و ترۆمبێل د سنورێن توركيا را چووبيته كۆبانێ.
د به‌يانێ دا هاتيه: “ئه‌وێن دبێژن ترۆمبێله‌ك د ده‌رگه‌هين سنورى يێن توركيا را چوويه كۆبانێ و خوه ته‌قانديه “دره‌وه. به‌رى نوكه چو به‌رپرسێن توركيا رانه‌گانديه كو ترۆمبێله‌كا مينرێژكرى ل ناڤ توركيا بيت”
توركيا يا دودله د هه‌ڤكاريكرنا هێزێن هه‌ڤپه‌يمانان دا دژى داعش ئه‌وا روويه‌كێ مه‌زن ژ عيراق و سوريا گرتى، د هه‌مان ده‌م دا هێزێن چه‌كدارێن كورد و پێشمه‌رگه شه‌ره‌كێ دژوار ب پشته‌ڤانيا هه‌ڤپه‌يمانيا نێڤده‌وله‌تى ل گه‌ل دكه‌ن.
ئه‌ڤرۆ نيوز:
شاندێ هه‌رێما كوردستانێ ب سه‌رۆكاتيا نێچيرڤان بارزانى سه‌رۆكێ حوكمه‌تا هه‌رێما كوردستانێ به‌ر ب به‌غدا ب رێ كه‌فت.
ئه‌ڤ شانده دێ بۆ ماوێ رۆژه‌كێ گه‌نگه‌شێ ل سه‌ر كێشێن د ناڤبه‌را هه‌ردو لايان دا كه‌ن و ب تايبه‌ت ژى پرسا په‌ترۆل و مووچێ فه‌رمانبه‌ران.
به‌رى نوكه ژى هه‌ردولايان گه‌شبينيا خوه بۆ سه‌ره‌دانا ڤێ جارێ يا شاندێ هه‌رێما كوردستانێ ده‌ربڕيه، به‌لێ د هه‌مان ده‌م دا، سه‌فين دزه‌يى ئاخفتنكه‌رێ ب ناڤێ حوكمه‌تا هه‌رێما كوردستانێ راگه‌هاند بوو كو ب سه‌ره‌دانه‌كێ كێشه هه‌موو چاره نابن.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمانێ دهۆكێ دێ نيڤ ساهى بيت و نيڤ ئه‌ور و ده‌ليڤا بارانێ يا هه‌يى.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجاڤێ ڤه‌كێشانا پاله‌په‌ستۆيێن بلندێن سيبريا و هاتنا كو سه‌نته‌رێ وێ دكه‌ڤيته سه‌ر ده‌ريا قه‌زوين ل سه‌ر هه‌رێما كوردستانێ سوبه‌هى رۆژا دوشه‌مبى رێكه‌فتى 1\12\2014 پێشبينى دهێته كرن ئه‌سمانێ دهۆكێ نيڤ ئه‌ور بيت و نيڤ ژى ساهى و ده‌ليڤا باران بارينا چپ چپ يا هه‌يى ب تايبه‌ت ل ده‌ڤه‌رێن چيايى.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ ژى يا بلند دێ پيچه‌ك بلند بيت و يا نزم ژى دێ بلند بيت ب ره‌نگه‌كى د ناڤبه‌را شه‌ش بۆ 11 پله دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى باشوورێ رۆژئاڤا بيت ب ره‌نگه‌كى دێ يێ ناڤه‌ندى بيت د ناڤبه‌را پێنج بۆ 20 كليۆمه‌تر د ده‌مژمێره‌كێ و ماوێ ديتنێ ژى دێ هه‌شت بۆ 10 مه‌تر بيت.
ئەڤرۆ:
جێگرا سەرۆکا لژنا قانوونی ل پەرلەمانێ کوردستانێ بۆ ئەڤرۆ دیار کر کو ئەو دێ ھەموو بزاڤان کەن پرۆژە قانوونا “پەسنا فەرمانبەران” ئانکو ھژمارتنا خزمەتا فەرمانبەران یا ئەڤ سالە ب دو سالان بەری ھاتنا سالا نوو پەسەند بکەن.
دکتۆرە بھار مەحموود خویا کر کو خواندنا ئێکێ بۆ ڤێ پرۆژە قانوونێ ھاتیە کرن و بۆ لژنا وان و یا دارایی ھاتیە ھنارتن و پەرلەمان چاڤەرێی راپۆرتێن وانە، دا کو خواندنا دویێ بۆ بکەت.
بھار خانێ ئاشکرا ژی کر کو ھەموو ئەو ئمتیازاتێن ل سالەکا ئاسایی بۆ فەرمانبەری دھێنە ھژمارتن، ل سالا دھێتە زێدەکرن ژی دێ بۆ ھێنە ھژمارتن و گۆت: “دێ بزاڤان کەین بەری ئەڤ وەرزێ قانوون دانانێ ب دووماھی بھێت، ئانکو بەری 1\1\2015 ڤێ پرۆژە قانوونێ پەسەند بکەین و باوەر ناکەم چو ئالی دژ بن”.
ھەژی گۆتنێ یە، ژ بەر قەیرانا دارایی و گیرۆبوونا مووچەی و بھێن فرەھیا فەرمانبەران، پرۆژە قانوونا “پەسنا فەرمانبەران” نوکە ل پەرلەمانی یە و ل گۆڕەی ناڤەرۆکا پرۆژەی، خزمەتا ئەڤ سالە یا فەرمانبەران دێ ب دو سالان ھێتە ھژمارتن.
ئه‌ڤرۆ نيوز:
ب گۆره‌يى نووچه‌يه‌كێ كه‌نالێ سى ئێن ئێن دوهى ل وه‌لاتێ يابان كه‌رنه‌ڤالا سالانه يا ترۆمبێلێن كلاسيك ل باژێرێ ميجى جينگۆ گالن برێڤه‌چوو.
ئەڤرۆ:
دەستەیا بەرەڤانیی و پاراستنا مافێن کێم نەتەوەیان دیار کر کو رۆژا 9\12\2014ی وەکو رۆژا ئازادکرنا شنگالێ ھاتە دەستنیشانکرن و داخوازی دھێتە کرن د ڤێ رۆژێ دا شنگال ژ تیرۆرستان بھێتە رزگارکرن.
سەرۆکێ دەستەیا بەرەڤانی و پاراستنا مافێن کێم نەتەوەیان د بەیاننامەکێ دا دیار کریە کو تیرۆرستان مەزنترین تاوان د دەرھەقێ خەلکێ شنگالێ دا کریە کو ھەتا نوکە ل ھەموو جیھانێ کارێن وەسا ھوڤانە نەھاتینە تۆمارکرن و گۆت “مەژی رۆژا 9\12\2014ی وەکو رۆژا جیھانی یا ئازادکرنا شنگالێ دیارکریە و د ڤێ رۆژێ دا سەرجەم پێدڤیێن ئاوەریان دێ ھێنە دابینکرن”.
ژ ئالیێ خوەڤە میەسەر حەجی قائیمقامێ قەزا شنگال بۆ ئەڤرۆ دیار کر چەند زووترە شنگال بھێتە رزگارکرنا باشترە و دێ زیان کێمتر بن، چونکی زڤستانە و ھەتا نھا وەکو پێدڤی کەلوپەلێن زڤستانێ ل سەر ئاوەریان نەھاتینە بەلاڤکرن و گۆت “ب ڤی ئاوایی رەوشا ئاوەریان دێ دژواتر بیت، لەورا دخوازین لەز د رزگارکرنا شنگالێ دا بھێتە کرن و خەلک ڤەگەرنە سەر مال ومولکێن خوە”.
ئەڤرۆ:
بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ ئەڤرۆ دیار کر کو ئەڤرۆ 30\11\2014 دێ فۆرمێن دامەزراندنا پۆلیسان ل سەر وەلاتیان ھێنە بەلاڤکرن و ھەر کەسێ حەز ھەبیت بلا سەرەدانا رێڤەبەریا پۆلیسان بکەت.
رائید ھێمن سلێمان ئەترووشی دیار کر کو رێڤەبەریا پۆلیسێن پارێزگەھا دھۆکێ دێ ھژمارەکا پۆلیسان دامەزرینیت و گۆت “دڤێت داخوازا دامەزراندنێ بۆ رێڤەبەرێ پۆلیسێن پارێزگەھا دھۆکێ بھێتە نڤیسین و ژیێ کەسێ داخوازا دامەزراندنێ دکەت ژ 18 سالان کێمتر نەبیت و ژ 35 سالان زێدەتر نەبیت و درێژاھی بۆ ژنان ژ 160سم کێمتر نەبیت و بۆ زەلامان ژ 165سم کێمتر نەبیت و کێشا زەلامی ژ 60 کیلۆیا کێمتر نەبیت و کێشا ژنان ژ ٥٥ کیلۆیان کێمتر نەبیت و ھەر دو رەگەزان دڤێت ژ باوەرناما ناڤنجی کێمتر نەبیت و چ کێشێن قانوونی ل سەر نەبن و نەھاتبنە حوکمکرن”.
ھەروەسا ناڤھاتی گۆت “دڤێت رازیبوونا پشکا نەھێلانا گۆنەھباریان و بریارا لیژنا پزیشکی ل سەر لێھاتنا لەشی و چاڤان و ناسناما بارێ شارستانی و رەگەزناما عیراقی و فۆرما خوراکی یا پارێزگەھا دھۆکێ و کارتا پێزانینان و کەفیل ھەبیت”.
ئەڤرۆ:
فەرماندەکێ ھێزێن پشتەڤانیا پێشمەرگێ کوردستانێ ل کۆبانێ دیار کر کو ئەو ھاتینە ئاگەھدارکرن ئەڤرۆ 1\12\2\2014 یان سوبەھی ڤەگەرنە ھەرێما کوردستانێ و گۆت “دوھی 29\11 ھێزێن پێشمەرگەی ب دژوارترین رەنگ بەرسڤا ھێرشێن داعش داینە”.
لیوا عەبدولقھار مەجید دۆسکی، فەرماندێ ھێزێن پشتەڤانیا پێشمەرگێ باشوورێ کوردستانێ ل کۆبانێ ئاشکرا کر، ئەو ھاتبوونە ئاگەھدارکرن کو ل 27\11\2014 ڤەگەرنە ھەرێمێ لێ وەسا چێ نەبوو، و بۆ ئەڤرۆ گۆت “ئەم ھاتینە ئاگەھدارکرن ئەڤرۆ 1\12 یان سوبەھی ڤەگەرینە ھەرێما کوردستانێ”.
دۆسکی خویا ژی کر، شەرێ ھێزێن کوردی د گەل تیرۆرستێن داعش ل کۆبانێ یێ بەردەوامە و شەڤا بۆری ژ سێ لایانڤە تیرۆرستێن داعش ھێرش کرینە و ل لایێ رۆژ ھەلات شەر ھەتا شەڤا ل دووڤ دا ژی یێ بەردەوام بوو، پێشمەرگەی ژی ب دژوارترین رەنگ بەرسڤا ھێرشێن وان دایە و گۆت “ب تنێ دوھی 29\11\2014 نێزیکی 100 تۆپ و مۆشەکان مە تێوەرکرینە”.
وەکو دیار ٢٨/١٠/٢٠١٤ ١٥١ پێشمەرگێن ھێزا پشتەڤان یا ئێک و دو یێن سەر ب وەزارەتا پێشمەرگەی ڤە ب چەکێ گران و ب رێیا تورکیا دەربازی رۆژئاڤایێ کوردستانێ و باژێرێ کۆبانێ بوون.
ئه‌ڤرۆ نيوز:
بۆ جارا ئێكێ ستێرا وه‌رزێ بورى يا كورد د به‌رنامێ ئه‌ره‌ب ئايدول دا ل لوبنانێ، په‌رواز حسێن، ل وێرێ ب رێيا كه‌نالێ mbc داخواز ژ خه‌لكى كر كو ده‌نگێ خوه بده‌نه كوڕێ كوردستانا خوشتڤى چونكو ئه‌و ژ هه‌ژى ناسناڤى يه.
په‌روازێ گۆتژى: “ئه‌ز ل سه‌ر تۆڕا جڤاكيا فه‌يسبۆك و تيويته‌ر و ئينستگرام پشته‌ڤانيا عه‌مارى دكه‌م و حه‌ز دكه‌م ئه‌و ناسناڤى ببه‌ت و هه‌كه ئه‌و ببه‌ت هه‌چه‌كو من برى، چونكو كوڕێ وه‌لاتێ منه”.
ل ده‌سپێكێ ژى عه‌مار كۆفى بخێرهاتن ل په‌روازێ كر بۆ چوونا وێ بۆ به‌رنامه‌يى و سۆپاسيا وێ ژى كر ل سه‌ر پشته‌ڤانيكرنا عه‌مار يا به‌رده‌وام.
نيشاندان