ئەڤرۆ:
پشتی دوھی رۆژناما ئەڤرۆ بەلاڤکری کو ٥٠٠ کورد ل کنارێن ئیتالیا د بێ سەروشوونن، وەلاتێ یونان ب رێیا “غەواسا” ئەو گەمیە ڤەگەراندە ئێک ژ گزیرتێن خوە.
سەعید شنگالی، چالاکڤانێ کۆمەلا جوانێن رەسەن ل وەلاتێ ئەلمانیا بۆ ئەڤرۆ دیار کر کو دوھی سکرتێرا وەزیرا دەرڤە یا ئەلمانیا ئەو ئاگەھدار کرن کو یونانێ ب رێیا غەواسێن خوە ئەو پەنابەرە برینە ئێک ژ گزیرتێن وەلاتێ خوە و ب سلامەتن و گۆت:”یونان وان بۆ تورکیا ناڤەگەرینیت و دێ سەرەدەریا پەنابەران ل گەل کەت”.
ئه‌ڤرۆ نيوز، ناجی به‌ده‌ل:
كاوه عومه‌ر هاریكارێ گشتی یێ پلاندانانێ ل وه‌زراه‌تا په‌روه‌ردا حكومه‌تا هه‌ریما كوردستانێ راگه‌هاند: ل پارێزگه‌ها دهۆكێ ئیك په‌یمانگه‌هـ هه‌یه ئه‌و ژی په‌یمانگه‌ها دهۆكێ و ماموستایێن هاتینه وه‌رگرتن وه‌ك قوتابیێن ئه‌وێ په‌یمانگه‌هێ ته‌ڤایا وان 467 كه‌سن لگوری پسپوریێن جودا جودا هاتینه وه‌رگرتن ژبوی شیانێن وان بهێنه بلندكرن.
ناڤبری دیاركر خواندن تێدا دو سالن ب ره‌نگه‌كێ خولی یه ب دووماهی هاتنا خواندنی یان ده‌رچوونا وان د ئیمتیازاتێن ئیداری وه‌كو یێن باوه‌رنامه‌یین به‌كالوریوس هه‌ین مینا ده‌رماله‌یان و مافێ رێڤه‌به‌ریێ و پێشكێشكرنا سه‌رپه‌رشتیاریێ هه‌یه كو چه‌وا به‌كالیورسی هه‌ی.
كاوه عومه‌ر دیاركر ژی رێژه‌یا 90% یا ئه‌و ماموستایێن ل دهۆكی پێشكێش كرین هاتینه وه‌گرتن ل سه‌ر چه‌ند به‌شان كو به‌شا كوردی 60 كه‌س و به‌شا عه‌ره‌بی 49 و ئیگلیزی 61 و بێكاری 52 و زانست 26 و كومپیوته‌ر 45 و جڤاكى 54 و هونه‌ر 60 و وه‌رزش 60.
ئه‌ڤه ژی ناڤێن ئه‌و ماموستایێن هاتینه وه‌رگرتن:
ئه‌ڤرۆ نيوز:
ژێده‌ره‌كى ژ ناڤا باژێرێ سلێمانيێ بۆ شه‌فه‌ق نيوز راگه‌هاند كو فرۆكا سه‌رۆكێ جڤاتا نوونه‌رێن عيراقێ سه‌ليم جبۆرى ژ ئه‌گه‌رێ كه‌شوهه‌وايى نه‌شيا ل سلێمانيێ داده‌ت.
ئه‌ڤى ژێده‌رى دا زانين ژى كو بالێوێزێ كوێت ل به‌غدا و سه‌رۆكێ جڤاتا نوونه‌رێن عيراقێ سه‌ليم جبورى ل به‌ر بوو ب مه‌ره‌ما سه‌ره‌دانا كه‌مپا عالياوا يا قه‌زا خانه‌قين ل فرۆكخانا سلێمانيێ بهێنه خوار، به‌لێ فرۆكه ژ به‌ر كاودانێن سه‌قايى نه‌شيا ل وێرێ داده‌ت.
كه‌مپا عالياوه ل خانه‌قين ب هزاران كۆچبه‌رێن ده‌ڤه‌رێن ديالا ب خوه ڤه دگريت ئه‌وێن مالێن خوه هێلاين ژ ئه‌گه‌رێ هێرشێن چه‌كدارێن داعش بۆ وان ده‌ڤه‌ران و بووينه مه‌يدانێن شه‌روپێكدادانێ د ناڤبه‌ر چه‌كداران و له‌شكرێ عيراقێ.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى رۆژا ئه‌ينى ئه‌سمانێ دهۆكێ دێ ساهى بيت و ده‌ليڤا باران بارينێ نابيت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ مانا وان پاله‌په‌ستۆيێن نزمێن ده‌ريا ناڤه‌راست بۆ سه‌ر هه‌رێما كوردستانێ پێشبينى دهێته كرن ل دهۆكێ ئه‌سمان دێ ساهى بيت و ده‌ليڤا باران بارينێ نابيت.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ ژى يا بلند دێ پيچه‌كێ بلند بيت و يا نزم ژى دێ نزمتر لێ هێت ژ رۆژێن به‌رى نوكه د ناڤبه‌را 7 بۆ 12 پله.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى باشوورێ رۆژئاڤا بيت ب ره‌نگه‌كى دێ ل سه‌ر خوه بيت د ناڤبه‌را پێنج بۆ 10 كليۆمه‌تر د ده‌مژمێره‌كێ و ماوێ ديتنێ ژى دێ هه‌شت بۆ 10 مه‌تر بيت.
ئه‌ڤرۆ نيوز، بارزان مزووری:
بەرپرسێ لقا 14 ل مووسل ،عصمەت رەجەب ، بۆ ئەڤرو نیوز دیار کر کۆ چەکدارێن تیرورستێن داعش ھەموو کارمەندێن ساخله‌ميێ یێن ناڤ باژێرێ مووسل ئاگەھدار کرینە ژ بەر بکارنەئینانا ھندەک جورێن دەرمانا و نەدانا وان بۆ وەلاتیان، بڕیاردا کو وان دەرمانا بەس بۆ بریندارێن داعش بکاربینن و ب وه‌لاتيان نه‌ده‌ن.
ناڤبری دیار کر کۆ پشتی دانا رێژەیەکا زۆر یا بریندارا ل سکرێ مووسل داعش کەفتینە د رەوشەکا خراب دا تایبەت جورێن دەرمانێن بریندارێن وان پێ دھێنە چارەسەرکرن کێم بووینە .
ئەڤرۆ:
بەرپرسەکێ پارتی دیموکراتی کوردستان ل گەرمیان راگەھاند، میلیشیاتێن شیعی دەست ب سەر ناحیا سەعدیە ل پارێزگەھا دیالا گرتیە و ناھێلن کورد بچنە ناڤا ناحیێ، ھەروەسا دیاردکەت، کو ھادی عامری ب پشتەڤانیا لەشکرێ ئیرانێ بلنداھیێن کۆباشی داگیرکرینە و ئالایێ خوە ل جھێ ئالایێ کوردستانێ بلندکریە، ئەڤە د دەمەکیدایە ھێزێن پێشمەرگەی ل ڤێ دەڤەرێ ھەبووینە و ب ئاگەھداریا فەرماندێن کورد ھاتینە ڤەکێشان.
جەعفەر شێخ مستەفا، بەرپرسێ لقا ١٥ یا پارتی دیموکراتی کوردستان ل گەرمیان بۆ رۆژناما ئەڤرۆ دیارکر، کو شەڕێ رزگارکرنا جەلەولا و سەعدیە ب ھەڤپشکی بوویە و گۆت” مخابن برادەرێن ئێکەتیێ ڤان شەڕان دکەنە موزایەدە و بۆ خوە دەرخستنێ داخویانیان بۆ دەزگەھێن راگەھاندنێ ددەن، پلانا پاقژکرنا ھەردو ناحیێن سەعدیە و جەلەولا پلانەکا ھەڤپشک بوویە و پێشمەرگەیێن ل ڤی میحوەری ، پتریا وان ژ ھەردو لیوایێن ھەڤپشکن ژ پارتی و ئێکەتیێ و برادەرێن پەکەکێ ژی پشکداری ئازادکرنا جەلەولا کریە و نوکە بارەگایێ خوە ڤەکریە، ھەروەسا لەشکرێ عێراقێ و میلیشیاتێن شیعی ژی ل ھندەک دەڤەران پشکدار بووینە، نەکو تنێ ھێزەکێ پشکداری د پاقژکرنا جەلەولا دا ژ داعش کریە، پلان وەسا ھاتبوو دارشتن پێشمەرگە ناحیا جەلەولا پاقژبکەن و لەشکرێ عیراقێ و میلیشیاتێن شیعی ناحیا سەعدیە پاقژ بکەن، بەلێ ل ھندەک دەڤەران تێکەلی ئێکبوون، مخابن میلیشیاتێن شیعی رێ ب ھێزێن کوردی نەدا بچنە ناڤا سەعدیە و پشکداریێ د ئازادکرنا ئەڤێ ناحیێ دا بکەن، بێگومان ئەم ب چو شێوەکی ناحیا جەلەولا چۆل ناکەین و پێشمەرگە ناھێتە ڤەکێشان”.
ل دۆر ئاخڤتێن ھادی عامری سەرکردەیێ میلیشیاتێن شیعی، ئەڤی بەرپرسێ پارتی گۆت” ئەم ھەموو دزانین داعش رێکخراوەکا تیرۆرستیا دڕندەیە، بەلێ ھێشتا داعش ژ ھادی عامری باشترە، ئەڤ سەرکردێ شیعە یێ توندڕەو یێ ھاتیە دەڤەرێ و ب پشتەڤانیا ئیرانێ سەربازگەھەک بناڤێ خوە (ھادی عامری) ل دەڤەرێ ڤەکریە و رۆژەکێ بەری ئازادکرنا جەلەولا و سەعدیە ب پشتەڤانیا ئیرانێ ھادی عامری و میلیشیایێن شیعی ھاتن بلنداھیێن کۆباشی ل نێزیک سەعدیە و ب ئاگەھداریا ھژمارەکا فەرماندەیێن پێشمەرگەی ل دەڤەرێ، ئەو بلنداھی کۆنتڕۆلکرینە و ھێزێن پێشمەرگەی ھاتینە ڤەکێشان، نەە کیلۆمەتر ئەردێ کوردستانێ ژلایێ میلیشیاتێن شیعی ڤە یێن ھاتینە کۆنتڕۆلکرن و ئالایێ خوە ل جھێ ئالایێ کوردستانێ بلندکریە، بۆ ڤێ مەرەمێ مە پەیوەندی ب مەحموود سەنگاوی سەرپەرشتیارێ میحوەرێ (گەرمەسێر)کریە و سەرکردایەتیا پارتی ژی مە ئاگەھدارکریە، چونکی ئەڤ میلیشیاتێن شیعی لەشکرێ ئیرانێ دگەلدایە و ھەتا گۆرەی ھندەک پێزانینان چەکدارێن حزبولا یا لبنانێ ژی ل دەڤەرێ ھاتینە دیتن”.
جەعفەری پتر گۆت” شەڕێ ل دەڤەرا خانەقین، شەڕێ شیعە و سوننەیانە، نوکە شیعە دخوازن سوننەیان دەربکەن ل دەڤەرێ و پشتی سوننەیان کوردان ژی دەربکەن، ئەڤە دو رۆژە ناحیا سەعدیە ھاتیە پاقژکرن، میلیشیاتێن شیعی ب چو شێوەیەکێ رێ نادەن کورد بچنە ناڤا ئەڤێ ناحیێ و خالێن پشکنینێ داناینە، ھەتا رێ نادەن کەنالێن راگەھاندنێ بچنە ناڤ سەعدیە و ھەموو تژی کریە ب وێنەیێن رێبەرێ شۆڕەشا ئیسلامیا ئیرانێ، گۆرەی پێزانینێن مە، ھەنە ل گەل مەحموود سەنگاوی رێککەفتینە کو تنێ کۆمیتە بچیتە سەعدیە، ھەموو خانیێن عەرەبێن سوننە ژی یێن ھاتینە تالانکرن و باژێڕ ھاتیە تێکدان، ئەڤ ناحیە ب تەمامی یا کەفتیە بن کۆنتڕۆلا میلیشیاتێن شیعی و ب ئاشکرا دبێژن نابیت کورد ڤەگەڕێنە سەعدیە”.
ئەڤرۆ:
رێکخراوا داعش یا تیرۆرستی وەکو رێکخراوەکا رێکخستی یا توندرەو پشتی شیای ل وەلاتێ سووریێ چەند دەڤەران کونترۆل بکەت ب تایبەتی باژێرێ رەقە، نەخشەیێ خوە بەرفرەە کر و بەر ب عیراقێ ڤە ھات و چەندین باژێرێن گرنگ کەفتنە ژێر دەستھەلاتا وێ و خیلافەت راگەھاند ، داعش کیە و ژ چو ھزر و ئایدولوژیا ھاتیە، شارەزایەک دیار دکەت کو داعش ئێک ژ ستوونێن گرنگ یێن توندرەو یێن سەلەفیایە.
د. فەرسەت مەرعی مامۆستایێ زانکۆیا دھۆک و شارەزا د وارێ دیرۆکێ دا دیار کر کو داعش ستوونەکا گرنگ یا سەلەفیانە و بۆ رۆژناما ئەڤرۆ گوت” داعش ئێک ژ ستوونێن سەلەفیانە و بالێ وان یێ توندرەوە، کو ئەڤ چەندە بەری چەند سالان ھاتیە پێش و داعش ژ وان دروست بوویە، لێ ھندەک کار و لڤینێن وان وەکو یێن (خەوارجانە) کو د سەردەمێ پێغەمبەرێ ئیسلامێ دا ھەبوون”.
فەرسەت مەرعی ئاماژە ب وێ چەندێ کر کو (ئبن تەیمیە ئەلحەرانی) د دەمێ مەغولان دا خەلک کافر دکر و یا نوکە داعش دکەت ئەوە و گوت” ئبن تەیمیە ئەلحەرانی مەزنێن مەغولان ب کافر ل قەلەم د دان کو دیرۆکا وێ بۆ بەری ٨٠٠ سالان ڤەدگەریت، د ھەمان دەم دا مەغولان ھەموو ستوونێن ئیسلامێ بجە دئینان، لێ ئبن تەیمیەیی ئەو ب دەرکەفتی ژ ئایینی دیتن، داعش ھات ھەمان ھزر و ئایدلوژیا وی بکارئینا و نوو کرەڤە و ئەوێن ل گەل وان نەبیت کافر دبینن”.
د.فەرسەت ئەو چەندە دیارکر کو مەلا کرێکار نێزیکی داعشە و گوت” ل کوردستانێ ھزرا ژ ھەموویان نێزیکتر بۆ داعش یا مەلا کریکارە، چونکی د دەمێ خوە دا ئەڤی کەسی سەربور یێن ھەین ل گەل رێکخستیا قاعیدە و ئەنسار ئەلسونە و ئەنسار ئەلئیسلام، لێ ب چو رەنگان نەشێت کارێ خوە ل کوردستانێ بکەت، چونکی خەلک گەھشتیە وێ راستیێ کو داعش ب ھەموو ھێزا خوە ڤە دژی ھەبوونا مللەتێ کوردە”.
سەلەفی دبێژن ھەر کەسێ حوکمی لمە بکەت ئولی ئەلئەمرێ مەیە، ل دۆر ئەڤێ چەندێ ناڤبری گوت” بۆ نموونە ھەکە خۆدێ نەکەت، سوباھی داعش کوردستانێ داگیر بکەت، ئانکو دێ ئەو ئەبو بەکر بەغدادی ب خەلیفێ خوە دانن و بەیعێ بۆ کەن، چونکی ئە وەسا دیار دکەن کو ھەر چیێ حوکمی لمە بکەت مەزنێ مەیە ژبەر ئەڤێ چەندێ ئەز دبێژم مەترسینە ل سەر جڤاکی”.
دکتور فەرسەتی ئاشکەرا کر کو وەلاتێ سعودیێ ب ھەموو ھێزا خوە ڤە پشتەڤانیا داعش دکەت و ئەڤ چەندە ب دیکیومێنت دبێژین، چونکی سەرژمێری ھاتیە کرن ل وی وەلاتی و پتریا مەزن و بازرگانێن سعودیێ پالپشتی و پشتەڤانیا داعش دکەن، دیسان ناھێـتە ڤەشارتن کو داعش سەید قوتب ژ ئیخوانان وەرگرتیە و پتریا ھزرێن وی بکاردئینیت.
به‌ری چه‌ند رۆژه‌كان خانمه‌ك ل گه‌ل هه‌ڤژێنێ خوه ژ هۆله‌ندا گه‌شته‌ك كرن بۆ كوردستانێ ب مه‌ره‌ما سه‌ره‌دانا برایێ وێ یێ نه‌ساخ، پشتی گه‌هشتینه دهۆكێ، ته‌كسیه‌ك بۆ خوه گرتن كو بۆ پتر ژ جاره‌كێ ل كوردستانی َ بوون، هه‌لبه‌ت ئه‌و ڤێ گرانیێ نزانن كو ژ ئه‌نجامێ بلندبوونا بهایێن سۆته‌مه‌نی یه و نه‌ك قه‌ساتیا شۆفێری له‌ورا ئه‌وان نیگه‌رانیا خوه دیار بۆ شۆفێری دیاركرن، له‌ورا ئه‌وی ژی بۆ وان دیاركر كو ئه‌و پێشمه‌رگه‌یه و و هه‌مان رۆژێ ژ ئه‌ركێ خوه ڤه‌گه‌ریایه و هێشتا چانتكا وی د سندۆقا ترومبێلێ دایه و هێشتا نه‌چوویه مال ناڤ زارۆیێن خوه دا ب ده‌ستڤالا، چونكو ره‌وشا وان یا كێمده‌رامه‌ته و خوارن تێرا زارۆیێن وی ناكه‌ت، ژ به‌ر بارودۆخێن خراب یێن كوردستان تێدا دبۆریت، ئه‌و هه‌یامه‌ك بوو نه‌زڤریه مال و ل سه‌ر ته‌كسیێ شۆله‌نه‌كریه وه‌كو هه‌ر جار بۆ دابینكرنا ژیانه‌كا هێژا وه گۆت كو ئه‌وێ ژ خودێ رازیه كو ره‌وشا وی ژ گه‌له‌ك هه‌ڤالێن وی باشتره ژ ئه‌وێن هنده‌كان كو نه‌ڤیاین بزڤرنه ده‌ستووردانێن بێڤه‌دانا خوه، چونكو نه‌شێن بچووكترین پێدڤیێن ژیانێ بۆ زارۆێن خوه دابیبن بكه‌ن، له‌ورا وان خواست بمیننه ل به‌ره‌ی ل شوونا هندێ كو ده‌ستڤالا بزڤرنه مال، له‌ورا ئه‌وێ خانمێ شه‌رم ژخوه كر و داخوازا لێبۆرینێ ژێ كر و رابوو گۆژمه‌كێ دراڤی وه‌كو ب هاریكاریا مرۆڤاتی دایێ، لێ ئه‌وی سویند خار كو ژ بلی كرێیا ته‌كسیێ زێده‌تر وه‌رنه‌گریت كو ئه‌و نه‌خوازۆكه و ئه‌وی نه‌ڤێنت كه‌س خێرا پێ بكه‌ت. ئه‌ڤ چیرۆكه و گه‌له‌كێن وه‌كی وێ هایدانا مه دكه‌ن یان مه نه‌چار دكه‌ن كو ب راوه‌ستین ل به‌رامبه‌ر هه‌ر كه‌سێ ناڤێ وی د ناڤ تۆمارا پێشمه‌رگه‌ی دا نه‌بیت و ب گه‌نده‌لی كو گه‌له‌ك یێ دووره ژ خه‌بات و فیداركاریێ و ده‌رده‌سه‌ریان و ئه‌رك و ده‌وامێ و مووچێ خوه وه‌ردگرن هه‌ر وه‌كو ئه‌ڤ پێشمه‌رگێ قاره‌مان، دبیت ژی پتر وه‌ربگریت، ژ به‌ر وان سالێن خزمه‌تێ یێن ب سه‌ختی بۆ دهێنه نڤیسین و به‌رپرسه‌كێ ژ وی گه‌نده‌لتر دیده‌ڤانیێ بۆ دكه‌ت، ب راستی هه‌ژمارا ڤان كه‌سێن ئه‌ز ددانم خوینمێژێن پێشمه‌رگان كێمتر نینن لێ ره‌نگه بگه‌هیته هزاران، چونكو د راپۆرته‌كا كه‌نالێ رووداو دا ئه‌ڤ بابه‌ته به‌ری چه‌ند رۆژه‌كان هاتبوو وه‌شاندن، داخۆیانیه‌كا ئه‌ندامه‌كێ لژنا نه‌زاهه‌تێ (عمر سالح) یا سه‌ر ب په‌رله‌مانی ڤه دیاركر كو 100 ملیار دینار دهێنه مه‌زاختن بۆ مووچه‌یێن وان كه‌سان ل هه‌ر سێ پارێزگه‌هان بێی جوداهی و ب وه‌كهه‌ڤی، هه‌ر د وێ بیاڤی دا ژێده‌ره‌كی ل وه‌زارتا ناڤخوه‌یی یا عیراقی دیاركر كو 200 هزار كه‌سێن ئاشۆپ سه‌ر ب وێڤه‌نه د ناڤ رێزێن له‌شكری و ئاسایشێ دا ( ژ وان ژی كورد هه‌نه) مووچه سالانه ب ملیاران دهێنه مه‌زاختن، وه‌رن ئه‌م هزر بكه‌ین هه‌كه ئه‌ڤ دراڤه ب تنێ بهێنه پارڤه‌كرن ل سه‌ر پێشمه‌رگێن دروست دێ ژیانا وان یا چاوا بیت خۆش و ته‌نا؟
خۆیایه كو ئێك ژ وان ئه‌گه‌رێن سه‌ره‌كی یێن حزبان، خۆیایه كو ئێك ژ وان ئه‌گه‌رێن سه‌ره‌كی یێن ڤێ سیاسه‌تا گه‌نده‌ل برێڤه‌دبه‌ن، بۆ هندێ یه كو هه‌ژماره‌كا مه‌زنتر ژ لایه‌نگیر ده‌نگده‌ران بده‌ستڤه‌بینن و ئه‌ز یا پشتراستن كو هنده‌ك حزب هه‌نه پێدڤی راكێشانا ده‌نگده‌ران نینه چونكو دیرۆك و خه‌باتا وان تێرا هه‌یه كو پرانیا جه‌ماوه‌ری لێ خرڤه‌ببن و هه‌كه ره‌ڤین و رووۆكه‌فتن و ساڕیه‌ك هه‌بیت، مسۆگه‌ر پتریا جاران ژ به‌ر ڤێ گه‌نده‌لیێ یه ئه‌وا دهێته كرن، له‌ورا بلا پێداچوونه‌كێ د سیاسه‌تا خوه دا بكه‌ن، هه‌كه ئه‌و ڤان كه‌سێن ئینتیهازی ژ ده‌ست بده‌ن، ل شوونێ دێ هزاران سه‌رفه‌مه‌ندان بده‌ستڤه‌ئینن، دێ وان كه‌سان بده‌ستخوه ئێخن یێن دبنه پشتا وان و هه‌ر كه‌سێ پاراستنا كوردستانێ ب خوین و گیانێ خوه بكه‌ت، دا كو مافێ خودانێ بده‌ینێ و كه‌سێن گه‌نده‌ل رسوا بكه‌ین هه‌تا هه‌تایێ چونكو پشتی روودانێن دووماهیێ یێن بۆ سه‌لماندین كو بێی پێشمه‌رگه‌ی ئه‌م چو نائینین، پێدڤیه ل سه‌ر مه ئه‌م ڤێ خینمێژیێ نه‌هێلین.
و: ئه‌ڤرۆ
راستی حه‌تا ئه‌ڤرۆژی هژماره‌ك سیاسه‌تمه‌دارێن كوردستانێ و هنده‌ك چاڤدێرێن سیاسیێن كورد و بیانی ب چاڤه‌ك پر ژ گومان سه‌حدكه‌نه هه‌ڵوێستێن سیاسیێن ئه‌نقه‌ره و د ناڤ شرۆڤه‌كرنه‌كا پر ژ دوودلی و رارایی دا دژین و نكارن ب دروستی ڤه‌رێژ و مه‌ره‌مێن نه‌رمه دپلوماسییه‌تا توركیا بزانن و سه‌ره‌داڤێن ئارمانجێن وان بده‌ست بینن، لێ ده‌مێ هزرێن خوه ل ئه‌وان پێنگاڤێن كو حكومه‌تا داود ئۆغلۆ ژ نشكاڤه دهاڤێت دكه‌ن، دوچاری هنه‌ك راستیان دبن كو نه دكارن رابگه‌هینن و نه دشێن ڤه‌شێرن، له‌ورا ژ بۆ ب ده‌ست ڤه‌ئینانا نیڤ ئه‌نجامه‌كێ كۆمه‌كا شرۆڤه و پێشنیار و مه‌گرتییان ته‌خمین دكه‌ن و د ناڤبه‌را بێده‌نگیێ و چاڤدێریێ و ژ ڤانداریێ دا ته‌ڤنێ خوه ڤه‌دده‌ن. بۆ نموونه د بیاڤێ پرۆسه‌یا ئاشتیێ دا حوكمه‌تا ئه‌ردوغان – ئۆغلۆی ب دوو پیڤه‌رێن جودا و دوو رووبه‌رێن جودا پرۆژه و نه‌خشه‌رێكێن خوه پێشكێش دكه‌ت. سیاسه‌ت و پرۆسه‌یا شه‌ر و ئاشتێی ل باكۆرێ كوردستانێ گه‌له‌كا جودایه ل گه‌ل دپلۆماسیه‌تا ئاشتێی و پێكڤه‌ژیانا ئابووری و پاراستنا به‌رژه‌وه‌ندیێن گه‌ل و میلله‌تێن ده‌ڤه‌رێ. ل دوف دیتنا مه داود ئۆغلۆ سه‌رۆك وه‌زیرێن توركیا ده‌مه‌ك درێژه دخوازیت باشۆرێ كوردستانێ، ئانكو حوكمه‌تا هه‌رێما كوردستانێ زێده‌تر خوه ب فه‌لسه‌فه‌یه‌ك ئابووری و ئایدیالۆژیه‌ك ئیكۆنۆمیست گرێ بده‌ت، نه‌وه‌ك ناسیونالیزما نه‌ته‌وه‌یی و پان كوردستانیزم، له‌وا ده‌مێ بنگه‌ه و په‌یامێن ده‌وله‌تبوون و سه‌رخه‌بوونێ ژ لایێ سه‌ركردایه‌تیا بزاڤا رزگاریخوازا كوردستانێ دهێته قایم كرن و هه‌وڵێن ئازادبونێ تێن راگه‌هاندن، توركیا ژ پان ئیسلامیزیما خوه پوشمان دبیت و ئه‌و ژی ناسیونالیزمانه پێكوڵا سفركرنا پرۆبلێمێن و وه‌ڵاتێ خوه ل گه‌ل ده‌وروبه‌ر و جیهانێ دده‌ت. حوكمه‌تا توركیا دخو+ازیت ل باكۆرێ كوردستانێ چه‌ك و بزاڤا چه‌كداری بهێت یاساغ و حه‌رامكرن ، خونیشاندان و راگه‌هاندنا سه‌رخه‌بوونا باژێرڤانی و كارگێریا گوند و باژێركان و دامه‌زراندنا دادگه‌هێن خوه جهی بهێنه راوه‌ستاندن و ته‌ڤایا پارت و رێكخراوێن سیاسی و چه‌كداریێن باكورێ كوردستانێ بهێنه چه‌ككرن و ئێدی حه‌تا حه‌تا شه‌ر بهێته حه‌رامكرن . لێ به‌لێ ل باشۆر هه‌ر هه‌می ئارامی و سه‌قامگیری و ئاشته‌ڤایێ دخوازن و هه‌وڵ دده‌ن پیترۆلیزما باشۆرێ كوردستانێ ژ بۆ سه‌روه‌ری و سه‌رخوه‌بوون و ده‌وڵه‌تبوونا كوردان بهێته مه‌زاختن. رۆژا ئینیا بووری به‌رێز داود ئۆغلۆ نڤێژه‌كا ب جماعه‌ت ل پایته‌ختێ هه‌رێما كوردستانێ ل باژێرێ هه‌ڤلێرێ ل گه‌ل حه‌شامه‌تا خه‌لكێ هه‌ڤلێرێ ئه‌نجامدا و راگه‌هاند كو كوردستان و هه‌ڤلێر بۆ توركیا هێلێن سوورن و وه‌كی توركیا دهێنه پاراستن. سه‌ره‌دانا به‌رێز داود ئۆغلۆی بو عیراق و هه‌ڤلێرێ و ئه‌نجامدانا نڤێژا جومعێ ل مزگه‌فتا جه‌لیل خه‌یاتی ل هه‌ڤلێرا پایته‌خت، تنێ په‌یامه‌ك نینه بو كوردان، به‌لكی كه‌پسول و ده‌رمانه‌كێ ئارامبه‌خشه و هه‌یام هه‌یام ئه‌م پێدڤینه نه‌فه‌س و گیانێ كوردینیێ پێَبپارێزین.
نيشاندان