ئەڤرۆ:
د راپۆرتەکا شرۆڤەکاری دا کو ڤەگێر سەعدولا بۆ رۆژناما ئەڤرۆ بەرھەڤکریە ئاماژە ب وێ چەندێ کریە کو پشتی رزگارکرنا چەند دەڤەرەکێن بەرفرەە ل دەردۆرێن مووسلێ ژلایێ پێشمەرگەی ڤە، رۆژ بۆ رۆژێ بابەتێ رزگارکرنا مووسلێ د ناڤ میدیایێ دا گەرمتر دبیت و بەحسێ رۆلێ پێشمەرگەی د ئازادکرنا مووسلێ دا دھێتـە کرن ب تایبەتی ژی کو نوکە ژلایێ رۆژھەلاتێ ڤە ل چیایێ زەرتک پێشمەرگە ب تنێ 13 کیلۆمەتران ژ مووسلێ دوورە.
ب رەنگەکێ گشتی جادا کوردی ل دژی وێ چەندێ یە پێشمەرگێن کورد پشکداریێ د شەرێ ئازادکرنا مووسلێ دا بکەن و دبێژن بلا خوینا کوردان بۆ ئازادکرنا ئاخا عەرەبان نەھێتە رشتن، بەرامبەر وێ چەندێ بشار کیکی سەرۆکێ ئەنجومەنێ پارێزگەھا نەینەوا د داخویانیەکێ دا بۆ رۆژناما ئەڤرۆ دبێژیت” ب بۆچوونا من پێدڤیە پێشمەرگە پشکداریێ د شەرێ ئازادکرنا مووسلێ دا بکەن، ژ بەر کو 30% ژ خەلکێ مووسلێ کوردن و ھندی تیرۆر د ناڤ مووسلێ دا بمینیت، دێ بیتە مەترسی بۆ سەر ھەرێما کوردستانێ ژی”.
ژبلی وێ چەندێ کو پشکداری و نە پشکداریا پێشمەرگەی د شەرێ ئازادکرنا مووسلێ دا بوویە جھێ دانوستاندنێ، ھەکە ھاتوو بریارا وێ چەندێ ھاتە دان کو پێشمەرگە پشکداریێ د شەرێ مووسلێ دا بکەت، شێوازێ پشکداریا پێشمەرگەی ژی د وی شەری دا بوویە جھێ دانوستاندنێ.
ل دۆر شێوازێ پشکداریا پێشمەرگەی د شەرێ ئازادکرنا مووسلێ دا، ئەسیل نوجێفی پارێزگارێ نەینەوا بۆ رۆژناما ئەڤرۆ گۆت”مە ھەماھەنگی یا ل گەل حوکمەتا ھەرێما کوردستانێ ھەی و پێشمەرگە دێ پشکداریێ د شەرێ ئازادکرنا مووسلێ دا کەت، لێ ناچیتە د ناڤ مووسل دا، بەلکو ل دەرڤەی باژێری دێ وەکو ھێزا پشتەڤان بیت بۆ ھێزێن مووسلێ یێن کو دێ پشکداریێ د شەرێ رزگارکرنێ دا کەن”.
ل دۆر وێ چەندێ کا بۆچی پێشمەرگە نەچیتە د ناڤ مووسلێ دا، ئەسیل نوجێفی دبێژیت”ھەتا کو چو حەساسیەت پەیدا نەبن و داعش ژی وەکو شەرەکێ تایفی، یان نەتەوەیی بۆ خوە بکار نەئینیت”.
ژ لایێ خوە ڤە پەرلەمانتارێ کورد ل پەرلەمانێ عیراقێ بەختیار شاوەیس بۆ خەندان دبێژیت “بەری دەستپێکرنا پرۆسا رزگارکرنا مووسلێ، پێدڤیە حوکمەتا کوردستانێ بۆ پشکداری پێکرنا ھێزا پێشمەرگەی د وی شەری دا، رێککەفتنێ ل گەل بەغدا بکەت و لایەنێ سیێ ژی کو پێدڤیە لایەنەکێ نێڤدەولەتی بیت ئامادە بیت د وێ رێککەفتنێ دا”.
ژ لایەکێ دی ڤە، پەرلەمانتارا کورد ل پەرلەمانێ عیراقێ سۆزان بەکر دبێژیت”ھەتا مادێ 140ێ ژ دستوورێ عیراقێ نەھێتە بجھئینان و ناسناما کوردستانی ب ھندەک دەڤەران نەھێتە دان و پێشمەرگە ژلایێ بەغدا ڤە نەھێتە پرچەککرن، پێشمەرگە پشکداریێ د شەرێ ئازادکرنا مووسلێ دا ناکەت”.
پارێزگارێ نەینەوا دبێژیت ئەو ناخوازن ھێزێن حەشد شەعبی یێن شیعی پشکداریێ د شەرێ ئازادکرنا مووسلێ دا بکەن و ھێزێن مووسل ب خوە ژی کو ئەڤە چەند ھەیڤەکە راھێنان دکەن نەشێن ب تنێ مووسلێ رزگار بکەن، لەوما رەنگە پێدڤی ب ھێزەکا دی یا دەرڤەی پارێزگەھێ بن و گەلەک سیاسەتمەدارێن سوننی یێن مووسلێ ھاتنا لەشکرێ ئەمریکی بۆ رزگارکرنا وی باژێری ب چارەسەریێن گەلەک باش دبینن، لێ حوکمەتا عیراقێ کو شیعە سەرۆکاتیا وێ دکەن، قەبوول ناکەن ب رەنگەکێ فەرمی داخواز ژ ئەمریکا بھێتە کرن بۆ پشکداریێ د رزگارکرنا مووسلێ دا، لەوما رەنگە ل دووماھیێ ل سەر دو دلیا کوردان ڕا پێشمەرگە ھەر پشکداریێ د ئازادکرنا مووسلێ دا بکەت و بشار کیکی دبێژیت”ھەکە ھێزێن ھەڤپەیمانان داخوازێ ژ حوکمەتا ھەرێما کوردستانێ بکەن کو پێشمەرگە د شەرێ مووسلێ دا پشکدار بیت، باوەر ناکەم حوکمەتا کوردستانێ وێ داخوازێ رەت بکەن”.