ئه‌ڤه‌ ئیسلاما سیاسی ل ده‌ڤه‌رێ په‌یدا بووی(ل كوردستانێ ده‌ستپێكا سالێن 1980 و ل ده‌ڤه‌رێ پشتی سه‌ركه‌فاتا شۆره‌شا ئیرانێ 1979ێ) ته‌ناهی ل ده‌ڤه‌رێ بوویه‌ خه‌ونه‌كا دوور ده‌راز و كار ل سه‌ر تێكدانا پێكڤه‌ژیان و هه‌ڤ په‌ژراندن د ناڤبه‌را پێكهاته‌یێن جڤاكی دا كریه‌ و پیرۆزیێن ئۆلی و مه‌زهه‌بی یێن نه‌ سه‌ر ب ڤێ ره‌وتێ ڤه‌ ئه‌تك كرنه‌ ب تایبه‌ت یێن برایێن كریستیان و ئێزدی. راسته‌ ئه‌ڤ ره‌وته‌(ئیسلاماسیاسی) هێشتا ل كوردستانێ نه‌بوویه‌ خوه‌دی هێزه‌كا بالاده‌ست و ئه‌ڤا ل مسرێ و وه‌لاتێن دنێن ده‌ڤه‌رێ دكه‌ن، نه‌كارینه‌ ل كوردستانێ ئه‌نجام بده‌ن، ئه‌و ژی نه‌كو ئه‌ڤ ره‌وته‌ یێ خوه‌دی ئایدولۆجیه‌ك و جیهانبینیه‌كا جودایه‌؛ نه‌خێر به‌لكو جڤاكا كوردستانێ خوه‌دی كولتۆره‌كێ هه‌ڤ په‌ژراندن و مرۆڤ دوسته‌، یا دن مه‌ چ كێشه‌ د گه‌ل نه‌ته‌وه‌ و ئولێن دن نینه‌ و كێشا مه‌ كێشه‌ك نه‌ته‌وه‌ی یه‌ و پارتێن سیاسی ل كوردستانێ ته‌ڤ د كوردستانینه‌ و ل سه‌ر پرسا هه‌ڤ په‌ژراندن و پێكڤه‌ژیانێ كاردكه‌ن و ب تایبه‌ن پارتی دیمۆكراتی كوردستان كو ئه‌ڤه‌ پتره‌ ژ 60سالان خه‌بات ل سه‌ر ڤی ته‌وه‌ری كریه‌ و كادرێن پێشكه‌فتی و خودان بریار ژ نه‌ته‌وه‌ و ئولێن دن د ناڤ رێزێن وێ دا گه‌هه‌شتنه‌ پلێن هه‌ری بلند و گه‌له‌ك ژ وان د پێخه‌مه‌تا ڤێ سیاسه‌تا راست دا شه‌هید بوونه‌ یێن وه‌كه‌ شه‌هیدێ سه‌ركرده‌ هورمز مه‌لك چكۆ و مه‌حموود ئێزدی و چه‌ندین شه‌هیدێن دن و ب ڤێ سیاسه‌تا پێكڤه‌ژیان و هه‌ڤ په‌ژرنادنێ ئه‌ڤرۆ كوردستان بوویه‌ مێرگه‌كا ئارام بۆ ته‌ڤ ئتن و پێكهاته‌یێن عیراقێ و ب تایبه‌ت بۆ عه‌ره‌بێن سوننه‌ كو ئه‌و نه‌ ل وێ باوه‌رێ بوون ئه‌و بكارن بێی سه‌رگێژی ل كوردستانێ ئاكنجی ببن. چونكو ئه‌و هه‌تا كه‌فتنا رژێما سه‌ددامێ دراكۆلا(9. 04. 2003) به‌رپرسێن ته‌ڤ كاره‌ساتێن ب سه‌ر گه‌لێ كوردستانێ دا هاتینه‌ و ب تایبه‌ت ئه‌نفال و ب عه‌ره‌بكرنا كوردستانێ. لێ ده‌ما شه‌رێ ناڤخوه‌ په‌یدابووی، ب ترسڤه‌ به‌رێ خوه‌دانه‌ كوردستانێ و چاڤه‌رێی تولڤه‌كرنێ بوون، كو كورد تولا سیاسه‌تا شۆڤینیا وان بكه‌ن و ژیانێ لێ بكه‌ن هزره‌ت!! لێ به‌رۆڤاژی ب سینگه‌ك فره‌ه هاتنه‌ پێشوازی كرن. هه‌رچه‌نده‌ تولڤه‌كرن شرینه‌ وه‌كی ئه‌لمان دبێژن، لێ د كولتۆرێ كوردان دا تول ژ كه‌سێن لێ قه‌ومی ناهێت ستاندن و به‌لكو هاریكاریێ پێشكه‌ش دكه‌ن. به‌لێ ل جه‌م ملله‌تێن دن ئه‌ڤه‌ به‌رچاڤ ناكه‌ڤت و هه‌رده‌ما بیڤا خوه‌ دیتن، ده‌ستێ تولهلدانێ دوه‌شینن هه‌روه‌كو سۆگمان ته‌لهلیانێ ئه‌رمه‌نی ل به‌رلینێ 1921ێَ بیڤا خوه‌ دیتی و ته‌لعه‌ت پاشایێ ده‌ست د كوشتارگه‌ها ئه‌رمه‌نیان دا هه‌ی كوشتی و ماینه‌ ب دوڤ وان كه‌سان ڤه‌ یێن ده‌ست د كوشتارگه‌هێن ئه‌رمانیاندا هه‌ین؛ هه‌روه‌سا گه‌لێ ئیسرائیلی ژی سیاسه‌تا تولهلدانێ ل دژی نازیان په‌یاده‌ كریه‌ لێ مه‌ كوردان!! مه‌ كوردستان كریه‌ چاهێرا ئه‌نفالچیان و عه‌ره‌بێن شۆڤینی و ئیسلامیێن هزر داعش!! مه‌ ل ژوور گوتیه‌ كو تولهلدانێ جهێ خوه‌ د كولتۆرێ كوردی دا نه‌گرتیه‌ لێ وه‌كو دبێژن: جام تژی بوو دێ ژێ رشت و ب كاره‌ساتا شنگالێ جامێ بێهنفرهه‌یی یا كوردستانیان پر بوویه‌ و بپه‌قینا هه‌ولێرێ(19،11،2014) دڤێت ب سه‌ردا بچت و ئه‌مژی ل هنده‌ك چاره‌یان بگه‌رهین كو ئێدی كوردستان نه‌بت چاهێرا بكوژێن گه‌لێ كوردستانێ. خوه‌ش به‌ختانه‌ پێر عسه‌ت ره‌جه‌ب به‌رپرسێ لقا چارده‌ یێ پارتی دیمۆكراتی كوردستان بۆ مالپه‌رێ خه‌ندان راگه‌هاند: كو ل ڤان دووماهیان دا چه‌ند یه‌كه‌یێن چه‌كدار هاتنه‌ دروستكرن بۆ كوشتنا وان كه‌سان یێن بازرگانیێ ب كه‌چێن كوردێن ئێزدی دكه‌ن. ئه‌ڤه‌ نوچه‌یه‌كا مژده‌ به‌خشه‌ كو كوردستانی ژی مینا گه‌لێن جیهانێ ده‌ست ب تولهلدانێ بكه‌ن ل دژی وان كه‌سێن ده‌ست د كوشتارگه‌هێن گه‌لێ كوردستانێ دا هه‌ین، بكه‌ت. لێ دیسا نابت ب چ ره‌نگان تولهلدان جهێ كولتۆێ پیكڤه‌ژیان و هه‌ڤپه‌ژراندنێ بگرت.

ب درێژیا دیروكێ دا توركیا هه‌ر ل سه‌ر ده‌مێ ئه‌تاتوركی وده‌سهه‌لاتێن توركیێ یێن ل دووڤ ئێك ئارمانجێن وێ یێن سه‌ره‌كی دژاتی و ژناڤبرنا كوردانه‌ ل هه‌ر جهه‌كی كو ب هه‌ر شێوه‌كی ناهێلیت ئه‌ڤ ملله‌تێ تووشی چه‌ندین كاره‌ساتان بووی بگه‌هیته‌ مافێن خوه‌ كو ژ به‌ر ڤێ چه‌ندێ هه‌می بزاڤێن خوه‌ خستینه‌ كاری ل سه‌ر ئاستێ ناڤخوه‌یی بیت یان ده‌ردوری بیت كو هه‌ر ده‌م كوردستانێ دكه‌ته‌ جهێ ململان و په‌رزنینا كێشه‌یێن خوه‌، هه‌ر ژ به‌ر ڤێ چه‌ندێ چه‌ندین شۆره‌ش و سه‌رهلدانێن ملله‌تێ كورد ژناڤبرینه‌ و سه‌ركوتكرینه‌، هه‌ر ژ به‌ر ئارمانجێن خوه‌ چه‌ندین داگێران بۆ چه‌ندین لایه‌ن وه‌لاتان كرینه‌. بۆ زانین توركیا ژ ئه‌نداكه‌كا قولپا نیتۆ یه‌، به‌س وه‌كو دیار نه‌یا پێگیره‌ ب رێنه‌مایێن ڤێ قولپێ و هه‌رده‌م كار دكه‌ت پێچه‌وانه‌ی وێ كو ئه‌ڤ چه‌نده‌ بوویه‌ جهێ دلگرانی و نه‌لره‌حه‌تیا زۆربه‌ی ئه‌ندامێن ڤێ قولپێ و ژبه‌ر هندێ كو هێشتا نه‌بوویه‌ ئه‌ندام د ناڤا بازارێ هه‌ڤپشكێ ئه‌ورۆپی دا ئه‌و ژی ژ به‌ر نه‌چاره‌سه‌ركرنا كێشه‌یا كوردی یه‌ ل توركیێ چونكو برینا سه‌ره‌كی ل توركیا پرسا كوری، هه‌روه‌سا داگیركرنا قوبرسێ یه‌ و پێشێلكرنا مافێ مرۆڤ و ده‌ستێوه‌ردانێن وێ د وه‌لاتێن ده‌ره‌كی دا ب بهانه‌یا چه‌كدارێن په‌كه‌كێ ژبه‌ر كو ئه‌و دانیت كو په‌كه‌كه‌ تیرۆرسته‌. لێ تیرۆرستێن داعش ئه‌وێن ئه‌و هاریكاریا وێ دكه‌ن خودانا كۆمكوژی و جینۆساید و بن پێ كرن و پێشێلكرنا مافێ مرۆڤی نه‌تیرۆرسته‌،لێ باوه‌ر توركیا ژی دێ د ڤی ئاگریدا كه‌لێن، چونكو ئه‌ڤ هه‌ڤیره‌ دێ گه‌له‌ك ئاڤێ ڤه‌خۆت. هه‌ر وه‌سا ژبه‌ر كوردان توركیا ل سالا2003 ێ رێك نه‌ دا ئه‌مریكا و هه‌ڤپه‌یمانێن وێ بۆ لێدان و ژناڤبرنا رژێما سه‌دام حوسێنی. گومان تێدا نینه‌ كو توركیا و هه‌ردو رژێمێن ئیراق و سووریێ هانده‌ر و هاریكار و رێكخۆشكه‌ر بوون بۆ هاتنا داعشێ بۆ ناڤ ئاخا ئیراقێ ب گشتی و ده‌ڤه‌رێن هه‌رێمێ یێن كوردنشین ب تایبه‌تی و پیلانێن وێ ل ڤێ داویێ ژبۆ دۆرچێچكرنا باژێرێ ۆراگرێ كۆبانێ ژ لایێ چه‌ته‌یێن داعشێ ڤه‌ كو نه‌دووره‌ كومكوژی لێ روودابانه‌ ل سه‌ر ده‌ستێن ڤان چه‌تان هه‌كه‌ پێشمه‌رگه‌ هانێ نه‌چووبانه‌. هه‌روه‌سا نه‌چوونا توركیێ ل ده‌ستپێكێ بۆ ناڤ قولپا هاتیه‌ پێكئینان ب سه‌رۆكاتیا ئه‌مریكا دژی داعش كو ل ڤێ داویێ ب بریاره‌كا په‌رله‌مانێ توركیێ كو رازی بووی خوه‌ بده‌ته‌ ل گه‌ل ڤێ قولپێ چونكو ئه‌و نه‌شێت خوه‌ دووربێخیت ژ ڤێ قولپێ به‌س ئه‌و ژی ب هنده‌ك مه‌رجان ئێك ژ وان كو سنۆرێن عیراقێ و سووریێ ببه‌زینیت، لێ هه‌ر ئه‌ڤ رژێما فاشت نه‌جهێ باوه‌ریێ یه‌ و هه‌تا نها چ بۆ ڤێ قولپێ نه‌كریه‌ و كوردان گه‌له‌ك سه‌ربۆرێن هه‌نه‌ دگه‌ل نه‌ڤیێن ئه‌تاتوركی كو نه‌خودان هه‌لویسته‌ ب تایبه‌تی سه‌باره‌ت هه‌ر بریاره‌كا گرێدای پرسا كوردی و دبه‌رژه‌وه‌ندیا كودان دابیت. وه‌ك ئه‌م دبینین ئه‌و هه‌ر ده‌م دبیته‌ ئه‌گه‌رێ هه‌لوه‌شاندنا ئاگر به‌ستێن د ناڤبه‌را وێ و په‌كه‌كێ دا و چێكرنا ئاسته‌نگان د رێیا پێڤاژۆیا ئاشتیێ دا. لێ بلا توركیا باش بزانیت كو ئه‌و نه‌شێت بزاڤا كوردان لاواز بكه‌ت. ئه‌ڤجا وێ ب فه‌ر دیت كو بۆخوه‌ چه‌ته‌یێن داعش ب ئاڤرینیت و خوه‌ ل گه‌ل بكه‌ته‌ بانه‌ك و باگوردانه‌ك و سۆرێن خوه‌بۆ ڤه‌كه‌ت هاریكاریا وێ بكه‌ت ژ لایێ لۆجستی ڤه‌ و ژ هه‌می لایان ڤه‌ كو وه‌سا هزر دكه‌ت ئه‌ڤ داعشه‌ باشترین چه‌كه‌ د ده‌ستێن وێ دا ل ڤی سه‌رده‌می بۆ لاوازكرنا كوردێن عیراقێ و سووریێ و توركیێ مه‌ره‌م ژ هندێ دا نه‌هێلیت بگه‌هنه‌ مافێن خوه‌ یێن ره‌وا و راگه‌هاندنا ده‌وله‌تا كوردی د ئایه‌نده‌ی دا. یا ژهه‌میێ خرابتر كو توركیا ب هه‌ر ئاوایه‌كی نه‌ڤێت كو گوه ل په‌یڤا كوردستانێ ببیت كو په‌یڤه‌كا نه‌دل ڤه‌كه‌ره‌ ل جه‌م وان كو هه‌ر ده‌م راگه‌هاندنا وێ دبه‌لاڤكرنا نۆچه‌یێن خوه‌ یێن خه‌به‌ری دا و د هه‌ر خرڤه‌بوونه‌ك كوربه‌نده‌كی دا دبێژیت ده‌سهه‌لاتا باكورێ كوردستانێ. دلره‌شی و ره‌گه‌سپه‌رستی و ده‌مارگیری نه‌ هه‌تا ڤێ رادێ. هه‌ر وه‌ساڤێت ئه‌م ژبیر نه‌كه‌ین سیناریۆیا وێ و داعش سه‌باره‌ت ئازادكرنا ده‌بلۆماتكارێن قونسولخانا توركیێ ل مووسلێ وه‌سا دیاره‌ وه‌كو راگه‌هاندن ئاماژی پێ دده‌ت ئه‌ڤ چه‌نده‌ به‌رامبه‌ر ئازادكرنا توركیا 180 ێ داعشیانه‌ یێن دگرتی خانه‌یێن توركیا دا. هه‌ر دڤی چوارچووڤه‌ی دا كو رێێ دایه‌ پێشمه‌رگه‌ی بچیته‌ كۆبانێ بۆ هاریكاریا په‌یه‌دێ دژی داش كو هه‌ر ئه‌و دبێژیت په‌یه‌ده‌ تیرۆرسته‌ و ژ لایه‌كێ دیڤه‌ هاركاریێن وێ د به‌رده‌وامن بۆ داعش، جهێ سه‌رسورمانێ یه‌ لێ وه‌سا دیاره‌ ئه‌ڤ چه‌نده‌ ژ به‌ر گڤاشتنێن قولپا دژی داعشێ یه‌ ڤێچا وه‌ره‌ د ڤێ چه‌ندێ بگه‌هه‌ وه‌سا دیاره‌ توركیا یا دلگرانه‌ ب گرنگی پێدانا كۆبانێ ژ لایێ وه‌لاتێن جیهانێ ڤه‌ كو ئه‌م دشێن بێژین فێل بازی و پیلانێن نه‌ڤیێن ئه‌تاتوركی دبه‌رده‌وامن و ئه‌م كورد چ جاران ژێ خلاس نابین چونكو هه‌می ته‌بك و ته‌لیێن وێ ژبۆ كوردان دهێنه‌ دانان و ڤه‌دان. به‌س ب ئێكگرتن ئێكرێزیا نافمالیا كوردی و ب گیانێ لێبۆرینێ ئه‌م دێ شێن خوه‌ ل به‌ر ڤان پیلانان گرین و راوه‌ستین.

كریستۆفه‌ركۆلومبس (1451 – 1506)، ده‌ریاڤان و گه‌ریده‌ێ به‌رنیاسێ ئیتالی، ل ده‌ستپێكا مه‌ها ئاب ل ساڵا 1492 ێ بوو ئێكه‌مین جار ب سێ گه‌میێن مه‌زن و ل ژێر ئاڵایێ ئسپانیا و ل گه‌ل 120 ده‌ریاڤانێن شه‌هره‌زا د ئۆقیانۆسا ئه‌تله‌نتیكدا كه‌فته‌ گه‌شته‌كا دو مه‌هی و ل چریا ئێكێ هه‌ر هه‌مان ساڵ گه‌هشته‌ جزیرتێن (ئیتێل) ل ئه‌مریكا لاتینی ئانكو جزیرتێن كاریبی، ئه‌وی هزر دكر یێ گه‌هشتیه‌ هنده‌ك جزیرتێن رۆژئاڤایا ئاسیا، هه‌ر وه‌كی چاوا ئیرۆ ئۆردغان ژی وێ هزرێ دكه‌ت كو زێده‌تر ژ دو سه‌د سالان به‌ری كۆلومبسی ژ لایێ گه‌ریده‌ێن ئیسلامێ ڤه‌ هاتیه‌ دیتن. به‌رێز ئوردغانی د گۆتارا خوه‌ ل دیدارا سازیێن بوسلمانێن ئه‌مریكا لاتیندا كو ئیستنبولێ ل حه‌فتیا بووری هاتبوو سازكرن، وه‌سا راگه‌هاند كو بوسلمانان ل سه‌ده‌یێ دوانزدێ دا هاتن و چوونه‌ك به‌رده‌وام بۆ ئه‌مریكا لاتینی هه‌بوویه‌ و ئه‌وان ل ساڵا 1178 ێ كێشوه‌رێ ئه‌مریكا ناسی به‌ری كۆڵومبسی و هه‌روه‌سا كۆلومبسی د بیره‌وریێن خوه‌ دا به‌حسێ دیتنا مزگه‌فته‌كێ ل سه‌ر چیایه‌كێ كۆبا كریه‌ و ئه‌ز ئاماده‌مه‌ مزگه‌فته‌كێ ل وی جهی جاره‌كادی ئاڤا بكه‌م و دێ ل گه‌ل برایێن خوه‌ یێن كۆبی گه‌نگه‌شێ ل سه‌ر ڤی بابه‌تی كه‌م. ئه‌ڤه‌ پوخته‌ك ژ گوتنێن ئوردوغانی بوون. ئۆردوغان سه‌رۆك كۆمارێ ده‌وله‌ته‌كا ده‌ستوور علمانیه‌ و د هه‌مان ده‌مدا ره‌هبه‌رێ مه‌زنترین حزب و بزاڤا ئیسلامیا میانره‌و و رادیكال و ئیخوان رێبازه‌ و نازدار و نازاندیێ ب هێزترین و پر ده‌سته‌ڵاترین هه‌ڤپه‌یمانیا جیهانیه‌ كو ئه‌وژی (ناتۆ) یه‌، له‌ورا ب دیتنا من پێدڤیه‌ پێنگاڤ پێنگاڤ و په‌یڤ په‌یڤ و پیت پیت، شرۆڤه‌ و لێكدانه‌ڤێن سیاسی ژ بۆ مه‌ره‌م و مه‌به‌ستێن ئۆردغان و ته‌ڤایا سیاسه‌تمه‌دار و رێڤه‌به‌رێن توركیا بهێنه‌كرن و حیساباتێن مه‌زن و گرنگ بۆ ره‌فتار و هه‌ڵۆیستێن رۆژانه‌ێن ده‌وله‌تا توركیا ل به‌رچاڤ بن. علمانییه‌تا توركیا ره‌نگڤه‌دانا ئیسلامیه‌ت و ئیخوانییه‌تا وێ یه‌، هه‌وڵێن به‌رێز ئۆردوغانی بۆ راگه‌هاندنا شكۆمه‌ندی و مه‌زنی و هه‌یبه‌ت و هه‌یمه‌نه‌تا دیرۆكا ئیسلامێ و ئاماژه‌كرن ب رابردوویا پر سه‌روه‌ریا وێ و خۆبێده‌نگ كرن ل سه‌ر حاله‌تێ لێكڤه‌بوون و دابه‌شبوونا ئیسلاما سیاسیا ئیرۆ كو ب سه‌ر چه‌ندین تیم و ده‌سته‌ و گرۆپ و گروهێن جۆراو جۆر به‌ڵاڤ بوویه‌، ره‌نگه‌كه‌ ژ ره‌نگێن ئه‌وان تیئۆر و بیردۆز و فه‌لسه‌فه‌ێن ئه‌فسانه‌یی و خورافی كو گلیزانكێن خه‌لیفه‌ و ئه‌میر و رزگاكه‌ر و چاكسازێن جڤاكی پێتێنه‌ ڤه‌كرن. نێ ده‌مێ كۆڵومبسی كێشوه‌رێ ئه‌مریكا ئاشكراكری چ ئاكنجیبوویه‌ك ل وێرێ نه‌بوون، تنێ هندیێن سوور نه‌بن. چێدبیت توركیا ب ڤان جۆرێن گۆتنان دبلوماسیه‌تا خاترگرتنێ په‌یره‌و بكه‌ت! خاترگرتنا كێ.. . ؟ ئه‌ڤه‌ و گه‌له‌ك پرسیار و ئه‌گه‌ر و مه‌گرتیێن دن هه‌نه‌ كو ره‌نگه‌ نها ده‌مێ خوه‌ لێڤه‌شارتنێ بیت. ئه‌و كیشوه‌رێ كو ب دیتنا رێزدار ئۆردۆغانی ژ لایێ باپیرێ خه‌لیفه‌ (ئه‌بۆبكر به‌غدادی) هاتیه‌ ئاشكرا كرن و ل دووڤ دا (كۆلومبس و ئه‌مه‌ریكۆ فسیۆش) ی فلۆره‌نسی چووینه‌ مزگه‌فتا وی ئاشكرا بكه‌ن، هه‌مان ئه‌و ئه‌مریكایه‌ كو رێیێن ئه‌رد و ئه‌سمان و پیاده‌رێ ژ بۆ بوورینا هێزێن پێشمه‌رگه‌ و چه‌كێن وان د ئاخ و ئه‌سمانێ توركیا دا ڤه‌كر داكو پشته‌ڤانیا (یه‌. په‌. گ) بكه‌ن و نه‌هێلن (كۆبانێ) بۆ مه‌ره‌مێن جودا جودا بهێته‌ داگیركرن، هه‌ژیه‌ بێژم كو پشته‌ڤانیا راسته‌وخۆیا ئه‌مریكا بۆ (كۆبانێ) باندۆرا پرۆسه‌یا ئاشتیێ ل توركیا تووشی بێ ئومێدیێ كر. توركیا خه‌ریكه‌ به‌ر ب قووناغا بێ به‌هربوون ژ ناز و نیعمه‌تێن ئه‌مریكا و (ناتۆ) یێ دچیت. ده‌مێ ئه‌مریكا له‌شكرێ (یه‌. په‌. گه‌) و (پ. یه‌. ده‌) ل ده‌رڤه‌ی چارچووڤێ تیرۆر و ل ده‌رڤه‌ی گریدان ب (پ. ك. ك) رادگه‌هینیت، چ پرس و شیره‌تكاریێ ل گه‌ل ئۆردغانی ناكه‌ت، ده‌مێ (ئۆباما) دخوازیت ئۆردوغان سۆز و په‌یمانێن خوه‌ ل هه‌مبه‌ر پرۆسه‌یا ئاشتیێ بجهبینیت، چ مه‌رج و خه‌مساریان قه‌بوول ناكه‌ت. هه‌كه‌ راستبیت كو رۆژانه‌كێ هه‌واڵگریا ئه‌مریكا و ئیسرائیلێ ب هه‌ڤرا هاریكاریا هه‌واڵگریا توركیا كربیت پێخه‌مه‌ت ده‌ستگیركرنا (ئۆجه‌لان)، لێ ئیرۆ ئه‌مریكا هزرا هندێ دكه‌ت كو (پ. ك. ك) ل ڤان رۆژان ببیت هه‌ڤپه‌یمان و پارته‌ك ئه‌مریكی. ره‌نگه‌ ئه‌ز یێ شاش بم، لێ به‌لێ ئه‌ز دبینم كو ئه‌مریكا ده‌ستێ راستێ ل توركیا بلند كریه‌ به‌س ب ده‌ستێ چه‌پێ زلله‌ها خوه‌ د دانیت.