ئه‌ڤرۆ:

سێمێل ئێکەمین قەزایە ل سەرانسەری پارێزگەھا دھوکێ بێ نەخۆشخانە، ب تنێ دو بنگەھێن ساخلەمیا دەستپێکی لێ ھەنە و بنگەھەکێ ئێڤاریان ئەڤە ژی ل دووڤ ئامارا ئاکنجیێن قەزایێ کێمە، سەرەرای ڤێ کێماسیێ ژی ئەڤ ھەردو بنگەھە پری کیماسی نە.

وەلاتیەک ب ناڤێ ئەحمەد یوسف دیار کر، ھەردو بنگەھێن ساخلەمیێ ل سێمێلێ (گولان و دوبان ) دەرمان لێ دکێمن، نوشدارێ بسپۆر نینە، ھەکە مرۆڤ ل ناڤ ب گەریت، چو نیشانێن ساخلەمیێ لێ نابینیت، ھیڤیدارم پتر گرنگی ب ساخلەمیا باژێرێ سێمێلێ بھێتە دان ژ دەرمانێن جۆرێن باش و سەروبەرکرنا باخچان د ناڤ دا.

وەلاتیەکێ دی ب ناڤێ رێبەر بابان گۆت: ھەردو بنگەھێن ل سێمێلێ گەلەک د بێ سەروبەرن و نوشدارێن تایبەتمەند نینن، بارا پتر نوشدارێن مە ئەوێن تازە دەرچووبووین، وەکو یا پێدڤی بۆ نەخۆشی ناھێتە کرن بۆ نموونە، نەخۆشەک دێ بێژیتە نوشداری پشتا من یا دئێشیت، دێ دەستەکێ حەپکێن سەرئێشێ و شرینقێن مسەکن دەتێ و گۆت: ئەم سوپاسیا حوکمەتا ھەرێمێ دکەین بۆ نووژەنکرنا ھەردو بنگەھان، لێ پا پشتی ب داوی دھێن ھندەک کەس بھێنە تەرخان کرن ژ بۆ سەخبێرکرنا رۆژانە.
محەمەد ئیبراھیم دبێژیت: سێمێل راستە قەزایە، بەلێ چو نیشانێن قەزایێ لێ د دیار نینن، گەلەک باشە دو بنگەھێن ساخلەمیێ لێ ھەبن، ئێک ھەتا نیڤرو یە و یا دی ب شەڤ ژی عەلەساس ھەیە، بەلێ ب مخابنی ڤە ھەردویان کێم دەرمان لێ ھەنە.
د. بەھائەدین بشار، بەرپرسێ کەرتێ ساخلەمیا سێمێلی دیار کر، ھەردو بنگەھێن مە ل سێمێلێ ب شێوەکێ سروشتی کارێن خوە دکەن، بنگەھێ گولان بنگەھەکێ سەرەکیە و چەند نوشدارێن تایبەتمەند تێدا کاردکەن وەک نوشدارێن (ئافرەت و زارۆ بوونێ، دل و ھناڤ، پیستی و تیشک و سونەر) ل گەل چەندین نوشدارێن دی و دەرمانسازان.
سەبارەت نەبوون یان کێمبوونا دەرمانان دکتور دبێژیت: راستە دەرمان نە ل ئاستێ پێدڤی نە، لێ پا ئەڤە ئاریشەکا گشتیە زێدەباری ھندێ کو نھا ھژمارەکا زورا ئاوارەیان ھاتینە دەڤەرا مە و دەرمان بۆ وان ژی ل سەر پلێتا بێ بەرامبەر دھێتە مەزاختن، دیسا کارێ دەرمانخانێن کەسایەتی (ئەھلی) ژ لایێ مەڤە ھاتیە رێکخستن و رۆژانە د ڤەکری نە ھەتا رۆژێن ئەینی و بێھنڤەدانا و ھەر شەڤ ئێکا نوبەدار ژی ھەیە.
ل دور گازندا نەبوونا نوشدارێ نوبەدار د. بەھا دبێژیت: بنگەھێ نوبەدار ل سێمێلێ دەواما وان ھەر ژ ئێڤاری ھەتا سپێدەھیا رۆژا دی بەردەوامە و نوشدار ل گەل گشت کارمەندان د خزمەتا وەلاتیان دایە و زێدەتر گوت: کلینیکا دوبان یاراوێژگاری ژ نوو ھاتیە ڤەکرن و چەندین نوشدارێ تایبەتمەند وەک تایبەتمەندێ نشتەرگەریا زارۆیان، ب تنێ تایبەتمەندێ دل و ھناڤان نینە و بزاڤێن مە دبەردەوامن کو نوشدارێن تایبەتمەندێن پێدڤی بۆ راوێژکاریا ناڤبری دابین بکەین.

سەروکێ پشکا کارگێری کەرەستە ل پەیمانگەھا تەکنیکی کارگێری/دھۆک زانکویا پولیتەکنیکی یا دھوک پشکا کەرەستە ل سالا ٢٠٠٠ ھاتیە ڤەکرن ئەڤ سالە مە چو قوتابی نەوەرگرتینە بتنێ مە قووناغا دوێ مایە کۆ ئەو ژی یا داویێ یە و ١٣ گەر دەرچووینە و نھا مە ١٠٨ قوتابی ھەنە.
دیدار، شەھلا رێکانی:
سەروکێ پشکا کارگێری کەرەستە ل پەیمانگەھا تەکنیکی کارگێری/دھۆک نەبیل نەعمان، ل دۆر ئەگەرێن راوەستاندنا پشکا کارگێری کار؟ بۆ رۆژناما ئەڤرۆ گۆت: ژبەرکو گەلەک قوتابی ژ ڤێ پشکێ دەرچوینە کو پێدڤیا خەلکی بڤان دەرچویا ھندە.
ئەرێ وە نیازە ھندەک گوھۆڕینا بکەن و پاشان جارەکا دی بزڤرینەڤە؟ نەبیل دبێژیت: نەخێر مە لبەر نینە جارەکا دی ئەڤ پشکە بھێتە ڤەکرن ژبەرکو دپلانا زانکویێ دایە ل سالێن بھێت دا گەلەک بەشێن کارگێری بھێنە گوھۆڕین و پتریا پشکێن پەیمانگەھێ ژی بھێنە راکەن و ل شوینا وان کولیژا بدانیت، ئەڤجا دبیت ئەڤ پشکە ببیتە بەشەکێ تەقەنی و ب رەنگەکێ دیتر بھێتە ڤەکرن.
خواندنا وە پتر پراکتیکی یە یان تیوری سەروکێ پشکا کارگێری کەرەستەی گۆت: مە ھندەک مادێن تیوری ھەنە و ھندەکێن پراکتیکی لێ بەھرا پتر ب ئالیێ تیوری ڤە گرێدایە ژبەر کو کارگێری کەرەستە بەشەکە ژ کارگێری کار.
ئەڤ قوتابیێن دەرچووین چەند ھاتینە دامەزراندن و ھون ژ ئاستێ وان درازینە یان نە؟ نەبیل گۆت: ب دروستی نزانین چەند ھاتینە دامەزراندن ژ بەرکو دڤێت وەکو دەولەتێن ئەوروپی دوڤچوونا وان قوتابیێن قووناغێن دووماھیێ دەربازکرین بھێتە کرن، لێ مە ئەڤ سیستەمە ل کوردستانێ نینە و رەنگە ل ئیراقێ ھەموویێ ژی نەبیت، و ھەکە پرسیارا چو پشکێ بکەی کا چەند قوتابیێن ھاتینە دامەزراندن یان ل چەند کومپانیا و کەرتێ تایبەت کار دکەن ھەلبەت رەنگە وان ژی چو ئامار لنک نەبن.
کارکرنا دەرچویێن ڤێ پشکێ پتر بۆ کەرتێ حکومیە یان تایبەت؟ نەبیل نەعمانی گۆت: ل ھەردوو جھا دشێن کار بکەن لێ ئەو بخوە دەما دھێنە دامەزراندن دبنە نڤیسەر و پاشی دێ بنە مولاحەز و پاشی کێمتر ١٠ سالا دێ بنە ھاریکارێ پارێزڤانێ کوگەھێ ئەڤجا لکیژ کەرتی بیت گشتی یان تایبەت.
ل داویێ نەبیل نەعمانی گۆت: مە پێدڤی ب تاقیگەھەکا ژ جورێ کوگەھی ھەبوو تا نھا مەنینە و نەھاتینە دانان و دڤێت مە ھەبیت ژ بەرکو پتریا جارا مە قوتابی دبرنە ھولەکا دی و مە کەل و پەلێن خوە دبرنە وێرێ دا بابەتی بشێوێ پراکتیکی وەرگرین و پشتی ھینگێ جارەکا دی مە کەل و پەلێن خوە رادکرنە ڤە بو جھێ وان دزڤراندن و مە پێدڤی ژی ھەنە و مە گەلەک جارا داخوازا ڤێ چەندێ ژی ژ راگریێ کر و مە گوتە وان ژی لێ پا ژبەرکو جھێ مە یێ تەنگە لەوا تا نھا مەنینە لێ ئەم قوتابیێن خوە ھندەک جارا دبەینە گەشتێن زانستی وەکی کوگەھا و ھندەک جھێن دی گرێداینە ب کوگەھاڤە وەک (سایلو وکۆمپانیا ئاھێت خوارنێ) داکو قووتابی مفای بخۆ ژێ بکەن.

ئه‌ڤرۆ نيوز:

رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمان دێ ساهى بيت.

پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ به‌رده‌واميا فشارێن وه‌لاتێ توركيا و ده‌ريا ناڤه‌راست بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رێكه‌فتى 2015.3.10 ئه‌سمان دێ ساهى بيت.

رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه‌ كو پلا گه‌رماتيێ دێ يا هه‌ڤبه‌ركرى بيت ل گه‌ل رۆژێن به‌رى نوكه‌ ب ره‌نگه‌كى د ناڤبه‌را 19 بۆ 8 دا.

ل دۆر پێشبينيا رێژا هه‌وايى و مه‌ودايێ ديتنێ ژى دايه‌ زانين كو دێ ئاراسته‌يێ وى دێ باشوورێ رۆژئاڤا بيت ب ره‌نگه‌كى دێ يێ ل سه‌رخوه‌ و ناڤه‌ندى بيت د ناڤبه‌را 10 بۆ 20 كلم د ده‌مژمێره‌كێ دا و ماوێ ديتنێ ژى دێ 8 بۆ 10 كلم  دا بيت.