ئه‌ڤرۆ:

ئەندامەکێ جڤاتا سەرکردایەتیا پارتی ل پارێزگەھا کەرکووکێ راگەھاند، چو رێککەفتن د ناڤبەرا ھێزێن پێشمەرگەی و ملیشیاتێن (حەشد شەعبی) دا یێ شیعی نەھاتینە کرن کو رێ ب وان بھێتەدان بھێنە دناڤ باژێڕێ کەرکووکێ دا و دیارکر، پەیوەندیێن پارتی و پارێزگەرێ کەرکووکێ یێن ئاسایی بووین و بزاڤێن دھێنەکرن ئاریشە بھێنە چارەکرن.
مەحەمەد خورشید، ئەندامێ جڤاتا سەرکردایەتیا پارتی دیموکراتی کوردستان ل کەرکووکێ د داخۆیانیەکێ دا بۆ رۆژناما ئەڤرۆ رەت کر چو رێککەفتن د ناڤبەرا ھێزێن پێشمەرگەی و ملیشیاتێن شیعی ھاتبنەکرن کو بھێنە کەرکووکێ وگۆت” ئەو پێزانینێن ل دۆر رێککەفتنا پێشمەرگەی و حەشد شەعبی دھێنە بەلاڤکرن کو رێ بدەنە حەشد شەعبی بھێتە د کەرکووکێ دا، چو راستی بۆ نینە و رێ ناھێتەدان بھێنە کەرکووکێ، بەلێ ل دووڤ قانوونا ھاتیە دەرکرن بۆ پێکئینانا حەشدی شەعبی و بەرگریا نیشتیمانی، رێ ھاتیەدان ئەڤ ھێزە ل سنورێ ناحیا (بەشیر) و قەزا (حەویجە) بھێتە پێکئینان و نابیت ب چو شێوەکی بھێنە دناڤ باژێڕێ کەرکووکێ دا “.

ل دۆر ئاریشا د ناڤبەرا پارتی و پارێزگەرێ کەرکووکێ دا، گۆت” مە چو ئاریشێن کەسایەتی ل گەل نەجمەدین کەریم نەبووینە، بەلێ مە ئاریشە ل گەل وی ل سەر ھندەک پرسان ھەبوون، بەری نوکە گڤاشتن ل سەر ئەندام و لایەنگرێن پارتی ل فەرمانگەھێن باژێڕێ کەرکووکێ ھەبوو ، نوکە ئەڤ ئاریشە یا بەر ب چارەکرنێ ڤە دچیت و نەجمەدین کەریم سەرەدانا مە کریە، ژلایێ خوەڤە ژی مە وەکی پارتی سەرەدانا پارێزگەری کریە، ھەکە وی نیەتا چارەکرنا ئاریشان ھەبیت، دێ ھێنە چارەکرن و ھێشتا ئاریشە ماینە و ب دووماھی نەھاتینە و پێدڤیە دانوستاندن ل دۆر چارەکرنا وان بھێنەکرن”.
مەحەمەد خورشیدی دیارکر، بەری نوکە ھژمارەکا مەزن یا ئاوارێن عەرەب ھاتینە کەرکووکێ و ل دووڤ دووماھی ئامارا حوکمەتا ناڤخوەییا کەرکووکێ، ٥٤ ھزار خێزانن و ھژمارا ئەندامێن وان نێزیکی ٣٠٠ ھزار کەسان دبن، راستە کەسێن تیرۆرست و خراپکار ژی تێدا یێن ھەین، لێ ھاتنا وان وەلاتیێن عەرەب ژی پشتی تێکچوونا رەوشا دەڤەرێ و ھاتنا داعش بوویە و ھندەک ژوان پشتەڤان و ھاریکارێن تێرۆرستێن داعشێ بووینە و د ھێرشا ڤێ دووماھیێ دا، دەست ل گەل ئینانا داعشێ ھەبوو”.