په‌يڤدارا وه‌زاره‌تا ده‌رڤه‌‮ ‬يا ئه‌مريكا راگه‌هاند كو ئه‌و دێ د ناڤا ده‌مه‌كي‮ ‬نێزيك دا پلانا لێدانا داعش‮ ‬يه‌ك ئالي‮ ‬كه‌ن و بۆ ڤێ چه‌ندێ كۆمسيۆنه‌ك ئاڤا كرينه‌ و وه‌لاتێن ئه‌ندام د‮ (‬ناتۆ‮) ‬دا جهێ خوه‌ د ناڤ كۆمسيۆنێ دا دگرن و دڤێت توركيا ژي‮ ‬ببيته‌ پشكه‌ك ژ ڤێ كۆمسيۆنێ و د زووترين ده‌م دا جهێ خوه‌ د شه‌رێ ل دژي‮ ‬داعشێ دا‮ ‬يه‌ك ئالي‮ ‬بكه‌ت،‮ ‬و هه‌لويستێ نها توركيا نيشا دده‌ت ب چو ره‌نگه‌كي‮ ‬ناهێته‌ قه‌بوول كرن‮.‬
ماري‮ ‬حرف په‌يڤدارا وه‌زاره‌تا ده‌رڤه‌‮ ‬يا ئه‌مريكا د پرێس كۆنفرانسه‌كي‮ ‬دا ل وه‌زاره‌تا ده‌رڤه‌ راگه‌هاند كو‮ ‬په‌يوه‌ندي‮ ‬و هه‌ڤديتنێن وان ل گه‌ل توركيا به‌رده‌وامن ژ بۆ كو د ناڤ هه‌وپه‌يمانا ل دژي‮ ‬قاعيده‌ و داعش و كۆمێن سه‌ر ب وان دا جهێ خوه‌ بگريت‮ ‬و گۆت‮:‬‮ »‬لێ مخابن هه‌تا نها ژي‮ ‬توركيا هه‌لويستێ خوه‌ ئاشكرا نه‌كريه‌ و به‌رسڤه‌كا ئه‌ره‌ني‮ ‬نه‌دايه‌ مه‌ و ئه‌م دخوازين د زووترين ده‌م دا جهێ خوه‌ ديار بكه‌ت‮«.‬
ماري‮ ‬حرف راگه‌هاند ژي‮ ‬كو‮ ‬هه‌ڤديتنێن وان‮ ‬يێن ل گه‌ل مسر،‮ ‬ئوردن و عه‌ره‌بستانا سعووديێ د ئاسته‌كي‮ ‬بلند دانه‌ و هه‌ر سێ ئاليان ژي‮ ‬ديار كرينه‌ كو دێ د شه‌رێ ل دژي‮ ‬تيرۆرێ دا جهێ خوه‌ بگرن‮ ‬و‮ ‬گۆت‮:‬‮ »‬قاعيده‌ و ده‌وله‌تا ئيسلاميا عيراق و شامێ بۆ هه‌موو جيهانێ مه‌ترسيێ دروست دكه‌ن و دڤێت هه‌موو ئاليێن ديمۆكراسي‮ ‬و ئاشتيخواز ل دژي‮ ‬تيرۆرێ هه‌لويستێ خوه‌ ئاشكرا بكه‌ن و د ناڤ هه‌ڤپه‌يمانيێ دا جهێ خوه‌ بگرن‮«.‬
په‌يڤدارا وه‌زاره‌تا ده‌رڤه‌‮ ‬يا ئه‌مريكا هه‌روه‌سا راگه‌هاند ژي‮ ‬كو‮ ‬توركيا سالا‮ ‬2003 ده‌مێ شه‌رێ ئازاديا عيراقێ ژي‮ ‬ل گه‌ل ئه‌مريكا و هه‌ڤپه‌يامانان دا جهێ خوه‌ نه‌گرتبوو و ئه‌و‮ ‬يه‌ك ببوو سه‌ده‌مێ وێ‮ ‬يه‌كێ كو ئه‌مريكا ده‌مه‌كي‮ ‬درێژ په‌يوه‌نديێن خوه‌ ل گه‌ل توركيا سار بكه‌ت‮ ‬و گۆت‮:‬‮ »‬بريار‮ ‬يا توركيايه‌‮ ‬يان دێ ل گه‌ل مه‌ و هه‌ڤپه‌يمانێ دا جهێ خوه‌ گريت‮ ‬يان ژي‮ ‬دێ رێيا خوه‌ هه‌لبژێريت،‮ ‬لێ توركيا چ بريارێ دده‌ت بلا بده‌ت ئه‌م د پلانا خوه‌‮ ‬يا بۆ ژناڤبرنا داعش و قاعيده‌ دا د رژدين‮ ‬و جيهانا مه‌ ئێدي‮ ‬ژ تيرۆرێ بێزار بوويه‌ و دڤێت تيرۆرێ ب ته‌مامي‮ ‬ژناڤ ببه‌ين و ئه‌ڤرۆكه‌ جڤاكێ مرۆڤاهيێ وێ‮ ‬يه‌كێ ژ مه‌ دخوازيت‮«.‬
هه‌ر د ڤێ ده‌ربارێ دا رۆژنامه‌ڤان ره‌مه‌زان ده‌مير ژ ئه‌نقه‌ره‌ بۆ رۆژناما ئه‌ڤرۆ راگه‌هاند كو‮ ‬سياسه‌تا ئه‌نقه‌ره‌ گه‌له‌ك تاريه‌ و ديار نينه‌ كا دێ توركيا چ كه‌ت و نها پارتێن ل په‌رله‌مانێ توركيا ژي‮ ‬حوكمه‌تێ ته‌نگاڤ دكه‌ن دا برياره‌كا راست بده‌ت و پرانيا پارتێن ل په‌رله‌ماني‮ ‬ژي‮ ‬دخوازن توركيا پشكداريێ د وي‮ ‬شه‌ري‮ ‬دا بكه‌ت‮ ‬و گۆت‮:‬‮ »‬سه‌رۆك وه‌زير ئه‌حمه‌د داوود ئوگلۆ هه‌تا نها ژي‮ ‬د ئاخڤتنێن خوه‌ دا بۆ داعش نه‌ گۆتيه‌ تيرۆرست و وێره‌كيا ئاخڤتنێ ل دژي‮ ‬ڤێ رێكخستنێ نينه‌ لێ پارتێن وه‌ك پارتا كۆماريا گه‌ل و پارتا ديمۆكراسيا گه‌لان ب دژواري‮ ‬حوكمه‌تێ ره‌خنه‌ دكه‌ن و ديار دكه‌ن كو په‌يوه‌نديێن توركيا د وارێ سه‌ربازي،‮ ‬سياسي‮ ‬و ئابووري‮ ‬ڤه‌ ل گه‌ل داعش هه‌يه‌ و بريندارێن وان ل توركيا دهێنه‌ ده‌رمانكرن و ژ ئه‌نقه‌ره‌ خواستن كو خوه‌ ژ وان تيرۆرستان دوور بكه‌ت،‮ ‬چونكو ئه‌و‮ ‬يه‌ك دێ وه‌سا كه‌ت كو پاشه‌رۆژا توركيا تاري‮ ‬بيت و‮ ‬يا نها توركيا دكه‌ت‮ ‬ياريكرنه‌ ب ئاگري‮«.‬
ل ئاليێ دي‮ ‬د‮. ‬دوگو ئه‌رگيل ئه‌ندامێ ناڤه‌ندا ڤه‌كۆلينێن ستراتيژي‮ ‬يێ توركيا ژي‮ ‬ديار كر كو‮ ‬داعش ل باژێرێن ئسته‌نبول،‮ ‬روحا،‮ ‬چه‌وليك،‮ ‬ئه‌ده‌نه‌،‮ ‬ئه‌نتاكيا‮ (‬هه‌تاي‮) ‬و مه‌رسينێ خوه‌ ب رێكخستن دكه‌ت و ئه‌ندامان بۆ خوه‌ كۆم دكه‌ت و ئه‌ندامێن خوه‌ ب ره‌نگه‌كي‮ ‬ئازاد ژ سنۆرێن توركيا ڤه‌ بۆ سووريێ و رۆژئاڤايێ كوردستانێ ده‌رباز دكه‌ت‮ ‬و گۆت‮:‬‮ »‬د ده‌ربارێ هاريكاريا توركيا ل گه‌ل داعش ب سه‌دان به‌لگه‌ د ده‌ستێ مه‌ و هه‌موو رۆژنامه‌ڤانان دا هه‌نه‌ و ل دووڤ هزرا من نها داعش ل ناڤ باژێرێن توركيا و باكورێ كوردستانێ ژ كۆنترۆلا حوكمه‌تێ ژي‮ ‬ده‌ركه‌ڤتيه‌ و ژ ترسا ڤێ‮ ‬يه‌كێ نه‌شێت ل دژي‮ ‬وێ‮ ‬د ناڤ هه‌ڤپه‌يمانيا ئه‌مريكا دا جه بگريت‮«.‬
ناڤهاتي‮ ‬هۆشداري‮ ‬دا حوكمه‌تا توركيا كو هه‌كه‌ نها شه‌رێ داعش نه‌كه‌ت ره‌نگه‌ پشتي‮ ‬ده‌مه‌كي‮ ‬دي‮ ‬توركيا ژي‮ ‬تووشي‮ ‬چاره‌نڤيسێ عيراقێ و سووريێ بيت چونكو توركيا‮ ‬ياريێ ب ئاگره‌كي‮ ‬گه‌له‌ك مه‌زن دكه‌ت و ئه‌مريكا و وه‌لاتێن دي‮ ‬يێن هه‌رێمێ وێ‮ ‬يه‌كێ ژ توركيا قه‌بوول ناكه‌ن و دێ بزاڤێ كه‌ن به‌رێ وي‮ ‬ئاگري‮ ‬بده‌نه‌ توركيا‮ ‬و گۆت‮: ‬‮»‬ژ به‌ر ڤێ‮ ‬يه‌كێ دڤێت نها توركيا د شه‌رێ ل دژي‮ ‬داعش دا هاريكاريا ئه‌مريكا بكه‌ت دا بشێت ب كێمترين زيان خوه‌ ژ وي‮ ‬به‌لايێ قورتال بكه‌ت و داخۆيانيێن به‌رپرسێن ئه‌مريكا ژي‮ ‬نيشا دده‌ن كو ئه‌مريكا وه‌ك سالا‮ ‬2003 ژ توركيا قه‌بوول ناكه‌ت و نها گه‌له‌ك به‌رپرسێن ئه‌مريكا ژي‮ ‬ديار دكه‌ن كو ئێدي‮ ‬توركيا هه‌ڤپه‌يمانێ مه‌ نينه‌ و ئه‌مريكا ره‌نگه‌ ب جهێ توركيا خوه‌ نێزيكي‮ ‬كوردان بكه‌ت‮«.‬