دھۆک، لەزگین جۆقی:

فەرماندێ ھێزا پێشمەرگەی ل چیایێ شنگالێ قاسم سمێر بۆ ئەڤرۆ دیارکر کو پێنچ کچێن ئێزدی ل بەری دو شەڤان گەھشتنە چیایێ شنگالێ و خوە ژ دەستێن چەکدارێن داعش رزگار کرن کو دو کچ خەلکێ گۆندێ تلقەسپن و ھەر سێ کچێن دی ژی یێن گۆندێ کوچو بوون.

قاسم سمێر گۆت ژی ئەڤە دو ھەیڤن کچێن گرتی ل دەستێن چەکدارێن داعش ل گۆندێ رەمبوسی ھاتبوونە زیندان کرن ژ لایێ داعش ڤە، ل دووڤ ئاخڤتنێن کچان چەکدارێن داعش ھەولدان ڤان ھەر پێنچ کچان ببەنە وەلاتێ سوریا لێ کچان بریار دان ب رەڤن، چونکو یان دێ ھێنە کوشتن یان ژی دێ خوە گەھینە چیایێ شنگالێ، ب شەڤ رەڤین و ھەر پێنچ ب سلامەتی گەھشتنە چیایی و دێ ھێنە رەوانە کرن بۆ کەس وکارێن وان.

قاسم سمێر ئەو ژی خویاکر کو چەکدارێن داعش ل شنگالێ لاواز بووینە وەکو جاران ھاتن و چوونێ ناکەن و زیانێن مەزن گەھشتینە وان پشتی فرووکێن ھەڤپەیمانان بارەگایێن وان بوردۆمان دکەن.

ئەڤرۆ نیوز، شێخان، بارزان سلێمان مزووری:
ژێدەرەکی ژ ھێزێن پێشمەرگەی ل میحوەرێ باشیک بۆ ئەڤرۆ نیوز دیار کر کو دێ ئەڤرۆ دەمژمێر دوی پشتی نیڤرۆ 15\10 دەنگەکێ ب ھێز و دوکێلەکا مەزن ل ناحیا باشیک رابوو، پشتی دووڤچوون ھاتیە کرن دیار بوو کو چەکدارێن تیرورستێن داعش مەزارێ نەسرەدین یێ ئێزدیان ل نێزیک تاخێ “عین علق” ل ناحیا باشیک پەقاند.
ژ لایەکی دی ڤە رەوشەنبیرەکێ دەڤەرا باشیک ب ناڤێ، خدر خەلات، بۆ ئەڤرۆ نیوز دیار کر کو ئەڤ مەزارە کەڤنترین مەزارێ ئاینێ ئیزدیانە بەری شەش سەد سالایە ھاتیە دروست کرن.

دھۆک، لەزگین جۆقی:

سەرۆکێ گرۆپێ گەنجێن ھێزا شەرفەدین بۆ ئەڤرۆ دیارکر کو ب ھەڤکاریا وەلاتێ ئەلمانیا ل بەرە پێنچ ھزار پەککەفتیێن ئاوارێن شنگال بۆ چارەسەریێ بۆ ئەلمانیا بھێنە ھنارتن، داخواز ژی ژ سازیێن پەیوەندیدارێن حوکمەتا ھەرێمێ کر د ھەڤکار بن ل گەل وان بۆ سەرکەفتنا ڤێ پێنگاڤێ.

مەروان رەشو سەرۆکێ گرۆپێ گەنجێن ھێزا شەرفەدین کو ژ کۆمەکا گەنجێن خوە بەخش ئەڤ گرۆپە پێک دھیت گۆت نوکە ل ھەموو دەڤەرێن ئاوارێن شنگالێ لێ دئاکنجی ناڤ دھێنە تۆمار کرن و پرۆسە دی یا بەردەوام بیت ھەتا ھەموو ئاوارە دھێنە دیتن، یێ پیدڤی چارەسەریێ بیت دێ ناڤێ وێ ھێتە تۆمار کرن و بلند کرن بۆ وەلاتێ ئەلمانیا، ئەو ژی دیارکر کو بەرنامەک ھاتیە دانان ب ھەڤکاریا حوکمەتا ئەلمانیا ھەتا پێنچ ھزار پەککەفتیێن کارەساتا شنگال بھێنە رەوانە کرن بۆ وەلاتێ ئەلمانیا ب مەرەما چارەسەریێ.

ناڤبری ئەو ژی خۆیاکر کو کارەساتا شنگالێ ب سەدان وەلاتی پەککەفتی و نەخۆش کرینە ھەر چەندە حوکمەتا ھەرێما کوردستانێ ب ھەموو سازیێن خوە ڤە بەردەوام پشتەڤانیێ و ھاریکاریا وان دکەت.