NO IORG
Facebook

ئه‌ڤرۆ نيوز، نيوار محه‌مه‌د سه‌ليم:

په‌يڤدارێ وه‌زاره‌تا دارايى ل حوكمه‌تا هه‌رێما كوردستانێ د داخۆيانيه‌كێ دا بۆ مالپه‌رێ ئه‌ڤرۆ نيوز چاوانيا دانا مووچێ وه‌زاره‌تێن دێ به‌رى جه‌ژنێ مووچه‌ى وه‌رگرن دياركر.

پشتى ده‌ست ب به‌لاڤكرنا مووچێ وه‌زاره‌تا پێشمه‌رگه‌ى هاتيه‌ كرن، بڕيار بوو ئه‌ڤرۆ و سوبه‌هى مووچێ هه‌شت وه‌زاره‌تێن دى بهێته‌ به‌لاڤكرن كو پێكهاتينه‌ ژ هه‌ر ئێك ژ وه‌زاره‌تا ڤه‌گوهاستن و گه‌هاندنێ، ره‌وشه‌نبيرى و لاوان، كاروكاروبارێن جڤاكى، شه‌هيدان و ئه‌نفالكريان، پێشه‌سازى و بازرگانى، پلان دانان، داد، ل گه‌ل وه‌زاره‌تا سامانێن سرۆشتى.

دلێر تارق، په‌يڤدارێ وه‌زاره‌تا دارايى ل حوكمه‌تا هه‌رێما كوردستانێ، راگه‌هاند كو ئه‌ڤ هه‌شت وه‌زاره‌ته‌ دێ ب رێكه‌فتنه‌كێ بيت د ناڤبه‌را گه‌نجينێن پارێزگه‌هان دا و گۆت: “گه‌نجينێن وان پارێزگه‌هان دێ داخوازێ ژ رێڤه‌به‌ريێن وان وه‌زاره‌تان كه‌ن بچن مووچێ خوه‌ وه‌رگرن”.

زێده‌تر گۆت: “هه‌ر وه‌زاره‌ته‌ك ژ ڤان گه‌نجينێ داخواز ژێ كر دێ چن مووچێن خوه‌ يێن هه‌يڤا هه‌شت به‌رى جه‌ژنێ وه‌رگرن كو هه‌موو دێ د ئه‌ڤرۆ و سوبه‌هى دا ب دووماهى هێن”.

ئەڤرۆ، ھەژار مەعروف:

ئێکەتیا تەپا پێ یا قەتەری راھێنەرێ عیراقی و یانا قەتەر یا قەتەری رازی شنێشل ب باشترین راھێنەر ل ھەیڤا بوری ل سەر ئاستێ خولا پیشەکاران یا قەتەری ھەلبژارت، پشتی کارێ وی ل سێ یاریێن بوری و سێ سەرکەفتن ل دووڤ ئێک تومارکرین کو بەری وی راھێنەرێ  یانا ناڤبری دو یاریا ل دووڤ ئێک خوسارەت ببوو.

د داخویانیەکێ دا راھێنەر ناڤبری بوو رۆژناما ئەڤرۆ دیارکر ل سێ یاریێن بوری دا شیان سێ سەرکەفتنا ب دەستخوڤە بینن و ئەڤە بوو ھاریکاریا دەستەیا راھێنەری و یاریکەران ڤەدگەراندن و یێ ب ئومێدە ل یاریێن بھێت ئەنجامێن باشتر ب دەستخوڤە بینن ھەر چەندە یاریێن بھێت دێ ئەرکێ وان ب زحمەتربیت ژبەرکو یاری بوو یاریێ خولا قەتەر ب ھێزدکەڤیت و ھەڤرکی د ژوارتر لێ دھێت.

ناڤبری ئەوچەندە ژێ دیارکر ل ماوێ بوری دا ل سەر دەرونی یاریکەران کار دکر و شیا شێوازێ کرنا یاریا تیمێ ب گوھورین.

دھێتە زانین ھەلبژارتنا رازی شنێشل ھاتە پێش پشتی چەندین شروڤەکارێن یاریێن خولا قەتەر و روژنامە و راگەھاندنا قەتەری گرنگیەکا مەزن دایە کارێ وی ل گەل یانا قەتەر ل سێ یاریێن بوری و تیما قەتەر شیا ئاستەکێ بلند پێشکێش.

ئەڤرۆ، سالار دۆسکی:

بریاردەرێ جڤاتا پارێزگەھا دھۆکێ دیارکر کو جڤاتا پارێزگەھێ دخوازیت پارێزگەھا دھۆکێ بھێتە بەربژێر کرن بۆ وەرگرتنا خەلاتێ نۆبلێ ئاشتیێ ل سەر ئاستێ جیھانێ، ژ بەر خۆراگرتنا وێ بۆ وەرگرتنا ڤێ ھژمارا ئاواران کو ل سەرانسەری جیھانێ چو باژێر ب ڤی رەنگی نین.

ئدریس ھەرکی بریاردەرێ جڤاتا پارێزگەھا دھۆکێ بۆ رۆژناما ئەڤرۆ گۆت بزاڤا دکەین دھۆک ب خەلاتێ نۆبلێ ئاشتیێ بھێتە خەلاتکرن، چونکو چو باژێرێن جیھانێ وەکوی پارێزگەھا دھۆک ئاوارە نەحەواندینە و دەرگەھێن خوە و مالێن خوە ڤەکرینە و گیانێ وان پاراستیە، ئەڤە سەرەرەرایی ڤان گرفتێن دارایی یێن ل ھەرێما کوردستانێ ھەین.

ئدریس ھەرکی گۆت ژی دێ کار کەین کو ل سەردانێن رێکخراوێن بیانی بۆ دھۆکێ رەوشا نوکە یا دھۆکێ و حەواندنا ئاواران بۆ شروڤە بکەین.

گۆت ژی ھەر رێکخراوەکا ھاتی بابەت بۆ ھاتیە شروڤەکرن ب ھەموو رەنگان کو چەند خەلک ل ڤی باژێری ھەیە، ھند ئاوارە تێدا ھاتینە حەواندن، زەرەرمەند خەلکێ دھۆکێ بوویە، پارێزگەھا دھۆکێ ب ھەموو شیانێن خوە و خەلکێ خوە ڤە چو کێماسی نەکریە، زەرەرمەندێ ئێکێ قوتابی بووینە و ھەتا ٦٥٣ قوتابخانان ئاوارە تێدا نە، ئاماژە دا وێ ژی کو و ژ بلی ئاوارێن رۆژئاڤا دیسا ئاوارێن باشۆرێ عیراقێ، ئێزدی، شەبک، مەسیحی، ھەموو خەلک تێدانە، ئاوارە تەمەت رێژا خەلکێ باژێری بن لەورا دھۆک ژ ھەژی ڤی خەلاتی یە.

246

ڤەکۆلەرێن زانکۆیا “فیرمونت” یا ئەمریکی پشتی ڤەکۆلینەکا نوو ئەنجامدای و پشتەڤانیا پەیمانگەھێن نشتمانی یێن وەزارەتا ساخلەمی یا ئەمریکی بدەستڤەئینای، دیار کریە کو “مەترسیا پێشبینیکری بۆ ژدەستدانا بیردانکێ یا گرێدای گرۆپێ خوینێ یە”.

ڤەکۆلینێ دیار کریە کو ٨٢% ژ وان کەسێن تووشی سەرداچوونا مێشکی و ژدەستدانا بیردانکێ دبن خوینا وان ژ جۆرێ AB یە. تیمێ ڤەکۆلەران دیار کر کو بلندبوونا ئاستێ پرۆتینی یێ ناڤێ وی “ھۆکارێ ھەشتێ” یێ ھاریکار بۆ جەلتا خوینێ و مرۆڤان پتر تووشی لاوازیا ھەست پێکرنێ و د سەرداچوونا مێشکی دکەت، ئەوێن ئاستێ پرۆتینێ “ھۆکارێ ھەشتێ” ل نک یێ بلند ب رێژا ٢٤% پتر تووشی ئاریشێن بیردانکێ دبن، و وەسا دیار بوو ئەوێن خوینا وان AB ئاستێ “ھۆکارێ ھەشتێ” ل نک وان بلندترە.

پرۆفیسۆرا سەرپەرشت “کوشمان” دیار کر کو ڤەکۆلینا وان دیار کر کو ھۆکارێن بلندبوونا فشارا خوینێ و کولیسترۆلی و شەکرێ مەترسیا لاوازیا ھەستپێکرنێ و دسەرداچوونا مێشکی زێدە دکەت، بەلێ سیستەمێ خوارنێ یێ ساخلەم و بزاڤ و لڤین دھاریکارن بۆ کێمکرنا مەترسیێن دسەرداچوونا مێشکی.

ھەژی ئاماژێ یە کو چار گرۆپێن خوینێ د ناڤ مرۆڤان دا ھەنە، گرۆپێ O+ ژ ھەموویان بەربەلاڤترە، گرۆپێ B د ناڤ ئاسیەویان دا ھەیە و گرۆپێ O ل ئەمریکا لاتینی، و گرۆپێ AB گەلەک یێ کێمە ل جیھانێ.

به‌رهه‌ڤكرن، به‌يار زاويته‌ى:

ئه‌سيل نوجێفى پارێزگارى نه‌ينه‌وا

ئه‌ڤرۆ نيوز، نيوار محه‌مه‌د سه‌ليم:

پارێزگارێ نەینەوا ل ھەولێرا پایتەختێ ھەرێما کوردستانێ د کۆنگرەکێ رۆژنامەڤانی دا دیارکر کو ئەوان باوەری یا ھەیی دێ عەبادی ژ مالکی باشتر بیت و ھیڤی خواست کو دەستێن خراب ژ ناڤ دەستەلاتێ دا لاببەت و نەھێلیت.
نوجێفی دیارکر کو ئێک ژ وان بابەتێن ھەستیار ئەو بەحسکرنە یا دبێژیت خەلکێ نەینەوا ھەموویان دەستێن ل گەل داعش ھەین و گۆت: “خەلکەکێ کێمە ھاریکاریا وان دکەت و ھەکە ملیۆنەک و ٦٠٠ ھزار کەس ھەڤکاریا داعش بکەن دنیا ھەموو نەشێت ژ ناڤ ببەت، ب تنێ خەلکانەکێ کێم ھاریکاریا وان یا کری، خەلکێ ل ناڤ مووسل ژی ھەیی یێ ئامادەیە ھەڤکاریا مە بکەت”.
پارێزگارێ مووسل زێدەتر گۆت: “گەنجێن نەینەوا ل ناڤ مووسل و دەرڤە دێ پشکداری شەرێ دژی داعش بن”.
دەربارەی پێشڤەچوونێن پێشمەرگەی ژی گۆت: “ھێزێن کوردی ل رەبیعە یێ بەر ب پێش دچن و چاڤەرێینە بەغدا ژی ھاریکاریێ بکەت دا کو بشێین ل ھەموو دەڤەران داعش نەھێلین”.
ل دۆر مووچێ فەرمانبەرێن پارێزگەھا نەینەوا ژی گۆت: “فەرمانبەرێن مووسل دێ ل کەرکووک و ھەولێر وەرگرن، بەلێ کێشەکا ھەیی و ئەو مووچە دێ گیرۆ بن ژبلی یێ پۆلیسان ئەوێ کو نوکە ب ئێکجاری ھاتیە راوەستاندن”.

ئەڤرۆ نیوز، نیوار محەمەد سەلیم:
رێڤەبەریا پۆلیسێن پارێزگەھا دھۆکێ راگەھاند کو ب ھەلکەفتا ھاتنا جەژنا قوربان ئەوان وەکو رێڤەبەریا پۆلیسێن پارێزگەھا دھۆکێ پلانەک دارێتیە دا کو ئێمناھیا باژێری ب پارێزن و پتر خزمەتا وەلاتیان بکەن و د ڤێ پلانێ دا ھەموو ئەفسەر و پۆلیس د پشکدارن و ل سەر تاخێن باژێری ھاتینە بەلاڤکرن.
نەقیبێ مافپەروەر ھێمن سلێمان بەرپرسێ راگەھاندنا پۆلیسێن پارێزگەھا دھۆکێ راگەھاند کو دێ پشکا پشکا پولیسێن ھەوارھاتنێ ترۆمبێلێن وان دێ ل سەر ٢٥ خالان د ناڤ باژێری دا بەلاڤ بن و گۆت: “زێدەباری ژوورا کۆنترولی ٢٤ دەمژمێرا دێ د کاری دا بیت کو ھەر وەلاتیەکێ ئاریشەک ھەبیت دشێت پەیوەندیێ ب ھەردو ھێلێن ١٠٤ و ١٤٠ بکەت”.
زێدەتر گۆت: “پشکا پۆلیسێن چالاکیێن مەدەنی دێ ل سەر شەش خالان د بەلاڤەکری بن زێدەباری ھێزەکا ئامادە بۆ ھەر روودانەکا نەچاڤەرێکری”.
دەربارەی ناڤ تاخان ژی دیارکر کو پشکا پۆلیسێن نەھێلانا گۆنەھباریان دێ پۆلیسێن خوە ب جلکێن مەدەنی ل ناڤا تاخان بەلاڤ کەت و دیسا ل نڤیسینگەھێن نەھێلانا گۆنەھباریان دێ ئەڤسەر و پۆلیسێن نۆبەدار ھەبن”.
نەقیبێ مافپەروەرد گۆتژی: “ھەمی بنگەھێن پۆلیسان یێن سەر ب پشکێن پۆلیسێن رۆژھەلات و رۆژئاڤا دێ ئەڤسەر و پۆلیسێن نۆبەدار ھەبن بۆ ھەر وەلاتیەکێ سکالایەک ھەبیت تۆمار بکەت یان کێشەک بۆ دروست بیت”.
ل دووماھیێ ژی گۆت: “ئەڤ پلانە دێ ل ھەمی قەزایێن سەر ب پارێزگەھا دھۆکێ ڤە دھێتە ب جە ئینان”.

ئەڤرۆ نیۆز ، سالار دۆسکی

ژڤانە ئەڤرۆ ئێڤاری ١/١٠ ل باخچێ پانۆراما ئازادی و ب ھەلکەفتا رۆژا جیھانی یا مۆزیکێ چەندین بزاڤ و چالاکی، ژ لایێ رێڤەبەریا ھۆنەرێ مۆزیکێ بھێنە ئەنجامدان.
سەمەدار مایی رێڤەبەرێ ھۆنەرێ مۆزیکێ بۆ ئەڤرۆ نیۆز دیارکر کو دێ ئێڤارەکا مۆزیکێ ھێتە سازکرن ب ژەنینا مۆزکێن رۆژلاتی و رۆژئاڤایی ل پانۆراما ئازادی وەکو دەربڕین ژ ڤێ رۆژا جیھانی.
مایی گۆت: “ئەڤ بیرھاتنە د چارچووڤێ ئەڤان کاودانان دا دھێتە ساخکرن کو کاودانێن ئابووری نەدباشن، بەلێ ھەر نەبوویە رێگر ھەمبەر بزاڤ و کارێ مە، وەکو پێشتر دێ بەردەوام بین ل سەر خەباتا خوە و ئەڤە مۆزیکە دیاری نە بۆ ێشمەرگێ کوردستانی”.

ئه‌ڤرۆ نيوز، نيوار محه‌مه‌د سه‌ليم:

ئه‌ميندارێ گشتى يێ وه‌زاره‌تا پێشمه‌رگه‌ى ل حوكمه‌تا هه‌رێما كوردستانێ ره‌تدكه‌ت كو ل ده‌مێ كۆنترۆلكرنا ره‌بيعه‌ و گۆندێن ده‌وروبه‌ر ژبلى هێزێن پێشمه‌رگه‌ى چو هێزێن دى پشكدارى تێدا كربيت ب تايبه‌ت هه‌ردو هێزێن يه‌په‌گه‌ و په‌كه‌كه‌.

د رۆهنكرنه‌كێ دا، سكرتێرێ رۆژنامه‌ڤانى يێ فه‌ريق جه‌بار ياوه‌ر، ئه‌ميندارێ گشتى يێ وه‌زاره‌تا پێشمه‌رگه‌ى و ئه‌ندام و ئاخفتنكه‌رێ فه‌رمى يێ فه‌رمانده‌يا گشتى هێزێن پاراستنا هه‌رێمێ، د به‌رنامێ رووداوى ئه‌مرۆ يێ كه‌نالێ رووداو دا ده‌رباره‌ى پشكداريكرنا هێزێن گه‌ريلايێن په‌كه‌كێ و شه‌رڤانێن يه‌په‌كێ دا ئاماژه‌ ب وێ چه‌ندێ كربوو كو ب گۆره‌ى ژێده‌رێن ميدياى و ده‌نگوباسان پشكدارى يا تێدا كرى، به‌لێ پشتى دووڤچوونێ و پێزانينێن له‌شكرى يێن وه‌زاره‌تا پێشمه‌رگه‌ى و ژوورا ئۆپه‌راسيۆنا مووسل، ديار بوو كو هه‌ردو هێزێن گه‌ريلايێن په‌كه‌كێ و شه‌رڤانێن يه‌په‌گێ ب چو ره‌نگه‌كى پشكدارى د شه‌رێ ره‌بيعه‌ و زۆمار دا نه‌كريه‌.

دايه‌ زانين ژى كو د پێشڤه‌چوونێن ره‌بيعه‌ دا ب تنێ هێزێن پێشمه‌رگه‌ى و فه‌رمانده‌يا گشتى يا پاراستنا هه‌رێمێ پشكدارى تێدا كريه‌.

سه‌ليم جبورى سه‌رۆكێ جڤاتا نوونه‌رێن عيراقێ

ئه‌ڤرۆ نيوز، نيوار محه‌مه‌د سه‌ليم:

ئه‌ڤرۆ سپێدێ سه‌رۆكێ جڤاتا نوونه‌رێن عيراقێ سه‌ليم جبوره‌ ب رێيا فرۆكخانا هه‌ولێر گه‌شته‌ باژێرێ هه‌ولێر و ل گه‌ل سه‌رۆكێ په‌رله‌مانێ كوردستانێ كۆمببوو و بڕياره‌ ل گه‌ل هه‌ر ئێك ژ سه‌رۆكێ وه‌زيران و سه‌رۆكێ هه‌رێما كوردستانێ ژى كۆم ببيت.

سه‌ليم جبورى ئه‌ڤه‌ ژ ماوێ ده‌ست بكاربوونا وى وه‌كو سه‌رۆكێ جڤاتا نوونه‌رێن عيراقێ بۆ جارا دويێ يه‌ سه‌ره‌دانا هه‌رێما كوردستانێ دكه‌ت.

ژێده‌رێن ده‌نگوباسان ئاماژێ ب وێ چه‌ندێ دكه‌ن كو بڕياره‌ ل گه‌ل سه‌رۆكێ په‌رله‌مانێ كوردستانێ و سه‌رۆكێن فراكسيۆنێن ناڤا په‌رله‌مانى و سه‌رۆك وه‌زيرێن هه‌رێمێ و سه‌رۆكێ هه‌رێمێ كۆمبيت.

وه‌كو هاتيه‌ زانين مه‌ره‌م ژ هاتنا سه‌رۆكێ جڤاتا نوونه‌رێن عيراقێ ژبوو به‌حسكرنا ره‌وشا ئاوارا و چه‌ند پرسێن ئێمناهيێ يه‌ و دبيت به‌حس ل ڤه‌گه‌ريانا وه‌زيرێن كورد ژى بۆ عيراقێ بهێته‌ كرن ب تايبه‌ت ل ده‌مێ كۆمبوونا وى ل گه‌ل سه‌رۆك وه‌زيران و سه‌رۆكێ هه‌رێمێ.

فازل ميرانى سكرتێرێ پارتى ديموكراتى كوردستان

ئه‌ڤرۆ نيوز، نيوار محه‌مه‌د سه‌ليم:

فازل ميرانى سكرتێرێ پارتى ديموكراتى كوردستان د ديداره‌كێ دا بۆ رۆژناما هه‌ولێر دا ئاماژه‌ ب وێ چه‌ندێ كر كو بۆ پارتى ئێكرێزيا مالا كوردى گه‌له‌ك گرنگتره‌ ژ وه‌زاره‌تان ل به‌غدا و گۆت: “هه‌كه‌ ب خالبه‌ندى بيت، غه‌در يا ل پارتى هاتيه‌ كرن”.

فازل ميرانى ديار كر كو گوهۆڕينا مالكى زيانه‌ك بوو ب وى كه‌فتى و ده‌ستكه‌فته‌كا مه‌عنه‌وى بوو بۆ كوردان ب تايبه‌ت سه‌رۆك بارزانى يێ پێداگرى ل سه‌ر وێ چه‌ندێ كرى كو نابيت بۆ جارا سيێ مالكى ببيته‌ سه‌رۆكێ وه‌زيران.

دا زانين ژى كو وى گه‌له‌ك جاران ب عه‌ره‌بان گۆتيه‌ كو كێشا كوردا ل گه‌ل شيعه‌ و سونا نينه‌، كێشا حوكمه‌تا ژى نينه‌، كێشا وان ل گه‌ل عه‌قليه‌تا عه‌ره‌بايه‌ كو هه‌كه‌ ته‌ماشه‌ى دونيايێ بكه‌ن ئه‌ڤ هه‌موو گوهۆڕينێن وارێ ته‌كنولۆژى و خواندن و پێشكه‌فتنێ ب ده‌ست هاتينه‌، به‌لێ ناڤ عه‌ره‌بان هێشتا بابه‌تێ قه‌بۆلكرنا خه‌لكێ دى د سه‌رێ وان دا نه‌چوويه‌ خوار، ژخوه‌ كێمتر ديتنا خه‌لكێ دى ئێش و دوريشمێ مه‌زنێ وانه‌.

ئاماژه‌ ب وێ چه‌ندێ ژى كر كو قه‌ده‌را كوردان وه‌سا يا چێبووى هه‌تا ب زمانێ خوه‌ ب خوونن دڤێت هزار شه‌هيدان بده‌ن، هه‌تا قايمقام و رێڤه‌به‌رێن ناحيا هه‌بن دڤێت هزار شه‌هيدان بده‌ن، هه‌تا پارێزگار و وه‌زيره‌كى ددانن دڤێت هزار شه‌هيدان بده‌ن، هه‌تا فيدراليه‌ت هه‌بيت دڤێت بيست هزار شه‌هيدان بده‌ن، هه‌كه‌ به‌حس ل ده‌وله‌تا كوردى ژى بكه‌ن، ب خيانه‌ت و جوداكرن ل قه‌له‌م دهێته‌ دان و دێ قيامه‌ت رابيت، ئانكو ئه‌ڤه‌ بابه‌ته‌كێ تاكه‌ كه‌سى نينه‌ و يێ عه‌قليه‌تێ يه‌ و ئه‌ڤه‌ ژى شانسێ مه‌يه‌، هه‌كه‌ ژ ل گه‌ل وه‌لاته‌كێ وه‌كو ئێنگليز يان ئێكێ ئه‌ورۆپا ژياباين دا تشته‌كێ دى بيت.

فازل ميرانى گۆت: “مالكى و عه‌بادى يێن ئێك قوتابخانه‌ و حزبن و مه‌زهه‌بن، به‌لێ كاودانێن مانا مالكى ل گه‌ل حكمرانيا كاودانێن ئاغايێ عه‌بادى جوداهى يا هه‌ى”.

ده‌رباره‌ى هه‌ڤپشكيا د پشكداريا حوكمه‌تا به‌غدا ژى گۆت: “دڤێت به‌لاڤكرنا وه‌زاره‌تان ب كوردان بۆ ئێكرێزيا مالا كوردى بيت، مه‌ چاوان وه‌زير بۆ پارتى دڤێن وه‌سان بۆ ئێكه‌تى و گۆڕان و يه‌كگرتوو و كۆمه‌لێ ژى دڤێن، پارتى بێى هه‌ڤپشكێن خوه‌ يێن كوردستانى ناچيته‌ به‌غدا، بلا مه‌ وه‌زاره‌ت نه‌بن، به‌لێ هه‌ڤگرتن هه‌بيت”.

ده‌رباره‌ى وێ چه‌ندێ كا هه‌كه‌ خالبه‌ندى بيت دێ چاوان بيت، ميرانى دا زانين كو هه‌كه‌ خالبه‌ندى بيت ئێكه‌تيێ وه‌زاره‌ت ب به‌رناكه‌ڤيت و مافێ خوه‌ يێ وه‌رگرتى چونكو سه‌رۆكێ كۆمارێ يێ وه‌رگرتى، سه‌رۆكێ كۆمارێ نێزيكى 32 خالان يێ ل سه‌ر هه‌ين و گۆت: “هه‌كه‌ ب خالبه‌ندى بيت غه‌در يا ل پارتى هاتيه‌ كرن”.

website security
WP Facebook Auto Publish Powered By : XYZScripts.com