ئەڤرۆ نیوز:
وەزارەتا ساخلەمیا عیراقێ راگەهاند کو د ماوەیێ ٢٤ دەمژمێرێن بۆری دا ٤٨ نەخوشێن دی یێن کۆرۆنایێ ل عیراقێ مرن و هەروەسا هزار و ٩٩٧ کەسێن دی ژی تووشی کۆرۆنایێ بووینە و ب گشتی هەتا نها ل عیراقێ ٤٧٢ هزار و ٦٣٠ کەس تووشی کۆرۆنایێ بووینە کو ژ وان ٣٩٩ هزار و ٦٥٥ کەس چارەسەر بووینە و ١٠ هزار و ٩١٠ کەس ژی مرینە.
ئەڤرۆ نیوز، زنار تۆڤی:
دەزگەهێ لوتکە یێ کاروبارێن پەنابەران راگەهاند، گەنجەکێ هەرێما کوردستانێ کو ئاکنجیێ باژێرێ زاخۆ بوویە، ب رێیا دەربازبوونێ ژ رووبارێ درینا ل سنۆرێ وەلاتێ سربیا وەغەر کریە.
ئەڤرۆ شەمبیێ، دەزگەهێ لوتکە دیار کر: کۆچبەرەکێ کورد یێ ب ناڤێ ئاراز سەلیم کو د ژیێ ٢٤ سالیێ دابوو، پشتی کوردستان بجههێلای و ب شێوەیەکێ نە قانوونی بەرەف وەلاتێن ئورۆپا برێکەفتی، ل ئێڤاریا رۆژا پێنجشەمبی ل گەل سێ کۆچبەرێن دیتر ل دەمێ دەربازبوونێ ژ رووبارێ درینا ل سنورێ وەلاتێ سربیا بەری بگەهیت وەغەر کریە.
هەروەسا گۆتیە ژی، ب مەرەما هاریکاری و ب ساناهیکرنێ بۆ دیتنا تەرمێ کورێ وان، کەسوکارێن ئارازی پەیوەندی ب دەزگەهێ لوتکە کریە و دەزگەهێ لوتکە ژی دێ هاریکار بیت بۆ دیتنا تەرمێ وی گەنجی.
ئەڤرۆ نیوز:
سەرۆکێ هەرێما کوردستانێ نێچیرڤان بارزانی ژ بەر وەغەرا د. نەجمەدین کەریم پارێزگارێ شەرعی یێ کەرکووکێ پەیامەک بەلاڤکر و راگەهاند کو ژ دەستدانا نەجمەدین کەریم ژ بۆ مە و گەلێ کوردستانێ خەمەکا مەزنە. سەرەخوشیێ ل هەڤژین و زارۆیێن د. نەجمەدین کەریم، خەلکێ کەرکووکێ و هەموو خەلکێ کوردستانێ دکەم و هەڤخەمێ وانم.
سەرۆکێ هەرێما کوردستانێ هەروەسا دیار ژی دکەت کو د. نەجمەدین کەریم هەر د ژیەکێ گەنج دا پشکداری د شۆرەشێ دا کریە و دەمێ بارزانیێ نەمر نەخوش کەفتی ژی د. نەجمەدین کەریم ل ئەمریکا وەکو نوشدار خزمەت کر و کەسەکێ دلسوز بوو و گەلێ کوردستانێ چ دەمەکێ خەبات و دلسوزیا د. نەجمەدین کەریمی ژبیر ناکەت.
ئەڤرۆ نیوز:
وەزارەتا دەرڤە یا روسیا بەری دەمەکێ راگەهاند کو هەکە شەرێ ل هەرێما قەرەباخێ بەردەوام بیت ئەو دێ پشتەڤانیا ئەرمەنستانێ کەن.
وەزارەتا دەرڤە یا روسیا راگەهاند کو بەردەوامیا شەرێ ل قەرەباخێ دێ کارتێکرنا خوە ل هندەک دەڤەرێن دی ژی کەت و دێ مەترسیا خوە بۆ روسیا هەبیت، ژ بەر هندێ ژی هەکە شەر بەردەوام بیت دێ روسیا پشتەڤانیا ئەرمەنستانێ کەت.
وەزارەتا دەرڤە یا روسیا جارەکا دی داخواز ژ هەر دو ئالیێن شەری ژی کر کو پێگیریێ ب ئاگربەستێ بکەن و شەری بدەنە راگرتن.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ژ بەر وەغەرکرنا د. نەجمەدین کەریم پارێزگارێ شەرعی یێ کەرکووکێ پەیامەکێ بەلاڤ دکەت ئەڤە ژی دەقێ پەیاما سەرۆکێ حوکمەتێ یە:
به‌داخ و پەژارەیەکی زۆره‌وه، هه‌واڵى كۆچى دوایى کەسایەتیی نیشتمانپەروەر و تێکۆشەری دیار و بە هەڵوێستی کوردستان (دكتۆر نه‌جمه‌دین كه‌ریم)م پێگەیشت. د.نەجمەدین لە سەردەمی شۆڕشی ئەیلوولەوە وەک پێشمەرگەیەک و سەرکردەیەکی یەکێتی قوتابیانی کوردستان و دواتریش لە دەرەوەی وڵات، رۆڵێكى گرنگیی لە خه‌باتى رزگاریخوازى گه‌لى كوردستان و ناساندنی پرسی کورد لە نێوەندە دیپلوماسیی و ئەکادیمییە جیهانییەکاندا هەبوو. لە دواى ئازادکردنی عێراقیش لە رژێمی دیکتاتۆریی، وەک پارێزگاری کەرکووک، جێدەستی لە قووڵكردنه‌وه‌ى گیانى بەیەکەوه‌ژیانى ئاشتییانەی نێوان پێكهاته جیاوازه‌كان و داکۆکیکردن لە پرسە نیشتمانییەکان دیار بوو. پرسه و سه‌ره‌خۆشى خۆم له بنه‌ماڵه به‌ڕێزه‌كه‌ى و خه‌ڵكى كوردستان و بەتایبەتی شاری کەرکووک ده‌كه‌م و هاوبه‌شى خه‌میانم، خواى مه‌زن گیانى به به‌هه‌شت شاد بكات و ئارامییش بە هەموومان ببەخشێت.
مه‌سرور بارزانى
سه‌رۆكى حكومه‌تى هه‌رێمى كوردستان
2020/10/31
ئەڤرۆ نیوز، زنار تۆڤی:
ژ پێخه‌مه‌ت پاراستنا گیانێ وەلاتیان، ئەڤە سێ رۆژە پۆلیسێن هاتنوچوونا پارێزگه‌ها دهۆكێ هۆشداریێ دده‌نه شۆفێران، داکو ماسك و ده‌ستگۆركان بکاربینن، ل ئێكشه‌مبیا بهێت هه‌ر شۆفێره‌كێ پێگیریێ ب وان رێنمایان نه‌كه‌ت دێ هێتە سزادان.
موقه‌دمێ مافپەروەر ئازاد تاها په‌یڤدارێ رێڤەبەریا هاتنوچوونا پارێزگه‌ها دهۆكێ بۆ ئەڤرۆ نیوز دیار کر: ئه‌ڤ كارێ ئه‌م ئه‌نجام دده‌ین ژ بۆ پاراستنا گیانێ خه‌لكێ مەیە، ئەڤە سێ رۆژە پۆلیسێن هاتنوچوونا پارێزگه‌ها دهۆكێ ل هه‌موو قه‌زا و ناحیان هۆشداریێ ددەنە شۆفێران كه‌رەستێن خۆپاراستنێ وه‌ك ماسك و ده‌ستگۆركان بکاربینن.
ناڤهاتی گۆت ژى: ل ئێكشه‌مبیا بهێت هه‌وه‌ك دێ هێتە ئه‌نجامدان و هه‌ر شۆفێره‌كێ پێگیریێ ب رێنمایان نه‌كه‌ت دێ هێته سزادان و ئه‌ڤ سزادانه ژ بریارێن وه‌زاره‌تا ناڤخۆ یا حوکمه‌تا هه‌رێما كوردستانێ دەرچووینە، لەوما دخوازین شۆفێر پێگیریێ ب وان رێنمایان بكه‌ن.
ئەڤرۆ نیوز:
رێڤەبەرێ پەیمانگەها پاستۆر یا فرەنسی، یا تایبەتە ب ڤەکۆلینێن نەخۆشیێن ڤەگوهاستی راگەهاندیە، جۆرەکێ مرۆڤان هەیە، هەتا نوکە تووشی ڤایرۆسێ کۆرۆنایێ نەبووینە، د دەمەکێ دا کو وان مامەلە ل گەل تەشبویان دا هەبوویە.
ئاریج توتۆلیان رێڤەبەرێ پەیمانگەها پاستۆر یا فرەنسی د وارێ زیندەزانی، مایکرۆئۆرگان و ڤاکسینان دا ڤەکۆلینان دکەت دیار کریە: ئەڤە دەمەکێ زۆرە وان هزر کرییە کو گرۆپەکێ خەلکی یێن هەین ب چ شێوەیان تووشی کۆرۆنایێ نابن و ئەگەر ژی هێشتا یێ روون نینە.
ناڤهاتی ئاشکرا کر ژی، لدووڤ وان کەرەستێن ل بەر دەستێ وان، ئەو هێشتا نەشێن رۆن بکەن کا بۆچی ئەو گرۆپێن خەلکی تووشی کۆرۆنایێ نابن، چونکی ئەو نەشاینه بگەهنە ئەنجامەکی بۆ تێگەهشتن ل شێوە و ئالیێن بایۆلۆژی ب وێ بەرگریا کو وان کەسان هەی.
لدووڤ هندەک ڤەکۆلینان کو د دەمێ بوری دا ئەنجامداینە، پشکەکا مرۆڤان خودان جینەکا تایبەتن و رێکێ ب ڤایرۆسێ کۆرۆنایێ نادەن د لەشێ مرۆڤاندا گەشێ بکەت.
ئەڤرۆ نیوز:
کچەکا کورد ب ناڤێ میلودی قادر غەدیری، نوکە ئاكنجیە ل وەلاتێ كەنەدا، دێ پشکداریێ د بەریكانا شاهجوانیا جیهانی دا كەت بۆ سالا 2020.
بریارە ئەڤ بەریکانە ل ئێكی چریا دویێ هەتا حەفتی هەمان هەیڤ ل وەلاتێ كەنەدا بهێتە سازكرن، دێ 52 كچێن جوان پشکداریێ د وێ بەریكانێ دا كەن، ئێك ژ وان كچەكا كوردە بناڤێ میلودی قادر غەدیری.
میلودی ژ دایكبوویا سالا 1994 یە، ژ مالباتەكا كوردا باژێرێ مهابادێ یە ل رۆژهەلاتێ کوردستانێ، دەرچوویا زانكۆیێ یە، كارێن خۆبەخشی و مرۆڤایەتیێ پێشكێشی خەلكێ پەنابەر دكەت ل وەلاتێ كەنەدا، وێ حەزا موزیكێ و سترانگوتنێ ژی هەیە، لبەرە ل دەمەكێ نێزیك پشکداریێ دچالاكیێن هونەری یێن مالا كورد دا بكەت.
ئەڤرۆ نیوز ، زنار تۆڤی:
پەیڤدارێ رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: ئەڤرۆ روودانەکا ترافیکێ ل سێمێلێ چێبوویە و د ئەنجامدا کەسەکێ وەغەر کریە و سێ یێن دیتر ژی بریندار بووینە.
موقەدمێ مافپەروەر ئازاد تاها، زێدەتر گۆت: ئەڤرۆ چارشەمبی ٢٨/١٠/٢٠٢٠ و ل دەمژمێژ 6:30 خولەک، ل سەر جادا سێمێل – سێجێ روودانەکا هاتنوچوونێ دروست بوویە، د ئەنجامدا کەسەکێ وەغەر کریە و سێ کەسێن دیتر ژی بریندار بووینە.
ناڤهاتی دیار کر ژی: روودان ژ جۆرێ لێکدانێ بوویە، دناڤبەرا دو ترومبێلان دا ژ جۆرێ پیکاب نیسان و قەلابەکا بارهەلگر، زیانێن مادی ژی ب وان ترۆمبێلان کەفتینە.
نيشاندان