ئەڤرۆ نیوز:
ژ ئەگەرێ شورتا کارەبێ ئاگر بەربوو هژمارەک ژ خیڤەتێن کەمپا چەمشکۆ ل سنورێ قەزا زاخۆ و ١٢ خیڤەت سوتینە و نها ١٢ خێزان بجه ماینە و تیمێن هەوارهاتنێ ژی دیار دکەن کو ژ بەر شورتێ کارەبێ ئاگر بەربوویە کەمپی و وان ژی شیاینە ئاگری کۆنترۆل بکەن.
کەمپا چەمشکۆ دکەڤیتە سنورێ قەزا زاخۆ و پرانیا ئاکنجیێن وێ ژی خەلکێ شنگالێ نە.
ل گۆر زانیاریان ژ بەر ئاگری زیانەکا مەزن یا ماددی گەهشتیە خەلکی لێ چو زیانێن جانێ نەبووینە.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ب هەلکەفتا سەرێ سالا نوو یا زایینی پەیامەک بەلاڤکر و راگەهاند کو ئەو ل گەل بەغدا ل دۆر بۆدجێ سالا ٢٠٢١ گەهشتینە رێککەفتنێ و هێڤی خواست کو ئالیێن سیاسی ل پەرلەمانی بابەتێ موچەی و شایستێن دارایی یێ خەلکێ کوردستانێ وەکو کارتەکا فشارێ ل دژی هەرێما کوردستانێ بکار نەئینن، ئەڤە ژی دەڤێ پەیاما سەرۆکێ حوکمەتا هەرێما کوردستانێ یە:
بەبۆنەی سەری ساڵی نوێی زایینی 2021 ، گەرمترین پیرۆزبایی لە هاونیشتمانیانی کوردستان بەگشتی و پێشمەرگە قارەمانەکان و بنەماڵە و کەسوکاری سەربەرزی شەهیدان بە تایبەتی دەکەم . هیوادارم ساڵێکی پڕ لە کامەرانیی و ئاشتی و ئارامیی و کۆتایی هاتنی نەهامەتی و قەیرانەکان بێت لە کوردستان و عێراق و جیهاندا.
کوردستانییانی خۆشەویست :
لەکاتێکدا پێ دەنێینە ساڵی نوێوه، هەرێمی کوردستان و جیهان به‌گشتی، ساڵێكی زۆر سه‌ختی به‌ڕێكرد، ئەویش بەهۆی بڵاوبوونەوەی پەتای ڤایرۆسی کۆرۆنا و لێکەوتە ئابوورییە سەختەکانی و نەناردنی شایستە داراییەکانی هەرێمی کوردستان لە لایەن کاربەدەستانی حکومەتی فیدراڵی لە بەغدا ، کە لە ئەنجامدا قەیران ودۆخێکی دارایی سەخت و بارگرانییەکی زۆر لە سەر هاونیشتمانیانی خۆشەویستی هەرێمی کوردستان دروستبوو ، ئێستا کە له‌سه‌ر بودجه‌ی 2021 له‌گه‌ڵ حكومه‌تی عێراق گه‌یشتووینه‌ته رێککەوتن. هیوادارم ڕێککەوتنەکە وەکو خۆی جێبەجێ بکرێت و لایەنە سیاسییەکانی عێراق، چیتر رێگە نەدەن ماف و شایستە داراییەکانی خەڵکی کوردستان، بکرێتە کارتێکی فشاری سیاسی لە دژی خەڵکی مافخوراوی کوردستان . دووپاتیشی دەکەینەوە کە ئێمە هەرگیز دەستبەرداری مافە دەستوورییەکانمان نابین.
گەلی کوردستان خاوەن پرسێکی نەتەوەیی و نیشتمانییە و قوربانییەکی زۆری لەم پێناوە داوە و قەوارەی هەرێمی کوردستان، بەرهەمی خەبات و تێکۆشانی سەدان هەزار شەهیدە و پێویستە بە هەموومان داکۆکی لێ بکەین و بیپارێزین ، چونکە کەرامەت و سەربەرزی خەڵکی کوردستان، بەندە بە هەبوون و بەهێزبوونی ناسنامەی نیشتمانیی و نەتەوەییمان و ڕێزگرتن لە مافە دەستوورییەکانمان. داوا لە هەموو هێز و لایەنە سیاسییەکان و خەڵکی خۆڕاگری کوردستان دەکەم، هەموو جیاوازیی و ناکۆکییەک بەلاوەبنێن و بەرگری لە خاک و قەوارەی فيدراڵی هەرێمی کوردستان و دەسکەوتەکان بکەن و یەکگرتووانە، ڕووبەڕووی هەموو هەڕەشەکان ببنەوە و داکۆکی لە مافە ڕەوا و دەستوورییەکانیان بکەن . دڵنیام بە یەکڕیزی و یەکگرتوویی، دەتوانین هەموو قەیران و ئاستەنگەکان تێپەڕینین.
لێرەدا جەخت لە هەوڵە بەردەوامەکانمان بۆ درێژەدان بە چاکسازی و باشترکردنی ژیان و گوزەرانی خەڵکی هەرێمی کوردستان و سەروەری یاسا و دادپەروەریی و سەقامگیرکردنی زیاتری ئاسایش و ئارامی دەکەینەوە.
ئێمە بە گەشبینی و ئومێدەوە، دەڕوانینە داهاتوو، بەو هیوایەی هەرێمی کوردستان پێ بنێتە قۆناغێکی نوێی گەشەکردن و پڕ دەستکەوت و ئاوەدانی و دووربێت لە هەموو ناخۆشی و دۆخێکی نەخوازراو.
ساڵی نوێ لە هەموو لایەک پیرۆز بێت و کوردستانیش هەمیشە، بەهێزتر و سەرفرازتر و ئاوەدانتر بێت.
مەسرور بارزانی
سەرۆکی حکومەتی هەرێمی کوردستان
2020/12/31
ئەڤرۆ نیوز:
مالپەرێ ت٢٤ یێ تورکیا د راپۆرتەکێ دا دیار کریە کو شاندەکێ تورکیا ل سەر فەرمانا رەجەب تەیب ئەردۆگانێ سەرۆک کۆمارێ تورکیا و ب ناڤبژیڤانا روسیا سەرەدانا شامێ کرینە و ل گەل بەرپرسێن حوکمەتا سووریێ دەست ب هەڤدیتنان کرینە.
ئەو یەک پشتی هندێ هات کو بەری چەند رۆژان سەرۆک کۆمارێ تورکیا راگەهاند کو ئەو بەرهەڤن هەموو ئاریشێن هەی ب رێیا دانوستاندنان چارەسەر بکەن.
ئەڤرۆ نیوز:
دەزگەهێن راگەهاندنا ئەمریکا دیار دکەن کو پشتی سعوودیێ هەر یەک ژ وەلاتێن مسر و کوێت ژی داخوازا چەکێن گران و پێشکەفتی ژ ئەمریکا کرینە و ئەمریکا دێ ب گۆژمێ پتر ژ ٤ ملیار دۆلاران چەکی ددەتە وان وەلاتان.
دەزگەهێن راگەهاندنا عەرەبی ژی دیار دکەن کو وەلاتێ کوێت داخوازا کڕینا هەشت کۆپتەرێن مودێرن ژ ئەمریکا کریە و ئەمریکا ژی رازیبوونا خوە دیار کریە.
ئەڤرۆ نیوز:
بەرپرسەکێ رژێما سووریێ بۆ ئاژانسا سپوتینگ یا روسی دیار کریە کو دوهی کۆمبوونەک د ناڤبەرا وان و هێزێن سووریا دیموکرات دا ب ناڤبژیڤانیا شاندەکێ روسی هاتیە کرن و د کۆمبوونێ دا رێککەفتن هاتیە کرن کو هێزێن سووریا دیموکرات باژێرکێ عەین عیسا یێ سەر ب پارێزگەها رەققە رادەستی رژێما سووریێ بکەن.
هەتا نها ب فەرمی هێزێن سووریا دیموکرات ئەو یەک پشتراست نەکرینە لێ چاڤدێرێن سیاسی ژی دیار دکەن کو روسیا فشارێن خوە ل سەر هێزێن سووریا دیموکرات زێدەتر لێ کرینە دا عەین عیسا رادەست بکەت، چونکو هەکە تورکیا هێرشی عەین عیسا و دەڤەرێن دی بکەت چو هێزەک نەشێت رێگریێ ل تورکیا بکەت.
ئەڤرۆ نیوز:
کۆمەلگەھا دەروازەیێ نیڤدەولەتی یێ ئیبراھیم خەلیل ئاگەهداریەکێ بەلاڤ دکەت ئەڤە ژی دەڤێ ڤێ یە:
ئاگەھدارییا خەلکێ هەرێما کوردستانێ و عیراقێ دکەین هەر کەسەکێ بخوازیت سەرەدانا وەلاتێ تورکیا بکەت، پێدڤیه راپورتا پشکنینا کورونایێ (PCR) نێگەتیڤ دگەلدا ھەبیت و ٧٢ دەمژمێر زێدەتر بسەر دەرچوونا مێژوویا راپورتێڤە دەرباز نەببن. ژبەر کو ل دیف رێنماییێن نوو یێن ولاتێ ناڤبری بێی هەبونا راپورتا پشکنینا کورونایێ رێکێ نادەن گەشتیار سەردانا ولاتێ وان بکەن، ئەڤ بریارا وان دێ ل رێککەفتی٣٠\١٢\٢٠٢٠ێ ھێتە جێ ب جێ کرن.
ئەڤرۆ نیوز:
پەیڤدارێ پۆلیسێن پارێزگەها دهۆکێ راگەهاند کو ئەڤسالە رێژا تاوانان ل پارێزگەها دهۆکێ ب رەنگەکێ بەرچاڤ کێم بووینە و ٩١% ژ وان کەیس و سکالایێن کو ل سنورێ پارێزگەها دهۆکێ هاتینە تۆمار کرن ژی ب دووماهی هاتینە.
موقەدەم هێمن سلێمان ئەو یەک ژی دیار کر کو ل سالا ٢٠٢٠ ل سنورێ پارێزگەها دهۆکێ ٣٠ حالەتێن کوشتنێ هەبووینە کو ژ وان ٢٥ زەلام بووینە، هەروەسا ٢٦ حالەتێن خوەکوشتنا زەلامان هەبووینە و ١٥ حالەتێن خوەکوشتنا ژنان ژی هاتینە تۆمارکرن.
ناڤهاتی ئەو یەک ژی دیار کر کو ل سالا ٢٠٢٠ دا ١٠٨ کەیسێن قۆمارکرنێ هاتینە تۆمارکرن و گۆت: (سەبارەت ب بازرگانیکرن و بکارئینانا ماددێن هۆشبەر ژی ٤٧ کەس هاتینە دەستەسەرکرن).
هێمن سلێمان ئەو یەک ژی نەڤەشارت کو ل گۆر سالا ٢٠١٩ ب رەنگەکێ بەرچاڤ رێژا تاوانان ل سنورێ پارێزگەها دهۆکێ ل سالا ٢٠٢٠ کێم بووینە.
ئەڤرۆ نیوز:
پەیڤدارێ رێڤەبەریا هاتنوچوونا دهۆکێ راگەهاند کو ئەڤرۆ د ئەنجاما روودانەکا هاتنوچوونێ دا ل سەر رێیا بەردەرەش ٩ کەس بریندار بوون.
ئازاد تاها ئەو یەک ژی دیار کر کو روودان د ناڤبەرا ترۆمبێلەکا کیا سیراتۆ و بێ ئێم دەبلیو دا ل سەر رێیا قەزا بەردەرەش ل نێزیک بەنزینخانا گوندێ ئیسماوە دا روو دایە کو د ئەنجام دا نەه کەس بریندار بووینە و چو کەسەکێ ژی جانێ خوە ژ دەست نەدایە.
نيشاندان