ئەڤرۆ نیوز ، عەلی حاجی :

پشتی پرا دەلال ل باژێرێ زاخۆ ھاتیە سەخبێریکرن و مێژوویا وێ یا راستەقینە ھاتیە ئاشکەرا کرن، ب مەرەما دیار کرنا روویێ پرا دەلال باژێرڤانی ب ھەڤکاری دگەل گەشو گوزارا و رێڤەبەریا شینواران ل زاخۆ رابووینە ب سەخبێریکرنا دەوروەبەرێن پرا دەلال .

ل دور ڤێ چەندێ بژار مونیب سەروکێ باژێرڤانیا زاخۆ بۆ ئەڤرۆ نیوز ئاشکرا کر سالا ٢٠١٦ مە ئەڤ پروژە پێشکێشکر و نوکە دا کار ل سەر وی پروژەیی دھێتە کرن و ژبەر قەیرانا دارایی کارێ پرۆژەی دێ ب سێ قوناغ بیت ، قوناغا ئێکێ رابوینە ب جوانکرنا دەروازا باژێرێ زاخۆ کو ھندەک ستووین ھاتینە دانان و ل سەر وان ستوینا ھێمایێ پرا دەلال ژی ھاتیە دانان و دگەل دانانا چەندین کورسیێن کارەبایی ، قوناغا دووێ دنوکە دا کار ل سەر دھێتە کرن کو ئەو ژی رەخودورێن پرێ ڤە دێ بنە مەدرەجێن رومانی ھێنە دانان و کو ٧ مدەرجا پێک دھێت و نێزیکی حەفت ھزار کەسان دشێن رووننە خارێ ، ژبەر کو جاددەیا پرا دەلال یا بلند و ٦ مەتران چەنگێ پرێ بەرزە دکەت ، ئەم رابوینە نزمکرنا جاددەیێ و نێزیکی ٤ مەتران دێ جاددە ھێتە خار و ب وی رەنگی دێ زێدەتر پر دیار کەت.

ناڤھاتی گوت ژی: ئێدی نابیت ب چو رەنگەکی ترومبێل ل بەرامبەر پرا دەلال ب راوەستن و ئەو جاددەیا بەرامبەری وێ ھاتیە گرتن و ھەر دیسان پارکەک ژی ھاتیە بەرھەڤ کرن دا کو گەشتیار و ھاولاتی ترومبێلێن خوە دا تێدا ب راوەستینن ، دێ ستوینێن مەزن یێ کارەبێ ل ھەردوو لاێن پرێ ھێنە دانان ب مەرەما پەیداکرنا روناھیێ و ب شەڤ روژ کارێ بەردەاومە ، ھەر دیسان ئەو خارنگەھێن ل دەوروبەرێن پرێ ب تایبەتی یێن نێزیک پرێ ھاتینە ئاگەھدار کرن ددەمەکێ نێزیک دا دێ ھێنە راکرن ، د قوناغا سیێ دا دێ پارکەک بەر لایێ ئاڤا خابیری ھێتە دروست کرن ھەر ژ پرا دەلال ھەتا پرا بەدرخان لێ ھێشتا دەست ب وێ قوناغێ نەھایتە کرن و ئەو پارکە دێ ل سەر روبەرێ ٤٥٠ مەترێن دوو جارکی دروست بیت و دێ جوانیەکا دیتر دەتە دەوروبەرێن پرا دەلال.

ئەڤرۆ نیوز ، عەلی حاجی :

ئەڤرۆ ل روژا شەمبی ژ ئەگەرەکێ نەدیار ئاگر بەر دبیتە مالا وەلاتیەکێ باژێرێ زاخۆ و دبیتە ئەگەرێ وێ چەندێ زیانێن مەزنێن مادی بەر خانیێ وی ھاولاتی بکەڤیت.

رائید بێوار عەبدولعەزیز بەرپرسێ راگەھاندنا بەرەڤانیا باژێری ل پارێزگەھا دھوکێ بۆ ئەڤرۆ نیوز دیار کر ئەڤرۆ ل روژا شەمبیێ رێکەڤتی ٢٧/٤/٢٠١٩ ل دەمژمێر ١١ی سپێدێ تیمێن مە ل بەرەڤانیا باژێری ل زاخۆ ھاتینە ئاگەھدار کرن ل سەر ھەبونا روودانەکا ئاگ بەربوونێ کو ب مالا ھاولاتیەکێ ل تاخێ رکاڤا نوو دکەڤت ھەر ئێکسەر تیمێن مە گەھشتنە جھێ روودانێ و شیان کونترولێ ل سەر وی ئاگری بکەن ، خوەش بەختانە چو زیانێن گیانی نەبوون بتنێ زیانێن ماددی بەر ب مالا وی ھاولاتی کەفتینە و پشکەکا کەل و پەلێن وان ژی ھاتینە سوتن و ھەتا نوکە ئەگەرێن ئاگر بەربوونێ نەھاتینە زانین.