ئه‌ڤرۆ، سالار محه‌مه‌د دۆسكی:

بسپۆره‌كێ زانستێن سیاسی ل زانكۆیا دهۆك، ئاشكراكر كو سه‌ره‌دانا نێچیرڤان بارزانی،  سه‌رۆكێ‌ هه‌رێما كوردستانێ‌ بۆ باژێرێ‌ سلێمانیێ‌ دێ‌ بیته‌ ده‌رگه‌هه‌ك ئالیێن سیاسی نێزیكی ئێك بن تایبه‌ت پارتی و ئێكه‌تی و دێ‌ بیته‌ ئه‌گه‌رێ چاره‌سه‌ركرنا گه‌له‌ك ئاریشان د ڤێ‌ قۆناغێ دا.

د.هه‌وار نێروه‌یی، راگرێ‌ كولیژا زانستێن سیاسی ل زانكۆیا دهۆكێ‌ بۆ رۆژناما (ئه‌ڤرۆ) گۆت”ڤالاهیه‌كا مه‌زن دناڤبه‌را پارتێن كوردستانێ دا دروست ببوو و تایبه‌ت دناڤبه‌را پارتی و ئێكه‌تی دا و ئه‌ڤه‌ دده‌مه‌كی دا هات ده‌مێ‌ جێگرێ‌ سه‌رۆكێ‌ جڤاتا نوونه‌رێن ئیراقێ‌ هاتیه‌ هه‌لبژارتن و ئه‌ندامێن ئێكه‌تی ل جڤاتا نوونه‌ران ده‌نگ ب به‌ربژارێ پارتی دیموكراتی كوردستان نه‌دای، هه‌ر كه‌سه‌كێ‌ هزرا سه‌رهلدانا كێشه‌ و ئالوزیان دكر دناڤبه‌را هه‌ر دو ئالیان دا و دێ‌ كارتێكرنه‌كا راسته‌وخوه‌ ل سه‌ر هه‌رێمێ‌ هه‌بیت و دروست بوو و تایبه‌ت ده‌مێ‌ هه‌ر دو پارتێن سیاسی جودا به‌ربژار بۆ پوستێ‌ سه‌رۆك كومارێ‌ ئیراقێ‌ دیاركرین و ئه‌ڤ هه‌ر دو هوكاره‌ ئه‌گه‌ره‌كێ‌ سه‌ره‌كی بوون بۆ نه‌گه‌هشتنا هه‌ردو ئالیان بۆ پرسا هه‌لبژارتنێ‌ په‌رله‌مانێ‌ كوردستانێ‌، گومان تێدا هه‌یه‌ ل ده‌مێ‌ خوه‌ دا نه‌هێنه‌كرن و ئه‌ڤ هه‌می بابه‌ته‌ بۆ هه‌رێما كوردستانێ‌ دچاره‌نڤیسسازن و ته‌مامكه‌رێن هه‌ڤدوونه‌ بۆ ڤێ‌ قۆناغا هه‌ستیارا كوردستانێ‌”.

گۆت ژی” ئێكه‌تی و پارتی پێدڤی ب هه‌ڤدو هه‌یه‌ و دڤێت ئێك دو بگرن و ب هه‌بوونا پرۆژه‌كێ‌ ئێكگرتی بشێن هه‌رێما كوردستانێ‌ ژ ڤێ‌ قۆناغێ ده‌رباز بكه‌ن، وه‌لاتێن رۆژهه‌لاتا ناڤه‌راست و تایبه‌ت وه‌لاتێن جیران چێكه‌رێن ئالۆزی و كێشێن سیاسی نه‌ ل هه‌رێما كوردستانێ‌ تایبه‌ت و ل ده‌ڤه‌رێ‌ ب گشتی و قه‌یرانێن سیاسی ئاراسته‌ی هه‌رێما كوردستانێ‌ و ئیراقێ‌ دكه‌ن ژوان ژی توركیا و ئیران له‌ورا خوه‌ رزگاركرن ژ ڤان قه‌یرانان بتنێ‌ ب ئێكده‌نگیا پارتی و ئێكه‌تیێ‌ یه‌”.

د.هه‌وار نێروه‌یی، زێده‌تر رۆهنكر” ئالیێن سیاسی ل هه‌رێما كوردستانێ‌ شیان یێن هه‌ین هه‌رێما كوردستانێ‌ ژ ڤێ‌ قۆناغێ‌ ده‌رباز بكه‌ن و تایبه‌ت پارتی و ئێكه‌تی  و گرنگه‌ پرۆژه‌كێ‌ كوردستانی هه‌بیت ژ ده‌رڤه‌ی به‌رژوه‌ندێن حزبایه‌تی،راسته‌ هه‌ر پارته‌كێ‌ به‌رژه‌وه‌ندیێن حزبایه‌تی یێن خوه‌ هیێن هه‌ین، لێ‌ دڤێت به‌رژه‌وه‌ندێن كوردستانێ‌ به‌ری هه‌ر تشته‌كی بن”.

راگرێ‌ كولیژا زانستێن سیاسی ل زانكۆیا دهۆك ئه‌و ژی گۆت” ئیراق د ق‌وناغه‌كا نه‌ ئارام دا دبوریت، ئالیێن نه‌قانوونی ل ئیراقێ‌ و تایبه‌ت pkk   كاریگه‌ریه‌كا خراب ل سه‌ر پاشه‌رۆژا ئیراقێ‌ هه‌یه‌، له‌وما یا گرنگه‌ ئالیێن شه‌رعی ل كوردستانێ‌ و ئیراقێ‌ پێكڤه‌ كار بكه‌ن”.

د.هه‌وار نێروه‌یی دیاكر” گرنگه‌ بۆ بابه‌تێن نه‌ته‌وی ئێكگرتنه‌كا خورت دناڤبه‌را هه‌موو ئالیێن سیاسی دا هه‌بیت و تایبه‌ت پارتی و ئێكه‌تی له‌وما گرنگه‌ به‌رده‌وام دانوستاندن دناڤبه‌را هه‌موو پارتان دا هه‌بن و سه‌ردانا (نێچیرڤان بارزانی) سه‌رۆكێ‌ هه‌رێما كوردستانێ‌ بۆ سلێمانیێ‌ ده‌ستپێكری كاره‌كێ‌ گه‌له‌ك گرنگه‌ و دبینم دره‌نگ ژی بوو لێ‌ گاڤه‌كا گه‌له‌ك باش بوو و دێ‌ یا به‌رهه‌مدار بیت  و دێ‌ بیته‌ فاكته‌ره‌كێ‌ گرنگ بۆ ده‌ربازبوونا هه‌رێما كوردستانێ‌ ژ ڤێ‌ قۆناغا هه‌ستیار”.

د. هه‌وار نێروه‌یی ئه‌و ژی ئاشكراكر كو كێشه‌ و ئالۆزیێن دناڤبه‌را پارتێن سیاسی دا ب كومبوونه‌كێ‌ چاره‌سه‌رنابن، لێ‌ چوونا سه‌رۆكێ‌ هه‌رێما كوردستانێ‌ ڤه‌كرنا ده‌رگه‌هه‌كی یه‌ بۆ چاره‌سه‌ركرنا كێشه‌ و ئالۆزیان و تایبه‌ت مژارا هه‌لبژارتنێن په‌رله‌مانێ‌ كوردستانێ‌ نوكه‌ ل رێ‌ دایه‌ و له‌وما گرنگه‌ ئه‌ڤ ناكۆكیه‌ بهێنه‌ چاره‌سه‌ره‌كرن و پرسا كۆمسیۆنا هه‌لبژارتنان بهێته‌كاراكرن و كوده‌نگیه‌ك دروست ببیت دا پشگێریا ناڤ ده‌وله‌تی ژی بۆ هه‌رێما كوردستانێ‌ یا به‌رده‌وام بیت چونكه‌ ده‌مه‌كه‌ دوستێن ملله‌تێ‌ كورد ره‌خنێ‌ ل هه‌رێما كوردستانێ‌ دگرن كو پێدڤیه‌ ئێك ده‌نگبن”.

ئاماژه‌كر” په‌یڤا نوونه‌را نه‌ته‌وێن ئێكگرتی ل ئیراقێ‌ گه‌له‌ك یا زه‌لال بوو، گرنگه‌ ئالیێن سیاسی نێزیكی ئێك بن و ده‌رگه‌هێ ئێكانه‌ دیالوك و دانوستاندنه‌ دناڤبه‌را پارتێن سیاسی دا و تایبه‌ت پارتی و ئێكه‌تی”.

هه‌ولێر، قائید میرۆ

پشتی سه‌ره‌دانا نێچیرڤان بارزانی سه‌رۆكێ هه‌رێما كوردستانێ بۆ سلێمانیێ، شیایه‌ سه‌ره‌دانا ئالیێن سیاسی بكه‌ت ب مه‌ره‌ما ده‌ستپێكرنا دانوستاندنان، بسپۆره‌كێ زانستێن سیاسی ژی ئاشكراكر، نێچیرڤان بارزانی ده‌رگه‌هێ دانوستاندنان هه‌مبه‌ر ئالیێن سیاسی  ڤه‌كریه‌ و ئاریشه‌یێن د ناڤبه‌را وان دا هند د مه‌زن و ئالۆز نینن، له‌وڕا شیانێن چاره‌سه‌ركرنێ هه‌نه‌ و خالێن هه‌ڤپشك زێده‌ترن ژ خالێن ناكۆكی لسه‌ر.

سالح مه‌لا عومه‌ر، بسپۆرێ زانستێن سیاسی بۆ رۆژناما (ئه‌ڤرۆ) گۆت” به‌ری سه‌ره‌دانا نێچیرڤان بارزانی بۆ سلێمانیێ ناكۆكی دناڤبه‌را پارتی و ئێكه‌تیێ دا هه‌بوو كو كاریگه‌ری لسه‌ر ئالیێن دی ژی هه‌بوو، ره‌وشا هه‌رێما كوردستانێ رۆژ بۆ رۆژ به‌ر ب ئالۆزتر ببیت و كاریگه‌ری لسه‌ر پرۆسا سیاسی ب گشتی هه‌بیت، كۆمبوونێن په‌رله‌مانێ كوردستانێ هاتبوونه‌ راگرتن و  هه‌لبژارتن دده‌مێ خوه‌ دا نه‌دهاتنه‌ ئه‌نجامدان، به‌لێ سه‌ره‌دانا سه‌رۆكێ هه‌رێما كوردستانێ بۆ ئه‌گه‌رێ وێ چه‌ندێ ره‌وش به‌ر ب ئاسایی بوونێ بچیت و بشێوه‌یه‌كێ گشتی نوكه‌  ده‌رگه‌هه‌ك یێ هاتیه‌ ڤه‌كرن بۆ ئه‌نجامدانا دانوستاندنان دناڤبه‌را ئالیێن سیاسی دا تاكو لسه‌ر مێزێن دانوستاندنان كۆمببن و بگه‌هنه‌ خالێن هه‌ڤپشك، ئه‌ز نابێژم ب سه‌ره‌دانه‌كێ هه‌موو بابه‌ت هاتینه‌ چاره‌سه‌ركرن، به‌رۆڤاژی پێدڤی ب دانوستاندنێن زۆر هه‌یه‌ دناڤبه‌را ئالیێن سیاسی دا، به‌لیێ سه‌قایه‌ك هاتیه‌ چێكرن بۆ چاره‌سه‌ركرنا ئاریشه‌یان”.

سالح مه‌لا عومه‌ر گۆت ژی” ب دیتنا من ناكۆكیێن د ناڤبه‌را ئالیێن سیاسی دا هند د مه‌زن نینن كو نه‌هێنه‌ چاره‌سه‌ركرن، زێده‌تر فه‌زایه‌كێ سایكۆلۆژی هاتبوو چێكرن ره‌وشا هه‌رێما كوردستانێ بگه‌هیته‌ ئاسته‌كی كو دانوستاندن نه‌هێنه‌ ئه‌نجامدان، تایبه‌ت ب رێیا كه‌نالێن راگه‌هاندنێ و سۆشیال میدیایێ ره‌وشه‌كا زۆر خراپ  هاتبوو چێكرن دناڤبه‌را پارتی و ئێكه‌تیێ دا، نوكه‌ ره‌وش به‌ر ب  ئاسایی بوونێ یه‌ و شه‌ڕێ راگه‌هاندنێ ژی هاتیه‌ راگرتن و زێده‌تر ده‌لیڤه‌ بۆ سیاسه‌تمه‌داران هێلایه‌ و ئه‌ز باوه‌رم ئاریشه‌یێن د ناڤبه‌را ئالیێن سیاسی و كه‌سایه‌تیێن سیاسی دا هند دمه‌زن و زه‌حمه‌ت نینن ببنه‌ ئه‌گه‌رێ وێ چه‌ندێ نه‌گه‌هنه‌ ئه‌نجامه‌كی، بۆ نموونه‌ لدۆر پرۆسا هه‌لبژارتنان ناكۆكی هه‌بوون، به‌لێ ئه‌نجامدانا هه‌لبژارتنان پرۆسه‌كا ئالۆز نینه‌، چونكه‌ ب گۆره‌ی قانوونێ پشتی چار سالان پێدڤیه‌ هه‌لبژارتن بهێنه‌ ئه‌نجامدان، ئاریشه‌ لسه‌ر وێ چه‌ندێ یا هه‌ی كا ئایا قانوونا هه‌لبژارتنان بهێته‌ راستڤه‌كرن یان ژی نه‌،  ئه‌ڤه‌ دێ ب دانوستاندنان هێته‌ ئێكلاكرن، لدۆر پرسا كاراكرنا كۆمسیۆنێ ژی ب هه‌مان شێوه‌ی ئاریشه‌كا مه‌زن و ئالۆز نینه‌ و ده‌لیڤا رێككه‌فتنێ یا هه‌ی، ئه‌ز یێ گه‌شبینم ب چاره‌سه‌ركرنا ئاریشان و رێككه‌فتنا ئالیێن سیاسی، به‌لێ پێدڤیه‌ ده‌زگه‌هێن راگه‌هاندنێ و سۆشیال میدیا رۆله‌كێ ئه‌رێنی ببینن بۆ وێ چه‌ندێ  كو ئالیێن سیاسی بگه‌هنه‌ رێككه‌فتنێ و به‌رۆڤاژی نه‌بنه‌ ئاسته‌نگ بۆ چێكرنا ئاریشه‌یان و لێكدووركه‌فتنا ئالیێن سیاسی، نێچیرڤان بارزانی ب سه‌ره‌دانا خوه‌ شیایه‌ سه‌قایه‌كێ ئارام ل كه‌نالێن راگه‌هاندنێ و سۆشیال میدیایێ په‌یدا بكه‌ت بۆ ئاساییكرنا ره‌وشێ”.

ئه‌ڤرۆ:

به‌رپرسێ لقێ 17 یێ پارتی دیموكراتی كوردستان ل شنگالێ راگه‌هاند، سه‌رانێن PKK بزاڤێ دكه‌ن ب ترسێ و هێزێ گه‌نجێن ئێزدی د سه‌ردا ببه‌ن و بۆ كارێن تیرۆرستی بكاربینیت.

ئاشتی گۆچه‌ر، به‌رپرسێ لقێ 17 یێ پارتی ل شنگالێ گۆت” ئێزدی خه‌لكه‌كێ ب وه‌فانه‌ و كوردێن ره‌سه‌نن و دزانن تنێ پارتی و بارزانی خزمه‌تا ئێزدیان و ئێزیدخانێ دكه‌ن”.

ئاماژه‌ كر” چه‌ند رۆژه‌ ئه‌م د كه‌مپاندا دگه‌ریێن بۆ سێ ئارمانجان، ژوان ژی سوپاسیا هه‌لویستێ شنگالیان بكه‌ین كو شیاین بۆ هه‌رسێ كورسیێن شنگالی د هه‌لبژارتنێن جڤاتا نوونه‌رێن ئیراقێ دا، پارتی بكه‌نه‌ ئێكه‌م و خه‌ونا وان هێزان ژناڤ ببه‌ن كو دخواست شنگالێ ب ده‌ردێ ده‌ڤه‌رێن دی ببه‌ن، هه‌روه‌سا ژ نێزیك ڤه‌ گوه ل داخوازیێن وان بكه‌ین و بێژینه‌ وان ئاگه‌هداری زارۆیێن خوه‌ ببن كو PKK بۆ كارێن خراب بكارنه‌ئینیت”.

ئاشتی كۆچه‌ر دووپاتكر ژی” به‌رده‌وام ئێزدیان نه‌هێلایه‌ سته‌م بهێته‌ قبوولكرن و نوكه‌ ژی دزانن ئه‌و هێزێن ل شنگالێ هه‌ین بۆ ئه‌جندێن هه‌رێمایه‌تی كار دكه‌ن”.

سه‌باره‌ت زڤرینا پارتی ژی بۆ شنگالێ، به‌رپرسێ لقێ 17 یێ پارتی دبێژیت” ئه‌م ب ئاشتی و بێ شه‌ر دێ زڤرین باژێرێ خوه‌، شنكال پارتیه‌، به‌لێ ئه‌و هێز دخوازن شه‌ر د ناڤبه‌را شنگالیاندا روو بده‌ت، ئه‌ڤه‌ ژی ل ده‌ف مه‌ حه‌رامه‌ و سه‌رۆك بارزانی براكوژی یا حه‌رام كری”.

ئه‌ڤرۆ:

جێگرێ سه‌رۆكێ لژنا په‌ترۆل و غازێ ل جڤاتا نوونه‌رێن ئیراقێ رادگه‌هینیت، ده‌ركرنا قانوونه‌كا ئێكگرتی یا په‌ترۆل و غازێ بۆ چاره‌سه‌ركرنا كێشێن په‌ترۆل و غازێ دێ ژ كارێن سه‌ره‌كی یێن مه‌ بیت.

د. سه‌باح سوبحی، ئه‌ندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان و جێگرێ سه‌رۆكێ لژنا په‌ترۆل و غازێ ل جڤاتا نوونه‌ران، گۆت” پشتی لژنا په‌ترۆل و غازێ ل جڤاتا نوونه‌ران هاتیه‌ پێكئینان، دێ كاری بۆ چاره‌سه‌ركرنا كێشێن كه‌رتێ په‌ترۆل و غازێ كه‌ت، چونكه‌ 95% ژ داهاتێ ئیراقێ ل سه‌ر په‌ترۆلێ یه‌، پشتی شه‌رێ د ناڤبه‌را رووسیا و ئۆكرانیا دا كۆرانكاری ب سه‌ر كه‌رتێ په‌ترۆلێ دای ێن هاتین، ب تایبه‌تی ژ روویێ بهای ڤه‌، ژبه‌ر وێ چه‌ندێ كاری بۆ رێكخستنا كه‌رتێ په‌ترۆل و غازێ دكه‌ین”.

زێده‌تر دبێژیت” پشتی پرۆژێ ئازادیا ئیراقێ و ژناڤبرنا رژێما به‌عس، قانوونا په‌ترۆل و غازێ هاتیه‌ به‌رهه‌ڤكرن و پاشی ژئالیێ سه‌رۆكایه‌تیا جڤاتا وه‌زیرێن ئیراقێ ژی پرۆژه‌ هه‌بوو، به‌لێ هه‌تا نوكه‌ ئیراق نه‌شیایه‌ ببیته‌ خودان قانوونا خوه‌ یا تایبه‌ت ب په‌ترۆل و غازێ ڤه‌، ئه‌م د ڤێ خۆلا جڤاتا نوونه‌رێن ئیراقێ دا بۆ ده‌ركرنا قانوونا په‌ترۆل و غازێ دێ هه‌موو شیانێن خوه‌ ده‌ینه‌ كاری و رێ ژی ناده‌ین قانوونه‌ك بهێته‌ ده‌ركرن كو ماف و شایستێن هه‌رێما كوردستانێ د كه‌رتێ په‌ترۆلێ دا ل به‌رچاڤ نه‌هێته‌ وه‌رگرتن”.

ل دۆر بریارا دادگه‌ها فیدرالی دژی قانوونا په‌ترۆل و غازێ ل هه‌رێما كوردستانێ، دبێژیت” بریارا دادگه‌ها فیدرالی ل دۆر ره‌تكرنا قانوونا هه‌ژمار 22 یا سالا 2007 ل هه‌رێما كوردستانێ دێ ره‌نگڤه‌دان ل سه‌ر كارێن مه‌ هه‌بیت، دێ بزاڤێ كه‌ین ئه‌و گرفت بهێنه‌ چاره‌سه‌ركرن و دێ به‌رگریێ ژ مافێ خه‌لكێ هه‌رێما كوردستانێ كه‌ین”.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی، پشكداری د رێوره‌سمێن ده‌رچوونا خۆلا 27 یا كۆلیژا له‌شكری یا دوو ل زاخۆ كر و په‌یڤه‌ك تێدا پێشكێشكر تێدا سه‌ره‌رای پیرۆزباهیێ ل ده‌رچوویان، دووپاتی ل گرنگی و پێدڤیا رێكخستنا هێزا پێشمه‌رگه‌ی كر و داخوازكر پارتی دیموكراتی كوردستان و ئێكه‌تی نیشتمانی كوردستان بۆ ڤێ مه‌به‌ستێ هاریكاریێ بكه‌ن و ده‌ستێوه‌ردانێ د كاروبارێن پێشمه‌رگه‌ی دا ب راوه‌ستینن.

هه‌ر ل دۆر پرۆسا ئێكگرتنا هێزا پێشمه‌رگه‌ی، سه‌رۆكێ هه‌رێمێ باسێ وان گاڤان كر یێن هه‌تا نوكه‌ هاتینه‌ هاڤێتن و هه‌ژماره‌كا هێزێن پێشمه‌رگه‌ی هاتینه‌ یه‌كخستن، به‌لێ دووپاتی ل وێ چه‌ندێ كر كو ئه‌و به‌س نینه‌ و خه‌لكێ كوردستانێ و دۆستێن هه‌رێما كوردستانێ ل جڤاكێ نێڤده‌وله‌تی، چاڤێن وان ل وێ چه‌ندێ یه‌ كو پرۆسه‌ باشتر برێڤه‌بچیت.

نێچیرڤان بارزانی ئاماژه‌ ب به‌رده‌وامیا مه‌ترسیێن داعسێ و پێدڤیا هاریكاری و هه‌ماهه‌نگیا زێده‌تر د ناڤبه‌را پێشمه‌رگه‌ی و له‌شكرێ ئیراقێ دا كر، ب تایبه‌تی ل ده‌ڤه‌رێن سنوورێ مادا 140 یا دستووری كوڤ الاهیا ئه‌منی تێدا هه‌یه‌ و تیرۆرست مفای ژێ دبینن. هه‌روه‌سا ئاماژه‌ ب رۆلێ پێشمه‌رگه‌ی د شكاندنا داعشێ دا كر.

د پشكه‌كا دی یا په‌یڤا خوه‌ دا، نێچیرڤان بارزانی، باسێ گرنگیا دانوستاندنێ و لێكتێگه‌هشتنێ د ناڤبه‌را ئالیێن كوردستانی دا كر و ئاماژه‌ ب كۆمبوونا ڤێ دووماهیێ یا پارتی دیموكراتی كوردستان و ئێكه‌تی نیشتمانی كوردستان كر و ب كۆمبوونه‌كا باش هه‌ژمارت، هه‌روه‌سا هیڤی خواست دیدار و كۆمبوونێن زێده‌تر بۆ ئێكرێزی و ته‌باییێ د ناڤبه‌را ئالیێن سیاسی دا بهێنه‌ ئه‌نجامدان و گۆت” ده‌لیڤه‌كا باش بۆ نه‌هێلانا ناكۆكیان یا هه‌ی”.

ره‌وشا ئیراقێ و بنبه‌ستا سیاسی ل وه‌لاتی، ته‌وه‌ره‌كێ دی یێ په‌یڤا سه‌رۆكێ هه‌رێما كوردستانێ بوو و تێدا باس ل كاریگه‌ریێن ره‌وشێ ل سه‌ر ژیان و گوزه‌رانا خه‌لكی و ره‌وشا هه‌رێما كوردستانێ كر و دووپاتی ل پێدڤیا هاریكاریێ دناڤبه‌را هه‌موو ئالیێن ئیراقی دا كر بۆ ده‌ربازكرنا ره‌وشا دژوار و چاره‌سه‌ركرنا كێشان.

ل دووماهیا په‌یڤا خوه‌، نێچیرڤان بارزانی، سه‌ره‌رای دووپاتكرنا به‌رهه‌ڤی و جدیه‌تا حوكمه‌تا هه‌رێما كوردستانێ بۆ چاره‌سه‌ركرنا كێشان ل گه‌ل به‌غدا ل سه‌ر بنه‌مایێ دستوورێ ئیراقێ، داخواز ژ حوكمه‌تا فیدرالی و ده‌زگه‌هێن ئیراقی كر هه‌كه‌ وه‌لاتیێن هه‌رێما كوردستانێ ب وه‌لاتیێن ئیراقی دبینن، دووماهیێ ب فشارێن خوه‌ ل سه‌ر هه‌رێما كوردستانێ بینن.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، راگه‌هاند، پشكداریكرنا مه‌ د كۆربه‌ندێ جیهانیێ داڤۆس دا بۆ وێ چه‌ندێ بوو، هزر و بۆچوونێن حوكمه‌تا هه‌رێما كوردستانێ و خه‌لكێ كوردستانێ ل گه‌ل هه‌موو به‌رهه‌ڤبوویێن كۆربه‌ندی ئالۆگۆر بكه‌ین و گوهداریا هزر و بۆچوونێن وان بگرین.

ئه‌ڤ ئاخڤتنێن سه‌رۆكێ حوكمه‌تا هه‌رێما كوردستانێ ل داخۆیانیه‌كا رۆژنامه‌ڤانی ل داڤۆس هاتن كۆ تێدا گۆت ژی” ئارمانجه‌كا دی یا پشكداریا مه‌ د وی كۆربه‌ندی دا بۆ تێگه‌هاندنا جیهانی یه‌ ل وان ته‌حه‌دیێن روو ب روویی مه‌ دبن، بۆ وێ چه‌ندێ هه‌م بۆچوونا خوه‌ ب وان رابگه‌هینین و هه‌م ژی گوهداریا بیر و بۆچوونێن وان بكه‌ین، بۆ چاره‌سه‌ریا وان قه‌یرانێن نوكه‌ روو ب روویێ جیهانێ ب گشتی بووین”.

مه‌سرور بارزانی دووپاتكر ژی” ئه‌م ل هه‌رێما كوردستانێ دبیت بشێین تا راده‌كی مه‌ كاریگه‌ری هه‌بیت ل كێمكرنا پشكه‌ك ژ وان كێشێن د سیكته‌رێن ئاسایشا خۆراكی و ئاسایشا وزێ هه‌ین كوت  تووشی جیهانێ بووین، كو هیچ نه‌بیت بشێین بۆ ده‌ڤه‌رێن خوه‌ وێ كێماتیێ پر بكه‌ین”.

د به‌رسڤا پرسیاره‌كێ دا، ل دۆر پاشه‌رۆژا هاریكاری و هه‌ماهه‌نگیێن د ناڤبه‌را هه‌رێما كوردستانێ و وه‌لاتێن جیهانێ، مه‌سرور بارزانی، سه‌رۆكێ حوكمه‌تا هه‌رێما كوردستانێ، گۆت” ل كۆربه‌ندێ ڤێ جارێ یێ داڤۆس، ئه‌و بابه‌تێن زێده‌تر باس ل سه‌ر هاتیه‌ كرن، پێكهاتی بوون ژ كێشێن ئاسایشا خۆراكی، كێشا وزێ و هنده‌ك پرس و كێشێن سیاسی، كو ل ده‌ڤه‌رێ په‌یدابووینه‌ و ب شێوه‌كێ گشتی باس ل كاریگه‌ریێن شه‌ری ژی هاته‌ كرن، وه‌كو شه‌رێ ئۆكرانیا، كو وان كێشان چه‌ند كاریگه‌ری ل سه‌ر پرسێن دی هه‌بوو، نه‌كو تنێ ل ئورۆپا، به‌لكو ل ده‌ڤه‌رێن دی ژی”.

مه‌سرور بارزانی گۆت ژی” مه‌ ل سه‌ر وێ چه‌ندێ ئاخڤت، چاوان بشێین هاریكاریا هه‌ڤدو بین و ئه‌و چاوان بشێن هاریكاریا مه‌ بكه‌ن، مه‌ ل گه‌ل گه‌له‌ك وان كۆمپانیان ژی ئاخڤت یێن كو پشكداری د كۆربه‌ندی دا كری، ئه‌و ژی دخوازن بۆ كارێ وه‌به‌رئێنانێ بهێنه‌ هه‌رێما كوردستانێ و مفای ژی ژ ئه‌زموونا مه‌ وه‌ربگرن، كو ئه‌م شیاینه‌ سه‌ره‌رای وان هه‌موو قه‌یرانێن تووشی مه‌ بووین، چ وه‌كو روو ب رووبوونا تیرۆرێ، یان ژی ئه‌و كێشێن نوكه‌ ل ده‌ڤه‌رێ هه‌ین، كو كوردستان چاوان شیا ل سه‌ر پێ خوه‌ راوه‌ستیت و گاڤێن باشتر ژی به‌ر ب پێشڤه‌ ب هاڤێژیت”.

هه‌روه‌سا دووپاتكر” مه‌ داخواز ژ وان كۆمپانیان كر، بهێنه‌ هه‌رێما كوردستانێ و وه‌به‌رئێنانێ بكه‌ن، وان ژی به‌رهه‌ڤیا خوه‌ دیاركر، ئه‌و د وێ باوه‌ریێ دانه‌ ده‌لیڤێن زۆر ل هه‌رێما كوردستانێ یێن هه‌ین، كو بشێن مفای ژێ وه‌ربگرن، هه‌لبه‌ت بۆ وێ چه‌ندێ ئه‌م ژی مفای ژ شاره‌زاییا وان وه‌ربگرین و پێكڤه‌ بشێین هاریكارێن هه‌ڤدو بین”.

ئه‌ڤرۆ:

شانا راگه‌هاندنێ و هشیاریێ یا سه‌ر ب وه‌زاره‌تا پێشمه‌رگه‌ ڤه‌ ئاشكرا دكه‌ت، رێ ناهێته‌ دان ئێدی ئاسایش و ئارامیا خه‌لكێ تێك بچیت.

شانا راگه‌هاندنێ و هشیاریێ یا سه‌ر ب وه‌زاره‌تا پێشمه‌رگه‌ ڤه‌ به‌یاننامه‌ك به‌لاڤكر، تێدا هاتیه‌، پاراستنا ئاسایش و ئارامیا خه‌لك و ئاخا كوردستانێ ئه‌ركێ سه‌ره‌كیێ هێزێن پێشمه‌رگه‌یه‌.

هه‌روه‌سا د وێ به‌یاننامێ دا هاتیه‌، هیڤیدارین د ململانیێن سه‌ر سنووری ئێدی په‌ل بۆ سه‌ر هێزێن پێشمه‌رگه‌ی نه‌ هێنه‌ هاڤێتن و PKK  ژی ل وێ ده‌ڤه‌رێ بزاڤێ نه‌كه‌ت ئارامی و ئاشته‌واییا هێزێن پێشمه‌رگه‌ی ب ده‌لیڤه‌ ببینیت

ده‌قێ به‌یاننامێ:

ل رۆژا پێنجشه‌مبی 26 گۆلانا 2022، ل دو روودانێن جودا دا، ب چه‌كێ قه‌ناس هێرش ل سه‌ر هێزێن پێشمه‌رگه‌ی هاته‌ كرن و ب هاونان گوندێن ده‌ڤه‌رێ هاتنه‌ توپبارانكرن، ب ڤی شێوه‌ی:

ئێك: ب چه‌كێ قه‌ناس هێرش ل سه‌ر سه‌نگه‌ره‌كێ لیوا چار یا په‌یاده‌ ل گوندێ كانی ماسی هاته‌ كرن و پێشمه‌رگه‌یه‌ك ب ناڤێ (محه‌مه‌د فازل محه‌مه‌د) بریندار بوو.

دوو: ل ده‌مێ هاون بارانكرنا ده‌ڤه‌را بامه‌رنێ گولله‌ هاونه‌ك ل گوندێ ئه‌ره‌دنا ل ناحیا بامه‌رنێ ل قه‌زا ئامێدیێ ل پارێزگه‌ها دهۆكێ، كه‌فته‌ خوارێ، د ئه‌نجامدا، دوو وه‌لاتی ب ناڤێن (یوسف كۆڤان، ئاڤه‌ند هشیار) شه‌هید بوون و دو وه‌لاتی ژی بریندار بوون.

ئه‌ڤ روودانه‌ د ده‌مه‌كی دا بوون، هێزێن پێشمه‌رگه‌ی ل سه‌نگه‌رێن خوه‌ بوون، هه‌روه‌سا پشكه‌ك ژ گونده‌كێ ئه‌شیره‌تا نێروه‌ د ئاهه‌نگه‌كێ دا بوون ل گوندێ ئه‌ره‌دنا، سه‌ر ب قه‌زا ئامێدیێ ڤه‌.

ئه‌م ل وه‌زاره‌تا پێشمه‌رگه‌ رادگه‌هینین كو، هێزێن پێِمه‌رگه‌ی و خه‌لكێ كوردستانێ نیگه‌رانن ژ وان كریاران و پێدڤیه‌ هه‌موو ئالی تێبگه‌هن كو، پاراستنا ئاسایش و ئارامیا خه‌لك و ئاخا كوردستانێ ئه‌ركێ سه‌ره‌كیێ هێزێن پێشمه‌رگه‌یه‌ و خه‌مساریێ ناكه‌ن بجهئینانا ئه‌ركێ خوه‌. هیڤیدارێن دململانیێن سه‌ر سنووران ئێدی  په‌ل بۆ سه‌ر هێزێن پێشمه‌رگه‌ی نه‌هێنه‌ هاڤێتن و PKK ژی ل وێ ده‌ڤه‌رێ بزاڤێ نه‌كه‌ت ئارامی و ئاشته‌واییا هێزێن پێشمه‌رگه‌ی ب ده‌لیڤه‌ ببینیت، چونكه‌ رێ ناهێته‌ دان ل وان ده‌ڤه‌ران ئاسایش و ئارامیا خه‌لكی تێك بچیت و گیانێ وه‌لاتیان و پێشمه‌رگه‌ی بكه‌ڤیته‌ د مه‌ترسیێ دا.

ئه‌ڤرۆ:

ئه‌ندامه‌كێ جڤاتا سه‌ركردایه‌تیا پارتی دیموكراتی كوردستان، راگه‌هاند، پێدڤیه‌ ئه‌و ده‌ستپێشخه‌ریا سه‌رۆكێ هه‌رێما كوردستانێ كری، ئالیێن سیاسی ژ ده‌ست خوه‌ نه‌ده‌ن، چونكه‌ ئه‌و ده‌ستپێشخه‌ریه‌ د خێرا ملله‌تێ كورد و ئالیان و هه‌رێما كوردستانێ ب گشتی دایه‌ و دێ بیته‌ ئه‌گه‌رێ وێ چه‌ندێ كورد ل ئیراقێ ببیته‌ ئالیه‌كێ ب هێز و كاریگه‌ر.

عه‌لی عه‌ونی، ئه‌ندامێ جڤاتا سه‌ركردایه‌تیا پارتی دیموكراتی كوردستان، گۆت” ئه‌و دانوستاندنێن بۆ ئێكرێزیا ناڤمالا كوردی ده‌ست پێكرین گه‌له‌ك دگرنگن، چونكه‌ مه‌ چ رێیێن دی نینن و هه‌كه‌ ئه‌م د ئێكگرتی نه‌بین، دێ به‌غدا مفای ژ وێ چه‌ندێ وه‌رگریت و فشاران ئێخیته‌ سه‌رمه‌ بۆ وێ چه‌ندێ موسته‌حه‌قاتێن مه‌ ببریت و وان مادێن دستووری ژی پێشێل بكه‌ت كو په‌یوه‌ندی ب مافێن هه‌رێما كوردستانێ ڤه‌ هه‌ین”.

گۆت ژی” ئه‌و ده‌ستپێشخه‌ریا سه‌رۆكێ هه‌رێما كوردستانێ ڤه‌كرنا ده‌رگه‌هه‌كی یه‌ بۆ وێ چه‌ندێ حزب و ئالیێن سیاسی وێ ده‌لیڤه‌ ژ ده‌ست نه‌ده‌ن، چونكه‌ ئه‌و كارێ سه‌رۆكێ هه‌رێمێ ئه‌نجامدای، د خێرا ملله‌تی و ئالیان و هه‌رێما كوردستانێ ب گشتی دایه‌”.

ناڤبری رۆهنكر ژی” هه‌كه‌ ئه‌م ئێك ده‌ست بین، ل به‌غدا دێ بینه‌ هێزه‌كا كاریگه‌ر كو فشارێ بكه‌ین بۆ بده‌ستڤه‌ئینانا مافێن كوردان ب گشتی، ب شێوه‌كی وه‌سا كو رێگریێ ل حوكمه‌تا ئیراقێ بكه‌ت مافێن هه‌رێما كوردستانێ پێشێل بكه‌ت”.