ئه‌ڤرۆ:

فه‌رمانداره‌كێ هێزێن سووریا دیموكرات راگه‌هاند كو وان داخواز ژ ئه‌مریكا كرینه‌ رێگریێ ل ئێرشێن فرۆكێن بێ فرۆكه‌ڤان یێ توركیا بۆ سه‌ر رۆژئاڤایێ كوردستانێ و باكورێ سووریێ بكه‌ت، چونكو ده‌مه‌كه‌ توركیا به‌رده‌وام ئێرشی وه‌لاتیێن سڤیل ل وان ده‌ڤه‌ران دكه‌ت.

فه‌رمانداره‌كێ هێزێن سووریا دیموكرات كو ناڤێ وی نه‌هاتیه‌ ئاشكرا كرن بۆ كه‌نالێن راگه‌هاندنێ یێ رێڤه‌به‌ریا خوه‌سه‌ر دیار كریه‌ كو ده‌مه‌كه‌ توركیا ب رێیا فرۆكێن بێ فرۆكه‌ڤان و درۆنان ئێرشی ده‌ڤه‌رێن ل ژێر كۆنترۆلا وان دكه‌ت و د ئه‌نجاما ئێرشێن توركیا دا به‌رده‌وام وه‌لاتیێن سڤیل دبنه‌ قوربانی و به‌ری سێ رۆژان ژی ژ ئه‌نجاما ئێرشا فرۆكێن توركیا ل نێزیكی قامشلۆ وه‌لاتیه‌ك هاتیه‌ كوشتن و هه‌روه‌سا دو كه‌س ژی بریندار بووینه‌ و ژ به‌ر هندی ژی وان داخواز ژ ئه‌مریكا كرینه‌ كو رێگریێ ل ئێرشێن ئه‌سمانی یێن توركیا بكه‌ت.

هه‌مان فه‌رمانداری ئه‌و یه‌ك ژی دیار كریه‌ كو به‌ری نها د كۆمبوونا شاندێ وان و شاندێ ئه‌مریكی دا فه‌رمانداره‌كێ ئه‌مریكا بۆ وان دیار كریه‌ كو وان داخواز ژ توركیا كرینه‌ ئاگربه‌ستێ بنپێ نه‌كه‌ت و هه‌كه‌ توركیا ل سه‌ر ئێرشێن خوه‌ به‌رده‌وام بیت ئه‌مریكا دێ ب فه‌رمی داخواز ژ توركیا بكه‌ت كو ئێرشێن خوه‌ بده‌ته‌ راگرتن.

چاڤدێرێن سیاسی ژی دیار دكه‌ن كو توركیا خوه‌ بۆ ئۆپه‌راسیۆنه‌كا نوو ل دژی په‌كه‌كێ به‌رهه‌ڤ دكه‌ت و هه‌روه‌سا توركیا دڤێت ب رێیا درۆنان ئێرشی رۆژئاڤایێ كوردستانێ و باكورێ سووریێ ژی بكه‌ت و ژ به‌ر هندێ ژی هه‌سه‌دێ داخواز ژ ئه‌مریكا كریه‌ كو ئاسته‌نگیان ل هه‌مبه‌ر ئێرشێن توركیا دروست بكه‌ت، لێ هه‌تا نها ئه‌مریكا ب فه‌رمی ل هه‌مبه‌ر ئێرشێن ڤێ دووماهیێ یێن توركیا چو داخۆیانیه‌ك فه‌رمی به‌لاڤ نه‌كریه‌.

ل گۆر باوه‌ریا چاڤدێرێن سیاسی هه‌تا كو هه‌ر دو جڤاتێن كوردی یێن رۆژئاڤایێ كوردستانێ ئاریشێن د ناڤبه‌را خوه‌ دا چاره‌سه‌ر نه‌كه‌ن و پێكڤه‌ د ئاستێ نێڤده‌وله‌تی و هه‌رێمی دا ده‌ست ب بزاڤێن دبلۆماسی بۆ پشته‌ڤانیێ ل رۆژئاڤایێ نه‌كه‌ن دێ ئێرشێن توركیا ژی به‌رده‌وام بن، چونكو توركیا دبێژیت هه‌موو هێزێن كو نها ل رۆژئاڤایێ كوردستانێ نه‌ سه‌ر ب په‌كه‌كێ نه‌ و په‌كه‌كه‌ ژی هه‌رده‌م بۆ وێ مه‌ترسیێ یه‌ و توركیا ب مافێ خوه‌ یێ ره‌وا دزانیت كو به‌رده‌وام ئێرشی رۆژئاڤایێ كوردستانێ بكه‌ت.

ئه‌و یه‌ك د ده‌مه‌كێ دایه‌ كو پشتی ئێرشا چه‌كدارێن داعشێ یا ل سه‌ر زیندانا حه‌سه‌كێ وه‌زاره‌تا به‌رگریێ یا ئه‌مریكا ژی دیار كربوو كو ئه‌و دێ بۆ ده‌مه‌كێ درێژ ل سووریێ مینن، چونكو مه‌ترسیا داعشێ ل سه‌ر باكورێ سووریێ هه‌یه‌ و ئه‌مریكا ژی دێ ب هه‌موو ره‌نگه‌كێ هه‌ڤپه‌یمانێن خوه‌ ل سووریێ پارێزیت، چاڤدێرێن سیاسی ژی دبێژن مانا ئه‌مریكا ل رۆژئاڤایێ كوردستانێ بۆ پاراستنا كوردان گه‌له‌ك گرنگه‌.

ب هه‌لكه‌فتا هاتنا هه‌یڤا ره‌مه‌زانا پیرۆز سه‌رۆك مه‌سعود بارزانی په‌یامه‌ك به‌لاڤكر و تێدا دبێژیت، ب هه‌لكه‌فتا هاتنا هه‌یڤا ره‌مه‌زانێ پیرۆزباهیێ ل هه‌موو موسلمانێن كوردستانێ و ئیراقێ و جیهانێ دكه‌م. ژ خودێ مه‌زن دخوازم نڤێژ و رۆژی و لاڤایێن هه‌موویان قه‌بوول بكه‌ت و هاتنا ڤێ هه‌یڤا پیرۆز ببیته‌ جهێ خێر و به‌ره‌كه‌تا هه‌موو ئالیه‌كی.

سه‌رۆكێ هه‌رێما كوردستانێ، نێچیرڤان بارزانی ب هه‌لكه‌فتا هاتنا هه‌یڤا ره‌مه‌زانێ د په‌یامه‌كێ دا راگه‌هاند، هاتنا هه‌یڤا ره‌مه‌زانا پیرۆز ل هه‌موو موسلمانان ل كوردستانێ، ئیراقێ و جیهانێ پیرۆز دكه‌م، هیڤیدارم ئه‌ڤ هه‌یڤا پیرۆز خێرێ و خوه‌شیێ و به‌خته‌وه‌ریێ دگه‌ل خوه‌ دا بینیت و ئاشتیێ و سه‌قامگیریێ ب سه‌ر مرۆڤایه‌تیێ دا بینیت. هه‌روه‌سا دبێژیت بلا ئه‌م هه‌موو رامان و وانێن ب رۆژیبوونێ و هه‌یڤا ره‌مه‌زانێ، بكه‌ینه‌ هێڤینێ ته‌باییێ و لێبۆرینێ و به‌رجه‌سته‌كرنا بهایێن مرۆڤایه‌تیێ و ئاشته‌واییێ.

ئه‌ڤرۆ:

سه‌رۆك مه‌سعود بارزانی ل دۆر سڤكاتیكرن ب مه‌رجه‌عێ شیعی و سوتنا باره‌گایێ لقێ 5 یێ پارتی ل به‌غدا راگه‌هاند، سڤكاتیكرن ب پیرۆزی و هیمایێن بلند ب هیچ شێوه‌كی یا قه‌بوولكری نینه‌ و زۆر ب توندی سوتنا باره‌گایێ پارتی دیموكراتی كوردستان ل به‌غدا دكه‌ین.

شه‌ڤا 27 ل سه‌ر 28 ئادارێ لایه‌نگرێن حه‌شدا شه‌عبی هێرشی باره‌گایێ لقێ پێنج یێ پارتی ل به‌غدا كر و پشكه‌ك ژێ سوت، حه‌شدا شه‌عبی ب بیانویا وێ چه‌ندێ ئه‌و هێرشه‌ كر كو كه‌سه‌ك وه‌كو (كادرێ پارتی) د تویته‌كێ دا سڤكاتی ب مه‌رجه‌عێ شیعان كریه‌.

سه‌رۆك مه‌سعود بارزانی ل دۆر وان روودانان راگه‌هاند” زۆر ب توندی وێ سڤكاتیا ژ ئالیێ كه‌سه‌كی ڤه‌ ب مه‌رجه‌عیه‌تێ كری شه‌رمزار دكه‌ین، ئه‌و جۆره‌ ره‌فتارێن نه‌ هه‌ژی هیچ په‌یوه‌ندی ب گه‌لێ كوردستانێ و پارتی دیموكراتی كوردستان ڤه‌ نینه‌”.

هه‌روه‌سا ئاماژه‌ كر” زۆر ب توندی سوتنا باره‌گایێ پارتی دیموكراتی كوردستان ل به‌غدا شه‌رمزار دكه‌ین كو ئه‌ڤه‌ جارا دوویێ یه‌ ژ ئالیێ كۆمه‌كا تێكده‌ران و شكه‌ستن خواری دهێته‌ ئه‌نجامدان و ئه‌ڤه‌ به‌لگه‌یه‌ ل سه‌ر نه‌بوونا سه‌قامگیریێ و ئاسایشێ”.

پێشتر ل 17 چریا ئێكێ 2020 پشكه‌ك ژ لایه‌نگرێن حه‌شدا شه‌عبی هێرش كربوو سه‌ر لقێ پێنج یێ پارتی ل به‌غدا و ئالایێ كوردستانێ سوتبوو و ئالایێ حه‌شدا شه‌عبی ل سه‌ر باره‌گای بلندكربوو.

سه‌رۆك بارزانی د په‌یاما خوه‌ دا دبێژیت” ژبلی خرابكاریێ و تێكدانێ و ئاژاوێ هیچ تشته‌كێ دی ژده‌ستێ وان گرۆپان نه‌هاتیه‌”.

د په‌یاما سه‌رۆك بارزانی داهاتیه‌ ژی” كوردستان خودانا فه‌رهه‌نگێ بلند یێ پێكڤه‌ژیانێ یه‌ و و هیچ ده‌مه‌كی سڤكاتیكرن ب ره‌مز و موقه‌ده‌ساتێن خه‌لكی جهێ خوه‌ دناڤ فه‌رهه‌نگێ گه‌لێ كوردستانێ دا نه‌كریه‌ و جه نابیت ژی”.

ل دۆر په‌یوه‌ندیێن ل گه‌ل ئالیێن ئایینی یێن شیعی، سه‌رۆك بارزانی دبێژیت” گه‌لێ كوردستانێ رێز و پێزانینه‌كا مه‌زن بۆ مه‌رجه‌عیه‌تێ یا هه‌ی و په‌یوه‌ندیێن دیرۆكی و دۆستایه‌تی و هه‌ڤسۆزی د ناڤبه‌را بارزانیێ نه‌مر و ئایه‌توللا حه‌كیم و شه‌هید سه‌در به‌لگه‌یه‌ بۆ وێ په‌یوه‌ندیێ و دۆستایه‌تیا دێرین. ئه‌و كه‌سێ سڤكاتی ژی كری ژ ئالیێ قانوونێ ڤه‌ هاتیه‌ ده‌سته‌سه‌ركرن و سزایێ تاوان وزێده‌گاڤیا خوه‌ دێ ده‌ت”.

ئه‌ڤرۆ:

فراكسیۆنا پارتی دیموكراتی كوردستان و ژ سه‌رجه‌مێ 16 فراكسیۆنێن په‌رله‌مانێ كوردستانێ 11 فراكسیۆن ل گه‌ل ئه‌نجامدانا هه‌لبژارتنێن په‌رله‌مانێ كوردستانێ نه‌ د ژڤانێ خوه‌ دا و فراكسیۆنا پارتی پێشوازی ل مه‌رسوومێ سه‌رۆكایه‌تیا هه‌رێمێ و بریارا سه‌رۆكێ حوكمه‌تێ كر كو وه‌سا دیاردكه‌ن هه‌لبژارتن ل ژڤانێ خوه‌ بهێنه‌ ئه‌نجامدان ئه‌وژی ل ئێكێ چریا ئێكێ 2022.

نێچیرڤان بارزانی، سه‌رۆكێ هه‌رێما كوردستانێ رۆژا 1 چریا ئێكێ 2022 دیاركریه‌ بۆ ئه‌نجامدانا هه‌لبژارتنان و نوكه‌ ژی مه‌رسوومێ سه‌رۆكایه‌تیا هه‌رێمێ هنارتیه‌ بۆ په‌رله‌مانی.

زانا مه‌لا خالد، سه‌رۆكێ فراكسیۆنا پارتی ل په‌رله‌مانێ كوردستانێ گۆت” پارتی ل گه‌ل وێ دایه‌ هه‌لبژارتن ل ژڤانێ خوه‌ بهێنه‌ ئه‌نجامدان و مه‌ پێشوازی ل مه‌رسوومێ سه‌رۆكایه‌تیا هه‌رێما كوردستانێ و بریارا سه‌رۆكێ حوكمه‌تا هه‌رێمێ كو ئاماژێ دكه‌ن ب ئه‌نجامدانا هه‌لبژارتنان ل ئێكێ چریا ئێكێ، له‌وما ئه‌م وه‌كو نوونه‌رێن پارتی ل په‌رله‌مانی ب راستی رادگه‌هینین پێدڤیه‌ هه‌لبژارتن ل ژڤانی خوه‌ یێ دیاركری دا بهێنه‌ ئه‌نجامدان و ب هیچ شێوه‌كی پارتی زۆرینه‌یا په‌رله‌مانتارێن پارتی بكارنائینیت بۆ درێژكرنا ڤێ خۆلا په‌رله‌مانێ كوردستانێ”.

گۆت ژی” به‌رهه‌ڤی یێن هاتینه‌ كرن و مه‌رسووم ده‌رچوویه‌ و سه‌رۆكێ حوكمه‌تێ ئالیێن په‌یوه‌ندیدار یێن حوكمه‌تێ راسپیاردینه‌ پێدڤیێن لوجستی و دارایی به‌رهه‌ڤ بكه‌ نبۆ هه‌لبژارتنان، ئه‌وا مای چاره‌سه‌ركرنا گرفتا قانوونی یا كۆمسیۆنا هه‌لبژارتن و راپرسیانه‌ كو ئه‌ڤه‌ ئه‌ركێ په‌رله‌مانێ كوردستانێ یه‌”.

ئاماژه‌كر” وه‌كو فراكسیۆنا پارتی ل حه‌فت كۆمبوونێن بۆری دا مه‌ دانوستاندن ل گه‌ل ئالیێن سیاسی كرینه‌ ل سه‌ر بنه‌مایێ ئیستیحقاقێن هه‌لبژارتنان، چاوا ئه‌و كۆمسیۆنه‌ ل سالا 2014 دروست بوویه‌ و نوكه‌ ژی هه‌ر ل سه‌ر هه‌مان بنه‌مایێ هه‌لبژارتنێن په‌رله‌مانێ كوردستانێ ئه‌ڤ كۆمسیۆنه‌ بهێته‌ دروستكرن، به‌لێ ژ پێخه‌مه‌ت وێ ئێكێ كو هه‌لبژارتن ل ئێكێ چریا ئێكێ دێ هێنه‌ ئه‌نجامدان، مه‌ ل گه‌ل هه‌موو فراكسیۆنێن دی ل په‌رله‌مانی ده‌ستپێشخه‌ریه‌كا دی یا كری كو ئه‌ڤ كۆمسیۆنا هه‌ی وه‌كو خوه‌ بهێته‌ كاراكرن و پاشی ئه‌م بشێێن پارتی دناڤ كۆمسیۆنا هه‌لبژارتنان دا هه‌ی، تژی بكه‌ین”.

گۆت ژی” ئه‌م ل په‌رله‌مانێ كوردستانێ نوونه‌رایتا فراكسیۆنا خوه‌ دكه‌ین و مه‌ ده‌ستهه‌لاتا تمام ژ سه‌رۆك بارزانی یا هه‌ی بۆ هه‌ر بریاره‌كێ ل سه‌ر ڤی بابه‌تی”.

خویاكر ژی” ژ سه‌رجه‌مێ 6 فراكسیۆنێن په‌رله‌مانێ كوردستانێ ئه‌م 11 فراكسیۆن ل گه‌ل وێ چه‌ندێ نه‌ قانوونا هه‌لبژارتنان وه‌كو خوه‌ بیت و ده‌ستكاری تێدا نه‌هێته‌ كرن، پێنج فراكسیۆن ل گه‌ل وێ چه‌ندێ نه‌ گورانكاری د قانوونا هه‌لبژارتنان دا بهێنه‌ كرن، ژووان پێنج فراكسیۆنێن داخوازا گورانكاریان دكه‌ن تنێ فراكسیۆنا گۆران به‌ری ساله‌كێ پرۆژه‌ك هه‌بوو و نوكه‌ تنێ مه‌ چار رۆژ یێن ماین بۆ وێ چه‌ندێ كۆمسیۆنێ كارا بكه‌ین هه‌تا ل 1/10/2022 هه‌لبژارتن بهێنه‌ ئه‌نجامدان، فراكسیۆنێن دی هه‌تا نوكه‌ راتڤه‌كرنا قانوونێ وه‌كو پرۆژه‌یه‌ك پێشكێشی په‌رله‌مانی نه‌كریه‌”.

پارتی دیموكراتی كوردستان به‌یاننامه‌ك به‌لاڤكر و تێدا هاتیه‌، پارتی به‌رده‌وام رێزه‌كا تایبه‌ت ل هه‌موو مه‌رجه‌عێن ئایینی دگریت و كادر و ئه‌ندامێن خوه‌ ئاگه‌هداركرینه‌، رێزێ ل مه‌رجه‌عیه‌تا ئیسلامی و ئایێن دی بگرن.

به‌یانناما پارتی پشتی وێ چه‌ندێ دهێت كه‌سه‌كی ب ناڤێ (نایف كوردستانی) د تویته‌كێ دا به‌حسێ مه‌رجه‌عیه‌تا شیعی كری كو ب سڤكاتیكرن هاتیه‌ هه‌ژمارتن.

پارتی د به‌یانناما خوه‌ دا ب توندی ئیدانا وێ تویتێ كر و دووپاتكر ژی كو وی كه‌سێ په‌یوه‌ندی ب پارتی ڤه‌ نینه‌ و ئه‌و تویته‌ تنێ ده‌ربرینێ ژ بۆچوونا تایبه‌ت یا وی كه‌سی دكه‌ت و ب هیچ شێوه‌كی هه‌لویستێ پارتی دیموكراتی كوردستان نینه‌ و پارتی باوه‌ریا راسته‌قینه‌ ب پێكڤه‌ژیانا ئاشتیانه‌ و رێزگرتن ل هه‌موو بیروباوه‌رێن ئایینی و مه‌زهه‌بی یا هه‌ی.