ئه‌ڤرۆ:

شیره‌تكارێ سه‌رۆكێ هه‌رێما كوردستانێ راگه‌هاند، بزاڤ یێن هه‌ین بۆ ئه‌نجامدانا كۆمبوونه‌كێ د ناڤبه‌را پارتی دیموكراتی كوردستان و ئێكه‌تی نیشتمانی كوردستان دا.

دلشاد شه‌هاب، شیره‌تكارێ سه‌رۆكێ هه‌رێما كوردستانێ گۆت” بزاڤێن رێكخستنا كۆمبوونه‌كا بلند دناڤبه‌را ئالیێن سیاسی د به‌رده‌وامن و ئالیێن سیاسی ژی پێشوازی ل وان بزاڤان كریه‌، بزاڤ ژێ یێن دهێنه‌ كرن بۆ ئه‌نجامدانا كۆمبوونه‌كێ دناڤبه‌را پارتی دیموكراتی كوردستان و ئێكه‌تی نیشتمانی كوردستان دا”.

ب هه‌لكه‌فتا جه‌ژنا ره‌مه‌زانا پیرۆز، د په‌یاما پیرۆزكرنا جه‌ژنێ دا، نێچیرڤان بارزانی، سه‌رۆكێ هه‌رێما كوردستانێ نووترین ده‌ستپێشخه‌ری خسته‌ به‌رده‌م ئالیێن سیاسی و داخواز ژ پارتی و ئێكه‌تیێ و هه‌موو ئالیێن كوردستانی كر جه‌ژنێ بكه‌نه‌ ده‌لیڤه‌ك بۆ نه‌هێلانا كێشه‌ و ناكۆكیان، هه‌روه‌سا داخواز كر ژی خوه‌ ژ هه‌وێن راگه‌هاندنێ و هه‌ڤدو شكاندنێ بپارێزن.

شیره‌تكارێ سه‌رۆكێ هه‌رێمێ ئاماژه‌ كر” ئالیێن سیاسی سه‌رۆكایه‌تیا هه‌رێما كوردستانێ وه‌كو چه‌ترا كۆمڤه‌كرنا هه‌موویان دهه‌ژمێرن و گۆت” په‌رت و به‌لاڤبوونێ گورزه‌كێ مه‌زن ل مه‌دایه‌”.

دلشادی ئه‌گه‌رێ نه‌بوونا ده‌لیڤێ بۆ كۆمبوونا ئالیێن سیاسی بۆ ره‌وشا سیاسی دزڤرینیت و به‌حس ل وێ چه‌ندێ ژی دكه‌ت كو دشیان دایه‌ د چارچۆڤێ ئارمانجه‌كا نیشتمانی ئێك بگرن.

سه‌رۆكێ هه‌رێما كوردستانێ د په‌یاما خوه‌ دا  ب هه‌لكه‌فتا جه‌ژنا ره‌مه‌زانێ گۆتبوو ژی” ل هه‌رێما كوردستانێ ژ هه‌موو ده‌مه‌كی زێده‌تر مه‌ پێدڤی ب ته‌بایی و ئێكرێزیێ یه‌” هه‌روه‌سا داخوازی ژ ئالیان ژی هه‌بوو كو پێكڤه‌ د ئێكرێز و هاریكار و هه‌ماهه‌نگ بن تاكو ل سه‌ر ئاستێ ئیراقێ ژی پێگه‌ و رۆل وكاریگه‌ری هه‌بیت.

ب دیتنا شێره‌تكارێ سه‌رۆكێ هه‌رێما كوردستانێ” پارتی و ئێكه‌تیێ به‌رسڤا ده‌ستپێشخه‌ریا سه‌رۆكایه‌تیا هه‌رێما كوردستانێ دایه‌” دیاركر ژی” سه‌رۆكایه‌تیا هه‌رێما كوردستانێ دخوازیت ئێكرێزی هه‌بیت”.

ئه‌ڤرۆ:

سه‌ره‌رای بریارا ئه‌مریكا كو رێ دده‌ت كۆمپانیێن بیانی ل رۆژئاڤایێ كوردستانێ كار بكه‌ن لێ وه‌لاتیێن رۆژئاڤایێ كوردستانێ ژ ره‌وشا نها دلگرانن و داخواز دكه‌ن كو ئه‌مریكا، رۆسیا و وه‌لاتێن ئێكه‌تیا ئۆرۆپا سنۆره‌كێ بۆ زێده‌گاڤیێن توركیا دانێن، چونكو ژ بلی عه‌فرینێ نها توركیا ل ده‌ڤه‌رێن دی ژی ده‌ست ب سیاسه‌تا گوهۆرینا دیمۆگرافیا رۆژئاڤایێ كوردستانێ كریه‌ و هه‌روه‌سا وه‌لاتیێن كورد دترسن كو توركیا ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ بكه‌ت و ژ به‌ر هندێ ژی دخوازن كو نه‌ته‌وه‌یێن ئێكگرتی، ئه‌مریكا، رۆسیا و وه‌لاتێن ئێكه‌تیا ئۆرۆپا ل هه‌مبه‌ر بزاڤێن توركیا بێده‌نگ نه‌مینن و هه‌لوه‌سته‌كێ توند نیشا بده‌ن.

هۆزان  عه‌فرینێ چاڤدێرێ سیاسی دیار كر كو مخابن مه‌ترسیێن مه‌زن ل سه‌ر رۆژئاڤایێ كوردستانێ هه‌نه‌، راسته‌ ئه‌مریكا ڤێ دووماهیێ بریاره‌ك دلخوه‌شكه‌ر دا كو رێ دده‌ته‌ كۆمپانیێن بیانی ل رۆژئاڤایێ كوردستانێ كار بكه‌ن، توركیا ژی هه‌ر زوو ل دژی بریارا ئه‌مریكا نه‌رازیبوونه‌كا توند نیشا دا، ئه‌و یه‌ك ژی نیشا دده‌ت كو توركیا نه‌ڤێت ره‌وشا رۆژئاڤایێ كوردستانێ باش ببیت.

ناڤهاتی ئه‌و یه‌ك ژی دیار كر كو دڤێت به‌ری هه‌ر تشته‌كێ هه‌ر دو جڤاتێن كوردی یێن رۆژئاڤایێ كوردستانێ ده‌ست ب گه‌ره‌كا نوو یا دانوستاندنان بكه‌ن و هه‌موو ئاریشێن هه‌ی د ناڤبه‌را خوه‌ دا چاره‌سه‌ر بكه‌ن، چونكو پێدڤیا كوردان ل سووریێ و رۆژئاڤایێ كوردستانێ ب ئێكگرتنێ هه‌یه‌، مخابن نها كورد دناڤا خوه‌ دا ئێكگرتی نینن و ئه‌و یه‌ك ژی دێ كارتێكرنا خوه‌ ل پاشه‌رۆژا كوردان كه‌ت، وه‌لاتیێن كورد ل رۆژئاڤایێ كوردستانێ ژی ژ به‌ر هندێ دلگرانن و داخواز ئێكگرتنا هه‌ر دو جڤاتێن كوردی یێن رۆژئاڤایێ كوردستانێ دكه‌ن.

نه‌شه‌ت محه‌مه‌د چاڤدێرێ سیاسی ژی دیار كر كو رژێما به‌شاری ل گه‌ل توركیا و هه‌موو دوژمنێن كوردان كار دكه‌ت دا نه‌هێلیت كورد ل سووریێ بگه‌هنه‌ مافێن خوه‌، لێ مخابن كورد ژی ل هه‌مبه‌ر پیلانێن نها هشیار نینن و یا پێدڤی ناكه‌ن، دڤێت هه‌ر زوو هه‌ر دو جڤاتێن كوردی ل سه‌ر پرۆژه‌یه‌كێ هه‌ڤپشك كار بكه‌ن و پێدڤیا رۆژئاڤایێ كوردستانێ ب رێڤه‌به‌ریه‌كا نوو یا هه‌ی، دڤێت هه‌موو هێز و ئالیێن سیاسی ل رۆژئاڤایێ كوردستانێ پێكڤه‌ د رێڤه‌برنا رۆژئاڤایێ كوردستانێ دا پشكدار بن، چونكو براستی ژی مه‌ترسیێن گه‌له‌ك مه‌زن ل سه‌ر پاشه‌رۆژا رۆژئاڤایێ كوردستانێ هه‌نه‌ و مخابن كورد ژی د ناڤا خوه‌ دا ئێكگرتی نینن، بێگومان ڤێ یه‌كێ كارتێكرنا خوه‌ ل وه‌لاتیێن كورد ل رۆژئاڤایێ كوردستانێ كریه‌ و وه‌لاتی ژ ره‌وشا نها دلگرانن.

ئه‌ڤرۆ، عه‌زیز هه‌ورامی:

پشتی چه‌ندین ئالیێن سیاسی دبن چه‌ندین بیانوویان دا دخواست كورسیێن كێمه‌ ئایین و نه‌ته‌وان ل په‌رله‌مانێ كوردستانێ كێم بكه‌ن و بزاڤا پشت گوه هاڤێتنا وان بكه‌ن كو ل په‌رله‌مانێ كوردستانێ خودانێن 11 كورسیانه‌، توركمان و مه‌سیحی وی پرۆژه‌ی ب دژی خوه‌ دبینن و دبێژن هه‌كه‌ پارتی نه‌بیت دێ دووماهی ب مه‌هێت.

كلارا ئودیشۆ، سه‌رۆكا فاركسیۆنا كلدانی سریانی ئاشووری ل په‌رله‌مانێ كوردستانێ بۆ رۆژناما (ئه‌ڤرۆ) گۆت” هنده‌ك حزب و ئالیێن سیاسی ل هه‌رێما كوردستانێ دژی پێكڤه‌ژیانێ نه‌ و باوه‌ری ب مافێن كه‌مه‌ ئایین و نه‌ته‌وان نینه‌ كو ئه‌و مافه‌ د قانوونی و دستووری نه‌، ئه‌و ئالی باس ل وێ چه‌ندێ دكه‌ن كو كۆتا نوونه‌راتیا گه‌لێ خوه‌ ناكه‌ن و كاری بۆ وێ چه‌ندێ دكه‌ن كورسیێن كۆتا كێم بكه‌ن یان دابه‌ش بكه‌ن، بۆ نموونه‌ دوو كورسیێن كۆتا مه‌سیحی بۆ پارێزگه‌ها سلێمانیێ و دوو بۆ پارێزگه‌ها هه‌ولێرێ و ئێك بۆ پارێزگه‌ها دهۆكێ، ئه‌م وێ چه‌ندێ قه‌بوول ناكه‌ین و رێ ب هیچ ئالیه‌كی سیاسی ژی ناده‌ین ده‌ستكاریێ د كورسیێن كۆتا بكه‌ت و كه‌سێ ئه‌و ماف نینه‌ بریارێ ل سه‌ر كورسیێن مه‌ بده‌ت”.

كلارا ئودیشۆ گۆت ژی” مه‌ پشته‌ڤانیا سه‌رۆك بارزانی و فراكسیۆنا پارتی دیموكراتی كوردستان یا هه‌ی كو 45 كورسێ یێن هه‌ین و به‌رده‌وام پشته‌ڤانێن مه‌نه‌، ئه‌م پرسیارێ ژ وان حزب و ئالیێن سیاسی دكه‌ین ئایا رێژا مه‌سیحیێن كلدانی سریانی ئاشووری ل پارێزگه‌ها سلێمانیێ چه‌نده‌ هه‌تاكو دو كورسیێن كۆتا بۆ بهێنه‌ دانان؟!”.

سه‌رۆكا فاركسیۆنا كلدانی سریانی ئاشووری ل په‌رله‌مانێ كوردستانێ، دیاركر ژی” ئه‌م ل گه‌ل ئێك بازنه‌یا هه‌لبژارتناینه‌ و ل هه‌ر شێوازه‌كێ قانوونی یێ هه‌لبژارتنان، پێدڤیه‌ كورسیێن كۆتا ل سه‌ر ئاستێ هه‌رێما كوردستانێ ئێك بازنه‌ بیت، تنێ مه‌سیحیان ده‌نگ ب من نه‌دایه‌ به‌لكو من ده‌نگێ موسلمانان ژی بده‌ستڤه‌ئینایه‌، فره‌بازنه‌یی بۆ ده‌نگده‌رێن كه‌مه‌ ئایین و نه‌ته‌وان دێ بیته‌ ئاریشه‌، مه‌ پشته‌ڤانیا سه‌رۆك بارزانی یا هه‌ی و د پشت راستین ئه‌و رێ ناده‌ت مافێن مه‌ بهێنه‌ پێشێلكرن”.

ژئالیێ خوه‌ڤه‌، ئازاد ئه‌كره‌م، سه‌رۆكێ فراكسیۆنا (ملله‌ت) یا توركمانی ل په‌رله‌مانێ كوردستانێ بۆ رۆژناما (ئه‌ڤرۆ) گۆت” كورسیێن كۆتا یێن كه‌مه‌ ئایین و نه‌ته‌وان مافێن وانن و پێ هاتیه‌ دان، نوكه‌ هنده‌ك حزب و ئالیێن سیاسی یێن په‌شێمان بووین ژ هه‌ژمارا وان كورسیێن كۆتا، ب دیتنا مه‌ كێمكرنا كورسیێن كۆتا جهێ قه‌بوولكرنێ ننیه‌ و بۆ هه‌رێما كوردستانێ ژی یا جوان نینه‌ ئه‌و كاره‌ بهێته‌ كرن، ئێك ژوان كارێن ل هه‌رێما كوردستانێ شانازیێ پێ دكه‌ین پێدانا مافێن پێكهاتانه‌ هه‌كه‌ بهێت و په‌شێمان بوون ژ هه‌ژمارا كورسیێن كۆتا بهێته‌ كرن رامانا وێ چه‌ندێ بۆ جیهانا ده‌رڤه‌ ئه‌وه‌ كو هه‌رێما كوردستانێ نه‌شیا پارێزه‌ریا مافێن كۆتا بكه‌ت و ئه‌و مافێن ب وان هاتیه‌ دان یێ زێده‌بوو”.

ئازادی دیاركر ژی” فراكسیۆنا مه‌ ل گه‌ل سیسته‌مێ فره‌بازنه‌ییێ د هه‌لبژارتنان دا نینه‌ و ئه‌و سیسته‌مه‌ بۆمه‌ یێ باش نینه‌، ل هنده‌ك جهان هه‌ژمارا مه‌ یا كێمه‌ و ل هنده‌ك جهێن دیتر ژی هه‌ژمارا مه‌ گه‌له‌كه‌، له‌وما د سیسته‌مێ ئێك بازنه‌یی یێ هه‌لبژارتنان دا دێ شێین ده‌نگێن خوه‌ كۆمڤه‌ بكه‌ین”.

ئه‌وژی گۆت” هزره‌كا شاشه‌ بێژین كورسیێن كۆتا نێزیكی ئالیه‌كێ سیاسی نه‌، بۆچی بۆ بزاڤا گۆران و بۆ ئێكه‌تی نیشتمانی كوردستان هه‌یه‌ بۆ پێكئینانا حوكمه‌تێ هه‌ڤپه‌یمانیێ ل گه‌ل پارتی دیموكراتی كوردستان بكه‌ن و بۆچی بۆمه‌ نابیت؟ ده‌مێ رێككه‌فتنه‌كێ دكه‌ی پێدڤیه‌ ژ روویێ ئه‌خلاقی ڤه‌ پێگیری رێككه‌فتنێ بی، ئه‌م ده‌مێ ل گه‌ل حوكمه‌تێ دا بین ئانكو ل گه‌ل وان ئالیێن پشكدارن د حوكمه‌تێ دا، نوكه‌ گۆران و ئێكه‌تی خوه‌ ب نیڤا حوكمه‌تێ دهه‌ژمێرن، لێ ئه‌و د ناڤا حوكمه‌تێ دانه‌ و ره‌فتارێن ئۆپۆزسیۆنێ دكه‌ن”.

ناڤبری ئاماژه‌ ب وێ چه‌ندێ ژی كر” هه‌كه‌ پارتی نه‌بیت، ئانكو كورسیێن مه‌ یێن كۆتا نامینن، فراكسیۆنا ئێكه‌تی نیشتمانی كوردستان هاتیه‌ ده‌ف مه‌ و ب مه‌ راگه‌هاندیه‌ كو وان پرۆژه‌ك یێ هه‌ی ل دۆر كورسیێن كۆتا توركمانان كو دوو كورسی بۆ پارێزگه‌ها سلێمانیێ و سێ كورسی بۆ پارێزگه‌ها هه‌ولێرێ، مه‌ ژی ب وان راگه‌هان هه‌كه‌ هوین پشته‌ڤانیا توركمانان دكه‌ن وه‌رن كورسیێن كۆتا زێده‌ بكه‌ن نه‌كو پشت گوه ب هاڤێژن و كێم بكه‌ن و پارتی ب سه‌ركێشیا سه‌رۆك بارزانی و فراكسیۆنا پارتی ل په‌رله‌مانێ كوردستانێ پارێزه‌رێن مه‌نه‌”.

ئه‌ڤرۆ:

سه‌رۆكێ پارتا سۆشیال دیموكراتا كوردستانێ راگه‌هاند، هه‌تا نوكه‌ ژی ب ئه‌ره‌بكرن ل كه‌ركووكێ و خانه‌قینێ و ده‌ڤه‌رێن دی یێن كوردستانێ یا به‌رده‌وامه‌، ئالیێن سیاسی یێن ئیراقی ب رێیا قانوونێ و دادگه‌ها فیدرالی دخوازن فشارێن زێده‌تر ل سه‌ر خه‌لكێ كوردستانێ بكه‌ن.

محه‌مه‌د حاجی مه‌حموود، سه‌رۆكێ پارتا سۆشیال دیموكراتا كوردستانێ گۆت” ئه‌و هه‌وا ب ناڤێ چه‌راندنا په‌زی یا به‌ر ب سنوورێ كه‌ركووكێ ڤه‌ هاتی، ژ ئه‌گه‌رێ نه‌ بجهئینانا دستوورێ ئیراقێ یه‌، ئه‌ڤه‌ هه‌موو فشارن و ل پاشه‌رۆژێ دێ په‌نایێ بۆ قانوونێ به‌ن و فشارێن خوه‌ ل سه‌ر هه‌رێما كوردستانێ زێده‌تر كه‌ن”.

گۆت ژی” ب ئه‌ره‌بكرن هه‌ر ب ئه‌ره‌بكرنه‌، به‌عسان كربیت، یان نوكه‌ بهێته‌ كرن، ئه‌و دخوازن ژ روویێ جوگرافی ڤه‌ سنوورێ كوردستانێ بچووك بكه‌ن”.

سه‌رۆكێ پارتا سۆشیال دیموكراتا كوردستانێ سه‌باره‌ت بێ ده‌نگیا سه‌رۆك كۆمارا ئیراقێ كو كورده‌، ئاماژه‌كر” یێ ره‌شبینم ژ بێ ده‌ستهه‌لاتیا كوردان به‌رامبه‌ر ده‌ستهه‌لاتدارێن ئیراقێ، ئه‌و هه‌ر چ تشتێ بێژن و كورد قه‌بوول بكه‌ن، ئه‌و چه‌نده‌ جهێ نیگه‌رانیێ یه‌، ب تایبه‌تی بریارا دادگه‌ها فیدرالی، ئه‌و كه‌نگی كارێ دادگه‌ها فیدرالیه‌ ل سه‌ر 200 ملیار دیناران باخڤیت، كو بۆ هه‌رێما كوردستانێ نه‌ هنێرن، ئه‌و دادگه‌ها بۆچی ل سه‌ر وان هه‌موو تاوانێن ل به‌رامبه‌ر خه‌لكی هاتینه‌ كرن یا بێ ده‌نگه‌، له‌وما نابیت هه‌ر چ تشتێ ئه‌و بكه‌ن، ئه‌م كورد قه‌بوول بكه‌ین”.

دیاكر ژی” دادوه‌رێن وێ دادگه‌هێ ژ ئالیێ سه‌رۆك كۆماری ڤه‌ یێن هاتینه‌ دامه‌زراندن و سه‌رۆك كۆمار دشێت وان لاده‌ت و ده‌ستهه‌لاتێن وان ژێ وه‌ربگریت، هه‌كه‌ سه‌رۆك كۆمار بشێت حوكمێ سێداره‌دانێ هه‌لبوه‌شینیت، چاوان نه‌شێت روو ب روویێ بریارا وێ دادگه‌هێ ببیت؟”.

دووپاتكر ژی” سه‌رۆك كۆمار دشێت بریارێن دادگه‌ها فیدرالی رابگریت و وێ دادگه‌هێ هه‌لوه‌شینیت ژی، دشێت ب مه‌رسومه‌كێ كۆماری دادوه‌رێن وێ خانه‌نشین بكه‌ت، هه‌كه‌ بێ ده‌نگی ل سه‌ر ڤێ چه‌ندێ بهێته‌ كرن، پێدڤیه‌ هه‌رێما كوردستانێ شه‌ری ل سه‌ر بكه‌ت”.

محه‌مه‌د حاجی مه‌حموود رۆهنكر” دادگه‌ها فیدرالی كار ب قانوونێن سه‌دام حسێن وئه‌حمه‌د حه‌سه‌ن ئه‌لبه‌كر دكه‌ت، به‌لێ نزانم ئه‌و هه‌موو قانوون زانێن ل هه‌رێما كوردستانێ هه‌ین بۆچی خوه‌ بێ ده‌نگ كریه‌، چاوان ئه‌و سڤكاتی به‌رامبه‌ر خه‌لكێ كوردستانێ دهێته‌ كرن، ل سه‌ر مالا خوه‌ دهێته‌ ده‌ركرن، كه‌ركووك و دووبز و سه‌رگه‌ران و داقووق و قه‌ره‌ته‌په‌ و دوزخورماتوو و خانه‌قین دهێنه‌ چۆلكرن و ئه‌و ده‌ڤه‌ر دهێنه‌ ب ئه‌ره‌بكرن، بۆچی ل به‌رامبه‌ر وێ سته‌مێ بێ ده‌نگیێ د هه‌لبژێرن؟”.

خویاكر ژی” پێشتر مام جه‌لال، سه‌رۆك كۆمار بوو، ل سه‌ر ده‌رئینان و فرۆشتنا په‌ترۆلێ ل گه‌ل سه‌رۆك وه‌زیرێن وی ده‌می یێ ئیراقێ نووری مالكی رێككه‌فت كو هه‌رێما كوردستانێ په‌ترۆلێ ده‌ردئینیت و دفرۆشیته‌ وه‌لاتێن جیهانێ، ئه‌ڤه‌ ئاخڤتنین مام جه‌لالی نه‌، ئاخڤتنێن سه‌رۆك كۆماری ژی دبنه‌ بنه‌مایێن قانوونی، كو ب خوه‌ پارێزه‌رێ دستووری یه‌”.

سه‌رۆكێ پارتا سۆشیال دیموكراتا كوردستانێ باس ل وێ چه‌ندێ ژی كر كو نابیت هه‌رێما كوردستانێ هیچ بریاره‌كا دادگه‌ها فیدرالی بجهبینیت، چونكه‌ ئه‌وا پاشڤه‌ زڤرینه‌، هندی كورد په‌ترۆلێ و غازێ بفرۆشن، نابیت هزر د تشته‌كی دی دا بكه‌ن، هه‌تاكو هه‌كه‌ فرۆشتنا وێ په‌ترۆلێ و غازێ تنێ تێرا كۆمپانیێن به‌رهه‌مئینانێ ژی بكه‌ت، نابیت ژبه‌ر وێ چه‌ندێ راوه‌ستین، چونكه‌ هه‌كه‌ ئه‌ڤه‌ نه‌هێته‌ كرن، هه‌تا 100 سالێن دی ژی ناهێته‌ چاره‌سه‌ركرن.

هه‌روه‌سا دیاركر، ئه‌وا نوكه‌ ل هه‌رێما كوردستانێ مه‌ترسی ئه‌وه‌، ره‌وتێ سه‌دری پرۆژه‌ قانوونه‌ك بۆ جڤاتا نوونه‌ران بلندكریه‌، كو راسته‌وخوه‌ دژی خه‌لكێ كوردستانێ یه‌، ب گۆره‌ی وێ پرۆژه‌ قانوونێ، هه‌ر كه‌سه‌كی په‌یوه‌ندی ل گه‌ل وه‌لاته‌كی هه‌بیت، وی وه‌لاتی ژی په‌یوه‌ندی ل گه‌ل ئیسرائیلێ هه‌بیت، پێدڤیه‌ ڤه‌كۆلین ل گه‌ل وی كه‌سی بهێته‌ كرن، ئانكو په‌ترۆلا مه‌ ب رێیا توركیا دهێته‌ هنارده‌كرن، ئه‌و دخوازن ب وێ رێ به‌ربه‌ستان بۆ كوردان دروست بكه‌ن”.

محه‌مه‌د حاجی مه‌حموود ئاشكرا كر ژی” به‌ری هه‌فتیه‌كێ سه‌رۆك وه‌زیرێن ئیسرائیلێ ل توركیا بوو، له‌وما ئه‌و پرۆژه‌ قانوونا ره‌وتێ سه‌دری راسته‌وخوه‌ به‌ربه‌سته‌ بۆ مه‌، له‌وما پێدڤیه‌ په‌رله‌مانتارێن كورد وی پرۆژه‌ قانوونێ رابگرن كو 100% دژی كوردانه‌ و د به‌رژه‌وه‌ندیا وه‌لاتێن ده‌ڤه‌رێ دایه‌، ئه‌و دخوازن ژ روویێ سیاسی و بازرگانی و ئابووری ژێده‌رێ داهات و خه‌لكێ كوردستانێ ب وێ پرۆژه‌ قانوونێ رابگرن”.