ئەڤرۆ نیوز:
سەرکردەکێ حەشدا شەعبی راگەھاند، ژ بەر کو نوکە حەشد شەعبی دھێتە ھژمارتن پشکەک ژ سیستەمێ لەشکری و ئەمنی یێ عیراقێ، دڤێت سونەیێن عیراقێ پشت راست بن کو ھێزێن حەشدا شەعبی کریارێن قرکرنێ دژی وان ئەنجام نادەن، رەتکر ژی کو ئالۆزیا ل گەل ھێزێن پێشمەرگەی ل شنگالێ دروست بووی یا ب مەرەم بیت و دیارکر کو ئەو ئالۆزی یە یا چارەسەر بووی و خۆیاکر ژی چوونا حەشدا شەعبی بۆ ناڤ باژێرێ مووسلێ یا گرێدای فەرمانەکا حەیدەر عەبادی فەرماندێ گشتیێ ھێزێن چەکدار ل عیراقێ.
کەریم ئەلنوری ئێک ژ سەرکردێن دیار یێ حەشدا شەعبی، ل دۆر ئاریشا ل گەل ھێزێن پێشمەرگەی ل شنگالێ دروست بووی، رەتکر کو یا ب مەرەم بیت و بۆ رۆژناما ئەڤرۆ گۆت” تنێ ھەڤتێنەگەھشتنەک بوو پەیدابووی و یا چارەسەر بووی و ئەم و پێشمەرگە ھەڤ چەپەرین دژی تیرۆرستێن داعشێ”.
ل رۆژا 26 ڤێ مەھێ، گرۆپەکا حەشدا شەعبی ھێزێن پێشمەرگەی ل رۆژھەلاتێ شنگالێ توپبارانکرن، پەیڤدارێ حەشدا شەعبی ئەحمەد ئەلئەسەدی دبەیاننامەکێ دا ئاشکرا کربوو کو ئەو توپبارانکرنە ب شاشی ڤە ھاتبوو کرن و لژنەکا ڤەکۆلینێ ل دۆر ئەگەرێن وێ روودانێ ھاتیە پێکئینان، ئاماژە دابوو ژی کو پێشمەرگە پشکەکە ژ ھێزێن چەکدارێن عیراقی و ھەڤپشکێن مەنە د شەڕێ تیرۆرێ و ژناڤبرنا داعشێ دا و لژنەکا بلند یا ھەڤکاریێ دناڤبەرا حەشدا شەعبی و پێشمەرگەی دا ل وێ دەڤەرێ یا ھاتیە پێکئینان”.
بەلێ فەریق جەمال ئێمینکی سەرۆک ئەرکانێن ھێزێن پێشمەرگەی دداخۆیانیەکێ دا بۆ کەنالێ کوردستان 24 دیارکربوو کو حەشدا شەعبی ئەفسەرەک ب پلەیا عەمید بۆ ھەڤکاریێ ل گەل پێشمەرگەی دەستنیشان کریە و چەندین جاران مە پەیوەندی ب وی ئەفسەری کریە بێ کو بەرسڤا پەیوەندیێن مە بدەت”.
سەبارەت ڤێ چەندێ ژی، کەریم ئەلنوری گۆت” دێ ھەڤکاریەک باش ل گەل پێشمەرگەی کەین و دێ دووڤچوونا وی بابەتی ژی کەین”.
توپبارانکرنا ھێزێن پێشمەرگەی ل رۆژھەلاتێ شنگالێ یا ھەڤدەم بوو ل گەل داخۆیانیێن توند یێن ( جەواد تەلیباوی) ئێک ژ سەرکردەکێ گرۆپا ( عێائب اھل الحق) یا ب سەر حەشدا شەعبی ڤە دژی ھێزێن پێشمەرگەی کو تێدا گۆتبوو” ڤەکێشانا پێشمەرگەی ژ دەڤەرێن ئازادکری ل پارێزگەھا نەینەوا یا گرێدای فەرمانا فەرماندێ گشتیێ ھێزێن چەکدارە ئەوژی حەیدەر عەبادی یە”.
تەلیباوی گەف ل پێشمەرگەی ژی کرن کو حەشدا شەعبی یا دو دل نابیت ژ ئەنجامدانا پرۆسەکا لەشکری دژی ھێزێن پێشمەرگەی ھەکە پێگیریێ ب وێ فەرمانا ڤەکێشانا خوە ژ وان دەڤەران نەکەن، گۆتبوو ژی” دەرکرنا پێشمەرگەی ژ دەڤەرێن ب سەر نەینەوا ڤە دێ یا ب ساناھیتر بیت ژ دەرکرنا داعشێ”.
بەلێ کەریم ئەلنوری بۆ ئەڤرۆ خویاکر کو حەشدا شەعبی چو مەرەم دژی ھێزێن پێشمەرگەی نینن، بەلکو ھەردو ھێز ھەڤپشکن دشەڕێ دژی داعشێ دا.
سەبارەت داخۆیانیێن ھندەک ژ سەرکردێن سونەیێن عیراقێ ل دۆر مەترسیا حەشدا شەعبی ل سەر وان و ئەنجامدانا کریارێن تولڤەکرنێ و دەربەدەرکرنا سونەیان ل دەڤەرێن کەمەرا بەغدا بۆ دروستکرنا کەمەرەکا شیعی ل دەوروبرێن بەغدا، کەریم ئەلنوری گۆت” ئەم سونەیان پشت راست دکەین کو چو کارێن قرکرنێ دژی وان ئەنجام نادەین، چونکی ئەم نوکە پشکەکێن ژ سیستەمێ فەرمی یێ ئەمنی و لەشکریێ عیراقێ نە”.
ھەرچەندە ل دەستپێکا شەڕێ ئازادکرنا مووسلێ ل مەھا چریا ئێکێ 2017، ھێزێن حەشدا شەعبی ل رۆژئاڤا مووسلێ ل بەرەیێ تلەعفەرێ شەڕێ دژی داعشێ دکەن، بەلێ کەریم ئەلنوری ئاماژە دا کو وان ل بەرە بچنە دناڤ مووسلێ ژی دا و گۆت” بۆ ڤێ چەندێ تنێ ئەم چاڤەڕی فەرمانەکا فەرماندێ گشتیێ ھێزێن چەکدارێن عیراقێ نە”.
ل دۆر رێگریا ل تیمەکا کەنالێ کوردستان 24 و دەزگەھێ بارزانی یێ خێرخوازی ھاتیە کرن بۆ چوونا ناڤ دەڤەرێن شەلالات و بەعوێزە دا، ڤی سەرکردێ حەشدا شەعبی گۆت” ھێزێن مە یێن حەشدا شەعبی یێن ل رۆژئاڤایێ مووسلێ، بەلێ دبیت ئەوێن ریگری کری ژھێزا (بابلیۆن) یا مەسیحی بیت کو ئەوژی ب سەر حەشدا شەعبی ڤەیە”.
بەلێ چەکدار جەمال پەیامنێرێ کوردستان 24 دبێژیت” ئەوێن رێگری ل مە کری وەکو تیما کەنالێ کوردستان 24، چکدارێن ( حەنین قەدۆی) بوون کو ب سەر گرۆپا (عێائب اھل الحق) یا حەشدا شەعبی ڤە بوون”.
سەرکردەکێ حەشدا شەعبی بۆ ئەڤرۆ: ئالۆزیا ل گەل پێشمەرگەی چارەسەر بوویە
نيشاندان
