ئه‌ڤرۆ نیوز:
ل فرۆكخانه‌یا لودرده‌یل هۆلیوۆد ل ویلایه‌تا فلۆریدا ل ئه‌مریكا چه‌كداره‌كی هێرش كره خه‌لكی و ته‌قه ل نه‌هـ كه‌سان كر.
ل گۆری ژێده‌رێن ده‌ستپێكی كه‌سه‌ك هاتییه كوشتن و هه‌شت ژی بریندار بووینه، پۆلیس ل جهێ روودانێ به‌لاڤ بووینه و شیاینه هێرشكه‌ری بگرن، لێ نه‌هاتییه زانین چ ئه‌گه‌ر ل پشتی كرنا ڤێ هێرشێ هه‌نه.
ئه‌ڤرۆ نیوز:
هێزێن پاراستنا گه‌ل یه‌په‌گێ ل رۆژئاڤایێ كوردستانێ هه‌ژمارا وان داعشێن د سالا 2016ێ دا ژ ئالیێ شه‌رڤانێن وێ ڤه هاتینه كوشتن دیار كر.
ل گۆری ئامارا یه‌په‌گێ ل پارسال 4 هزار و 622 تیرۆرستێن داعشێ ژ ئالیێ هێزێن وێ ڤه هاتینه كوشتن، هه‌روه‌سا د شه‌رێن 2016ێ دا ل دژی داعشێ 613 شه‌رڤانێن وێ گیانێ خوه ژ ده‌ست دایه.
هه‌روه‌سا د هه‌مان سال دا یه‌په‌گێ 9 هه‌زار و 425 كیلۆمه‌ترێن چوارگۆشه ژ ئاخا سووریێ رزگاركرینه.
ئه‌ڤرۆ نيوز:
رێڤەبەرێ کۆچ و کۆچبەرێن پارێزگەھا دھۆکێ یا سەر ب وەزارەتا کۆچ و کۆچبەرێن عیراقێ ڤە دیار کر کو رۆژانە 100 خێزانێن ئاوارەیێن مووسل دگەھنە سنوورێ پارێزگەھا دھۆکێ و گۆت: “دو کەمپێن نو دێ بۆ ئاوارێن مووسل ل سنوورێ پارێزگەھا دھۆکێ ھێنە ڤەکرن”.
مەجید شوکری، رێڤەبەرێ کۆچ و کۆچبەران ل پارێزگەھا دھۆکێ بۆ رۆژناما ئەڤرۆ دیار کر کو رۆژانە نێزیکی 100 خێزانێن ئاوارەیێن مووسل دگەھنە سنوورێ پارێزگەھا دھۆکێ و نوکە جھێ حەواندنا ئاواران ل کەمپا زیلکان نەمایە و گۆت: “ھەکە رێیا ھاتنا ئاوارەیان ژ لایێ ئێمناھیێ ڤە یا گونجای بیت دێ پێلەکا ئاواران ژ مووسل بەر ب دھۆکێ ڤە ھێت و پتریا وان ئاوارێن دگەھنە ھەرێمێ د برسینە و پێدڤی یا ب ھاریکاریێن مرۆڤی ھەی ژ بەر ڤێ چەندێ جھێن پەیوەندیدار ھاریکاریا ئاواران دکەن بۆ دابینکرنا خوارنێ و پێدڤیێن زڤستانێ”.
ناڤھاتی ئاماژە دا وێ چەندێ کو نوکە ئەو یێ کار بۆ ڤەکرنا دو کەمپێن نوو دکەن و ھەر دو کەمپ دێ کەڤنە د خزمەتا ئاوارەن دا ئەو ژی کەمپێن نێرگز ئێک و نێرگز دو نە و جھێ نێزیکی ھەشت ھزار خێزانان د ناڤ دا ھەیە و گۆت: “دەمێ ب دووماھی ھاتنا وان کەمپان دێ دەست ب وەرگرتنا ئاواران ل کەمپێن نوو ھێتەکرن و دەزگەھێن ئێمناھیێ ژی د بەردەوامن ل سەر ڤەکۆلینێ دگەل وان ئاوارێن گۆمان ل سەر ھەی و ھژمارەکا ئاواران بۆ ڤەکۆلینێ ھاتینە دەستەسەرکرن، بەلێ ژ بەر کو ئەڤە کارێ دەزگەھێن ئێمناھیێ یە ھژمارا وان ناھێتە زانین”.
ژ لایێ خوە ڤە بێوار کەریم، نوونەرێ دەزگەھێ خێرخوازی یێ بارزانی بۆ رۆژناما ئەڤرۆ دیار کر پشتی دەستپێکا قووناغا دویێ یا شەرێ مووسل ھزار کەسێن ل بن دەستھەلاتا تیرۆرستێن داعش ژ وان دەڤەرێن وەکو بەعوێزە خوە گەھاندینە سنوورێن ھەرێما کوردستانێ و گۆت: “ھەر ژ دەستپێکا ھاتنا وان ئاواران ھەموو پێدڤیێن ژیانێ ژ لایێ دەزگەھێ خێرخوازی یێ بارزانی و رێخکراوێن د وارێ مرۆڤایەتیێ دا کار دکەن ھاتینە دابینکرن”.
ئه‌ڤرۆ نيوز:
حوکمەتا ھەرێما کوردستانێ رێکخراوەکا کوردێن ئێزدی قەدەغەکر، ژبەر کو دیاربوویە کار بۆ لایەنەکێ سیاسی دکەت و سەرۆکێ بەرسڤدانا راپۆرتێن نێڤدەولەتی ژی گۆت: “رێکخراوا یەزدا ئاریشە ئێخستینە د ناڤ پێکھاتێن کوردستانێ دا و خوە کریە نونەرا وان”.
دکتۆر دیندار زێباری، سەرۆکێ فەرمانگەھا بەرسڤدانا راپۆرتێن نێڤدەولەتی بۆ رۆژناما ئەڤرۆ دیار کر کو رێکخراوا یەزدا مۆلەتا فەرمی ژ حوکمەتا ھەرێما کوردستانێ وەرگرتیە بۆ وێ چەندێ وەکو رێکخراوەکا جڤاکێ مەدەنی کار بکەت، بەلێ پشتی دووڤچوون بۆ کارێ رێکخراوا ناڤھاتی ھاتیەکرن بۆ وان دیاربوو کو ئەڤ رێکخراوە کارێن سیاسی دکەت و خوە کریە نوونەرا کوردێن ئێزدی و ئاریشە و ناکۆکی ئێخستیە د ناڤ پێکھاتێن ھەرێما کوردستانێ دا، چونکی بناڤێ کوردێن ئێزدی دچنە ژ دەرڤە و بەیانامە دەردکرن و گۆت: ” د ناڤ بەیاننامێن وان دا یا خویایە ئەجێندایەکێ سیاسی ل پشتە و کارێ بۆ حزبەکا سیاسی دکەت، لەوڕا دو جارا ژ لایێ دەزگەھێن پەیوەندیدار ڤە ل دھۆکێ و ھەولێرێ ھاتینە ئاگەھدارکرن”.
ناڤھاتی ئاماژە دا وێ چەندێ کو پشتی ئاگەھدارکرنێ ژی رێکخراوا یەزدا ھەر یا بەردەوامبوو ل سەر کارێ خوە یێ سیاسی و د ناڤ کەمپێن ئاواران دا کارێ سیاسی دکر و خەلک بۆ حزبەکا سیاسی ھان ددان، لەوڕا دەزگەھێن ئاسایشێ فەرمانەکا لایەنێن پەیوەندیدار بجھئینایە و نوکە ئەڤ رێکخراوە ھاتیە گرتن و رێ ناھێتە ئیدی بۆ مەرەمێن چو حزبێن سیاسی کار بکەت و گۆت: “کوردێن ئێزدی نوونەرێن خوە یێن یاسایی و شەرعی یێن ل پەرلەمانێ ھەرێما کوردستانێ ھەین”.
ئەڤرۆ نيوز:
پەیڤدارێ وەزارەتا ساخلەمیا حوکمەتا ھەرێما کوردستانێ ئاشکرا کر کو ل دەمەکێ نێزیک دێ دەرچوویێن کۆلیژێن پزیشکی یا گشتی، ددان، دەرمانسازی، پەرستاری دامەزرینن.
د. خالس قادر، پەیڤدارێ وەزارەتا ساخلەمیا حوکمەتا ھەرێما کوردستانێ دیار کر کو ژ پێخەمەت دامەزراندنا دەرچوویێن کۆلیژێن پزیشکی یا گشتی، ددان، دەرمانسازی، پەرستاری ئەو بەردەوام بزاڤان دکەن و بۆ دواڕۆژ گۆت: “ب مەرەما دامەزراندنێ مە ناڤێن دەرچوویێن ئەڤ سالە و سالا بۆری رەوانەیی جڤاتا وەزیرێن حوکمەتا ھەرێما کوردستانێ کرینە و چاڤەرێ دھێتە کرن ل دەمەکێ نێزیک بھێنە دامەزراندن”.
ناڤھاتی ئاماژە دا وێ چەندێ کو پشکەکا وان نۆشداران ب شێوێ خوەبەخش ل نەخۆشخانان دەوامێ دکەن و گۆت: “ھژمارا وان دەرچوویان نێزیکی ھزار نۆشدارانە”.
ئەڤرۆ نیوز:
قایمقامێ قەزا شنگالێ بۆ ئەڤرۆ ئاشکرا کر، حوکمەتا ھەرێما کوردستانێ پێنگاڤێن قانوونی و دستووری بۆ دەرکەفتنا پەکەکێ ژ شنگالێ ھاڤیتینە، دیسا ب رێیێن ئاشتی، دانوستاندن و نێڤدەولەتی داخوازێ ژ ژ پەکەکێ دکەت شنگالێ چوول بکەت و دبێژیت: مانا پەکەکێ ل شنگالێ یا بوویە ئاستەنگ ھەمبەر ئاڤەدانکرن، ڤەگەریانا ئاواران و پینگاڤێن ب جینوساید نیاسینا کارەساتێن وێ دەڤەرێ.
مەحما خەلیل، قایمقامێ قەزا شنگالێ دیار ژی کر، حوکمەتا عیراقێ چو شەرعیەت بۆ خوە نەھێلایە، ژ بەر کو ژ لایەکی ڤە دبیژیت نابیت چ ھێزێن نەشەرعی و بیانی د ناڤ ئاخا عیراقی دا بمینن و ژ لایەکێ دیڤە پشتەڤانیا مانا پەکەکێ دکەت و گۆت: “مە وەکو قایمقامیا شنگالێ گەلەک پێنگاڤ بۆ ئاڤەدانکرنا شنگالێ و ڤەگەریانا خەلکی بۆ سەر مال و حالێن خوە ھاڤێتینە، ژ وان ژی پرۆژێ کارەبا ستراتیژی کو خەتێ ٣٢ کیلۆ واتە، پرۆژێ ستراتیژی یێ ئاڤا شنگالێ ژی ب ھاریکاریا یۆنامی دێ ھێتە درستکرن، دیسا مە داخواز ژ ھەبیتاتێ کریە چار ھزار خانی بھێنە ئاڤاکرن و درستکرنا ڕێک و بانان ژی د پرۆژێن مەدا نە”.
دەربارەی گۆڕێن ب کۆم، قایمقامێ شنگالێ گۆت: “ھەتا نھا ڕۆفاتێن ھزار و 670 کەسان د 27 گۆڕێن ب کۆم دا ھاتینە دیتن، لی ھەتا نھا ڕێزگرتن بۆ وان ڕۆفاتان نەھاتیە کرن و پتری دو سال و نیڤانە ل سەر عەردی ماینە”.
ھەروەسا مەحما خەلیلی ئاماژە ب وێ چەندێ ژی کر، نھا چو مەترسی ل سەر شنگالێ نینە، حوکمەتا ھەرێما کوردستانێ ماستەر پلانەکا باش بۆ ئاڤەدانکرنا شنگالێ یا ھەی و گۆت: “شنگال وەکو شنگالیان دڤێت دێ ھێتە ئاڤاکرن، د سەرەدانا مە یا واشنتۆنێ ژی دا گەلەک وەلاتێن بیانی بەرھەڤیا خوە بۆ ھاریکاریکرن و ئاڤەدانکرنا شنگالێ دیارکریە”.
ئەڤرۆ نيوز:
شیرەتکارێ مەکتەبا سیاسی یا پارتی دیمۆکراتی کوردستان راگەھاند، شاندێ پارتی یێ دانوستاندنان ل ڤان نێزیکان دێ دەست ب سەرەدانا لایەنێن سیاسی یێن کوردستانی کەت، بۆ وێ چەندێ بەرسڤا وان بدەن.
عارف روشدی دیار کر مادەم پارتی پرۆژێ بارزانی کریە یێ خوە، یا بەرھەڤە بۆ دانوستاندنان ل سەر ھەلوەشاندنا ھەرسێ پۆستێن سەرۆکێ ھەرێما کوردستانێ و حوکمەت و پەرلەمانی، لێ دڤێت ئەڤجارە وەرەقا دانوستاندنان یا جودا بیت، بۆ وێ چەندێ پێگیری پێ بھێتە کرن و پێشوەخت ل سەر ھندەک پرسێن گرنگ رێککەفتن ھەبیت، لەورا گەشبینین ب ئەنجامێن دانوستاندنان و لایەنێن سیاسی یێن کوردستانێ ژی یێ ل دووڤ پەیاما بارزانی ھاتین و چاڤەرێینە پارتی بەرسڤا داخوازیان بدەت.
عارف روشدی ئاشکرا ژی کر کو دەمێ وێ چەندێ نینە مەرجان بێخنە ناڤ دانوستاندنان، ھەکە وان مەرج ھەبن، مە ژی یێن ھەین، لێ دڤێت بێ مەرج دانوستاندنان بکەین و بۆ باس نیوز گۆت:(وەرەقەکا نوو بۆ پکێئینانا ھەرسێ سەرۆکاتیان یا ھەی).
ئه‌ڤرۆ نيوز:
ژ ئه‌گه‌رێ نووژه‌نكرن و به‌رفره‌هكرنا كه‌عبا پيرۆز، وه‌لاتێ سعودى ژمارا حه‌جيێن هه‌موو وه‌لاتان ب ره‌نگه‌كێ گشتى كێمكربوون، ژ ڤێ رێژێ ژى به‌هرا هه‌رێما كوردستانێ ژى ب رێژا 20%ێ كێمكربوو، ئانكو سالا بۆرى سێ هزار و 656 حه‌جيان فه‌ريزا حه‌جێ ئه‌نجام دابوو.
كاروان ستۆنى، به‌رپرسێ راگه‌هاندنا رێڤه‌به‌ريا حه‌ج و عۆمرێ ل هه‌رێما كوردستانێ بۆ ئه‌ڤرۆ نيوز راگه‌هاند كو پشتى دوهى رۆژا چارشه‌مبى رێكه‌فتى 4ى كانوونا دويێ 2017 ل وه‌لاتێ سعودى كۆمبوونه‌كا گرنگ هاتيه ئه‌نجام دان و تێدا وه‌زيرێ حه‌جا سعوديێ و رێڤه‌به‌رێ گشتى يێ حه‌ج و عۆمرا هه‌رێما كوردستانێ پشكدارى تێدا كرى بڕيارا زێده‌كرنا ژمارا حه‌جيێن هه‌رێما كوردستانێ هاته دان.
زێده‌تر گۆت: “بڕيار هاته دان رێژا به‌رێ يا حه‌جيێن هه‌رێما كوردستانێ پشكداريێ تێدا بكه‌ن و ب ڤێ چه‌ندێ ژى به‌هرا هه‌رێما كوردستانێ جاره‌كا دى بۆ چار هزار و 500 كه‌سان ڤه‌گه‌ريا ڤه و ئه‌ڤه ژى نووچه‌كێ دلخۆشكه‌ره و به‌ختێ ئه‌و كه‌سێن ناڤێن خوه د پشككێشانێ دا تۆماركرى دێ زێده‌تر بيت”.
ب گۆره‌ى ئه‌ڤ رێكه‌فتنا هاتيه كرن كو 4500 حه‌جى ل هه‌رێما كوردستانێ پشكداريێ د فه‌ريزا حه‌جێ دا بكه‌ن، رێژا حه‌جيێن سالا بهێت بۆ فه‌ريزا حه‌جێ 20% زێده دبيت ئانكو ئه‌ڤ ساله 850 حه‌جى ژ سالا بۆرى دێ پشكداريێ د فه‌ريزا حه‌جێ دا كه‌ن.
ئه‌ڤرۆ نيوز:
وەزارەتا پێشمەرگە ل هەمبەر داخویانیەکا نوری مالکی راگەهاند، پێشمەرگە ب خوینا خو سنوورێ کوردستانێ دیاریکریە و ئەو دەڤەرێن بەری ئۆپه‌راسیۆنا کونترۆلکرنا موسل ژلایێ پێشمەرگە ڤە هاتنە ئازادکرن جهێ گەنگەشێ نينه.
هەڵگورد حیکمەت پەیڤدارێ وەزارەتا پێشمەرگە دياركر كو نورى مالکی راگەهاندیە کو پێدڤی یە پێشمەرگە ڤەگەریتە سنوورێن خو یێن بەری ٢٠٠٣ێ و ئەم د ئينينه بیرا نوری مالکی کو ئەوا وی گۆتی و ناڤێ وان ئيناى سنوور نینە، بەلکی هێلا تەماس یا پێشمەرگە دگەل سوپایێ رژێما بەعس بوویە”.
ل هه‌مبه‌ر ئاخافتنێن مالكى، هه‌ر پێنج فراكسيوكێن كوردى ل به‌غدا ب دژوارى به‌رسڤا مالكى داينه و دبێژن: پێشمه‌رگه ده‌ڤه‌رێن كوردستانى ب خوينێ ژ ده‌ست داعش پاقژكرينه و مالكى حه‌ق نينه ب ڤى ره‌نگى باخڤيت.
ئه‌ڤرۆ نیوز، ره‌وان نهێلى:
ل دووڤ پێزانینێن ئه‌ڤرۆ نیوز، بڕیاره سوبه یان دوسبه موه‌لیدێن ئه‌هلى یێن كاره‌بێ گوهۆرینێ بێخنه خشتێ نوو یێ به‌لاڤكرنا كاره‌بێ بۆ ڤێ هه‌یڤێ، پشتى كو خشتێ نوو یێ هه‌یڤا ئێك بوویه جهێ نه‌رازیبوونا وه‌لاتیان كو ل ده‌مژمێر 7 سپێدێ بۆ 8 سپێدێ و پێنجى ئێڤارى بۆ 12 شه‌ڤ موه‌لیدان كار دكر.
ژێده‌رێ ئه‌ڤرۆ نیوز كو نه‌ڤیا ناڤێ خوه ئاشكرا بكه‌ت دیاركر كو سوبه پرسا خشتێ نوو یێ به‌لاڤكرنا كاره‌با موه‌لیدان دێ ئێكلا بیت و بڕیار ل سه‌ر هێته دان كو موه‌لیدێن كاره‌بێ ل ده‌مێ كاره‌با نیشتمانى نه‌بیت ل ده‌مژمێر 7 سپێدێ تا 11 سپێدێ و ل ده‌مژمێر 2 نیڤرۆ تا ئێكێ شه‌ڤى كار بكه‌ن و بهایێ ئێك ئه‌مپیر دێ 10 هزار یان 11 یان 12 هزار دینار بیت.
نيشاندان