ئه‌ڤرۆ نيوز:

پشتی رێککەڤتنا روسیا و تورکیا ژ بۆ ئاگربەستا ل سووریا دوھی ئەو یەک ژ ئالیێ جڤاتا ئاسایشا نەتەوێن ھەڤگرتی ڤە ھاتە پەسەند کرن و وەزیرێ دەرڤە یێ تورکیا ژی راگەھاند کو پەیەدە رێکخراوەکا تیرۆرستیە و وێ چو رۆل د دانوستاندنێن ل کازاخستانێ دا بۆ چارەکرنا قەیرانا سووریێ نابن و چاڤدێرێن سیاسی ژی دیار دکەن کو رێککەڤتنا تورکیا و روسیا مەترسیەکا مەزنە بۆ رۆژئاڤایێ کوردستانێ.
پرۆژێ ھەڤپشک یێ روسیا و تورکیا بۆ چارەکرنا قەیرانا سووریێ و ئاگربەستا گشتی ل وی وەلاتی ژ ئالیێ جڤاتا ئاسایشێ ڤە ھاتە پەسەند کرن و ل گۆر وێ بریارێ دێ ئاگربەست ل ھەموو سووریێ ھێتە راگەھاندن و دێ رێکخراوێ مافێ مرۆڤی و یێن سەر ب نەتەوێن ھەڤگرتی ژی بزاڤێ کەن ھاریکاریێ مرۆڤی بگەھیننە وان دەڤەرێن کو ژ بەر شەری خەلکێ وێ د رەوشەکا خراب دا دژیت.
ل ئالیێ دی چەندین گرۆپێن ئۆپۆزسیۆنا سووریێ ژی دوھی راگەھاندن ھەکە فرۆکێن شەری یێن رژێما سووریێ ھێرشێن خوە یێن ئەسمانی نەراگرتن ئەو دێ پێگریێ ب ئاگربەستێ ناکەن و دێ ھێرشی ھێزێن رژێما سووریێ کەن و ژ بۆ ئاگربەستێ دڤێت فرۆکێن رژێما سووریێ ھێرشێن خوە بدەنە راگرتن.
ل ئالیێ دی پشتی کو جڤاتا ئاسایشێ پرۆژێ تورکیا و روسیا پەسەند کری وەزیرێ دەرڤە یێ تورکیا مەولود چاڤوش ئوگلۆی راگەھاند کو ئاگربەست ل سووریێ پێنگاڤەکا گرنگ بوو و یا کو ئەمریکا ب سالان نەشیا مە و روسیا شیا ئەم پێنگاڤەکا وەسا دیرۆکی بۆ پاشەرۆژا سووریێ ب ھاڤێژین و ئەز باوەرم ھەکە ھەموو ئالیێن ل سووریێ پێگیریێ ب ئاگربەستێ بکەن دێ قۆناغەکا نوو ل وی وەلاتی دەسپێ کەت و ئەو یەک بۆ ئاشتیێ و چارەسەریا سیاسی گەلەکا گرنگە و گۆت: (قۆناغا داھاتی ژی بێگومان دانوستاندنان ل کازاخستانێ نە و ھەموو ھێز و ئالیێن سیاسی یێن سووریێ دێ د وان دانوستاندنان دا پشکدار بن، چونکو ئەو کۆمبوون دێ نەخشەیا چارەسەریا سیاسی یا سووریێ دیار کەن).
وەزیرێ دەرڤە یێ تورکیا ل دۆر ئەگەرێ پشکداری کرنا پەیەدێ ژی راگەھاند کو پەیەدە رێکخراوەکا تیرۆرستی یە و ئەم رێ نادەین ب چو رەنگەکێ د کۆمبوونێن ل کازاخستانێ دا پشکدار بن، ھەکە یەپەگە کو بالێ سەربازی یی پەیەدێ یە دەستان ژ چەکی بەردەن و رێزێ ل ئێکپارچەیا ئاخا سووریێ بگرن ئەو ژی دشێن وەکو ئالیەکێ سیاسی پشکداریێ د وان کۆمبوونان دا بکەن لێ بەرۆڤاژی ھندێ ئەم رێ نادەین ئەو پشکدار بن.
چاڤدێرێ سیاسی ژی دیار دکەن کو پەیەدێ شاشیێن گەلەک مەزن ل رۆژئاڤایێ کوردستانێ کرن، چونکو بزاڤ کرن ئەو تنێ رۆژئاڤایێ کوردستانێ برێڤە ببەن و دەست ب گرتنا ئەشکەنجەدان و کوشتنا سەرکردە و ئەندامێن پارتێن دی یێن رۆژئاڤایێ کوردستانێ کرن و ژ بەر ھندێ ژی سەرەرای بزاڤێن مەزن ژ ئالیێ سەرۆکێ ھەرێما کوردستانێ ئێکەتیا ھێزێن کوردی ل رۆژئاڤایێ کوردستانێ دروست نەبوو، چونکو پەیەدێ نەدخواست چو ھێزەکا دی ژ بلی وان د رێڤەبرنا رۆژئاڤایێ کوردستانێ دا پشکدار بن، ژ بەر ھندێ ژی پشتی رێککەڤتنا روسیا و تورکیا مەترسیەکا مەزن ل سەر پاشەرۆژا کوردان ل رۆژئاڤایێ کوردستانێ دروست بوویە و راگرتنا ناڤێ رۆژئاڤا د کۆمبوونا چەند رۆژ بەری نھا ل رمێلانێ ژی نیشا دا کو پەیەدە خوەدان چو پرۆژەکێ نەتەوی بۆ رۆژئاڤایێ کوردستانێ نینە.

ئەڤرۆ نيوز:
دھێتە چاڤەڕێ کرن ئەڤرۆ فرانسو ئۆلاند سەرۆکێ فرەنسا سەرەدانا بەغدا بکەت و ل گەل سەرۆک کۆمار و سەرۆک وەزیرێن عیراقێ کۆم ببیت و دھێتە پێشبینیکرن ھەر ئەڤرۆ سەرەدانا ھەولێرێ ژی بکەت.
ئۆلاند د پەیاما خوە یا سالا نوو دا راگەھاندیە، ئەو دێ سەرەدانا عیراقێ کەت و دەستخۆشیێ ل ھێزێن پشکدار د ھەڤپەیمانیا دژی داعشێ دا کەت.
عەلی دۆلەمەری نوونەرێ حوکمەتا ھەرێما کوردستانێ ل فرەنسا دیار کر کو ئارمانجا فرەنسا ئەوە داعش ل عیراق و سووریا نەمینیت و بۆ باس نیوز گۆت:(ئێک ژ ئارمانجێن سەرەدانا سەرۆکێ فرەنسا بۆ باژێرێ ھەولێرێ، ئاگەھدار بوونە ل سەر دووماھی پێشھاتێن شەڕێ دژی داعش).
فرانسو ئۆلاندی راگەھاندیە، کو بەرھنگاربوونا تیرۆرێ ب دووماھی نەھاتیە و پێدڤیە بەردەوامی ب شەرێ دژی تیرۆری بھێتە دان و ژ بەر ڤی چەندێ وەلاتێ وی ئۆپەراسیۆنێن سەربازی ل عیراق، سووریا و وەلاتێ مالی ھەنە.

ئه‌ڤرۆ نيوز:

ژمارا ئه‌و كه‌سێن ل ئاهه‌نگا سه‌رێ سالێ ل يانه‌كا شه‌ڤان ل سته‌مبۆل ژ ئه‌گه‌رێ هێرشا چه‌كدارى هاتينه‌ كوشتن گه‌هشتنه‌ 39 كه‌سان.

به‌رپرسێن توركيا رۆژا ئێكشه‌مبى 1ى كانوونا دويێ 2016 راگه‌هاند كو ل ده‌مێ ئاهه‌نگ گێرانێ ب هه‌لكه‌فتا سالا نوو ل يانه‌كا شه‌ڤان ل سته‌مبۆل چه‌كداره‌كى ته‌قه‌ ل ئاماده‌بوويان كر و د ئه‌نجام دا ب گۆره‌ى دووماهى ئامار 39 كه‌س هاتينه‌ كوشتن.

سۆله‌يمان سويلۆ، وه‌زيرێ ناڤخۆ يێ توركيا دا زانين كو د ناڤ كوشتيان دا 16 كه‌س بيانى نه‌ و هێشتا پۆليسان هێرشكه‌رێن سه‌ره‌كى ده‌سته‌سه‌ر نه‌كرينه‌.

پۆليسێن توركيا ته‌كستێ ل سه‌ر وێ چه‌ندێ دكه‌ن كو ئه‌ڤ روودانه‌ ژ لايێ كه‌سه‌كێ ب تنێ ڤه‌ هاتيه‌ ئه‌نجام دان.