ئەڤرۆ نیوز:
سەرکردەیەکێ پارتی دیموکراتی کوردستان ئەشکرەکر، ژبلی بزاڤا گۆڕان لایەنێن سیاسی پێشوازیەکا باش ل پەیاما سەرۆک بارزانی کریە بۆ چارەسەرکرنا پرسێن ھەرێما کوردستانێ و دبێژیت، سەرۆک بارزانی ھەر دەستپێکێ نەڤیایە پۆستێ سەرۆکێ ھەرێمێ وەربگریت و ل ھەلبژارتنێن داھاتی سەرۆک بارزانی خوە بۆ پۆستێ سەرۆکێ ھەرێما کوردستانێ بەربژێرناکەت.
عەلی عەونی، ئەندامێ جڤاتا سەرکردایەتیا پارتی دیموکراتی کوردستان بۆ رۆژناما ئەڤرۆ گۆت” خەلکەکێ سلێمانیێ و کوردستانێ شیاینە گورزەکا کوژەک ب بزاڤا گۆڕان بدەن و نەھێلن داخوازیێن گۆڕان بۆ چێکرنا ئالۆزیان ل ھەرێما کوردستانێ سەربگریت و سزایەکێ باشێ گۆڕان داینە کو پێشوازی ل بانگەوازا گۆڕان نەکرن و شەقەکا باش لێدان ھەتا بچنە ناف حەدێ خوە یێ راستەقینەدا و پارتی و لایەنێن سیاسیێن ھەرێما کوردستانێ ژی شیان خوە ل گۆڕان رزگاربکەن، ڤێگاڤێ ئەم یێت بینین پارت و لایەنێن سیاسی پێشوازیێ ل پەیاما سەرۆک بارزانی دکەن، لسەر ئاستێ نافخۆ و نێڤدەولەتی پێشوازیەکا باش ھەبویە بۆ پێشنیارێن سەرۆکێ ھەرێما کوردستانێ، ژلایێ دەروونیڤە خەلکێ کوردستانێ دلخۆشترە لبەرێ، من دڤێت پیرۆزباھیێ ل راگەھاندنا پارتی بکەم بۆ دەرخستنا ئەڤان راستیێن پەیاما سەرۆک بارزانی، ھەموو راگەھاندنا نیشتیمانیا کوردستانێ ژی کو شیان دەنگێ رازگویێ بلند بکەن، دەنگێ گۆڕان و ماڵپەڕ و راگەھاندنێن وان بکەڤن، جارا چوییژی سەرۆک بارزانی ھەمان پەیام ھەبویە بەلێ راگەھاندنا پەکەکێ و گۆڕان کاردکر بۆ ڤێ چەندێ پەیاما سەرۆک بارزانی وەکی خوە نەگەھیت و ھەلویستێ سەرۆک بارزانی ھاتبو بەرزەکرن.
عەلی عەونی گۆتژی” سەرۆکێ ھەرێما کوردستانێ چەندین جارا تەکەزکریە ھەلبژارتن بھێنەکرن، ئەگەر ھەلبژارتنژی نەھێنەکرن لایەنێن سیاسی رێکەڤن کەسەکێ دی بۆ شونا بارزانی بھێتە دیارکرن، بەلێ نەشیان ڤێ چەندێ بکەن، ھەتا نوکە گورەی ئەڤا ئەز چاڤدێریێ دکەم ھەموو لایەنێن سیاسی پێشوازی ل پەیاما سەرۆک بارزانی کریە تنێ بزاڤا گۆڕان نەبیت، ئەوژی مە پێشبینی دکر گۆڕان ھەلویستەکێ وەسا ھەبیت، ھنگ زانن گۆڕان بزاڤەکە چو نەڤێت، گۆڕان چو بەرنامە نینە و ئەو بخۆژی نوزانن چو دڤێت، بەلێ لایەنێن سیاسی ھەر ئێکی ب جۆرەکێ ھەلویستێ خوە دیارکریە و پتریا ھەلویستێ وانژی ئەرینینە، بێگومان د چەندین کۆمبووناندا سەرۆک بارزانی ئەویەک خویاکریە نەخواستیە ھەر دەستپێکێ پۆستێ سەرۆکێ ھەرێما کوردستانێ وەربگریت، ھەرچەندە سەرۆک گۆتیە من نەڤیا ئەڤی پۆستی وەربگرم و تنێ بۆھندێ رازیبووم ھەتا حکوومەتێ بەرەف پێشڤەببەین و جارا بھێت ل ھەلبژارتناندا سەرۆک بارزانی جارەکادی خوە بۆ پۆستێ سەرۆکێ ھەرێمێ بەربژێر ناکەت و یا چوییژی یێ پەشێمانە.

ئەڤرۆ،
رێکخستنا مافێ مرۆڤان یا رۆژھەلاتێ کوردستانێ د داخۆیانیەکی دا راگەھاند کو دەولەتا ئیرانێ د ناڤا 20 رۆژێن دەربازبووی دا 60 کەس سێدارە داینە و د رەوشا نھا دا 48 کەس ژی ل بەندا سێدارەدانێ دانە و جڤاکێ نێڤدەولەتی ل ھەمبەر ڤێ یەکێ بێدەنگە.
رێکخستنا مافێ مرۆڤان یا رۆژھەلاتێ کوردستانێ راپۆرتەکا تایبەت ل سەر سێدارەدانێن دەولەتا ئیرانێ وەشاند و راگەھاند کو دەولەتا ئیرانێ ب رەنگەکی بەرچاڤ ھژمارا سێدارەدانا گرتیان زێدە کریە و د ناڤا 20 رۆژێن دەربازبووی دا 60 کەس سێدارە داینە و مەترسیا سێدارەدانا 48 کەسێن دی ژی ھەیە. رێکخستنا مافێ مرۆڤان ھەروەسا دیار ژی کریە کو دەولەتا ئیرانێ د زیندانان دا ژی زۆرداری و ئەشکەنجەی ل گرتیان دکەت.
ل ئالیێ دی دەولەتا ئیرانێ ب رەنگەکی بەرچاڤ بزاڤا خوە ل دەڤەرێن رۆژھەلاتێ کوردستانێ بەرفرەە کریە و زۆرداریەکا مەزن ل گوندیان دکەت و ژ وەلاتیێن کورد ل گوندێن دەڤەرا خانێ، ماکۆ و کرماشانێ داخواز کریە کو ببنە جاش و چەکێن دەولەتێ راکەن و یێن ل دژی داخوازا ئیرانێ دەردکەڤن، گەفا کوشتن و دەرکرنێ ل وان دھێنە کرن.
ھەر د ڤێ مژارێ دا ل سنورێ باکورێ کوردستانێ و رۆژھەلاتێ کوردستانێ ھێزێن سەربازی یێن ئیرانێ بەردەوام کەمین ل پێشیا کۆلبەرێن کورد داتینن و ل دووڤ نوچەیێن ھەرێمی ژ باژێرێ بازید یێ باکورێ کوردستانێ د ناڤا ھەیڤەکی دا ھێزێن ئیرانێ دو کۆلبەرێن کورد کوشتینە و چار کەس ژی بریندار کرینە.