ئه‌ڤرۆ نیوز:
دۆنالد ترامپ بوو سه‌رۆكێ 45ێ ێ ئه‌مریكا و سووندا یاسایی خوار، هه‌روه‌سا بۆ ب ملیۆنان ئه‌مریكییان گۆتاره‌ك خواند كو وی بخوه نڤیسییه و ئه‌ڤه ده‌قێ وێ یه:
سه‌رۆكێ دادگه‌ها بلند رۆبه‌لات، سه‌رۆك كارته‌ر، سه‌رۆك كلنتۆن، سه‌رۆك بۆش، سه‌رۆك ئۆباما، هه‌ڤوه‌لاتیێن ئه‌مریكی و خه‌لكێ جیهانێ، سوپاس.
ئه‌م خه‌لكێ ئه‌مریكا نها خرڤه‌بوویه‌نه د بزاڤه‌كا نیشتمانی دا بۆ ئاڤه‌دانكرنا وه‌لاتێ خوه و ڤه‌گه‌راندنا سۆزا وێ بۆ هه‌می خه‌لكێ مه. ب هه‌ڤرا ئه‌م دێ ئاراسته‌یێ ئه‌مریكا و جیهانێ بۆ چه‌نیدن سالێن بهێن ده‌ستنیشان كه‌ین. ئه‌م دێ رووبرووی زه‌حمه‌تییان بین لێ دێ كاری گه‌هینینه بنه‌جهی. هه‌ر چار سالان جاره‌كێ ئه‌م ل سه‌ر ڤان گاڤكان كۆم دبین ب مه‌ره‌ما ڤه‌گۆهاستنا رێكوپێك و ئاشتییانه یا ده‌ستهه‌لاتێ، ئه‌م سوپاسدارێن سه‌رۆك ئۆبامای و خاتینا ئێكێ میشێا ئۆباماینه ژبه‌ر هاریكارییا وان د ڤێ ڤه‌گۆهاستنێ دا، گه‌له‌ك د هاریكاربوون، سوپاس.
مه‌راسیما ئه‌ڤرۆ رامانه‌كا گه‌له‌گ تایبه‌ت هه‌یه، ژبه‌ركو ئه‌ڤرۆ ئه‌م نه‌بتنێ ده‌ستهه‌لاتێ ژ ئیداره‌یه‌كێ بۆ ئیداره‌یه‌كا دى ڤه‌دگۆهێزین، یان ژ پارته‌كێ بۆ پارته‌كا دی، به‌لكو ئه‌م ده‌ستهه‌لاتێ ژ واشنتۆنا پایته‌خت ڤه‌دگۆهێزین و راده‌ستی هه‌وه، ملله‌تی دكه‌ین. بۆ ده‌مه‌كێ درێژ گرۆپه‌كێ بچووك ل پایته‌ختێ وه‌لاتێ مه به‌رهه‌مێ حكوومه‌تێ بده‌ستڤه‌دئینا و خه‌لكی بها ددا. واشنتۆن وه‌رار دكر لێ سامانێ وێ د گه‌ل خه‌لكی نه‌دهاته دابه‌شكرن، ره‌وشا سیاسه‌تمه‌داران خوه‌ش بوو، لێ ده‌لیڤێن كاری چوون و كارگه‌هـ هاتنه گرتن. سازی و دامه‌زراوه‌یان خوه د پاراست، لێ وه‌لاتیێن وه‌لاتێ مه نه‌دپاراستن، سه‌ركه‌فتن نه سه‌ركه‌فتنێن هه‌وه بوون، ده‌ستكه‌فتی نه ده‌ستكه‌فتیێن هه‌وه بوون، د ده‌مه‌كی دا وان ئاهه‌نگ ل پایته‌ختی دگێران، چ تشته‌ك نه‌بوو خێزانێن ده‌ستكورت ل سه‌رانسه‌ری وه‌لاتی ئاگه‌هه‌نگان بۆ بگێرن.
هه‌ر ژ ڤی ده‌می و ل ڤێره ئه‌و هه‌می هاته گۆهورین، ژبه‌ركو ئه‌ڤ ده‌مه ده‌مێ وه‌یه، ده‌مێ هه‌ر كه‌سه‌كی یه ل ڤێره خرڤه بووی، و هه‌ر كه‌سه‌كێ ته‌ماشه دكه‌ت ل هه‌ر جهه‌كێ ئه‌مریكا بیت، ئه‌ڤه ئاهه‌نگگێرانا وه‌یه و ئه‌مریكا وه‌لاتێ وه‌یه.
گرنگ نه ئه‌وه كیژان پارتی حكوومه‌تێ كۆنترۆل دكه‌ت، به‌لكو گرنگ ئه‌وه حكوومه‌ت د بن كۆنترۆلا خه‌لكی دا بیت. 20ێ كانوونا دوێ 2017ێ دێ هێته بیرئینان وه‌ك رۆژه‌ك كو تێدا ملله‌ت بوویه ده‌ستهه‌لاتدارێ ڤی وه‌لاتی، ژن و زه‌لامێن ژبیركری ل ڤی وه‌لاتی ئێدی ناهێنه ژبیركرن، هه‌می نها گوهدارییا وه دكه‌ن، هوون ب ده‌هان ملیۆنان هاتن دا ببنه پشكه‌ك ژ بزاڤه‌كا دیرۆكی، كو وه‌كی وێ د جیهانێ دا نه‌هاتینه دیتن.
د ناڤه‌ندا ڤێ بزاڤێ دا بیروباوه‌ركا گرنگ هه‌یه، كو وه‌لاته‌ك هه‌یه بۆ خزمه‌تكرنا وه‌لاتیێن خوه، ئه‌مریكیا قوتابخانه‌یێن باش بۆ زارۆكێن خوه دڤێن، تاخێن ئارام و بسلامه‌ت بۆ خێزانێن خوه، كارێن باش بۆ خوه. ئه‌ڤه خواستێن سرۆشتی یێن خه‌لكی نه، لێ بۆ گه‌له‌ك ژ وه‌لاتیێن مه راستییه‌كا جیاواز هه‌یه. دایك و زارۆ د ناڤ باژارێن مه دا د هه‌ژاریێ دا ئاسێ بووینه، د ژه‌نگا كارگه‌هێن وه‌كی گۆرستانان دا ل ڤی وه‌لاتی ماینه، سیته‌مه‌كێ په‌روه‌رده‌یی كو ل دووڤ پاره‌یێ كاش كه‌فتییه، لێ گه‌نج و قوتابێن مه یێن جوان ژ هه‌می زانسته‌كی بێ به‌هر كرینه، تاوان و گرۆپێن تاوانان و مادێن هۆشبه‌ر ژیانا گه‌له‌كا ژێ ستاندییه و وه‌لاتێ مه ژ گه‌له‌ك شیانێن نه‌دیاربووی كرییه. ئه‌ڤ شێلوبێلییا ئه‌مریكییان ل ڤێره و نها رادوه‌ستیت.
ئه‌م وه‌لاته‌كین، ژانا وان ژانا مه‌یه، خه‌ونێن وان یێن مه‌نه و سه‌ركه‌فتنا وان یا مه‌یه، مه ئێك دل هه‌یه، ئێك نیشتمان و ئێك چاره‌نڤیسێ گه‌ش. سووندا ده‌ستبكاربوونێ ئه‌ز ئه‌ڤرۆ دخۆم، سووندا هه‌ڤسۆزیێ یه بۆ هه‌می ئه‌مریكییان. بۆ بده‌هان سالان، مه پیشه‌سازییا بیانی ل سه‌ر كیستێ پیشه‌سازییا ئه‌مریكا زه‌نگین كرییه، سوپایێن وه‌لاتێن دی بهێزكرییه د ده‌مه‌كی دا ژ هێزا سوپایێ ئه‌مریكا كێم كرییه. مه به‌رگری ژ سنۆرێن وه‌لاتێن دی كرییه لێ ره‌ت كرییه به‌رگریێ ژ سنۆرێن خوه بكه‌ین. مه ب ترلیۆنا دۆلاران ل سه‌رانسه‌ری جیهانێ مه‌زاختینه د ده‌مه‌كی دا ژێرخانه‌یا ئه‌مریكا لاوازبوویه و كه‌فتییه ره‌وشه‌كا خراب دا.
مه وه‌لاتێن دی زه‌نگین كرینه، هه‌ڤده‌م سه‌رۆه‌ت و سامان و باوه‌ری و هێزا وه‌لاتێ مه پووچ و به‌لاڤه بوویه. ئێك ئێكه كارگه‌هـ تێكچووینه و وه‌لاتێ مه بجههێلایه، بێی هزر د ملیۆنان كاركه‌رێن ئه‌مریكی دا بكه‌ن یێن ل پشت خوه هێلاین. سامانێ ته‌خا ناڤین ژێ هاتییه ستاندن و دوباره ل سه‌رانسه‌ری جیهانێ هاتییه مه‌زاختن، لێ ئه‌و رابۆری یه، نها ئه‌م تنێ ل پاشه‌رۆژێ دنێرین.
ئه‌م ئه‌ڤرۆ ل ڤێره كۆم بووینه و مه‌رسوومه‌كی به‌لاڤ دكه‌ین دا ل هه‌می باژاران بهێته بهیستن، هه‌روه‌سا ل هه‌می پایته‌ختێن بیانی، ل هه‌ر جهه‌كێ ده‌ستهه‌لات لێ دهێته كرن، ژ ئه‌ڤرۆ پێڤه بتنێ گرنگییا ئه‌مریكا دێ ل رێزا ئێكێ هێت، ئه‌مریكا دێ ل پێشیێ هێت، دیتنه‌كا نوو دێ ده‌ستهه‌لاتێ ل ئه‌ردێ مه كه‌ت، هه‌ر بریاره‌كا ل دۆر بازرگانیێ، باجان، كۆچبه‌ران و كارێن ده‌رڤه دێ د مفاێ كاركه‌ر و خێزانێن ئه‌مریكیان دا هێته دان. پێتڤییه سنۆرێن خوه ژ خرابكارییا وه‌لاتێن دی بپارێزین كو به‌رهه‌مێن مه بۆ خوه چێدكه‌ن، كۆمپانیێن مه ددزن، كارێن مه ژناڤ دبه‌ن. پاراستن دێ گه‌شه‌كرن و هێزه‌كا مه‌زن ل دووڤ خوه ئینیت. د گه‌ل هه‌ر هه‌ناسه‌یه‌كا جانێ خوه دێ خه‌باتێ كه‌م و هه‌وه بێهیڤی ناكه‌م، ئه‌مریكا دێ ده‌ست پێ كه‌ته‌ڤه و گه‌له‌ك باش سه‌ركه‌ڤیت، ئه‌م دێ كارێن خوه و سنۆرێن خوه ڤه‌گه‌رینین.
دێ سامان و خه‌ونێن خوه ڤه‌گه‌رینین، رێ و پر و تونێل و فرۆكخانه‌یێن نوو ل ڤی وه‌لاتێ جوان چێكه‌ین، دێ خه‌لكێ خوه ژ وه‌رگرتنا خوه‌شگۆزه‌رانیێ راكه‌ین و ئێخنه د ناڤ كاری دا، دێ ب ده‌ستێن ئه‌مریكییان وه‌لاتێ خوه نووژه‌ن و ئاڤه‌دان كه‌ینه ڤه، دێ دو قانوونێن ساده بكارئینین كو ئه‌و ژی: ژ ئه‌مریكییان بكره و ئه‌مریكییان بده شۆلی.
دێ ل هه‌ڤالیێ و نیازپاكیێ گه‌رین د گه‌ل وه‌لاتێن جیهانێ، لێ ل سه‌ر وی بنه‌مایی كو مافێ هه‌ر وه‌لاته‌كی یه به‌رژه‌وه‌ندییا خوه ل ده‌ستپێكێ دانیت، ئه‌م ل هندێ ناگه‌رین شێوازێ ژیانا خوه ل سه‌ر كه‌سێ بسه‌پینین، لێ دێ وه‌سا لێ كه‌ین كو گه‌ش ببیت و وه‌ك نموونه‌یه‌كا گه‌ش لێ بهێته نێرین و دووڤ بهێن. دێ هه‌ڤپه‌یمانیێن كه‌ڤن بهێز ئێخین و هه‌ڤپه‌یمانیێن نوو چێكه‌ین، دێ جیهانا شارستانی ل دژی تیرۆرا ئیسلاما توندره‌و كه‌ینه ئێك و دێ ب ته‌مامی وێ تیرۆرێ ل سه‌ر روويێ ئه‌ردی ژناڤ به‌ین. ژ بنێ سیاسه‌تێن خوه مه هه‌ڤسۆزی بۆ ویلایه‌تێن ئێكگرتی یێن ئه‌مریكا هه‌یه، برێیا وه‌فادارییا خوه دێ وه‌فادارییا هه‌ڤدو بینینه ڤه. ده‌مێ دو دلێ خوه بۆ نیشتمانپه‌روه‌ریێ ڤه‌دكه‌ی، جهێ لایه‌نگری و لێنه‌بۆرینێ نامینیت.
ئنجیل دبێژیته مه چه‌ند تشته‌كێ جوانه ده‌مێ به‌شه‌ر ب هه‌ڤرا د ئێكگرتنێ دا دژین، پێتڤییه یا د دلێ خوه دا ب ئاشكرایی بئینینه زمان، نه‌رازیبوونێن خوه ب راست و درستی ببێژین، لێ هه‌رده‌م ل دووڤ پشتگیریێ و هه‌ڤخه‌میێ بچین. ل ده‌مێ ئه‌مریكا یا ئێكگرتی بیت، كه‌س نه‌شێت وێ براوه‌ستینیت. نابیت ترس هه‌بیت، ئه‌م دپاراستینه و هه‌رده‌م دێ د پاراستی بین، دێ ژ ئالیێ ژن و زه‌لامێن مه د له‌شكه‌ری و ئالیێن قانوونی هێینه پاراستن، یا گرنگتر دێ ژ ئالیێ خۆدێ ڤه هێینه پاراستن.
ل داویێ، پێتڤییه هزر ب مه‌زنی بكه‌ین و خه‌ونێن مه‌زنتر مه هه‌بن. ل ئه‌مریكا ئه‌م دزانین وه‌لاته‌ك هند دژیت هندی یێ لسه‌ر خه‌باتێ به‌رده‌وام بیت، ئه‌م ئێدی وان سیاسه‌تمه‌داران قه‌بوول ناكه‌ین كو بتنێ د ئاخڤن و بێ كریار، هه‌رده‌م گازنده‌یان دكه‌ن لێ چ تشتان ل دۆر وان گازنده‌یان ناكه‌ن. ده‌مێ ئاخفتنێن ڤالا نه‌ما، نها ده‌مێ بزاڤێ هات، نه‌هێله كه‌س ببێژیت دشیان دا نینه، چ زه‌حمه‌تیی نه‌شێن خوه ل به‌ر دل و خه‌بات و روحا ئه‌مریكا بگرن.
ئه‌م شكه‌ستنێ نائینین، وه‌لاتێ مه دێ گه‌شه‌كرنێ بینیته ڤه، ئه‌م ل هه‌مبه‌ری ژدایكبوونا چاخه‌كێ نووینه، ئاماده‌ینه مژه‌ویێن ڤالاهییا ئاسمانی ڤه‌ببینین، ئه‌ردی ژ ئێشان رزگاركه‌ین، پیشه‌سازی و ته‌كنه‌لۆجیا پاشه‌رۆژێ چێبكه‌ین. شانازییه‌كا نو یا نشتمانی دێ د روحا مه دا گه‌ریت و دیتنا مه بلند كه‌ت، دابه‌شبوونێن مه چاره‌سه‌ركه‌ت، نها ده‌مه بئینینه بیرا خوه ئه‌و ژیرییا سه‌ربازێن مه چ جار ژبیرناكه‌ن، كو چ ئه‌م د ره‌ش بین، یان قه‌هوایی، یان سپی، مه هه‌مان خوینا نیشتمانپه‌روه‌ریێ هه‌یه، دێ خوه‌شیێ ب هه‌مان ئازادیێ به‌ین، دێ سلاڤی هه‌مان ئالایێ ئه‌مریكا كه‌ین.
چ زارۆكه‌ك ل نهالێن دێترۆیت ژدایك ببیت، یان ل ده‌شتێن نیبراسكا، ئه‌و ل شه‌ڤێ ل هه‌مان ئاسمان دنێرن، دلێ خوه ب هه‌مان خه‌ون پر دكه‌ن، هه‌ناسا ژیانێ ژ ئالیێ هه‌مان خۆدایێ مه‌زن پێ هاتییه دان. ئه‌ڤجا بۆ هه‌می ئه‌مریكیان، ل هه‌می باژارێن نێزیك و دوور، بچووك یان مه‌زن، ژ چیا بۆ چیا، ژ ئۆقیانۆس بۆ ئۆقیانۆس، گۆهداری ڤان په‌یڤان بكه‌ن، هوون چ جار ناهێنه پشتگوهـ هاڤێتن، ده‌نگێ وه، هیڤیێن وه، هه‌می خه‌ونێن وه دێ چاره‌نڤیسێ ئه‌مریكا پێناسه كه‌ن، ئازایه‌تی و باشی و ئه‌ڤینا وه دێ ب درێژییا رێیێ رێبه‌رییا مه كه‌ت.
ب هه‌ڤرا دی ئه‌مریكا بهێزكه‌ینه ڤه، دێ زه‌نگین كه‌ینه ڤه، دێ سه‌رفراز كه‌ینه ڤه، دێ ئارامتر كه‌ینه ڤه، و به‌لێ ب هه‌ڤرا دێ ئه‌مریكا مه‌زنتر كه‌ینه ڤه. سوپاس، خۆدێ وه پارێزیت. و خۆدێ ئه‌مریكا ب پارێزیت. سوپاس.
نيشاندان