ئەڤرۆ نیوز، لەزگین جوقی:
بەرپرسێ پشکا راگەھاندنێ ل رێڤەبەریا گشتيا پەروەردا پارێزگەھا دھۆکێ دیارکر رێکخراوا Giz یا ئەلمانی رازەمەندیا وەلاتێ ئەلمانیا وەرگرت بۆ مەزاختنا کوژمێ دو ملیۆن دولاران بۆ ھاتنوچوونا مامۆستایێن پارێزگەھا دھۆکێ و ل ڤێ ھەیڤێ دێ دەست ب مەزاختنێ ھێتە کرن.

ئه‌حمه‌د زوبێر، به‌رپرسێ پشكا راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ دياركر كو پتر ژ حه‌فت هزار مامۆستايێن پارێزگه‌ها دهۆكێ هاتنوچوونێ ل قه‌زا و ناحيه‌ و كۆمه‌لگه‌هـ و گوندێن سه‌ر ب پارێزگه‌ها دهۆكێ ڤه‌ دكه‌ن و به‌رده‌وامى دايه‌ پرۆسا خواندنێ و ئه‌ڤ ژمارا مامۆستايان دێ ل گۆر دوور و نێزيكيا جهێ ئاكنجيبوونێ و ده‌وامێ پارێ هاتنوچوونێ وه‌رگرن.

زۆبێر گۆتژى: “ب ئاماده‌بوونا لايه‌نێن په‌يوه‌نديدار ئه‌ڤ رێكه‌فتنه‌ هاتيه‌ كرن و رێكخراو دێ پارێ هاتنوچوونا مامۆستايان ب ستوويێ خوه‌ ڤه‌ گريت و په‌روه‌رده‌ دێ ميكانيزمه‌كا گۆنجاى ده‌ستنيشان كه‌ت بۆ مه‌زاختنێ پاره‌ى ل سه‌ر هه‌موو مامۆستايێن هاتنوچوونێ دكه‌ن”.

ئه‌ڤرۆ نيوز:

نه‌دا مێرگه‌سۆرى، ئه‌نداما جڤاتا نوونه‌رێن عيراقێ بۆ ماڵپەڕی فەرمیی پارتی دیموکراتی کوردستانی راگه‌هاند كو لژنێن په‌يوه‌نديدار ل جڤاتا نوونه‌رێن عيراقێ د به‌رده‌وامن ل سه‌ر دانوستاندنێ ل سه‌ر پرۆژێ قانوونا بۆدجا گشتى يا عيراقێ بۆ سالا 2017ێ.

ب گۆره‌ى گۆتنێن نه‌دا مێرگه‌سۆرى د پرۆژێ قانوونا سالا 2017ێ دا، 17% ژ به‌هرا هه‌رێما كوردستانێ و شايسته‌يێن داراى يێن هێزێن پێشمه‌رگێ كوردستانێ هاتينه‌ بنه‌جهكرن.

ئه‌ڤرۆ نيوز:

ئێك ژ وان ئاريشێن مه‌زن يێن بووينه‌ ئه‌گه‌رێن قه‌يرانا دارايى هاتنا چه‌كدارێن داعش بوو بۆ ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ و پارێزگه‌ها مووسل كو ب روو ب رووبوونا ڤێ رێكخراوا تيرۆرى كۆژمه‌كێ مه‌زن يێ پاره‌ى هاتيه‌ مه‌زاختن.

جه‌بار ياوه‌ر، ئه‌ميندارێ گشتى يێ وه‌زاره‌تا پێشمه‌رگه‌ى راگه‌هاند كو هه‌ر ژ هاتنا چه‌كدارێن داعش بۆ ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ و پارێزگه‌ها مووسل، حوكمه‌تا هه‌رێما كوردستانێ 142 مليار دينار خستينه‌ د خزمه‌تا شه‌رى دا.

ئاماژه‌ دا وێ چه‌ندێ ژى كو ب دروستى نزانن كا چه‌ند پاره‌ دهێته‌ مه‌زختن، “به‌لێ ئه‌و كۆژمێ پاره‌ى بۆ خوارن و ڤه‌خوارن و چه‌ك و ته‌قه‌مه‌نى و ترۆمبێل و سۆته‌مه‌نى و چاره‌سه‌ريا برينداران هاتيه‌ ته‌رخانكرن”.

ده‌رباره‌ى كۆژمێ پارێ ئه‌مريكا ره‌وانه‌ دكه‌ت دا زانين كو ئه‌و كۆژمێ پارێ ئه‌مريكا هنارتى يێ كێمه‌ و به‌هرا هه‌موو پێدڤيێن پێشمه‌رگه‌ى ناكه‌ت.

ب گۆره‌ى رێكه‌فتنا د ناڤبه‌را ئه‌مريكا و هه‌رێمێ دا، هه‌يڤان ئه‌مريكا دێ كۆژمێ 415 مليۆن دۆلاران ب درێژاهيا شه‌رێ ل دژى داعش ده‌ته‌ وه‌زاره‌تا پێشمه‌رگه‌ى.

نه‌ڤه‌شارت ژى كو ئه‌و پارێ بۆ مووچێ پێشمه‌رگه‌ى دهێته‌ مه‌زاختن يێ جودايه‌ ژ وى پارێ بۆ شه‌رى هاتيه‌ ته‌رخانكرن، “هه‌يڤانه‌ هه‌رێما كوردستانێ 140 مليار ديناران بۆ مووچێ پێشمه‌رگه‌ى ته‌رخان دكه‌ت”.