ئەڤرۆ نیوز:
ل قەزا سۆران دو باندێن سەختەکرنا پارەی ژ لایێ ھێزێن پۆلیسان ڤە ھاتنە دەستەسەرکرن و پەیڤدارێ پۆلیسێن سۆران ژی دبێژیت، ئەندامێن ھەر دو باندا خەلکێ دھۆکێ و بەغدا و دەرڤەی ھەرێما کوردستانێ بووینە و گۆت: “ڤان ھەر دو باندان 24 دەفتەرێن دۆلاری یێن سەختە ئیناینە بازاڕی”.
نەقیب ھاوار ئەرگوشی، پەیڤدارێ پۆلیسێن قەزا سۆران بۆ رۆژناما ئەڤرۆ ئاشکرا کر کو دو باندێن سەختەکرنا پارەی ھاتینە دەستەسەرکرن ئێک ژ وان یێ پێکھاتیبوو ژ پێنج کەسان و یێ دی ژ ھەشت کەسان و گۆت: “وەلاتیێن دھۆکێ و بەغدا و تورکیا و ئیرانێ ئەندامێن ڤان ھەر دو باندێن سەختەکرنا پارەی بوون، باندەکی 19 دەفتەرێن سەختە یێن دۆلاری و باندێ دی پێنج دەفتەرێن سەختە یێن دۆلاری ئینابوونە د ناڤ بازاری دا و دخواست وی پارێ سەختە د ناڤ بازاری دا بەلاڤ بکەن، بەلێ ژلایێ ھێزێن پۆلیسان ڤە ھاتنە دەستەسەرکرن و بەرانبەر دادوەرێ ڤەکۆلینێ دانپێدان ب تاوانا خوە کرن و ل دووڤ قانوونێ دێ ھێنە سزادان”.
ناڤھاتی ئاماژە دا وێ چەندێ کو ئەڤە باندێ دویێ یێ سەختەکرنا پارەی یە د ئەڤ سالە دا ل سنوورێ قەزا شێخان دھێتە دەستەسەرکرن و گۆت: “رێژا تاوانان ئەڤ سالە ژ سالا بۆری کێمترلێھاتیە و خەلک کێمتر تاوانان ئەنجامددەت، بەلێ ھندەک تاوانبارێن مەترسیدار ھاتینەگرتن وەکو یێن سەختەکرنا پارە و زێڕی، چونکی ئەڤە تاوانێن بەرچاڤن ژ بەر ڤێ چەندێ ھێزێن پۆلیسان و نەھێلانا گۆنەھباریان بەردەوام چاڤدێریا رەوشێ دکەن بۆ کۆنتڕۆلکرن و نەھێلانا تاوانێن دھێنەکرن و ھەر تاوانەکا ھاتبیتە ئەنجامدان ژی ئەنجامدەر ھاتینە دەستەسەرکرن و سزادان”.

ئه‌ڤرۆ نيوز:

رێڤەبەرێ نڤیسینگەھا کاروبارێن رەڤاندیان ل پارێزگەھا دھۆکێ دیار کر کو ل دووڤ دووماھی ئامارا ھەر ژ رۆژا دەستپێکرنا ئۆپەراسیۆنا مووسلێ و ھەتا 25 ڤێ ھەیڤێ 998 کچ و ژنێن رەڤاندنی د دەستێن تیرۆرستێن داعش دا ماینە و گۆت: “ھژمارا رزگاربوویان گەھشتیە دو ھزار و 754 کەسان و تیرۆرست یێ بزاڤێ دکەن رەڤاندیان بۆ وەلاتێن عەرەبی ڤەگۆھێزن”.
حسێن قائێدی، رێڤەبەرێ نڤیسینگەھا کاروبارێن رەڤاندیان ل پارێزگەھا دھۆکێ دیار کر کو ل دووڤ دووماھیک ئامار ھژمارا رزگاربوویێن ئێزدی ژ دەستێن رێکخراوا تیرۆرستی یا داعشی گەھتشیە دو ھزار و 754 کەسان و سێ ھزار و 659 رەڤاندی ھێشتا ماینە د دەستێن تیرۆرستێن داعش دا ژ وان ژی 998 کچ و ژنن و گۆت: “ھەر ژ رۆژا دەستپێکرنا ئۆپەراسیۆنا رزگارکرنا مووسل و ھەتا نوکە پلانەکا باش بۆ رزگارکرنا رەڤاندیان ھاتیە دانان و ھێشتا چو کەسێن ئێزدی ژ وان دەڤەران رزگارنەبووینە یێن د ئۆپەراسیۆنا مووسل دا ھاتینە رزگارکرن، چونکی پتریا رەڤاندیێن ئێزدی د ناڤ سەنتەرێ مووسل دانە”.
ناڤھاتی ئاماژە دا وێ چەندێ کو ل دووڤ پێزانینان تیرۆرستێن داعش کچ و ژنێن رەڤاندنی بەر ب وەلاتێن عەرەبی دبەن ب تایبەتی ژی وەلاتێ سووریا و ل ھەر وەلاتەکێ تیرۆرستێن داعش لێ ھەبن بێگومان کچ و ژن دێ ژ مووسلێ بۆ وی وەلاتی ھێنە ڤەگوھاستن و گۆت: “ئەم داخوازێ دکەین رێیا بەعاج بھێتە کۆنترۆلکرن بۆ وێ چەندێ داعش ئێدی رەڤاندیێن ئێزدی بەر ب رەقە نە بەن”.
ل دووماھیێ حسین کۆرو ئاشکرا کر کو ھندەک رێکخراو بۆ ب دەستڤە ئینانا پارەی بتنێ بۆ مەرەمێن خوە یێن کەسایەتی کار دکەن و گۆت: “وان رێکخراوان ئێک رەڤاندنی رزگارنەکریە بتنێ بازرگانیێ ب کەیسا رەڤاندیان دکەن ژ بەر ڤێ چەندێ دێ پێرابوون دگەل دا ھێنە کرن”.

ئەڤرۆ نیوز:
جێگرێ سەرۆکێ لژنا نافخۆ ل پەرلەمانێ کوردستانێ تەکەزکر، کو ب چو شێوەیەکی رازی نابن ل دەزگەھێن راگەھاندنێ سفکاتی ب چو کەس ولایەنەکێ بھێتەکرن و دیارکر، دێ ڤەکۆلین ل دۆر بەلاڤکرنا ڤیدیۆیەکێ ژ لایێ سەرکردەیەکێ گۆڕان ھێتەکرن.
نازم کەبیر، جێگرێ سەرۆکێ لژنا نافخۆ ل پەرلەمانێ کوردستانێ بۆ رۆژناما ئەڤرۆ گۆت:”ئەڤ ڤیدیۆیا ھاتیە بەلاڤکرن ل ھندەک دەزگەھێن راگەھاندنێ ل دۆر روودانێن کەرکووکێ ژ لایێ بزاڤا گۆڕان ھاتیە چێکرن، چونکی ژ لایێ سەرکردەیەکێ وان ڤە ھاتیە بەلاڤکرن و تێدا چەکدارەکێ داعش دەرکەفتیە و زۆری لڤی چەکداری کریە کو بێژیت پارتی ئەم ھنارتینە کەرکووکێ، لەوڕا ب چو شێوەیەکی ئەڤ چەندە ل ئەڤان کەسا ناھێتە قەبوولکرن و من ب خوە 15 شەھیدێن شەڕێ داعش ھەنە و سفکاتیکرن ب خوینا شەھیدان و پێشمەرگە و شەھیدێن پارتی دێ گران ل سەر ھندەک کەس و لایەنان کەڤیت”.
کەبیر گۆتژی”مە ل بەرە سکالایێ ل سەر ئەڤان چەکداران تۆماربکەین یێن ئەڤ ڤیدیۆیە بەلاڤکری و وەکو لژنا نافخۆ ژی داخوازا ڤەکۆلینێ دکەین ل دۆر روودانێن ل رۆژێن بۆری ل کەرکووکێ چێ بووین، ژبەرکو تۆمەتبارکرنا ھندەک لایەنان ب روودانێن کەرکووکێ دێ زیان ب گەلێ کورد کەڤن و فەرە دەزگەھێن ئەمنی ل کەرکووکێ ب ڤێ چەندێ رابن ھەتا بگەھنە ئەنجامەکی و ئەڤ کەسێن سفکاتیێ ب خوینا شەھید و پێشمەرگەی دکەن بھێنە سزادان، ئەڤە چەندین جارە ھندەک تۆمەت دھێنە دووبارە کرن و ب رێیێن جودا سفکاتی ب پێشمەرگە و پارتی دھێتەکرن”.

ئه‌ڤرۆ نيوز:

بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ دیار کر پۆلیسێن پارێزگەھا دھۆکێ د بەرھەڤیەکا باش دانە و چەکەکێ باش و ترۆمبێلێن گولەنەبڕ و ھەمی پێدڤی بۆ ھێزا سوات و پۆلیسێن ھێزا ئامادە ھاتینە دابینکرن.
ھێمن سلێمان بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ رۆژناما ئەڤرۆ خویا کر کو د بەردەوامیا کۆمبوونێن رێڤەبەریا پۆلیسێن پارێزگەھا دھۆکێ دوھی 25ى چريا ئێكێ 2016 لیوا تارق ئەحمەد ئیبراھیم رێڤەبەرێ پۆلیسان دگەل ھژمارەکا ئەفسەر و پۆلیسێن ھێزا ئامادە ل دۆر بەرھەڤبوونا ھێزێن پۆلیسان کۆم بوو.
ھێمن سلێمان خویا ژی کر کو زێدەباری دەستخۆشیێ بۆ کارێ وان یێ بەردەوام، لێ رێڤەبەرێ پۆلیسان تێکەستی ل سەر بەردەوامبوونا پۆلیسان د ئامادەباشیێ دا کر ژبۆ ھەر روودانەکا نەچاڤەرێکری، چونکی ئاخا پیرۆزا کوردسـتانێ و گیانێ وەلاتیان ئەمانەتێ پێشمەرگەی و ھێزێن ئێمناھیێ نە، تایبەت د ڤی دەمی دا کو تیرۆرستێن داعش ھەر دەمێ دەلیڤا خوە بـبینن دێ بزاڤێ کەن رەوشا ئاراما دەڤەرێ تێک دەن.
ھێمن سلێمان بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ گۆت ژی “بۆ ڤێ چەندێ ژی چەکەکێ باش و ترۆمبێلێن گولەنەبڕ و ھەمی پێدڤی بۆ ھێزا سوات و پۆلیسێن ھێزا ئامادە ھاتینە دابینکرن زێدەباری مەشق و راھێنانێن تایبەت د ڤی بیاڤی دا”.