ئەڤرۆ نیوز:
ھەفتیا بۆری دو فەرماندارێن ئیرانێ سەرەدانا رۆژھەلاتێ کوردستانێ کرینە و دەست ب بەرھەڤیان بۆ شەرێ ل دژی پارتێن رۆژھەلاتێ کوردستانێ دکەن و ئێک ژ فەرماندارێن ئیرانێ ژی دیار کریە کو دێ سنۆرێ ئیرانێ ل گەل عیراق و تورکیا ب رێیا ھێزێن پاسداران ڤە ھێتە پاراستن و ژ نھا ڤە دەست ب بەرھەڤیان بۆ شەری دکەن.
عەبدوللا عیراقی جێگرێ فەرماندارێ گشتی یێ ھێزێن پاسدارێن ئیرانێ ھەفتیا بۆری پشتی کو سەرەدانا پارێزگەھا سنە یا رۆژھەلاتێ کوردستانێ کری بۆ دەزگەھێن راگەھاندنێ دیار کر کو ھندەک ھێزێن چەکدار ل دەرڤەی سنۆرێ ئیرانێ دەست ب بەرھەڤیان دکەن دا کو شەرێ مە بکەن و سالا بۆری ژی وان ھندەک چالاکی ئەنجام دان و زیان گەھاندنە خەلکێ مە ژ بەر ھندێ ژی ئەم دێ دەست ب بەرھەڤیێن تەمام کەین و دڤێت نەھێلیت ئەو ھێزێن جوداخواز و تیرۆرست زیانێ بگەھیننە وەلاتێ مە و گۆت: (بەری نھا ھێزێن ئاسایشێ و پۆلیسان سنۆرێ مە دپاراستن لێ ئەم دێ ھێزێن پاسداران ل سەر ھەموو سنۆرێ خوە یێ ل گەل عیراقێ بجە کەین دا رێ نەدەین چو ھێزەکا چەکدار ژ دەرڤەی سنۆران ھێرشی وەلاتێ مە بکەت).
جێگرێ فەرماندارێ گشتی یێ ھێزێن پاسدارێن ئیرانێ ئەو یەک ژی دیار کریە کو ئەڤسالە رەنگە گوھۆرینێن مەزن ل دەڤەرا مە دروست ببن و ژ بەر ھندێ ژی ھێزێن چەکدار دێ بزاڤێ کەن مفایێ ژ رەوشا ئالۆز یا دەڤەرێ ببینن و ئالۆزیێن بۆ مە دروست بکەن و ژ بەر ڤان ئەگەران ئەم دێ ب ھەموو رەنگەکێ خوە بۆ شەری بەرھەڤ کەین و رێ نادەین چو ھێزەک ل دەرڤەی سنۆرێ مە ھێرشی وەلاتێ مە بکەت.
ل ئالیێ دی فەرماندارێ گشتی یێ ھێزێن عەردی یێ ئیرانێ محەمەد پاکپۆر ژی راگەھاند کو دوژمنێن ئیرانێ دخوازن ھاریکاریا ھندەک ھێزێن چەکدار بکەن کو بەری نھا شەرێ مە دکرن و ژ بەر ھندێ ژی مە دەست ب بەرھەڤیێن تەمام کرینە و دێ ھەموو سنۆرێن خوە ب رەنگەکێ باش ب پارێزین و رێ نادەین چو ھێزەک خوە نێزیکی سنۆران بکەت و ھەر بزاڤەکا لەشکری ل دژی وەلاتێ مە بھێتە کرن دێ ب ھەموو شیانێن خوە ل دژی وان راوەستن و دێ بەرسڤا پێدڤی دەین و گۆت: (ئیران وەلاتەک ب ھێزە و د بیاڤێ سەربازی دا نھا ئەم گەلەکێ پێشکەڤتی نە و ب ھێزین، ژ بەر ھندێ ژی بەرھەڤین ب ھەموو رەنگەکێ بەرسڤا ھەر ھێرشکا دوژمنان بدەین).
ھەژی ئاماژەپێدانێ یە کو پشتی دەمەکێ درێژ سالا بۆری چەندین جاران شەر د ناڤبەرا پێشمەرگێن رۆژھەلاتێ کوردستانێ و ھێزێن ئیرانێ روو دان و ل گۆر داخۆیانیێن ھەر دو فەماندارێن ئیرانی دیارە ئەڤسالە دێ ئیران ‌ھێزەکا مەزن ل سەر سنۆرێ ل گەل ھەرێما کوردستانێ بجە کەت.