ئەڤرۆ نیوز:
بسپۆرەکی ناڤدار یێ زانستێن رۆژھەلات د داخویانیەکی دا راگەھاند کو کوردێن عیراق و سووریێ د درێژیا دیرۆکێ دا جارا یەکێیە ئەو ھندە نێزیکی ئاڤاکرنا دەولەتا سەربخوە یا کوردستانێ دبن و ئەنقەرە، دیمەشق و تەھران ژی دەولەتبوونا کوردان وەک پیلانا ئەمریکا ل رۆژھەلاتا ناڤین بناڤ دکەن و ل دژی دەردکەڤن.
گریگۆری مەلامەدۆڤ بسپۆرێ ناڤدار یێ زانستێن رۆژھەلات د نڤیسا خوە یا رۆژناما ئاربیسی (RBC) دەیلی دا ل سەر رەوشا رۆژھەلاتا ناڤین ب گشتی و باشور و رۆژئاڤایێ کوردستانێ تایبەت راوەستیا و راگەھاند کو کوردێن عیراقێ و سووریێ د شەرێ ل دژی تیرۆرستێن داعشێ دا د چەپەرێن پێشدا بوون و ب قەبوول کرنا ھەموو کێم نەتەوە و ئۆل و مەزھەبێن جودا سەرنجا جیھانێ راکێشان و ئەو یەک بوویە سەدەمێ پشتەڤانیا ب ھێز یا ئەمریکا و ئورۆپا و دەرفەتا دروستکرنا دەولەتا کوردی ل ھەردو پارچێن کوردستانێ ب ھێزتر بوویە.

گریگۆری مەلامەدۆڤ د نڤیسا خوە دا رەوشا باشور و رۆژئاڤایێ کوردستانێ وەک رەوشەکا گەلەک گونجای بۆ دامەزراندنا دو دەولەتێن سەربخوە یێن کوردی ب ناڤ کریە و ئاشکرا ژی دکەت کو د درێژیا دیرۆکێ دا بەلکو ژی جارا یەکێ یە کورد ئەو ھندە نێزیکی دامەزراندنا دەولەتێن کوردستانێ دبن و ھەکە ب وێرەکانە بریارێ وەربگرن و دەولەتێن سەربخوە راگەھینن دێ ئەمریکا و ئورۆپا ژی پشتەڤانیا وان بکەن، لێ ھەکە ل بەندا ئەمریکا و ئورۆپا بمینن ئەو نابێژن دەولەتا خوە ئاڤا بکەن و بۆ ڤێ یەکێ ژی دڤێت کورد ب بریارەکا یەکجاری و وێرەکانە دەولەتێن سەربخوە دامەزرینن و د رەوشەکا وەسا دا چو ھێزەکا ھەرێمی نەشێت ھێرشێ کوردان بکەت.
بسپۆرێ زانستێن رۆژھەلات د پشکەکا دی یا نڤیسا خوە دا ژی ل سەر رەوشا گشتی یا رۆژھەلاتا ناڤین رادوەستیت و دیار دکەت کو نھا ل وەلاتێن ھەرێما رۆژھەلاتا ناڤین ژ عیراق، ھەتا سووریێ و ژ تورکیا ھەتا ئیرانێ، سعوودیە، لیبیا و مسرێ رەوشەکا ئالۆز ھەیە و ئەو وەلات د ناڤ خوە دا نە ئارامن و کۆنترۆلا ناڤخوە یا وەلاتێ ھەتا ئاستەکی بلند ژ دەست داینە و ئەو یەک دەرفەتا ئاڤاکرنا دەولەت و ھەرێمێن دیفاکتۆ دایە کوردان و کلیلا پاشەرۆژا کوردان ھەتا ئاستەکی بلند د دەستێ کوردان ب خوە دایە و دژاتیا ئیران، سووریێ و تورکیا ل ھەمبەر مافێ چارەنڤیسێ کوردان کاریگەریێ ل سەر پاشەرۆژا کوردان ناکەت ھەکە کورد خوەدان بریارەکا وێرەک بن.

گریگۆری مەلامەدۆڤ بسپۆرێ زانستێن رۆژھەلات ل سەر رەوشا گەلێن کریستیان و کێم نەتەوێن جودا یێن کو ل کوردستانێ دژین ژی راگەھاند کو کریستیان و کێم نەتەوە و ئۆلێن جودا د ناڤا کوردستانێ ھەتا ئاستەکی باش ئازاد دژین و ئارامیا وان ھەیە و د جھێ کو د بن دەستھەلاتا شیعە و سوننەیان دا بژن، دخوازن ل گەل کوردان پێکڤە بژین، ژ بەر کو کورد مللەتەکێ ھشکباوەر نینن و رێزێ ل مافێن وان دگرن و رەوشا کێم نەتەوە، ئۆلێن جودا و کریستیانان ژی وەسا دکەت کو ئەمریکا و رۆژئاڤا گرنگیێ بدەنە باشور و رۆژئاڤایێ کوردستانێ و گۆت: (ئەو یەک ژی بێگومان دەلیڤەکا زێرینە بۆ کوردان و دڤێت د رەوشا نھا دا کو رۆژھەلاتا ناڤین ب گشتی ئالۆزە ئەو ژی ناکۆکیێن خوە یێن ناڤخوەیی بدەنە رەخەکێ و بریارەکا وێرەکانە بدەن و دەولەتێن خوە ل باشور و رۆژئاڤایێ کوردستانێ راگەھینن، ئەز دبێژم نھا رەوش گەلەکا گونجایە و ھەکە کورد نھا بریارا راگەھاندنا دەولەتێ نەدەن رەنگە پاشی پەشیمان بن).