ئەڤرۆ:
سکرتێرێ ئێکەتیا نەتەوەیا دیموکراتی کورد ئاشکراکر، سەرۆکێ ھەرێما کوردستانێ ھەر ل دەستپێکا رۆلێ پرۆسا ئاشتیێ دا رۆلەکێ گرنگ ھەبوو و نوکە ژی دشێت رۆلەکێ زێدەتر ھەبیت وباروەریێ بۆ وەلاتێ تورکیا چێکەت، ھەروەسا دیارکر، پەکەکە دشێت ل گەل سەرۆکێ ھەرێمێ روونشتنان بکەت و مفای ژ پەیوەندنیێن نێڤدەولی یێن سەرۆک بارزانی وەربگرن.
سکرتێرێ پارتی ئێکەتیا نەتەوەیا کورد (غەفور مەخمووری) راگەھاند، پێدڤیە ھەموو کێشە ب رێیا ئاشتیی و لێکتێگەھشتن و دانوستاندنێ بھێنە چارەکرن، و پرۆسا ئاشتیێ کو ل باکوورێ کوردستانێ ھەبوو، تورکیا پێنگاڤێن پێشڤەچوونێ بۆ نەھاڤێتن، لەورا گەھشتە بنبەستێ، لێ دشیان دا ھەیە نوکە جارەکا دی سەرشنوو دەست ب پرۆسا ئاشتیێ بھێتە کرن، چونکە ئەڤە تاکە رێکە و ھەموو دونیا ژی ھەر بڤی رەنگی یە.
غەفور مەخمووری ھەروەسا گۆت: ئەم ل گەل توندوتیژیێ نینە، و چو کێشە ب توندوتیژیێ ناھێنە چارەسەرکرن، و خزمەتا ب کاودانێن نوکە ژی ناکەت، دشیان دایە ل سەر بنەمایێ لێکتێگەھشتنێ درێژە ب پرۆسا ئاشتیێ بھێتە کرن.
مەخمووری ئەو چەندە ژی دیارکر و نەڤەشارت، کو دڤێت ھەموو پەیوەندیێن مللەتێ کوردستانێ ل گەل ئێکدا دباشبن و کێشێن لابەلایی دەستژێ بەردەن و بتنێ ھزرا پرسا نەتەوەیی بکەین، چونکی رەوشا باشوورێ کوردستانێ زورا ھەستیارە، لەورا پێدڤیە ل سەر پارچێن دی یێن کوردستانێ تایبەتمەندیا ڤێ پارچێ بەرچاڤ بگرین، ودەست دکاروبارێن ناڤخوەیا وێ وەرنەدەین.
سکرتێرێ ئێکەتیا دیموکراتیا نەتەوەیی یا کورد ھەروەسا خوەیاکر، پێدڤیە کێشە ب رێیا دیالۆگێ بھێنە چارەکرن، چونکە ئەڤە تاکە رێیە بۆ چارەسەریا کێشان.
غەفور مەخمووری زێدەباری وێ چەندێ گۆت: سەرۆک بارزانی دشێت رۆلەکێ گرنگ ل چارەکرنا پرۆسا ئاشتیێ ل وەلاتێ تورکیا بگێریت، چونکی ھەر ل دەستپێکێ وی رۆلەکێ کاریگەر ل سەر پرۆسا ئاشتیێ ھەبوو و دشێت رۆلەکێ کاراتر ژی دڤێ قوناغێ دا ھەبیت، و باوەریەکا تەمام ژی بۆ وەلاتێ تورکیا سەبارەت پرۆسا ئاشتیێ پەیدا بکەت.
ل دووماھیێ سکرتێرێ پارتا ناڤبری، دووپاتکر پەکەکە دشێت ل گەل سەرۆک بارزانی چاڤپێکەفتنان بکەت بۆ ھندێ پرۆسیا ئاشتیێ ل تورکیا بەر ب پێشڤە بچیت و مفای ژ پەیوەندیێن ب ھێزێن نێڤدەولی یێن سەرۆک بارزانی ببینن.

ئه‌ڤرۆ نيوز:

ساله‌ك ب سه‌ر كونترۆلكرنا شنگال دا ده‌رباز بوو، به‌لێ ب تنێ 173 خێزان ڤه‌گه‌رياينه‌ شنگال و 13 گۆند هێشتا نه‌هاتينه‌ كونترۆلكرن، هه‌تا نوكه‌ 616 پێشمه‌رگه‌ ل وى سنورى شه‌هيد بووينه‌ و قايمقامێ شنگال ژى ئه‌گه‌رێ ڤه‌نه‌گه‌ريانا خه‌لكى بۆ وێ ده‌ڤه‌رێ ئاشكه‌را دكه‌ت.

مه‌حما خه‌ليل قايمقامێ قه‌زا شنگال راگه‌هاند كو هه‌تا نوكه‌ 13 گۆند نه‌هاتينه‌ كونترۆلكرن و گۆت: “ئه‌م ب هيڤى نه‌ د ساليادا بهێت يا كونترۆلكرنا شنگال دا، ئه‌و ده‌ڤه‌ر ژى بهێنه‌ كونترۆلكرن”.

زێده‌تر گۆت: “هه‌تا نوكه‌ 173 خێزان ڤه‌گه‌راينه‌ ناڤ باژێرى، به‌رى داعش هێرشێ بكه‌ته‌ سه‌ر ده‌ڤه‌رێ ژمارا روونشتڤانێن ده‌ڤه‌رێ 8 هزار و 105 خێزان بوون كو دبوونه‌ 51 هزار و 536 كه‌س.

ده‌رباره‌ى ڤه‌نه‌گه‌ريانا خه‌لكێ شنگال بۆ ناڤ شنگال ژى خۆيا كر كو ژبلى هه‌بوونا گه‌له‌ك هێزان ل ناڤ شنگال خزمه‌تگۆزاريێن ده‌سپێكى ژى نينن و داعش ژى جار جاران هێرشێ دكه‌ته‌ سه‌ر شنگال.

شنگال 140 كيلۆمه‌تران يا ژ سه‌نته‌رێ مووسل دووره‌ و هه‌ر ژ ده‌سپێكا هاتنا داعش هه‌تا نوكه‌ 616 پێشمه‌رگه‌ ل وێ ده‌ڤه‌رێ شه‌هيد بووينه‌ و 27 گۆڕێن ب كۆم ل وێ ده‌ڤه‌رێ هاتينه‌ ديتن و زێده‌ترى چار هزار كوردێن ئێزدى ئاواره‌ بوون و نێزيكى پێنج هزار كچ و ژنان ژى كه‌فتنه‌ ده‌ستێ داعش.