ئه‌ڤرۆ نيوز:
ئه‌ڤرۆ وه‌زاره‌تا خواندنا بلند ناڤێن قوتابيێن ل ماسته‌ر و دكتورايێ ل زانكۆيا كوردستانێ هاتينه وه‌رگرتن راگه‌هاند، ب رێيا ڤى لينكێ ل خوارێ بزانه تو ل خواندنا ماسته‌ر و دكتورايێ ل زانكۆيا دهۆك هاتيه وه‌رگرتن
ئه‌ڤرۆ نيوز:
حوكمه‌تا هه‌رێما كوردستانێ بڕيار دا پارێ خواندنێ ژ پێش زارۆيێن شه‌هيد و ئه‌نفالكرى و زيندانيێن سياسى ل هه‌موو ناڤه‌ندێن ئه‌هلى و حكۆمى دابين بكه‌ت.
به‌ره‌ڤان حه‌مدى، رێڤه‌به‌رێ گشتيێ وه‌به‌رهێنان و داهات ل وه‌زاره‌تا كاروبارێن شه‌هيدان و ئه‌نفالكريان بۆ رووداو گۆت: “به‌رى نوكه ئه‌ڤ بڕياره هه‌بوو، به‌لێ نوكه هاته نووكرن”.
كۆتژى: “ئه‌ڤه جهێ دلخۆشيێ يه، به‌رى نوكه دانوستاندن ل سه‌ر هه‌بوو كو رێژه‌كا پاره‌ى ل سه‌ر حوكمه‌تێ بيت و رێژه‌ك ژى ل سه‌ر قوتابى بيت، به‌لێ خۆشبه‌ختانه پشتى دانوستاندنه‌كا زۆر، حوكمه‌تێ بڕيار دا 100% ل سه‌ر حوكمه‌تێ بيت”.
نوكه ل پشكه‌كا زانكۆيێن حكومى خواندن ب پاره‌يه، ژ به‌ر هندێ نه ب تنێ ل قوتابخانه و زانكۆيێن تايبه‌ت، بڕيار ئه‌وان قوتابيان ژى ڤه‌دگريت يێن ل زانكۆيێن حكۆمى ژى دخوينن.
هه‌ر ب گۆره‌ى بڕيارا حوكمه‌تێ كو ل 5ى كانوونا ئێكێ ده‌ركه‌فتيه و ئيمزا نێچيرڤان بارزانى سه‌رۆك وه‌زيرێن هه‌رێما كوردستانێ ده‌رچوويه، ئێك زارۆيێ زيندانيێن سياسى ژى دێ ژ پارێن خواندنێ هێته ئازاكرن، ئانكو هه‌كه زيندانيێ سياسى چه‌ند زارۆيه‌ك هه‌بن و بخوونن، ئێك ژ وان دێ ژ دانا پاره‌ى هێته ئازاكرن.
ئه‌ڤرۆ نيوز:
ب كێمى 25 كه‌س ژ ئه‌گه‌رێ بيڤه‌له‌رزه‌كا ب هێز ل هه‌رێما ئاچيه يا ئه‌ندونسيا گيانێ خوه ژ ده‌ست دا و 26 كه‌سێن دژى ب گرانى بريندار بوون.
ب گۆره‌ى رۆیته‌رز، ئه‌ڤرۆ رۆژا چارشه‌مبى رێكه‌فتى 7ى كانوونا ئێكێ 2016 بيڤه‌له‌رزه‌ك ب گۆره‌ى 6.4 يا پيڤه‌رێ ريخته‌ر هه‌رێما ئاچيه يا ئه‌ندونسيا هه‌ژاند و ژ ئه‌گه‌رێ وێ چه‌ندێ چه‌ند ئاڤاهيه‌ك ئينانه خوار و روونشتڤانێن وێ ژ ترسادا چوونه سه‌ر جادان.
تيمێن گه‌ريان و رزگاركرنێ ل ئه‌ندونسيا د به‌رده‌وامن ل لێگه‌ريانا ب ده‌هان كه‌سان كو دهێته پێشبينيكرن د بن داروبه‌ر و ئاڤاهيێن خراب بوويى ڤه مابنه ئاسێ.
ئاچێ دكه‌ڤيته پشكا باكوور ژ دورگا سومه‌تره ل 26ى كانوونا ئێكێ يا 2004ێ ژ ئه‌گه‌رێ بيڤه‌له‌رزه‌كا مه‌ن “تسونامى” وێران بوو و ب تنێ ل وێ هه‌رێمێ 120 هزار كه‌سان گيانێ خوه ژ ده‌ست دا.
ب گۆره‌ى داتايێن ده‌زگه‌هێ رووپيڤا جيولۆجى يێ ئه‌مريكى بيڤه‌له‌رز پشتى ده‌مژمێر پێنجى سپێدێ بوويه ب ده‌مێ ئه‌ندونسيا. كووراتيا بيڤه‌له‌رزێ 17 كيلۆمه‌تر بوو ژ كه‌نارێ باكوورێ رۆژهه‌لاتێ ئاچى، ديسا چو هوشداريێن روودانا تسۆنامى نه‌هاتينه به‌لاڤكرن.
ب كێمى پێنج بيڤه‌له‌رزێن بچووك يێن دى پشتى بيڤه‌له‌رزا سه‌ره‌كى هاتينه هه‌ستپێكرن.
ئه‌ڤرۆ نيوز:
ئەندامەکێ ئێکەتیا مامۆستایێن کوردستانێ ئیماژە ب ڤێ چەندێ کر کو پارێ ھاندانا مامۆستا ب تنێ بۆ ئەڤ سالەیە و ھەیڤێن قوتابخانا دەوام تێتەکرن و ھەیڤێن ھاڤینێ ڤەناگریت و گۆت “بڕیارە دگەل مووچێ ھەیڤا دەە بھێتە بەلاڤکرن”.
عەتا ئەحمەد، ئەندامێ مەکتەبا سکرتاریەتا ئێکەتیا مامۆستایێن کوردستانێ بۆ رۆژناما ئەڤرۆ گۆت “پارێ ھاندنا مامۆستا ئەڤێ ژلایێ حوکمەتا ھەرێما کوردستانێ و رێکخراوا ئەلمانی ڤە ھاتیە مەزاختن، ب تنێ دێ بۆ کریا ھاتنوچوونا مامۆستایان بیت و د دەمێ بھێنڤەدانا ھاڤێنێ دا ناھێتە ھژمارتن، ھەروەسا ب تنێ دێ بۆ ئەڤ سالا خواندنێ بیت و سالێن داھاتی ڤەناگریت، لەوڕا مامۆستا دلگرانن ژڤێ چەندێ و ئەڤ پارە وەکو زێدەھی ناچیتە سەر مووچێ مامۆستا، بەلکو دێ ب لیستەکا جودا بسەر مامۆستایێن ھەرێما کوردستانێ ھێتە بەلاڤکرن، ب ئاوایەکی بۆ باژێڕان سەد ھزار و بۆ مامۆستایێن دەرڤەی باژێران 150 ھزار دینارن”.
عەتا ئەحمەد گۆت ژی “ل گۆر پێزانینێن بەردەستێ مە ئەڤ پارێ ھاندانێ دێ دگەل مووچێ ھەیڤا دەە یێ مامۆستایان ھێتە بەلاڤکرن، بەلێ ھێشتا یا رۆھن نینە دێ ھەیڤا چەند ھێتە ھژمارتن، ژبەرکو ھەیڤا دەە مامۆستایێن دھۆکێ و ھەولێرێ دەست ب دەوامێ کریە و یێن سلێمانیێ ژی ھێشتا دەست ب دەوامێ نەکریە، ئەگەر ل گۆر دەواما قوتابخانا و دەستپێکا سالا خواندنێ بیت ئەڤە دڤێت ژ ھەیڤا دەە بھێتە ھژمارتن و بسەر مامۆستایان دا بھێتە بەلاڤکرن”.
ئەڤرۆ نیوز:
پەرلەمانتارەکا کورد ل پەرلەمانێ عیراقێ دوپات کر، ب ئەگەرێ ناکۆکیێن ناڤبەرا شیعە و سونەیان کۆمبوونا پەرلەمانی بۆ پەسەندکرنا پڕۆژێ قانوونا بودجا گشتی یا عیراقێ کەفتیە ئەڤرۆ رۆژا چارشەمبی و دەلیڤە مایە ھێشتا پێداچوون ب داخوازیێن فڕاکسیۆنێن کوردستانی دا بھێتەکرن، ھەتا گھۆڕین ب سەر بودجا ھەرێما کوردستانێ دا بھێن.
نەجیبە نەجیب، ئەنداما لیژنا دارایی و ئابووری ل پەرلەمانێ عیراقێ بۆ رۆژناما ئەڤرۆ گۆت “د کۆمبوونا رۆژا دوشەمبی دا یا پەرلەمانێ عیراقێ، ل دۆر بنەھجکرنا بودجا حەشدا شەعبی ئاریشە کەفتە د ناڤبەرا کۆتلەیێن سونە و شیعە دا و بوویە ئەگەرێ پاشخستنا دەنگدانێ ل سەر پڕۆژێ قانوونا بودجا عیراقێ بۆ ئەڤرۆ رۆژا چارشەمبی و گۆت “ئاریشا د ناڤبەرا وان ژی دا ل دۆر ڤێ چەندێ بوو کو سونیا داخواز کر 40%ێ بودجا حەشدا شەعبی بۆ عەرەبێن سونە بیت و کۆتلێن شیعە ژی ب ڤێ رێژێ رازی نەبوون، واتە ئەگەر مووچە بۆ سەد ھزار چەکدارێن شیعە بھێتە مەزاختن ئەڤە ژ وان سەد ھزاران چل ھزار بۆ عەربێن سونە بیت، بەلێ ئەز د وێ باوەریێ دانینم کو عەرەبێن شیعە ب ڤێ داخوازا کۆتلێن سونی رازیبن و سەربگریت”.
ل دۆر وان مادێن پەیوەندی ب ھەرێما کوردستانێ ڤە ھەی، نەجیبە نەجیب گۆت “مە وەک فڕاکسیۆنا پارتی دیموکراتی کوردستان ل پەرلەمانێ عیراقێ رۆژا دوشەمبی ژی بایکۆتا کۆمبوونا پەرلەمانی کر، چونکی مە وەسا پێ باشە گھۆڕین ب سەر ئەڤان مادێن پەیوەندی ب ھەرێما کوردستانێ و ھێزا پێشمەرگەی ڤە ھەیە بھێنەکرن، ئەگەر ھەتا بەری دەستپێکرنا کۆمبوونا رۆژا چارشەمبی نەھێنە راستڤەکرن، دیسان دێ کۆمبوونا پەرلەمانی بایکۆت کەین و پشکداریێ ناکەین، نوکە ژی دەلیڤە ھەیە گھۆڕین بھێنەکرن”.
ھەروەسا نەجیبا خانێ گۆت “ئەز چ جاران باوەر ناکەم پەرلەمانتارێن عیراقێ دەنگی بۆ پڕۆژێ فڕاکسیۆنێن کوردستانی بدەن و دڤێت گھۆڕین تێدا بھێنەکرن، ئەڤا نوکە بۆ ھەرێما کوردستانێ ھاتیە دیارکرن د بەرژەوەندیا ھەرێما کوردستانێ دا نینە و ھەکە ب ڤی شێوەی پڕۆژێ قانوونا بودجەی بھێتە پەسەندکرن، دێ زیان بۆ ھەرێما کوردستانێ ھەبن، تنێ وەکی فڕاکسیۆنا پارتی و حوکمەتا ھەرێما کوردستانێ پێشنیار کرینە دێ چارەسەریا ئاریشا بودجە و مووچێن ھەرێما کوردستانێ ل بەغدا بکەن”.
ئه‌ڤرۆ نيوز:
ل باکورێ کوردستانێ ئۆپەراسیۆنێن ل دژی کوردان بەردەوام دکەن و نێزیکی ٥٠ باژێرڤانیێن کوردان ژ ئالیێ حوکمەتا تورکیا ڤە ھاتنە دەستەسەر کرن و کەسەکێ دی ژ ئالیێ حوکمەتێ د جھێ ھەڤسەرۆکێن باژێرڤانیێن باکورێ کوردستانێ دا ھاتنە ئەرکدار کرن و سەرۆک وەزیرێن تورکیا ژی دبێژیت باژێرڤانیێن د دەستێ پارتا ھەرێمێن دیمۆکراتیک دا پارێن بۆ خزمەتکرنا خەلکێ ددەنە پەکەکێ و وەک باژێرڤانیێن وان کار دکەن.
کامیران یوکسەک ھەڤسەرۆکێ پارتا ھەرێمێن دیمۆکراتیک DBP، د داخویانیەکی رۆژنامەڤانی دا راگەھاند کو چو باندۆرا سیاسی و جەماوەری یا حوکمەتا ئاکپارتی ل باکورێ کوردستانێ نەمایە و ب زۆرداری و ھێزا ئێمناھیا دەولەتێ دخوازیت ھەبو،نا خوە بدەتە قەبوول کرن و گۆت: (حوکمەتا ئاکپارتی و سازیێن دەولەتێ رەوابوونا خوە ل باکورێ کوردستانێ ژ دەست داینە و ھەر کریارەکا حوکمەتێ ل دژی سازی، کۆمەلە و دەستکەڤتێن گەلێ کورد دبیتە سەدەمێ دروستکرنا ئالۆزیێن دژوارتر و ب تەمامی ژ ئالیێ جەماوەری و سیاسی ڤە خوە تێک دچیت و ب رێیا زۆرداریا ھێزێن ئێمناھیێ دخوازیت ھەبوونا خوە بدەتە خوەیا کرن).
ھەڤسەرۆکێ DBP ھەروەسا راگەھاند ژی کو د رەوشا نھا ژ نێزیکی ٥٠ باژێرڤانیێن کو ب ئیرادا گەل ھاتنە ھەلبژاترن نھا ب زۆداریێ ھاتنە داگیرکرن و گۆت: (دڤێت ئاکپارتی و سەرۆک کۆمار ئەردۆگان بزانن کو چ بکەن بلا بکەن نەشێن ل ھەمبەر ھێزا گەل راوەستن و ئەم سەرێ خوە ل ھەمبەر وان ناچەمینین و ل ھەر جھەکێ بەرخوەدانا مە دێ مەزنتر بیت و گەل نوونەرێن حوکمەتا ئاکپارتی ل باکورێ کوردستانێ قەبوول ناکەن و چ رەوابوونا وان کەسان نینە).
ھەر د ڤێ مژارێ دا بینالی یلدرم سەرۆک وەزیرێن حوکمەتا تورکیا ژی راگەھاند کو ھەدەپە و DBP وەک باسکێن سیاسی یێن پەکەکێ بزاڤێ دکەن و گۆت: (باژێرڤانی بۆ خزمەتا گەل ھەیە لێ باژێرڤانیێن د دەستێ پارتا ھەرێمێن دیمۆکراتیک دا پارێن بۆ خزمەتکرنا خەلکێ ددەنە پەکەکێ و وەک باژێرڤانیێن وان کار دکەن و ڤەکۆلینێن مە ل سەر ھەموو باژێرڤانیان بەردەوام دکەن و د ئەنجاما ڤەکۆلین و لێپرسینان دا کیژ باژێرڤانی ھەڤکاریا تیرۆرستان کربیت ئەم دێ ل دژی وان بریاران وەربگرین و د جھێ وان دا دێ کەسەکێ نوو ئەرکدار کەین).
ل ئالیێ دی د ناڤا دو رۆژان دا ھێزێن ئێمناھیێن تورکیا ل باژێرێن ئامەد، سێرت، وان، ئەرزرۆم و مێردینێ ٦٢ کەسێن کو ئەندامێن DBP و ھەدەپێ نە دەستەسەر کریەە و د رەوشا نھا دا نێزیکی حەفت ھزار ئەندام و ئالیگرێن ھەدەپێ و DBP و پەرلەمانتار و ھەڤسەرۆکێن باژێرڤانیان ھاتینە گرتن.
ئه‌ڤرۆ نیوز:
سه‌عدى ئه‌حمه‌د پیره ئه‌ندامێ سه‌ركردایه‌تیا ئێكه‌تیا نیشمانیا كوردستانێ دیاركر كو ئه‌و یێ گه‌شبینه ب سه‌ره‌دانا شاندێ پارتى دیموكراتى كوردستان بۆ چاره‌كرنا پرسا سیاسى یا هه‌رێمێ و گۆت” دڤێت هه‌موو لایه‌ك بگه‌هین رێككه‌فته‌كێ كو د به‌رژه‌وه‌ندا خه‌لكێ هه‌رێما كوردستانێ دا ببیت”
سه‌عدى ئه‌حمه‌د پیره دیاركر ، ئه‌و و پارتى ده‌مه‌كه ل سه‌ر كێشێن سه‌رۆكایه‌تیا هه‌رێم و په‌رله‌مان و حوكمه‌تێ دانوستاندنێن دو قولى دكه‌ن و گۆت” ل سه‌ر ڤان پرسان ئه‌م هه‌ڤپه‌یمانین د حوكمرانیێ دا و پێدڤیه دانوستاندنێن تێروته‌سه‌ل بكه‌ن و ب گشتى ئه‌م پشكه‌كین ژ چاره‌سه‌ریێ، به‌رده‌وام بزاڤا چاره‌كرنا كێشان دده‌ین”.
سه‌عدى ئه‌حمه‌د ئاماژه ب وێ یه‌كێ كر كو یه‌یام و ده‌ستپێشخه‌ریا بارزانى د وه‌خته‌كێ گونجایى دا بوو، چونكه ب باوه‌را وى قوناغا شه‌رى ب دووماهى هاتیه و كورد ب ئێكگرتوویى دشێت چاره‌نڤیس و نه‌خشێ سیاسى یێ هه‌رێما كوردستانێ دیار بكه‌ت.
ئه‌ڤرۆ نیوز:
حوكمه‌تا هه‌رێما كوردستانێ د راگه‌هاندنه‌كێ دا دیاركریه: جهێ داخێ یه په‌رله‌مانتارێن كورد ده‌نگ ب پشكا بودجێ هه‌رێما كوردستانێ د قانوونا بودجێ عیراقێ بۆ سالا 2017 دایه، كو سه‌ره‌راى وێ یه‌كێ مه پێزانینێن دروست داینێ، به‌لێ به‌رۆڤاژى به‌رژه‌وه‌ندیێن گشتى یێن هه‌رێما كوردستانێ و موچه‌خوران ده‌نگ ب قانوونێ دایه.
دیاركریه ژى كو قانوونا بودجێ، پیلانه‌كا سیاسى یا مه‌ترسیداره دژى كوردستانێ و ئه‌وێن دبێژین كو ب پابه‌ندبوونا هه‌رێمێ و بجهئینانا قانوونێ، به‌غدا دێ موچێ فه‌رمانبه‌رێن هه‌رێمێ هنێریت، دره‌وه‌كا بێ بنه‌مایه و چو بۆ نینه.
ئه‌ڤرۆ نيوز:
ب دروشمێ (پێشمه‌رگه و زانكۆ هه‌ڤ چه‌په‌رن بو پاشه‌روژه‌كا گه‌شتر) رێوره‌سمێن ده‌رچوونا چارێ یا زانكویا پولیته‌كنیكى یا دهوكێ و گه‌را یازدێ یا قوتابیێن په‌یمانگه‌ها ته‌كنیكى یا ئامێدیێ برێڤه‌چوو.
روژا سێ شەمبی رێکەفتی 6-12-20166 رێورەسمێن دەرچوونا گه‌را (چارێ) یا زانکۆیا پۆلیتەکنیکى یا دھۆک، گه‌را (یازدێ) یا قوتابیێن پەیمانگەھا تەکنیکی یا ئامێدیێ، ل ژێر چاڤدێریا (پ.د. عدنان محسن) سه‌روكێ زانكویا پولیته‌كنیكى یا دهوكێ و ب ئامادەبوونا (د.زیره‌ك عزیزخان احمد) هاریكارێ سه‌روكێ زانكۆیا پۆلیته‌كنیكى یا دهۆك بو كاروبارێن زانستى و اسماعیل مصطه‌فا قایمقامێ قه‌زا ئامێدیێ و كارگێرێ لقا 18 یا پارتا دیموكراتا كوردستانێ و ژمارەیەکا زور ژ بەرپرس و رێڤه‌به‌رێن حکومی و حزبی، ئاهه‌نگا ده‌رچوونا قوتابیێن په‌یمانگه‌ها مه بو سالا خواندنێ (2015-2016) ھاتەساز کرن.
دڤێ گه‌را ده‌چوونێ دا (2188) قوتابى دێ باوه‌رناما دبلوما ته‌كنیكى ل پێنج پشكێن زانستى (كارگێرى بازارگه‌رى، كارگێرى گه‌شتیارى، شروڤه‌كرنا نه‌خوشیان، سامانێ ئاژه‌لى، ئایتى) ل په‌یمانگه‌ها مه وه‌رگرن.
ل دوماهیێ ژى دیاری ب سه‌ر سه‌ركه‌فتیێن ئێكێ و دووێ و سیێ یێن په‌یمانگه‌هێ دا هاتنه دابه‌شكرن.
ئه‌ڤرۆ نيوز:
چار ئه‌ندامێن ئێك خێزان كو زه‌لام و دو هه‌ڤژينێن وى و كچه‌ك بوون، ل قه‌زا خه‌بات “كه‌له‌ك” يا نێزيك هه‌ولێر د ناڤ مالا خوه دا گيانێ خوه ژ ده‌ست دان.
عه‌بدولجه‌بار مسته‌فا، رێڤه‌به‌رێ ئاسايشا خه‌بات د داخۆيانيه‌كێ دا بۆ رووداو گۆت: “ده‌مژمێر 12:30 ده‌قيقه‌ى شه‌ڤا 6ى كانوونا ئێكێ 2016 ل قه‌زا خه‌بات، ژ ئه‌گه‌رێ دوكێلا ماتۆڕێ كاره‌بێ، چار كه‌سێن ئه‌ندامێن ئێك خێزان گيانێ خوه ژ ده‌ست دان”.
رێڤه‌به‌رێ ئاسايشا خه‌بات گۆتژى: “ئه‌و ل مال هه‌ش كه‌س بوون، چار زارۆيێن دژى ژ ئه‌گه‌رێ دوكێلێ ره‌وشا ساخله‌ميا وان يا خرابه و ره‌وانه‌ى نه‌خۆشخانێ هاتينه كرن”.
ل دووڤ گۆتنا رێڤه‌به‌رێ ئاسايشا خه‌بات، ب شه‌ڤ كاره‌با نشتيمانى نه‌بوويه و مواليده ژى نه‌بوويه، ئه‌وان ژى ل به‌يتۆتا مالا خوه، ماتۆڕێ كاره‌بێ پێكريه و پاشان ژ ئه‌گه‌رێ راوه‌ستيانا دوكێله‌كا زۆر ل مال، چار كه‌سان گيانێ خوه ژ ده‌ست دايه.
عه‌بدولجه‌بار مسته‌فا ده‌رباره‌ى ژيێ ئه‌و كه‌سێن گيانێ خوه ژ ده‌ست داين گۆت: “زه‌لام 36 سال و هه‌ڤژينێن وى 34 و 22 سالن و كچا وى ژى 12 ساله”.
نيشاندان