ئه‌ڤرۆ نيوز:
شالاو عه‌لى عه‌سكه‌رى ئه‌ندامێ سه‌ركردايه‌تيا ئێكه‌تيێ وه‌كو په‌يڤدارێ ناڤه‌ندا بريارا ئێكه‌تيێ هاته دياركرن.
ل رۆژا 1 ئيلونێ جێگرێن سكرتێرێن گشتى يێن ئێكه‌تيێ دروستكرنا ناڤه‌ندا بريارێ ل ناڤ ئێكه‌تى نيشتمانى كوردستان راگه‌هاند و د هه‌مبه‌ردا بالێ هيرۆ ئيبراهيم كو خوه ب پرانيا مه‌كته‌با سياسى يا ئێكه‌تيێ دده‌نه نياسين ب ده‌ركرنا به‌ياننامه‌كێ شه‌رعيبوونا وێ ناڤه‌ندێ ره‌تكر.
ئه‌ڤرۆ نيوز:
سه‌رۆك بارزانى ئه‌ڤرۆ سه‌رپه‌شتيا كومبوونه‌كا سه‌ربازى و سياسى يا سێ قولى د ناڤبه‌را هه‌ولێر، به‌غدا، واشنتون كر و ل سه‌ر كۆنترۆلكرنا مووسل رێككه‌فتن.
ئه‌ڤرۆ مه‌سعود بارزانى سه‌رۆكێ هه‌رێما كوردستانێ سه‌رپه‌رشتيا كومبوونه‌كا هه‌ڤپشك يا سه‌ربازى و سياسى يا ناڤبه‌را هه‌رێما كوردستانێ و ئه‌مريكا و عيراقێ كر.
ئەڤرۆ نیوز،زنار تۆڤی:
ئەڤرۆ رۆژا دوشەمبی 19.9.2016 و لدەمژمێر 4 سپێدێ تۆپخانەیا سۆپایێ تورکی ب دژواری دەوروبەرێن گوندێ کێستە ل بەرواری بالا تۆپ بارانکر و ڤێ تۆپ بارانێ بۆ ماوێ 7 دەمژمێران ڤەکێشا
کۆڤان ئەحمەد وەلاتیەکێ گوندێ کێستەیە بۆ ئەڤرۆ نیوز دبێژیت:ئەڤرۆ ل دەمژمێر 4 سپێدێ تۆپ خانەیا سۆپایێ تورکی ب دژواری گوندێ کێستە ل بەرواری بالا تۆپ بارانکر و ڤێ تۆپ بارانێ بۆ ماوێ پتری 7 دەمژمێران ڤەکێشا و چەندین پرچک و سەچمێن تۆپان ل نێزیکی گوندی کەفتینە و گۆت ژی:ئاگرەکێ مەزن بەربوویە پیش و پەلەخی و پتری 500 دۆنەمێن ئەردێ دارستانێ ھاتینە سوتن و ب ھزاران دارێن کەزانێ و گھیشک و باھیڤ و چەندین جۆرێن دی یێن دارێن بەری و مازی ھاتینە سوتن و نوکە ژی ئاگر یێ بەرەف گوندی ڤە دھێت و گەلەک زیان دێ گەھیتە خەلکێ گوندی و ھەروەسا گەلەک ترس لدەف خەلکێ گوندی پەیدابوویە،چونکی تۆپ ل نێزیکی گوندی داینە.
ئەڤرۆ نیوز:
ئەندامەکێ پەرلەمانێ کوردستانێ ژ فراکسیۆنا پارتی دیموکراتی کوردستان رەخنە ل ھندەک بەرپرس و پەرلەمانتارێن ئێکەتی نیشتمانی کوردستان گرتن و خویاکر، داخویانیێن وان ل دۆر پرسا پەترۆلا ھەرێما کوردستانێ ب تنێ بۆ راکێشانا سۆزا وەلاتیانە و پێدڤی بوو بەری ئالا تالەبانی داتایێن پەترۆلا ھەرێمێ بەلاڤ بکەت، تەلەفۆنەک بۆ قوباد تالەبانی کربا ھەتاکو بزانیت چەند پەترۆل ھاتیە فرۆتن.
د. فەرسەت سوفی ئەندامێ پەرلەمانێ کوردستانێ ژ فراکسیۆنا پارتی دیموکراتی کوردستان بۆ مالپەرێ فەرمیێ پارتی گۆت” پێدڤیە پەرلەمانتار و سیاسەتمەدار ب شێوەکێ بەرپرسیارانە باخڤن و ھەر بۆ جادێ و لڤینا سوزا خەلکی نەئاخڤن، رێژە و چاوانیا فرۆشتنا پەترۆلێ کو وان بەرێزان بەحس لێکری، گەلەک د نەبەرپرسیارانەنە، دێ بێژی وان ئاگەە ژ رەوشا کوردستانێ و بارێ خەلکی نینە، ئەو تنێ بۆ دووبەرەکیێ یە، ل دۆر رێژە و چاوانیا فرۆشتنا پەترۆلێ، دچەند رۆژێن بھێت دا، سەرۆکاتیا جڤاتا وەزیرێن ھەرێما کوردستانێ دێ ل گەل لایەنێن سیاسی ل ھەرێما کوردستانێ کۆمبیت، بلا کەرەم بکەن بچن وان ھژمار و داتایێن خوە ببەن ل وێرێ و ب بەرھەڤبوونا سەرۆک وەزیران و جێگرێ سەرۆک وەزیران و ھەموو وەزیران ئاخڤتنێن خوە بکەن”.
ئالا تالەبانی سەرۆکا فراکسیۆنا ئێکەتی نیشتمانی کوردستان ل جڤاتا نوونەرێن عیراقێ ددیارەکا تەلەڤزیۆنی دا راگەھاندبوو کو ل دووڤ داتایێن وەزارەتا پەترۆلا عیراقێ، ل ھەیڤا بۆری ھەرێما کوردستانێ رۆژانە 661 ھزار بەرمیلێن پەترۆلێ یێن ھنارتینە بازارێن جیھانێ، ئەڤە ددەمەکی دا و ل دووڤ داتایێن وەزارەتا سامانێن سروشتی ل ھەرێما کوردستانێ ریژا پەترۆلا ھاتیە ھنارتن بۆ دەرڤە ژ وێ ھژمارێ کێمترە.
د. فەرسەت سوفی، ل دۆر ڤێ پرسێ دبێژیت” ھەکە شیان بسەلمینن ھژمار و داتایێن وان ددروستن و حوکمەتێ راستی نەگۆتیە، بلا ب مەردانە ھەلویستی وەرگرن، بەلێ ھەکە حوکمەتێ باوەری بۆ وان دروستکر ل دۆر داتایێن خوە، ئێدی چو تشت نامینیت کو د دەزگەھێن راگەھاندنێ دا باخڤن، ئەڤە حوکمەت دەرگەە ڤەکرن، ھەکە نەچن ب راشکاوانە ئاخڤتنێن خوە بێژن، یان ژی بەرھەڤی کۆمبوونێ نەبن، حەق نینە ئێدی خەلک گوە لێ بگریت”.
گۆت ژی” پێدڤی بوو برادەرێن ئێکەتیێ پرسیارێ ژ قوباد تالەبانی کو کەسەکێ بەرێزە و ب شێوەکێ دەزگەھی کاردکەت، حەق ئەوە بچن پرسیارێن خوە ژ وی بکەن، زەحمەتەک بربا و تەلەفۆنەک بۆ جێگرێ سەرۆکێ حوکمەتا ھەرێما کوردستانێ کربا و گوتبایێ ئەو 410 ھزار بەرمیلێن بەلاڤکرین ئیشکال ل سەر ھەیە، ئایا 661 ھزارن، یان 410 ھزارن، ب راستی ژی ل دەڤ من جھێ حێبەتیێ یە ئەو داخۆیانی و رەفتارێن نەبەرپرسانە یا ھندەک کەسان، ژبلی لڤینا سوزا خەلکی و بەرژەوەندیا سیاسی چو دی نینە، حوکمەت یا ھاتیە سەر خەتێ، بلا لایەنێن سیاسی بچن ل وێرێ ئاخڤتنێن خوە بێژن، خەلک یێ ژ وان داخۆیانیان وەستیای، بلا بچن ئاخڤتنێن خوە ل بەرامبەری حوکمەتێ بکەن”.
ھەر ل دۆر ڤی بابەتی و ل دووڤ باسنیۆز، بەھرۆز جەعفەر چاڤدێرێ سیاسی و ئێک ژ رێکخەرێن خوەنیشادانێن 17 شوباتێ د بەرپەرێ خوە ل سەر تۆرا جڤاکی یا فیسبووکێ نڤیسی یە” 23% ژ داھاتێ پەترۆلا کەرکووکێ دچیتە سەر حیسابا کەسی یا پارێزگارێ کەرکووکێ و نەجمەدین کەریم پارێزگارێ کەرکووکێ ب دەھان کەسێن دەوروبەرێ خوە یێن کرینە ملیۆنێر و ھەموو لڤینەکا رەوشەنبیری و رۆژنامەڤانی ل کەرکووکێ یا ھاتیە ژناڤبرن”.
ئەڤرۆ نیوز:
ماریا زاخاروڤا پەیڤدارا وەزارەتا دەرڤە یا روسیا دوھی د پرێس کۆنفرانسەکێ دا ل موسکو دیار کر کو ھێرشا دوھی یا ل دژی سەربازێن سووریێ کو د ئەنجاما وێ دا گەلەک سەرباز ھاتنە کوشتن بۆ مە جارەکا دی سەلماند کو ئەمریکا پشتەڤانیێ ل داعشێ دکەت و ھەر ئەمریکایە کو ناھێلیت داعش ژناڤ بچیت و گۆت: (لەشکرێ سووریێ ھێزەکا سەرەکی یە کو ل سووریێ شەرێ تیرۆرستان دکەت، لێ ئەمریکا ل ژێر ناڤێ شەرێ تیرۆرێ ھێرشی وان ھێزان دکەت کو شەرێ تیرۆرستان دکەن و کوشتنا سەربازێن سووریێ ژی نیشا ددەت کو ئەمریکا نەڤێت داعشێ ژناڤ بچیت و چو راستی بۆ ھندێ نینن کو دبێژن ئەمریکا شەرێ تیرۆرستان دکەت، بەلکو ئەمریکا پشتەڤانیێ ل داعشێ و جەبھەت ئەلنوسرا و گرۆپێن دی ل سووریێ دکەت و ناھێلیت ئەو گرۆپێن تیرۆرستی ژناڤ بچن).
ماریا زاخاروڤا ئەو یەک ژی دیار کر کو ھەتا نھا گەلەک کۆمبوون د ناڤبەرا مە و ئەمریکا دا سەبارەت ب شەرێ تیرۆرێ ھاتنە ساز کرن، لێ مخابن چو ھەلویستەکی ئاشکرا یێ ئەمریکا بۆ شەرێ ل دژی تیرۆرێ نینە، چونکو دەمێ مە ھێرشی داعشێ و گرۆپێن دی یێن تیرۆرستی ل سووریێ کری ئەمریکا ب جھێ کو پشتەڤانیا مە بکەت ب ھەموو رەنگەکێ دژبەریا مە دکر و ئەو یەک ژی نیەتا راست یا ئەمریکا بۆ جیھانێ دیار دکەت.
ل ئالیێ دی بەرپرسەکێ وەزارەتا دەرڤە یا ئەمریکا راگەھاند کو فرۆکێن وان ب شاشی ل دێرەزورێ بنگەھەکێ سەربازی یێن رژێما سووریێ بۆمبەباران کرینە کو د ئەنجام دا گەلەک سەرباز ھاتینە کوشتن و بریندار کرن، لێ ئەو روودان شاشی بوویە و ھێزێن مە ب چو رەنگەکێ ناخوازن کو ھێرشی ھێزێن سەربازی یێن سووریێ بکەن.
سەبارەت ب ھێرشا ل دێرەزورێ رێکخراوا چاڤدێریا مافێ مرۆڤی یا سووریێ ژی راگەھاند کو د ئەنجانا ھێرشێن فرۆکێن ئەمریکی بۆ سەر بنگەھەکێ سەربازی یێ رژێما سووریێ ٦٢ سەربازێن سووریێ ھاتنە کوشتن و گەلەک سەرباز ژی بریندار بووینە.
ئەڤرۆ نيوز:
د کۆمبوونا نەتەوێن یەکگرتی دا رەوشا کوردێن باکور و کریارێن دەولەتا تورکیا ل ھەمبەر کوردان و ئۆپۆزسیۆنێ ب دژواری ھاتنە رەخنە کرن و ھاتە ئاشکرا کرن کو تورکیا ل باژێرێن کوردان یاسایێن نێڤدەولەتی بنپێ کریە و سڤیلان دکوژیت و باژێران وێران دکەت.
ئۆزتورک تورکدۆگان سەرۆکێ گشتی یێ کۆمەلا مافێن مرۆڤان ل تورکیا د داخۆیانیەکی دا بۆ ئاژانسا DIHA راگەھاند کو جارا یەکێیە د ئاستەکی بلند دا دەولەت و حوکمەتا تورکیا ژ بەر کریارێن خوە یێن ل دژی کوردان ب دژواری دھێتە رەخنەکرن و گۆت: (د کۆمبوونا خوە یا ٣٣ یا کۆنسەیا مافێ مرۆڤان یا سەر ب نەتەوێن یەکگرتی دا ب ئاشکرا تاوانێن دەولەتا تورکیا ل دژی کوردان ھاتە رۆژەڤێ و ب بەلگەیان بنپێ کرنێن دەولەتا تورکیا ھاتنە ئاشکرا کرن و کریارێن دەولەتا تورکیا راستی رەخنەیێن دژوار ھاتن و ھەروەسا پرسگرێکا کوردی ل تورکیا جارا یەکێ د ئاستەکی وەسا بلند دا دبیتە رۆژەڤا نەتەوێن یەکگرتی و ئەو یەک بنگەھەکا ب ھێز بۆ چارەکرنا پرسگرێکا کوردی ژی دروست دکەت).
ئۆزتورک تورکدۆگان ھەروەسا ئاشکرا ژی کر کو نەتەوێن یەکگرتی بریارا ئاڤاکرنا کۆمیسیۆنێن ڤەکۆلینێ ژی دروست کریە دا کو ل باژێرێن باکورێ کوردستانێ ڤەکۆلینان ئەنجام بدەن و گۆت: (د کۆمبوونا کۆنسەیا مافێن مرۆڤی یا نەتەوێن یەکگرتی دا ب ئاشکرا ھاتە دیتن کو دەولەت و حوکمەتا تورکیا باوەریا خوە د ئاستێ نێڤدەولەتی دا ژ دەست داینە و راپۆرتێن دەولەتا تورکیا ب گۆمان دھێنە پێشوازیکرن و د کۆمبوونێ دا کوشتنا وەلاتیێن سڤیل ل جزیرا بۆتان، نسێبین، شەرنەخ، گەڤەر و سورێ و رووخاندنا ڤان باژێرکان ژ ئالیێ سەرباز و پۆلیسێن تورکیا ڤە ب دژواری ھاتنە رەخنەکرن و شەرمەزارکرن).
ل ئالیێ دی محەمەد فەردەن چارکیچ نوونەرێ دایمی یێ تورکیا یێ ل نەتەوێن یەکگرتی د رۆژا سیێ یا کۆمبوونا کۆنسەیا مافێن مرۆڤ دا رەخنە ل نەتەوێن یەکگرتی کر کو د راپۆرتا خوە دا بەحسێ پەکەکێ نەکریە و گۆت: (پەکەکە رێکخستنەکا تیرۆرستە و ئەو رێکخستن ژ کوشتن و رووخاندنا بەرپرسیارە و رەخنە ل نەتەوێن یەکگرتی دکەم کو پەکەکە وەک رێکخستنەکا تیرۆرست ب ناڤ نەکریە و دڤێت ئەو سازیا بلند یا جیھانێ کریارێن رێکخستنا تیرۆرست شەرمزار بکەت و تورکیا مافێن مرۆڤی بنپێ نەکریە و راپۆرت و بەلگەیێن کو ھاتنە ئامادە کرن ژ راستیێ دوورن).
ل سەر ئاخڤتنا نوونەرێ دایمی یێ تورکیا ل نەتەوێن یەکگرتی ژی ئۆزتورک تورکدۆگان سەرۆکێ گشتی یێ کۆمەلا مافێن مرۆڤی ل تورکیا راگەھاند کو نوونەرێ دایمی یێ تورکیا ژی باش دزانیت کە پەکەکە نە د ناڤ لیستا رێکخستنێن تیرۆرست یا نەتەوێن یەکگرتی دایە و مەرەما نوونەرێ تورک ئەو بوو کو گەنگەشەیان و بەلگەیێن ل بەر دەست یێن کو تاوانێن تورکیا دسەلمینن، ڤالا دەربخینیت لێ نەگەھشتە ڤێ مەرەما خوە و تورکیا ب دژواری ھاتە رەخنە کرن و ژ بەر وێران کرنا باژێرێن کوردان و گرتن، ئەشکەنجەدان، کوشتن و بەرزەکرنا وەلاتیێن کورد تورکیا ھاتە تۆمەتبار کرن).
ئه‌ڤرۆ نيوز:
ل رۆژئاڤایێ کوردستانێ بەرھەڤی بۆ ئاڤاکرنا پەلەمانی دھێنە کرن و د ھەمان دەمی دا دھێتە چاڤەرێکرن کو د جۆتمەھا ئەڤسالە دا فیدراسیۆنا رۆژئاڤا و باکورێ سووریێ بھێتە راگەھاندن و ل دووڤ ئاخڤتێن بەرپرسێن رێڤەبەریا خوەسەر یا رۆژئاڤا روسیا و ئەمریکا ژی ب گەرمی نێزیکی سیستەمێ فیدراسیۆنێ ل سووریێ دبن.
د کۆنگرەکا رۆژنامەڤانی دا ھەدیە یوسف ھەڤسەرۆکا فیدراسیۆنا رۆژئاڤا و باکورێ سووریێ راگەھاند کو وان بەرھەڤیێن خوە بۆ ئاڤاکرنا پەرلەمانی و سیستەمێ فیدرالی ل رۆژئاڤا و باکورێ سووریێ تەمام کرینە و گۆت: (ھەتا داویا ھەیڤا جۆتمەھێ ئەم دێ ھەم پەرلەمانی و ھەم ژی فیدراسیۆنا رۆژئاڤا و باکورێ سووریێ ب فەرمی راگەھینین و ھەموو کار و ئامادەکاریێن مە گەھشتینە قۆناغا داویێ و ل ھەمبەر بجھکرنا سیستەمێ فیدرالی دا چو ئاستەنگ ل پێشیا مە دا نینن).
ھەدیە یوسف ھەڤسەرۆک فیدراسۆنا رۆژئاڤا و باکورێ سووریێ ھەروەسا راگەھاند ژی کو چ ئارمانجەکا وان یا پارچەکرنا سووریێ نینە و ئەو دخوازن ب پشکداریا ھەموو نەتەوە و باوەریان فیدراسیۆنا گەلان ئاڤا بکەن و گۆت: (ئەم دخوازین سیستەمێ فیدراسیۆنێ ل ھەموو سووریێ بھێتە بجھکرن، ژ بەر کو سووریا نوو دشێت ب پشکداریا ھەموو گەلێن جودا و باوەریان ژ نوو ڤە زندی ببیت و ئێدی ل سووریێ ل سەر بنگەھێ نەتەوی و ئۆلی چو دەولەتەک نەشێت دەستھەلاتا خوە سەر خەلکی بسەپینیت).
ل سەر ھەلویستێن روسیا، ئەمریکا و وەلاتێن جیھانی و ھەرێمی ژی ناڤھاتی دیار کر روسیا راگەھاندیە کو ئەو پشتەڤانیا سیستەمێ فیدرالی دکەت و د ھەمان دەمی دا ئەمریکا ژی ھەتا نھا دژایەتیا سیستەمێ فیدرالی نەکریە و گۆت: (روسیا ب رێیا وەزارەتا دەرڤە و دبلۆماتکارێن خوە چەندین جاران ئاشکرا کر کو سیستەمێ فیدرالی بو سووریا نوو گەلەک باشترە و ئەمریکا ژی ئەم وەسا باوەر دکەین کو دێ پشتەڤانیا فیدراسیۆنێ ل رۆژئاڤا و سووریێ بکەت، ھەتا نھا ب تنێ تورکیا نەرازیبوونا خوە ل ھەمبەر سیستەمێ فیدرالی نیشا دایە لێ ل دووڤ ھزرا مە چ گرنگیا دژاتیا تورکیا نینە).
د ڤێ مژارێ دا پەیڤدارێ وەزارەتا دەرڤە یا ئیرانێ ژی راگەھاند کو ئەو قەبوول ناکەن سووریێ بھێتە پارچەکرن لێ د ھەمان دەمی دا دژبەریا سیستەمێ فیدراسیۆنێ ژی نەکر و ئاشکرا کر کو ئەو پشتەڤانیا رژێما ئەسەدی دکەن و ھەتا ب تەمامی رێکخستنێن تیرۆرست نەھێنە پاقژکرن نابیت بەحس ل ئاڤاکرنا سیستەمەکا دی ل سووریێ بھێتە کرن.
ئه‌ڤرۆ نيوز:
بڕياره د كۆمبوونا باراك ئۆباما سه‌رۆكێ ئه‌مريكا و حه‌يده‌ر عه‌بادى سه‌رۆك وه‌زيرێن عيراقێ دا، نوونه‌رێ مه‌سعود بارزانى سه‌رۆكێ هه‌رێما كوردستانێ ئاماده‌ى كۆمبوونێ ببيت.
بۆ پشكداريكرنا د روونشتنا 71 ساليا نه‌ته‌وێن ئێكگرتى دا، ئه‌ڤرۆ 18ى ئيلۆنا 2016ێ حه‌يده‌ر عه‌بادى ب سه‌رۆكاتيا شانده‌كى به‌ر ب وه‌لاتێ ئه‌مريكا ڤه چوو و هه‌ر ئێك ژ هشيار زێبارى وه‌زيرێ دارايێ عيراقێ و فه‌لاح حه‌سه‌ن وه‌زيرێ چاندێ هه‌ڤالينيا وى دكه‌ن و وه‌زيرێ ژ ده‌رڤه يێ عيراقێ ژى كو نوكه ل فه‌نزوێلايه بڕياره بگه‌هيته شاندى.
ب گۆره‌ى به‌رنامێ كارى يێ حوكمه‌تا عيراقێ بۆ ده‌زگه‌هێن راگه‌هاندنێ ره‌وانه‌كرى، ژبلى پشكداريى كرن د كۆمبوونا نه‌ته‌وێن ئێكگرتى دا، بڕياره حه‌يده‌ر عه‌بادى ل گه‌ل چه‌ندين سه‌ركردێن جيهانێ كۆم ببيت و ژ وان ژى باراك ئۆباما سه‌رۆكێ ئه‌مريكا.
ب گۆره‌ى چه‌ند پێزانينه‌كان ژى كو K24 ب ده‌ست خوه ئێخستينه، د روونشتنا حه‌يده‌ر عه‌بادى و باراك ئۆباماى دا، فوئاد حسێن وه‌كو سه‌رۆكێ ديوانا سه‌رۆكاتيا هه‌رێمێ وه‌كو نوونه‌رێ مه‌سعود بارزانى سه‌رۆكێ هه‌رێما كوردستانێ پشكدار بيت.
د كۆمبوونێ ژى دا بڕياره دانوستاندن ل سه‌ر رزگاركرنا باژێرێ مووسل و قوناغا ب رێڤه‌به‌رنا مووسل پشتى رزگاركرنێ بهێنه گه‌نگه‌شه‌كرن و فوئاد حسێن ژى دێ به‌حسا چاوانيا پشكداريكرنا پێشمه‌رگه‌ى د شه‌رێ رزگاركرنا مووسل دا كه‌ت.
ئه‌ڤرۆ نيوز:
په‌قينه‌ك ل ئسپانيا روودا و ژ ئه‌گه‌رێ وێ چه‌ندێ كه‌سه‌كى گيانێ خوه ژ ده‌ست و هه‌شت كه‌س ژى بريندار بوون و برينا دويان يا دژواره.
په‌قين ل ئاڤاهيه‌كێ ناڤه‌راستا باژێرێ پرێميا دى مار روودا و زيانه‌كا مه‌زن ب ئاڤاهى كه‌فت.
تيمێن هه‌وارهاتنێ و پۆليس و ده‌زگه‌هێن ئه‌منى گه‌هشتنه جهێ روودانێ و ڤه‌كۆلين د ئه‌گه‌رێن په‌قينێ دا ده‌سپێكرينه، به‌لێ هه‌تا نوكه ئه‌گه‌رێن په‌قينێ و جۆرێ ئه‌و بۆمبا ته‌قين پێ ئه‌نجام داى نه‌هاتيه زانين.
ئه‌ڤرۆ نيوز:
بەرپرسێ پشکا راگەھاندنێ ل رێڤەبەریا گشتی یا ساخلەمیا پارێزگەھا دھۆکێ دیار کر کو ل ھەر چار رۆژێن جەژنا قوربانی 698 زارۆک ژ دایک بووینە ژ وانا ژی 379 کچ و 319 کوڕ بووینە و گۆت: “43 کەسان ژ ئەگەرێن جودا جودا گیانێ خوە ژ دەستدایە”.
حەمزە رەزیکی، بەرپرسێ پشکا راگەھاندنێ ل رێڤەبەریا گشتی یا ساخلەمیا پارێزگەھا دھۆکێ دیار کر کو 17 ھزار و 418 نەخۆشان سەرەدانا نەخۆشخانێن دھۆکێ کریە و 274 روودان ژ کەتن و سۆتن و بریندابوونێ و ھنگافتنا ترۆمبێلان ل دھۆکێ پەیدابووینە و 21 روودانێن ترۆمبێلان ل نەخۆشخانێن دھۆکێ ھاتینە تۆمارکرن و 63 کەس تووشی ھنگافتنێ بووینە و ھەشت کەسان ژ ئەگەرێن روودانێن ھاتنوچوونێ گیانێ خوە ژ دەستدایە.
ناڤھاتی خویا کر کو 170 کەسان سەرەدانا نەخۆشخانا سۆتنێ کریە و ب ھاتنا شاندەکێ نۆشدارێن یابانێ شیاینە 30 نشتەرگەریان بکەن و گۆت: “24 جەنازە یێن گەھشتینە نۆشداریا داد بۆ دیارکرنا ئەگەرێن مرنێ و 91 کەسا پەیوەندی ب 122 کریە و ھەشت روودانێن ترۆمبێلا بووینە و پێنج حالەتێن جەلتێ و پێنج زارۆکبوون و دو مرن یێن دیتر جۆرا و جور بووینە”.
ناڤبری ئاماژە دا وێ چەندێ کو ژ بلی روودانان 35 کەسان ژ ئەگەرێ جودا جودا گیانێ خوە ژ دەستداینە کو 11 زارۆک ل نەخۆشخانا ھیڤی مرینە و 11 نەخوەش ل نەخۆشخانا ئازادی یێن دیتر ژی ژ ئەگەرێن جودا جودا بووینە و گۆت: “167 کریارێن نشتەرگەریان یێن ھاتینە کرن بۆ نەخوەشان”.
نيشاندان