ئه‌ڤرۆ نيوز:
ئه‌ڤرۆ ئه‌زموونێن خولا دويێ ژ قووناغا 12 ئاماده‌ى ده‌سپێكرن و وه‌زيرێ په‌روه‌ردێ سه‌ره‌دانا هۆلێن ئه‌زموونان كر و پاشان ژى كۆنگره‌كێ رۆژنامه‌ڤانى ئه‌نجام دا.
د وى كۆنگرێ رۆژنامه‌ڤانى دا، پشتيوان سادق، وه‌زيرێ په‌روه‌ردێ، راگه‌هاند كو هه‌كه نمرێن قوتابى ب دلى نه‌بن دشێت سالا بهێت ژى پشكدارى د ئه‌زموونان دا بكه‌ت خوه هه‌كه هه‌موو ئه‌زموون ئه‌نجام دابن و تێدا سه‌ركه‌فت ژى بيت.
ئاماژه بۆ وێ چه‌ندێ ژى كر كو ئه‌وان بۆ ئه‌زموونان ئاميرێن گه‌له‌ك باش و پێشكه‌فتى ئيناينه كو ناهێلن هێلێن مۆبايل و ئه‌نترنێتێ كار بكه‌ن و كۆمپانيێن ئه‌نترنێتێ ژى ژ ده‌ژمێر 6:00 بۆ 9:00 دێ هێلا ئه‌نترنێتێ بڕن.
ئەڤرۆ نيوز:
لیز تراس وەزیرا دادێ یا بریتانیا د داخۆیانیەکێ دا راگەھاند کو پشتی ھێرشێن تیرۆرستی ل ئورۆپا مەترسیا تیرۆرێ کارتێکرنا خوە ل ھەموو پشکێن ژیانێ یا کری، ژ بەر ھندێ ژی نوکە چەندین پشکێن زیندانان بۆ وان گرتیان ھاتینە تەرخان کرن یێن ب تاوانا کریارا تیرۆرستی یان ژی ھەولدان بۆ شولێن تیرۆرێ ھاتنە گرتن و گۆت: (مە دڤێت ب چو رەنگەکێ ل زیندانێ ھشکباوەر کارتێکرنێ ل زیندایێن دی نەکەن و ژ بەر ھندێ ژی پشکێن تایبەت بۆ وان ھاتینە چێ کرن و پێرابوونێن دژوار ژی دێ ل دژی وان ھێنە وەرگرتن).
وەزیرێ دادێ یا بریتانیا ئەو یەک ژی دیار کر کو ئەزموونێن بەری نیشا ددەن کو زیندان ئێک ژ وان جھان بوویە کو بزاڤێن تیرۆرستی شیاینە ب رێیا ئەندامێن خوە کارتێکرنێ ل کەسێن دی بکەن و ژ بەر ھندێ ئەم داخواز ژ وەلاتێن دی یێن ئورۆپا ژی دکەن کو ئەو کەسێن ھشکباوەر یێن نھا ل زیندانان دانە ژ گرتیێن دی جودا بکەن و گۆت: (خالا دی دڤێت ھندەک کەسێن بسپۆر ل وان زیندانا سەرەدەریێ ل گەل وان ھشکباوەران بکەن دا کو نەھێلن ئەو مەترسیێ دروست بکەن و ھەروەسا مە نەڤێت سەرەدەریەکا خراب ل گەل وان کەسان بھێتە کرن، چونکو دڤێت وەک زیندانیێن دی مافێ وان بھتە پاراستن).
ئه‌ڤرۆ نيوز:
رۆژناما (الشرق الاوسط) یا لەندەنی بەلاڤکریە کو شەش سەربازگەھێن زێرەڤانێن شۆرەشا ئیرانی ل نێزیکی کەرکووکێ یێن ھەین و تەھران بزاڤان دکەت سەربازگەھەکا دی ژی دروست بکەت.
رۆژناما ناڤبری د راپۆرتەکا خوە دا بەلاڤکریە کو ل ڤێ دووماھیێ ھزار و 500 سەربازێن ئیرانی ل وان سەربازگەھێن نێزیکی کەرکووکێ ھاتینە بجھکرن کو ئەو سەربازگەھە دکەڤنە دەڤەرێن مریەم بێگ و قەزا داقۆقێ.
ل دووڤ رۆژناما لەندەنی، نوکە لەشکرێ زێرەڤانێن شۆرەشا ئیرانی مژوولی دروستکرنا سەربازگەھەکا نوویە ل خۆرماتوو و ناحیا ئامرلی و تازە و سلێمان بەگ کو دکەڤیتە د ناڤبەرا کەرکووکێ و مووسلێ دا. دیسا دیارکریە کو دروستکرنا وان سەربازگەھان بۆ کونترۆلکرنا دەڤەرێ یە ھەروەسا رێیا مووسلێ ھەتا دگەھیتە سووریێ.
ئه‌ڤرۆ نيوز:
نوونەرێ کوردێن شەبەک ل جڤاتا پارێزگەھا نەینەوا دیارکر کو ل رۆژا پێنج شەمبی کوردێن شەبەک دێ خوەنیشاندانەکێ ل قەزا بەردەرەشێ ئەنجامدەن و تێدا داخوازکەن کو پێدڤیە تنێ ھێزێن پێشمەرگەی دەڤەرێن وان رزگار بکەن.
غەزوان حامد ئەندامێ جڤاتا پارێزگەھا نەینەوا و نوونەرێ کوردێن شەبەک د جڤاتا ناڤبری دا بۆ مالپەرێ فەرمیێ پارتی دیموکراتی کوردستان گۆت” بریارە رۆژا پێنج شەمبی 25 ڤێ مەھێ کوردێن شەبەک بۆ سێ مەرەمان خوەنیشادانەکێ ل قەزا بەردەرەشێ ئەنجامبدەن، ژوان ژی دەڤەرێن کوردێن شەبەک تنێ ژلایێ ھێزێن پێشمەرگەی ڤە بھێنە رزگارکرن و چو ھێزێن دی پشکدار نەبن، یا دویێ ژی دەشتا نەینەوا ببیتە پارێزگەە و بچیتە ب سەر ھەرێما کوردستانێ ڤە، یا سیێ ژی ل دەمێ رزگارکرنا دەڤەرێن کوردێن شەبەک ژ دەستێ داعشێ، رێکخراوێن نێڤدەولەتی ھاریکاریا وان بکەن”.
غەزوانی گۆت ژی” ڤێ جارێ ھەر ئەم ب خوە دێ خوەنیشادانێ ئەنجامدەین، بەلێ ژ نوکە و پێڤە دێ داخوازکەین پێکھاتێن دی ژی پشکدارببن” خویاکر ژی” ئەم دخوازین سەرۆک بارزانی ب خوە سەرپەرشتیا رزگارکرنا دەڤەرێن مە بکەت”.
ئەڤرۆ نیوز:
ل 9/12/2014 و بەری دو سال و نیڤان رێککەفتن ل سەر وەرگرتنا پۆستێن پارێزگەھا سلێمانیێ و ھەلەبجە و ئیدارێن گەرمیان و راپەرین د ناڤبەرا ئێکەتی نشتیمانی کوردستانێ و بزاڤا گۆڕان کو ھاتبووکرن کو پشتی دو سالان ئالوگوری د وان پۆستان دا دناڤبەرا ھەردو لایەنان دا بھێتە کرن، ل دووڤ چەندین بۆچوونان ئەڤ ئالوگورە نەیا قانوونی یە و سەرۆکێ فراکسیونا خزمەت ژی دیاردکەت کو ئەڤ چەندە د چو برگێن قانوونا جڤاتێن پارێزگەھان دا نەھاتیە.
ئامینا زکری، جێگرا سەرۆکێ فراکسیۆنا پارتی دیموکراتی کوردستان ل پەرلەمانێ کوردستانێ دیارکر کو ل گور قانوونێ پارێزگەر ب دەنگێن ئەندامێن جڤاتا پارێزگەھێ دھێتە ھەلبژاردن و پلەیا وی جێگر وەزیرە و جێگرێ پارێزگەری پلەیا وی رێڤەبەرێ گشتی یە ، جێگر ب دامەزراندن دھێتەدانان، ژلایێ کارگێری ڤە یا گونجای نینە و ھەڤدژی ل گەل قانوونێ ھەیە، ل گور قانوونا جڤاتێن پارێزگەھێن ھەرێمێ یا ھژمار (3) یا سالا 2009 مادێ (18) برگا سێ پارێزگەر ژلایێ جڤاتا پارێزگەھێ ڤە دھێتە ھەلبژارتن و پێدڤیە مەرسوما ھەرێمی بۆ دەربچیت، ھەکە مەرسوم بۆ دەرنەچیت، پارێزگار نەشێت نوونەراتیا پارێزگەھێ و دەست ب کاری بکەت، ل مادێ 20 ێ ل برگا ئێکێ دھەمان قانوونێ دا ھاتیە کو ل دەمێ بەرھەڤ نەبوونا پارێزگاری، جێگر دێ جھێ وی گریت، لێ ھەکە ھات و پۆست چۆل بوو، پێدڤیە ھەمان رێیێن قانوونی بۆ دانانا پارێزگارێ نوو بھێنە دانان، ھەکە پارێزگار دەست ژ کاری بەردەت، جێگر نەشێت جھێ وی بگریت، چونکە چۆل بوون دێ دروست بیت و ژلایێ قانوونی ڤە ئامادەنەبوون ل گەل چۆل بوونێ پێناسە و حوکمێ جودا ھەیە.
خانم ئامینا زکری ئەو ژی گۆت: ھەر چەندە وەکو ئستحقاقێ ھەلبژارتنان مافێ بزاڤا گۆڕانە ئەو پۆست وەرگرتبا، لێ دڤێ قوناغێ دا پرسیار ئەڤەیە ئێکەتی و گۆڕان رێککەفتنەک ئیمزا کریە و ھەتا ئێکبوونا ھەر دو حزبان گەرەکە، ھەکە مەبەست ژ ئالوگوریێ نەبوونا باوەریێ د ناڤبەرا ھەر دو حزبان دا و زێدەکرنا ئالوزیان نەبیت، جوداھی د ناڤبەرا حەسەن کەچەل و کەچەل حەسەنی دا نینە.
ل دووڤ بۆچوونا ڤێ ئەنداما پەرلەمانێ کوردستانێ، رابوونا گۆڕان و ئێکەتیێ ب ڤێ پێنگاڤا نە قانوونی بۆ ئالگوریا پۆستان ل پارێزگەھێن سلێمانیێ و ھەلەبجە بێ بەرچاڤ وەرگرتنا قانوون و رازیبوونا حوکمەتێ، دوور نینە ب ئەنجامدانا ئەڤان گوھۆرینان ڤالاھیێن قانوونی و کارگێری و کێشە و ناکوکیێن سیاسی ئیداری بەر ب ھەلکێشانێ ببەن و پەیوەندیێن حوکمەتێ ل گەل ئیدارا سلێمانیێ و ھەلەبچە دێ نەساخلەم بن و ئەڤ گوھۆرینە دڤێ قوناغا ھەستیار دا دبەرژوەندی و ئارامی یا ئیداری و رەوشا ھەرێمێ دا نابیت.
فەیسەل ئیبراھیم سەرۆکێ فراکسیۆنا خزمەت ل جڤاتا پاێزگەھا سلێمانیێ ئاشکراکریە کو کێشەکا قانوونی ھەیە ھەکە کومبوونا جڤاتا پارێزگەھا سلێمانیێ بھێتە ئەنجام دان، ژ روویێ قانوونی ڤە دکتور ئاسۆ فرەیدون پارێزگارە و جڤاتا پارێزگەھێ دەنگ بۆ دایە و ھەتا نوکە ل سەر کارێ خوە یێ بەردەوامە و ئەڤە ل دووڤ مەرسوومێ سەرۆکاتیا ھەرێما کوردستانێ و رازیبوونا وەزارەتا ناڤخوە وجڤاتا وەزیران.
ل دۆر دانانا کەسەکی ب وەکالەت ناڤبری ئاشکراکر،ل دووڤ قانوونا ھژمار (3) یا جڤاتا پارێزگەھان، دڤێت پارێزگار ئەندامێ جڤاتێ بیت و بەحسێ چو جێگران ب وەکالەت نەکریە.
فەیسەل ئیبراھیم ئەو ژی گۆت: ل وی دەمی رێککەفتنا سیاسی ل سەر پۆستان ھاتیەکرن د ناڤبەرا گوران و ئێکەتیێ د،ا مە وەکو فراکسیۆنا خزمەت دەنگ نەدابوویێ.
ئەڤرۆ نیوز:
شێخ زێدۆ باعەدری چالاکڤانێ سیاسیێ ئێزدی ل ئەڵمانیا و ئەندامێ ئەکادیمیا کادرێن پارتی و بەرپرسێ پەیوەندیێن کوردستانی ل کۆمەلا ھەڤالبەندیا کورد – ئەلمانیا بۆ رۆژناما ئەڤرۆ دیارکر، رەوشا مللەتەکێ مینا ئێزدیان کو دووماھیکا 74 فەرمانان بیت ، ب چو دیدار و گۆتنان نائێتە وەسفکرن، ژبەرکو مەزنیا قەبارێ کارەساتێ و قوربانیدان و کڕین و فرۆشتنا کچ وژنان ل بازارێن رەقە و مووسل و تلەعفەرێ و مەشقکرنا زارۆکێن د سەربازگەھێن چەکدارێن داعشێ دا ھەتا نھا ژی بەردەوامە، ب زۆری گوھۆڕینا ئاینی ل سەر ئێزدیا سەپاندن ئەڤە مەزنترین کارەساتە.
شێخ زێدۆ باعەدری گۆت ژی” ریھسپی و ماقولان ژی خوە بەرزەکرینە ، ژیوار ئەڤەیە دڤێت خوە باش بنیاسین و بووینە لەیستۆکەک د دەستێ ھندەک لایەنێن نە کوردستانی پەرست دا و بتنێ دادپەروەریا بنەماڵا بارزان و کەسایتیا کاریزمایا سەرۆک بارزانی و سەربەخۆبوونا کوردستانێ گرەنتینە ژ بۆ دووبارەنەبوونا کارەسات و ئەنفالان”.
ل دۆر وان دەڤەرێن نەھاتینە رزگارکرن، خوەیاکر” گیرۆبوونا رزگارکرنا دەڤەرێن ئێزدیان یێن ل بن کونترۆلا داعشێ گونەھەکا دیرۆکی یە ، و گەلەگ خراپ و نەباشە ژ بۆ وژدانا مرۆڤایەتیێ بێ ئۆمیدی و ترس و لەرز و خوە ھنداکرن پەیدا دبیت ، دناڤبەرا کوردێن ئێزدی و شەبەک و مەسیحی و کاکەیان دا ، پێدڤیە دەڤەرێن دی زووتر بھێنە رزگارکرن و شنگال ژی ھەر دێ مینیت کەلھا بەرخودانێ و پتر ژ 1400 ساڵان یە بەردەوامە د خۆراگریێ دا و پەکەکە دخوازیت شنگالێ بکەتە قەندیل لێ ئەو خەونە”.
ھێشتا گۆت” ھندەک لایەنێن سیاسی یێن کوردستانێ ، خوە ل ستراتیژیەتا کوردستانیبوونێ نا کەنە خودان ، بەلکو ل دووڤ حەزێن خوە یاریا ب پاشەرۆژا کوردستانێ دکەن”.
سەبارەت جینۆساید ناساندنا کارەساتێ دیارکر، چو کونگرە و مەحفەلێن ناڤنەتەوەی ب ئەرکێ خوە رانەبووینە ژ بۆ جینوساید ناساندنا ئێزدیان، چونکی ئەڤ کارەساتە ب ھەموو پیڤەران جینۆسایدە.
شێخ زێدۆ ئەو چەندە ژی گۆت” خۆزی چیایەک ئاگرین دناڤبەرا مە و عەرەبان دا ھەبا دا جارەکا دی مە و وان ھەڤدو نەدیتبا ، ژبەرکو ئەو ئاگرێ ئەم نھا تێدا ئەو ئەگەرو پلاندانەر بوون ب سەر گەلێ مە دا ئیناین ل شنگالێ”.
ل دوماھیێ گوت ژی” پارێزگەھبوونا شنگالێ و ھاتنا وێ ب سەر ب ھەرێما کوردستانێ ڤە دەرمانە بۆ ئێشێن ئێزدیان و چارەسەریە بۆ ھەموو کێشەیان، چونکی ھەر کوردەکی دلۆڤان و حەز ژێکەر بیت بۆ کوردستانێ ئەو ئێزدی یە”.
نيشاندان