ئه‌ڤرۆ نيوز:

کۆمپانیا وێسترن یونیەن یا ڤەگوھاستنا پارەی بۆ دەرڤەی وەڵاتی، ل دەسپێکا کارێ خوە ل عێراقێ و ل ھەرێمێ کار ب ئوپشنێ دولاری و دیناری دکر کو نڤیسینگەھێن وێ پارێ دولاری ژ خەلکێ نێردەر وەرگرت و ب حەوالەیەکێ د ھنارتە دەرڤەی وەڵاتی بەرامبەری (15) دولاران بۆ ھنارتنا ھزار دولاران وەک عمولا نڤیسنگەھێ، لێ ل رێککەفتی (18/3/2016) ڤێ کۆمپانیێ سیستەمێ خوە گوھارت و کار ل نڤیسینگەھێن کۆمپانیێ ب ئوپشنێ دینارێ عێراقی ب تنێ دھێتەکرن و ل دووڤ ڤی سیستەمێ بھایێ مەزاختنێ کۆمپانی ددانیت، ئەڤ سیستەمە یێ بوویە جھێ دلگرانیا خەڵکی و نێردەر ھزر دکەت نڤیسینگەھێن کۆمپانیێ پارێ عێراقی زێدەتر ژ وان وەردگریت.

وەڵاتیەکێ دھوکێ ب ناڤێ نەوزاد محەمەد بۆ ئەڤرۆ دیار کر، وی قەستا نڤیسنگەھەکا وێسترن یونیەن یا ڤەگوھاستنا پاران بۆ دەرڤەی وەڵاتی کر ب مەرەما ھنارتنا ھزار دۆلاران بۆ برایێ خوە ل وەلاتێ رۆسیا، نڤیسینگەھێ داخوازا پارێ عێراقی ژێ کر بۆ ھنارتنا حەوالەیا وی، لێ یا سەیر ئەو بوو نڤێسنگەھێ گوتێ بەرامبەری ھەر (100) دولاران دێ بۆ مە (134000) ھزار دیناران ئینی، لێ (100) دۆلار ل بورسا دھۆکێ (1280) دیناران بوون، ئانکو (5000) ھزار دینار جوداھیا بھایێ مەزاختنێ دۆلاری بوو دناڤبەرا نڤێسینگەھا وێسترن یونیەن و بۆرسا دھۆکێ، ژ بلی ڤێ چەندێ دڤێت عمولا نڤیسنگەھێ (19500) دیناران بدەم بۆ ھنارتنا حەوالەیا (1000) دولار بۆ روسیا.
ھەروەسا گۆت: فەرمانبەرێ نڤێسنگەھێ گوتە من کۆمپانیا وێسترن یونیەن کونترۆلا بھایێ مەزاختنێ دکەت ل دووڤ سیستەمێ نوو ئەوێ ل سەر مە ھاتیە دانان، چەند نموونە بۆ من گوتن کو ڤەگوھاستنا (100) دولاران بۆ روسیا دێ ب (134000) دیناران بیت و بۆ تورکیا دێ ب (129500) دیناران بیت و ھنارتنا (100) یورویان بۆ ئەلمانیا دێ ب (1485) دیناران بیت و کۆمپانیێ چو پەیوەندی ب بھایێ مەزاختنێ (100) دولاران ل بورسێن ناڤخویێن نینە، ئانکو سیستەمێ نوو ژ (2000 تا 5000) دیناران بۆ ھنارتنا (100) دولاران زێدەتر ژ بھایێ دولاری ل بورسێن نافخویی وەردگریت.
دلێر عومەر عەلی، رێڤەبەریێ بانکا کوردستان لقێ دھوک بۆ ئەڤرۆ دیار کر، وێسترن یونیەن کۆمپانیەکا ئەمریکیە، سیستەمەکێ پێشکەفتیە و ل ھەموو جیھانێ کاردکەت، کۆ د ماوێ 3 ھەتا 5 خۆلەکان دا کوژمێن پاران ژ دەستێ نێردەری دھێتە ڤەگوھاستن بۆ دەستێ وەرگری ل سەرانسەری جیھانێ، ل روژا 18/3/2016 کۆمپانیا وێسترن یونیەن سیستەمەکێ نوو ئێخستە کاری کو ل عێراقێ دڤێت سەرەدەریا خەلکی ل گەل کۆمپانیێ ب دینارێ عێراقی بھێتەکرن، چونکو دەمێ پارە چ دینار یان دولار یان یورو بیت بھێتە ڤەگوھاستن ژ عێراقێ بۆ ھەر وەڵاتەکی ئەو وەڵات ل دووڤ پارێ خوە سەرەدەریێ لێ دکەت، بۆ نموونە ل ئێکەتیا ئەورپا سەرەدەریێ دگەل یوروی دکەت و ل وەڵاتێن ئەمریکی سەرەدەریێ دگەل دولاری دکەت و ھەر وەڵاتەکێ دیتر سەرەدەریێ دگەل پارێ خوە یێ ناڤخویی دکەت.

راگرێ کۆلیژا پەروەردە و بنیات ل زانکۆیا دھۆک دیار کر کو بۆ سالا خواندنێ 2016-2017 دێ خواندن بۆ مامۆستایێن ئێڤاران دخوونن ل کولیژا ناڤبری ژ 600 ھزار دیناران بیتە 500 ھزار دینار و بەرھەڤی ھاتینەکرن بۆ خواندنا بلند ماستەر و دکتورایێ و دەرگەە بۆ ھەلگرێن باوەرنامێن بەکالوریوس ھاتیە ڤەکرن، ئەگەر ل فەرمانگەھەکا حوکمەتێ بیت دێ ل دووڤ چەندین رێنمایێن وەزارەتێ و زانکۆیێ ھێنە وەرگرتن.
پرۆفیسورێ ھاریکار د. ئسماعیل ئەحمەد سمۆ راگرێ کولیژا پەروەردە و بنیات ل زانکۆیا دھۆک بۆ رۆژناما ئەڤرۆ دیار کر، ل رێکەفتی 17/8/2003 بریار ل سەر ڤەکرنا کولیژا پەروەردە و بنیات ل زانکۆیا دھۆک ھاتیە دانان و ھەتا نوکە دو ھزار 827 قوتابی تێدا دەرچووینە، کولیژ پێک ھاتیە ژ حەفت پشکان، ھژمارا قوتابیێن کولیژا پەروەردە و بنیات سپێدێ و ئێڤاران (3600) قوتابی نە، (25%) میلاکێ زانکۆیا دھۆک ژ ڤێ کولیژێ یە و ئەڤە ژ بەر پێدڤیا خەلکێ مە ب ھەبوونا ڤان پشکان ل کولیژا پەروەردە و بنیا.
د. ئسماعیل ئەحمەد سمو ئەو ژی گۆت: پشتی لیژنا پەروەردێ و خواندنا بلند ل پەرلەمانێ کوردستانێ دووڤچوون ل سەر بھایێ خواندنێ ل زانکۆیێن کوردستانێ کری، ئەم ھاتینە ئاگەھدارکرن ژ لایێ سەرۆکێ زانکۆیا دھۆک ڤە کو بۆ سالا خواندنێ 2016- 2017 بھایێ خواندنێ بۆ ھەر قوتابیەکێ ئێڤاران 500 ھزار دینار بیت، چونکو بەری ھینگێ 600 دیناربوون و ئەڤە بھایەکێ رەمەزی یە، ئەڤ کاودانە ل بەرچاڤ ھاتنە وەرگرتن، ئەڤە ژ بەر ئەرکێ پیرۆز یێ ڤان مامۆستایان کو سپێدێ قوتابیان فێر دکەن و ئێڤاران ئەو ب خوە ل زانکۆیێ قوتابی نە، بۆ خێزانێن شەھیدان ژی بێ بەرامبەرە و ھەتا 98 قوتابیان مە ھەنە زارۆیێن شەھیدان و زیندانیێن سیاسی نە و بێ بەرامبەر دخوونن، دیسا سەرکەفتیێ ئێکێ بێ بەرامبەر و یێ دویێ و سیێ ژی رێژەکا کێم ژێ دھێتە وەرگرتن.
ل دۆر مەرجێن وەرگرتنا قوتابیێن ئێڤاران کو مامۆستا دھێنە وەرگرتن ناڤبری گۆت: دەرگەە بۆ مامۆستایان ڤەکریە و ب تنێ دەرچوویێ پەیمانگەھان بیت کو گرێدایی ب پەروەردێ ڤە و مامۆستا بیت و ئەڤە ھاتینە وەرگرتن، ب تنێ پەسەند بیت کو دەرچوویێ پەیمانگەھێ یە و مامۆستایە ل پەروەردێ و چەند مامۆستا ھەبن دێ دەرگەە ھەرێ ڤەکری بیت و دێ پێشوازیێ لێ کەین، لیژنەک بۆ وەرگرتنا قوتابیان ھەیە، لێ پتریا قوتابیێن دھێنە وەرگرتن ل سەر داخوازیا وان بوویە، چونکو ھەکە سەرەدانێ بۆ بکەی دبیت پۆلەکێ (60) قوتابی بن و پۆلەکێ (20) پوتابی و ئەگەر ئەڤە مە کربا پیڤەر دبیت ھەر پولەکێ (40) قوتابی مە وەرگرتبانە، دبینم خواستن پتر بەرچاڤ دھێتە وەرگرتن.
ئەو چەندە ژی دیار کر کو بۆ سالا خواندنێ (2016-2017) ژڤانە دەرچوویێن ئامادەیا بۆ خواندنا ئێڤاران بھێنە وەرگرتن و ھەتا (500) قوتابیان بھێنە وەرگرتن، ئەڤە دەستکەفتیەک بۆ قوتابیێن پولا شەشێ ئامادەیی و کولیژا پەروەردە و بنیات ل دووڤ پلانێ ھەتا (450) قوتابیان ل دەواما سپێدێ وەربگرین، ئانکو (1000) قوتابیان سپێدێ و ئێڤاران دێ ھێنە وەرگرتن، دیسا بۆ ئەڤ سالە خواندنا بلند ژی ل کولیژا پەروەردە و بنیات دێ (19) قوتابیان بۆ ماستەرێ وەرگرین (9) قوتابی دێ ب پارە ھێنە وەرگرتن و (9) بێ پارە و قوتابیێن دەرڤە و ھەلگرێ ناما بەکالوریوس بیت ماف ھەیە پێشکێش بکەت و ئەڤ (9) کورسیکە بۆ خەلکێ دەرڤەنە.
دیسا پشکا (ماتماتیکێ) ژی شەش کورسی ھەنە دو بۆ قوتابیێن دەرڤەنە، قوتابیێن دەرڤە ل چ فەرمانگەھا حوکمەتێ بیت و ب تنێ ھەلگرێ باوەرناما بەکالوریوس ھەبیت ماف ھەیە، ل دووڤ رێنمایێن وەزارەتا خواندنا بلند پیشکێشی خواندنا ماستەری بکەت ل زانکۆیا دھۆک و چاڤەرێی راگەھاندنێ ینە ژ لایێ وەزارەتا خواندنا بلند ڤە و ئەگەر ھاتە راگەھاند دێ زانکۆیا دھۆک ژی راگەھینت، دیسا دەروونیاسی ژی (9) کورسیک بۆ دکتورایێ دێ وەرگرن شەش ناڤخوە و دو ب پارە و ئێک ھاتیە تەرخانکرن بۆ زانکۆیا زاخۆ، (31) کورسی بۆ ماستەرێ و ھەر بۆ (زانستێ دەروونی) ھاتینە دەست نیشانکرن، (10) بێ پارە نە و (14) بۆ رێکێن وانەگۆتنێ و دو کورسی دێ بێ پارە بن و ئەڤە ژی ب ھەمان شێوە ھاتینە بەلاڤکرن.