ئەڤرۆ نيوز:
سەرۆکێ زانکۆیا دھۆکێ راگەھاند کو ب ھەڤکاری ل گەل وەزارەتا زانست و ڤەکولینێن زانستی یا ئەلمانی دێ پەیمانگەھەکا تایبەت بۆ چارەکرنا نەخۆشیێن دەروونی بۆ وان کەسێن تووشی روودانێن دەروونی دبن ھێتە ڤەکرن.
پرۆفیسۆر د. مسلح دھۆکی، سەرۆکێ زانکۆیا دھۆک بۆ ئەڤرۆ گۆت: “د سەرەدانا خوە دا بۆ وەلاتێ ئەلمانیا مە سەرەدانا چەندین زانکۆیێن ئەلمانی کر و ل گەل د. تێرێزا باوەر وەزیرا زانست و ڤەکولینێن زانستی ل وەلاتێ ئەلمانیا کۆم بووین”.
زێدەتر گۆت: “د وێ ھەڤدیتنێ دا، گەنگەشە ل سەر دامەزراندنا پەیمانگەھەکا تایبەت بۆ چارەکرنا نەخۆشیێن دەروونی بۆ وان کەسێن تووشی روودانێن دەروونی دبن ھاتە کرن”.
سەرۆکێ زانکۆیا دھۆکێ دا زانین ژی کو ئەڤ پەیمانگەھە دێ ل زانکۆیا دھۆک و ب پشتەڤانیا وەزارەتا زانست و ڤەکولینێن زانستی یا ئەلمانی ھێتە ڤەکرن و گۆت: “مەرەم ژ ڤێ پەیمانگەھێ بەرھەڤکرنا کەسانێن بسپۆرە د وارێ چارەسەرکرنا نەخۆشیێن دەروونی دا،Psycho therapy کو دێ یا تایبەت بیت ب قوتابیێن خواندنا بلند ڤە”.
د. موسلح دھۆکی نەڤەشارت ژی کو وەزیرا زانست و ڤەکۆلینێن زانستی یا ئەلمانی پشتەڤانیەکا زۆر بۆ ڤی پرۆژەی دەربڕە و بۆ ڤێ مەرەمێ دێ سەرەدانا ھەرێما کوردستانێ کەت و پشتەڤانیا دارای ژی بۆ ڤی پرۆژەی دابین کەت.

ئه‌ڤرۆ نيوز:

وه‌زاره‌تا خواندنا بلند و ڤه‌كولينێن زانستى ل هه‌رێما كوردستانێ دياركر زانكۆيا يورك ل هه‌ولێر يا باوه‌رپێكرى نينه‌، داخوازێ ژ قوتابيان دكه‌ت كو پارێ خوه‌ ل وێ زانكۆيێ ب هه‌روه‌ نه‌به‌ن.

د راگه‌هاندنه‌كێ دا كو دانه‌ك بۆ ئه‌ڤرۆ نيوز ره‌وانه‌كريه‌، وه‌زاره‌تا خواندنا بلند و ڤه‌كولينێن زانستى راگه‌هاند: زانكۆيا يورك ل باژێرێ هه‌ولێر شێوازێ خواندنا ئونلاين په‌يره‌و دكه‌ت، به‌لێ خواندن ل وێ زانكۆيێ يا باوه‌رپێكرى نينه‌ و چو په‌يوه‌ندى ب وه‌زاره‌تا خواندنا بلند و ڤه‌كولينێن زانستى ڤه‌ نينه‌.

هه‌ر د وێ راگه‌هاندنێ دا هاتيه‌: ماوه‌كه‌ ل باژێرێ هه‌ولێرێ زانكۆيه‌ك ب ناڤێ يورك باره‌گايێ خوه‌ ڤه‌كريه‌، ژ به‌ر هندێ ئاگه‌هداريا خه‌لكێ كوردستانێ و قوتابيان دكه‌ن كو ئه‌وێ زانكۆيێ چو په‌يوه‌ندى ب وه‌زاره‌تا خواندنا بلند و ڤه‌كولينێن زانستى ڤه‌ نينه‌ و يا بێ مۆله‌ت و يا باوه‌رپێكرى نينه‌.

خواندنا بلند دبێژيت: “شێوازێ خواندنا ئۆنلاين ل هه‌رێما كوردستانێ و عيراقێ يێ باوه‌رپێكرى نينه‌، ژ به‌ر هندێ ئه‌ڤێ زانكۆيێ ژى بۆ خواندنێ پشت ب سيسته‌مێ ئۆنلاين به‌ستيه‌، د هه‌مان ده‌م دا دوور ژ رێنما و رێكارێن قانوونى يێن ڤه‌كرنا زانكۆيانه‌ ل هه‌رێما كوردستانێ كو ب قانوون ل په‌رله‌مانێ كوردستانێ هاتيه‌ رێكخستن و ژ لايێ وه‌زاره‌تێ ڤه‌ سه‌رپه‌رشتى هاتيه‌ كرن، ژ به‌ر هندێ هه‌ڤدژى قانوون و رێنمايانه‌.

داخواز ژ قوتابيان كريه‌ كو ب چو ره‌نگه‌كى داخوازيێ پێشكێشى ئه‌ڤێ زانكۆيێ نه‌كه‌ن و پارێ خوه‌ ب هه‌روه‌ نه‌ده‌ن، چونكو باوه‌رناما وێ زانكۆيێ ل هه‌رێما كوردستانێ يا باوه‌رپێكرى نينه‌.

ئەڤرۆ:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند ب گۆرەی نەخشەیێن کەشناسی ھەتا دووماھیا ڤێ حەفتیێ پلێن گەرمێ دێ بلند بن.
د راگەھاندنەکێ دا کو وێنەک بۆ ئەڤرۆ رەوانەکریە، رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو ب گۆرەی نەخشەیێن کەشناسی ئەو پارستە ھەوایێ کارکریە سەر ھەرێما کوردستانێ دێ بیتە ئەگەرێ بلندبوونا پلێن گەرمێ و پێشبینی دھێتە کرن ئەڤ فشارە ل رۆژێن چارشەمبی و پێنجشەمبی ب بەرچاڤی ئاشکەرا ببیت.
ھەر د وێ راگەھاندنێ دا ھاتیە ژی: پێشبینی دھێتە کرن ل باشوورێ رۆژھەلاتا ھەرێما کوردستانێ وەکو دەڤەرێن “خانەقین، مەندەلی، کفری، کەلار، مەیدان و مەخمور” دێ بلندترین پلێن گەرمێ ھێنە تۆمارکرن، رەنگە بگەھیتە 50 پلان.
رێڤەبەریا گشتیا کەشناسی و بیڤەلەرزێ ل عیراقێ ژی راگەھاندیە کو ل دووماھیا ڤێ حەفتیێ پلێن گەرمێ دێ گەلەک بلند بن و ل رۆژێن چارشەمبی و پێنجەمبی ل ناڤەراستا عیراقێ گەھنە 50 پلان و ل دەڤەرێن باشووری ژی دێ ژ ڤێ پلێ بۆریت.

ئەڤرۆ نیوز :
وەزارەتا خواندنا بلند و ڤەکولینێن زانستی شەش مەرج بۆ ڤەگوھاستنا قوتابیان ل زانکۆ و پەیمانگەھا ئاشکەرا دکەت و رادگەھینیت کو ئەو قوتابیێن ئەڤ شەش مەرجە نەگرن، دشێن ب رێیا سیستەمێ پارالێل درێژاھیێ بدەنە خواندنا خوە.
ب گۆرەی راگەھاندنەکا وەزارەتا خواندنا بلند و ڤەکۆلینێن زانستی کو دانەک ب دەست ئەڤرۆ کەفتیە تێدا ئاماژە ب وێ چەندێ کریە کو قوتابیێن زانکۆ و پەیمانگەھان دشێن ژ ھەر ژ نوکە داخوازیێن خوە یێن ڤەگوھاستنێ بۆ ڤەگوھاستنێ ژ زانکۆ و پەیمانگەھان پێش کێش بکەن.
ب گۆرەی راگەھاندنا وەزارەتا خواندنا بلند، پێدڤیە کوڕ و کچێن شەھید و ئەنفالکریان بن و د ماوێ سالێن خواندنێ دا ژیانا ھەڤژینیێ ل زانکۆ و پەیمانگەھان پێک ئینابیت.
ھەر دیسا مرنا دایک یان باب د ماوێ سالێن خواندنێ دا ل زانکۆ و پەیمانگەھێ؛ ھەر دیسا ئێک ژ مەرجێن دی یێن ڤێ سیستەمی ئەوە کو قوتابیا ژن ل ماوێ سالێن خواندنا خوە ل ل زانکۆ و پەیمانگەھێ زارۆ ھەبیت.
ھەر د وێ راگەھاندنێ دا تەکست ل سەر نمرا قوتابی ژی ھاتیە کرن کو پێدڤیە ب ئاستێ باش یان سەرتر دەرچوو بیت یان ژی نەخۆشیەکا ماوە درێژ ل دەف ھەبیت.
ل دووماھیێ ژی دایە زانین کو ھەکە قوتابی چو ژ ڤان مەرجان ل دەف نەبن، دشێت ب دانا کۆژمێ 50% یێ پارالێل بۆ قووناغا دویێ و 100% یێ پارالێل ژ قووناغا ئێکێ داخوازا ڤەگوھاستنێ بکەت.

ئەڤرۆ نیوز:
ئەندامەکێ مەکتەبا سیاسی یا ئێکگرتوو یا ئیسلامی یا کوردستانێ بەحسێ جڤینێن ئەمیندارێ گشتیێ حزبا خوە ل گەل ئالیێن سیاسی دکەت، ئاشکرا کر کو بۆچونێن ھەموو پارتان ھاتینە وەرگرتن و ژڤانە نێزیکترین دەم ل گەل سەرۆکێ ھەرێما کوردستانێ کومبونەکێ ئەنجام بدەت.
غازی سەعید ئەندامێ مەکتەبا سیاسی یا ئێکگرتوویا ئیسلامی یا کوردستانێ بۆ رۆژناما ئەڤرۆ گۆت: ئەمیندار گشتی کومبوون ل گەل پتریا ئالیێن سیاسی ل ھەرێما کوردستانێ ئەنجام داینە و بتنێ مایە رۆژێن بھێت کومبونەکێ ل گەل سەرۆکێ ھەرێما کوردستانێ ئەنجام بدەت، ھەولیستێ پارتێن سیاسی دووربوون ھەیە و ھەتا نوکە نە گەھشتینە خالەکا ھەڤپشک و ئەڤ وێ رامانێ ناگەھینت کو پرۆسێسا ئاشبوونێ و نێزیکبوونێ ب دووماھی ھاتیە، چونکە بۆچوونا ھەموو پارتێن باشورێ کوردستانێ رێکخستنا ناف مالا کوردی و نەھێلانا گرفتێن نوکە خواستەکێ ڤێ قوناغێ یە، قۆناغا داھاتی بەرھەڤیێن باشتر بھێنەکرن بۆ ھەر ستراتجیەکا گرنگ کو گرێدایی خواستێن نەتەوەیی ڤە وەک ریفراندووم و ھەتا سەربەخۆیا کوردستانێ و مە باوەری ب ھەموو ئالیێن سیاسی ھەیە کو پێدڤی یە ئەڤ گرفتە نەمینت و ب زووترین دەم چارەسەری بۆ بھێتەکرن.
غازی سەعید ئەو ژی گۆت: خالا ھەڤپشک باوەری یە و بۆچوونا ھەموو ئالیێن سیاسی ئەوە ئەڤ ئالوزی و گرفتە نەمینت، ب باوەریا من خالێن جێواز نە گەلەک مەزن و ب باوەریا من گرێداینە ب پارتان ڤە بۆ نموونە بۆ چوونا پارتی دیموکراتی کوردستان ئەوە، خواستێن نەتەوەیی بێخینە بەری گرفتێن نافخوەی، دیسا بۆچوونا گوران ئەوە دڤێت ناف مالیا کوردی بھێتە رێخستن دا بشێن دووڤ دا کار بکەین بۆ ئەنجامدانا ڤی کاری، دیسا گوران دخوازیت پەرلەمان کومبوونێن خوە گرێدەت و بھێتە کاراکرن و دووڤ دا دانوستاندن و ھەر گورانکاریەک ل سەر بھێتەکرن و پارتی دیموکراتی کوردستان بۆچوونەکا بەرۆڤاژی ئەڤێ بۆچوونێ ھەیە و ئەڤە خالێن ناکوکن و ھەتا نوکە نەگەھشتینە چارەکێ.
ناڤبری ئەو ژی گۆت: نەبتنێ ناکوکی دناڤبەرا گوران و پارتی دا ھەیە، بەلکو بۆچوونێن جێواز دناڤبەرا ئالیێن سیاسی دا ھەنە، وەک ناکوکی پتر دناڤبەرا گوران و پارتی دا ھەنە، پتر دابرن دناڤبەرا ئەڤان ھەر دو ئالیان دا ھەیە.
ھەمان ئەندامێ مەکتەبا سیاسی یا ئێکگرتوو گۆت: ئارمانجا ئێکگرتوو ئەوە پێکڤە رونشتن و گەھشتنا خالەکا ھەڤپشک و پێدڤی یە ھەر دو ئالی ھندەک تەنازلا بکەن ژ ھنەک ھەلویستێن خوە دا بگەھنە ئێک دو.
ھەمان ئەندامێ مەکتەبا سیاسی گۆتژی: ئێکگرتوو پیشەنگە دڤی بابەتێ ئاشتبوونێ دا و دبیت ھندەک ئالیێن دژی ئەڤ خواستێ نێزیکبوونێ ھەبیت، لێ ئەمیندارێ گشتیێ ئێکگرتوو بەرنامێ کومبوونا دانایە و دیسا ب ھەلویستێ وی شەرێ راگەھاندنێ ھاتیە راگرتن و دیسا ھەموو ئالی دیتی نە، بۆچوونێن ھەموو ئالیێن سیاسی ل دەف ئێکگرتوو د زەلالن، قوناغا نوکە دێ پتر ئالی ھێنە داخازکرن و دێ سەردانا سەرۆکێ ھەرێما کوردستانێ ھێتەکرن و دێ بابەت پتر ھێتە گەنگەشەکرن و دیسا کارکرن ل سەر ئەوان بەیان نامێن سەرۆکێ ھەرێما کوردستانێ ل ھەیڤا رەمەزانا پیرۆز دێ ل سەر ھێتەکرن و ئەڤە ژی ببنە رێخوشکرن کو پتر بابەت ل سەر بگریت.
غازی نەڤەشارت و ئەو ژی گۆت: ھەموو ئالی پێ خوەش نین کو کاودانێن کوردستان تێدا دبوریت و تایبەت کاودانێن دارایی، وەک ھەموو ئالی داخاز دکەن کو قەیرانا دارایی و سیستەمێ پاشکەوتنا مووچەی ب دووماھی بھێت و ئەڤە دەرڤەی شیانێن ئالیێن سیاسی و حوکمەتا ھەرێما کورستانێ یە، قەیرانا دارایی یا جیھانی یە و گرێدایە ئالوزیێن گەل بەغدا و ئەڤە خواستا ھەموویانە بھێتە چارەسەرکرن و ئەڤە نە کارێ حزبێن سیاسی یە.
ھەمان ئەندامێ مەکتەبا سیاسی ئەو ژی گۆت: کریارا چاکسازیێ د سیستەمێ ئێکگرتوو دا بەردەوامی ھەیە و ئەگەر ئەڤ الیێن سیاسی نە گەھشتنە چ رێکەفتنا ئێکگرتوو خوە ژ پرۆژێ ئاشبنوونێ و نێزیکبوونێ خوە ناڤەکێشیت و چ جاران نا راوستیت و ئەگەر گوران و پارتی تەنازلێ ژ بۆچوونێن خوە نەکەن و نێزیکی ئێک نەبن، رەنگە ئێکگرتوو ھندەک رێکێن دی بگەریت بۆ چارەسەرکرنا ڤێ قەیرانا و مە باوەری ب خوە ڤەکێشانێ نینە و ب باوەرا مە ئەڤ ناکوکیێن نافخوە کارتێکرن ل سەر ھەموو بابەتان کریە و دیسا نوکە قوناغەکا زێرین داینە و رەنگە بەری سەد سالێن بوری ئەڤ دەرفەتە بۆ مللەتێ مە ناھتبیتە روخساندن و ممکن نینە ئەم ڤێ دەرفەتێ و ئەڤی دەسکەفتێ مەزن ژ دەست بدەین و تایبەت پشتی شەرێ داعش پتر زەلال بیت و ئەڤە ھەموو بھێنە ژ دەست دان بۆ ھندەک ناکوکیێن نافخوە و نە ل وی ئاستی بن ئەڤە ببنە گوری و ئێکگرتوو ناراوستیت ھەتا کاودان بھێنە چارەسەرکرن.