ئه‌ڤرۆ نيوز:
بەرپرسێ رێکخراوا ئێزدیان بۆ بەلگەنامەیان دیار کر کو بریارێن جینۆسایدێ یێن کۆنگرێسێ ئەمریکی و پەرلەمانێ بریتانیا و ھولەندا بۆ ئێزدیان داین، دوھی 17/7/2016 ل ھەولێرێ ڤەکۆلین ل سەر ھاتە کرن و دبێژیت: مەرەم ژێ دانانا میکانزمەکا گونجایە بۆ باشتر ب رێڤەچوونا بادەکا جینۆسایدێ.
حسام عەبدوللا، بەرپرسێ رێکخراوا ئێزدیان بۆ بەلگەنامەیان بۆ رۆژناما ئەڤرۆ ئاشکرا کر، ھژمارەکا ڕاسپاردان ھاتینە کۆمکرن و بۆ حوکمەتا ھەرێما کوردستانێ و دەولەتێن بیانی دێ ھێنە بلندکرن، دا کو رێیێن گونجای بۆ بادەکا جینۆسایدا ئێزدیان بھێنە دیتن و گۆت: “ئەو بریارێن ل پەرلەمانێ بریتانیا و ھولەندا و کۆنگرێسێ ئەمریکا بۆ جینۆسایدا ئێزدیان ھاتینە دان ب درێژی ھاتنە شلۆڤەکرن بۆ وێ چەندێ یا پێدڤی بۆ بادەکا جینۆسایدێ بھێتە کرن”.
حسام عەبدوللای خویا ژی کر، دووماھی پێشھاتێن جینۆسایدێ و ب رێڤەبرنا بادەکا جینۆسایدێ ھاتنە بەحسکرن و گۆت: “مە بەحسێ وێ چەندێ کر، کانێ چ پێدڤیە ل سەر حوکمەت و رێکخراوان ئەنجام بدەن بۆ ب جھئینانا ئەو بڕیارێن ژ کۆنگرێسێ ئەمریکا و پەرلەمانێن وەلاتێن جیھانێ دەردکەڤن ل دۆر جینۆسایدێ”.
حەسو ھورمی، چالاکڤان د وارێ مافێن مرۆڤی دا ئاماژە ب وێ چەندێ کر کو ھەکەر سەرۆک کۆمارێ عیراقێ بریارەکا کۆماری بۆ ئێزدیان بدەت کارەساتا شنگالێ ل دادگەھا لاھای دێ ھێتە ب رێڤەبرن و دێ بیتە جینۆساید و گۆت: “لێ ھیشتا سەرۆک کۆمارێ عیراقێ چو بریارێن کۆماری نەداینە و حوکمەتا عیراقێ ژی چو پێنگاڤ بۆ ب رێڤەبرنا بادەکا جینۆسایدا ئێزدیان نەھاڤێتینە، ھەکەر عیراق ببیتە ئەندام ل دادگەھا لاھای ژی چێنابیت، چونکو ھەکە عیراق ببیتە ئەندام ئەو کارەساتا روودای پشتی 60 رۆژان ژنوو دێ ھێتە قەبوولکرن و وەرگرتن ل دادگەھا لاھای ئەڤ چەندە ژی چ مفای ل ئێزدیان ناکەت”.
ھورمی زێدەتر ژی گۆت: “ھەکەر ناسنامەکا تیرۆرستەکی بھێتە گرتن و دەولەتا ئەو تیرۆرست ژێ ھاتی ئەندام بیت د دادگەھا لاھای دا، ئەو ژی ب مەرجەکی ئەو تیرۆرست خودانێ بریارێ بیت یان ژی ھەکە ئێزدی باوەریێ بۆ ھەر پێنج دەولەتێن جڤاتا ئێمناھیێ چێکەن، کو ئێک ژ وان پێنج دەولەتان بادەکا ئێزدیان وەربگریت بۆ دادگەھا لاھای بھنێریت، وی دەمی بادەکا جینۆسایدێ دێ ھێتە ب رێڤەبرن یان ھەکەر داخوازکەرێ گشتی ب رێڤە ببەت”.

ئەڤرۆ نیوز:
ئەندامەکا جڤاتا نوونەران ئیماژە بڤێ چەندێ دکەت، ئالۆزیێن عێراقێ بەرەف رەوشا خارپترچووینە و تشتێ باش لێ ناھێتە چاڤەڕێکرن ژبلی تێکچوونا رەوشێ، ھەروەسا دیارکر، خۆنیشادانێن مەزنتر لبەرێ دێ ھێنەکرن و زانیاری گەھشتینە مە دێ ھێرشی سەر ئەندامێن پەرلەمانی و مالێن وانا ھێتەکرن.
دکتۆر ئەشواق جاف، ئەنداما فڕاکسیۆنا پارتی ل پەرلەمانێ عێراقێ بۆ رۆژناما ئەڤرۆ گۆت” ئالۆزیێن باژێڕێ بەغدا بووینە ئاستەنگ ھەمبەر کۆمبوونێن جڤاتا نوونەرێن عێراقێ و ئەگەر رەوشا ئەمنیا بەغدا بڤێ شێوەی رێڤەبچیت ئەڤە کۆمبوونێن پەرلەمانی ناھێنەکرن و رێژا قانوونی تمام نابیت، چونکە ھێشتا چەند ئاریشەیەک وەکی خۆ ماینە ژوانا ئاریشە دناڤبەرا پەرلەمانی و حوکمەتێ دا ھەیە، ھەروەسا ئەف دبێژنێ کۆتلا پەرلەمانتارێن مانگرتی نێزیکی سەت پەرلەمانتارانن رژدن لسەر ھەلویستێ خوە بۆ گۆھڕینا دەستەیا سەرۆکایەتیا پەرلەمانی و کۆتلا سەدر یا دگەل خۆنیشاندەرا، رەوش وەسا دخوازیت کۆمبوون نەھێنەکرن، ھەموو پەرلەمانتارێن دەرڤەی بەغداژی ڤەگەڕیاینە مالێن خوە، سەرۆکێن فڕاکسیۆنا ئەندامێن خوە ئاگەھدارکرینە ددەمێ ئالۆزیان ل بەغدا نەمینن ئەڤی باژێڕی بجە پێلن، لەوڕا ئەم ھەموو جارێ چاڤەڕێی رەوشا ئەمنی دکەین بۆ ڤەگەڕیانا پەرلەمانی.
دکتۆر ئەشواقێ گۆتژی” زانیاریێن ھویر گەھشتینە بەردەستێ مە، بڕیارە رۆژا بیستی ڤێ ھەیڤێ خۆنیشاندانەکا مەزن ل باژێڕێ بەغدا بھێتەکرن و گروپەکا چالاکڤان و ھندەک کەسێن نەدیار پڕۆپاگندەیان بۆڤێ ئەڤێ خۆنیشاندانێ دکەن، پێشبینی دھێتەکرن ئەگەر بەرنامێ وانا سەربگریت خۆنیشاندانا ملیۆن بھێتەکرن و ئەف زانیاریێن مە ئیماژەبڤێ چەندێ دکەن، خۆنیشاندان دێ دژی رەوشا نوکەیا عێراقێ و گەندەلیێ بیت، ھەر وەختێ خۆنیشاندانەک وەسا بھێتەکرن، ئەڤە دێ توندوتیژی لێکەڤن و ئەنجامێن خراپ دێ ھەبن، خەلکەک ل توڕێن کۆمەلایەتی بانگەشەیا ڤێ چەندێ کریە خۆنیشاندەر ھێرشی سەر پەرلەمانتاران بکەن و ھەموو تشتەک دھێتە چاڤەڕێکرن راستە دبێژن خۆنیشاندانێن ھێمانە دێ ھێنەکرن، بەلێ 30ی نیسانێ ژی ھەر دگۆتن خۆنیشاندانا ھێمانەیە ھەتا ئەم ب زۆری ھاتینە رزگارکرن، مە باوەری نەمایە ب چو شێوەیەکی ئەف رەوشا نوکە عێراق تێدا دوماھی بھێت و ئاریشە چارەسەرببن، ھەر رۆژێ بەرنامەکە و ھەر رۆژێ ھندەک یێ ئاریشا پەیدا دکەن.

ئه‌ڤرۆ نيوز:

هه‌ر چه‌نده‌ بڕيار بوو ئه‌ڤرۆ نورى مالكى ئه‌ميندارێ گشتيێ حزبا ده‌عوه‌ سه‌ره‌دانا سلێمانيێ بكه‌ت، به‌لێ ب گۆره‌ى ژێده‌ره‌كێ ناڤا ئێكه‌تيێ ئه‌ڤ سه‌ره‌دانه‌ دێ سوبه‌هى هێته‌ ئه‌نجام دان.

كاروان باروه‌يس به‌رپرسێ راگه‌هاندنێ ل مه‌كته‌با سياسى يا ئێكه‌تى نشتيمانى كوردستان راگه‌هاند كو نورى مالكى دێ رۆژا دوشه‌مبى رێكه‌فتى 18ى تيرمه‌ها 2016ێ و ل ده‌مژمێر 3:00ى پشتى نيڤرۆ گه‌هيته‌ فرۆكخانا نێڤده‌وله‌تى يا سلێمانيێ و ژ لايێ ئاسۆ فره‌يدون پارێزگارێ سلێمانيێ ڤه‌ هێته‌ پێشوازيكرن، پاشان ژى ئێكسه‌ر دێ چنه‌ مالا جه‌لال ته‌له‌بانى سكرتێرێ گشتيێ ئێكه‌تيێ.

پشتى ديدارا ل گه‌ل جه‌لال ته‌له‌بانى سكرتێرێ گشتيێ ئێكه‌تيێ، بڕياره‌ ئێكسه‌ر بچيته‌ گرێ زرگه‌ته‌ و ل گه‌ل نه‌وشيروان مسته‌فا، رێكخه‌رێ گشتێ بزاڤا گۆڕان كۆم ببيت و پاشان ژى ژ لايێ مه‌كته‌با سياسى يا ئێكه‌تى نشتيمانى كوردستان ڤه‌ ئێڤاره‌ خوارنه‌ك بۆ هێته‌ دانان.
بڕياره‌ ژى پشتى ئێڤارخوارنێ ژى ل گه‌ل ئه‌ندامێن مه‌كته‌با سياسى يا ئێكه‌تى نشتيمانى كوردستان كۆم ببيت، به‌لێ هێشتا ديار نه‌بوويه‌ كا دێ مالكى ب شه‌ڤ ل سلێمانيێ مينيت يان ژى دێ ڤه‌گه‌ريت.