ئه‌ڤرۆ نيوز:

نێچيرڤان بارزانى، سه‌رۆك وه‌زيرێن هه‌رێما كوردستانێ د كۆنگره‌كێ رۆژنامه‌ڤانى دا، ده‌رباره‌ى سه‌ره‌دانا نورى مالكى بۆ باژێرێ سلێمانيێ راگه‌هاند كو ئه‌و نيه‌تا مالكى نزانن، به‌لێ هه‌كه‌ نيه‌ته‌كا خێرێ هه‌بايه‌، دا سه‌ره‌دانا هه‌ولێر ژى كه‌ت.

نێچيرڤان بارزانى كو هه‌ڤده‌م جێگرێ سه‌رۆكێ پارتى ديموكراتى كوردستانه‌، دا زانين كو سه‌ره‌دانا نورى مالكى سه‌رۆك وه‌زيرێن به‌رێ يێ عيراقێ و سه‌رۆكێ حزبا ده‌عوه‌ يا ئيسلامى ل سه‌ر داخوازيا ئێكه‌تيێ بوويه‌، به‌حس ل وێ چه‌ندێ ژى كر كو هه‌كه‌ سه‌ره‌دانا هه‌ولێر بكه‌ت ئه‌و ژى دێ پێشوازيێ لێ كه‌ن.

ئه‌ڤرۆ نيوز:

ئه‌ندامێ جڤاتا نوونه‌رێن عيراقێ د. جه‌مال كۆچه‌ر د په‌يجێ خوه‌ يێ تۆڕا جڤاكيا فه‌يسبۆكى دا بۆچوونه‌ك ل سه‌ر هاتنا نۆرى مالكى بۆ باژێرێ سلێمانيێ به‌لاڤكريه‌ و ئه‌ڤا ل خوارێ ده‌قێ وێ يه‌:

ئه‌رێ نورى المالكى دێ چكه‌ت بو هه‌رێما كوردستانێ ؟؟
ئه‌رێ ئاریشێن مه‌ و به‌غدا ب هاتنا وى دێ چاره‌سه‌ر بن ؟؟ 

هاتنا نورى المالكى بو باژێرێ سلێمانیێ ل رۆژا دووشه‌مبى رێكه‌فتى 18/7/2016 چه‌ندین پسیار ب دویڤ خودا ئینان و بووچون په‌یداكرن … ب دیتنا من :

1- هاتنا وى بو ده‌ڤه‌را سلێمانیێ بتنێ و روینشتنا وى دگه‌ل لایه‌نێن وێ ده‌ڤه‌رێ بتنێ ، وێ چه‌ندێ رادگه‌هینیت كو شولێ پێ هاتى یێ ل سلێمانیێ بتنێ و دگه‌ل وى لایه‌نى بتنێ … و پێتڤى ناكه‌ت مه‌زن بكه‌ین و به‌حسى هه‌مى هه‌رێمێ بكه‌ین .

2- ئه‌گه‌ر هاتبیت بو سه‌ره‌دانه‌كا لایه‌نه‌كى یان بو په‌یوه‌ندیه‌كا حزبى پێنگاڤه‌كا ئاسایى یه‌ وهه‌ر حزبه‌كێ ماف یێ هه‌ى په‌یوه‌ندیێن خو دگه‌ل هه‌ر لایه‌نه‌كێ عیراقێ خورت بكه‌ت و خوشبكه‌ت .. ب مه‌رجه‌كى زیانێ نه‌ گه‌هیننه‌ به‌رژه‌وه‌ندیێن گشتى یان نه‌ته‌وه‌یى یان ل سه‌ر حسێبا لایه‌نه‌كى دى یێ كوردستانێ بیت .

3- هه‌رلایه‌نه‌كێ بشێت خزمه‌تا گه‌ل و وه‌لاتێ مه‌ بكه‌ت جهێ رێزێ یه‌ ، لێ ب مه‌رجه‌كى لایه‌نێن حكوومى و به‌رپرس پێ د ئاگه‌هداربن .

4- ل دویڤ یاسایێ نوكه‌ مالكى چ پوستێن حكوومى نینن و نه‌شێت هیچ رێككه‌فتنه‌كێ ب ناڤێ حكوومه‌تا عیراقێ دگه‌ل چ ده‌وله‌ت و لایه‌نان بكه‌ت .. و چ لایه‌نا ژى ل هه‌رێما كوردستانێ ماف نینه‌ هیچ رێككه‌فتنه‌كێ ژ پێش حكوومه‌تا هه‌رێمێ یان ب ناڤێ وێ بكه‌ت دگه‌ل لایه‌نه‌ك یان حكوومه‌ته‌كێ ، به‌لكو پێتڤیه‌ ب رێكا حكوومه‌تا هه‌رێمێ بیت .

5- مالكى گه‌له‌ك خالێن هێزێ یێن دده‌ستى دا هه‌ین .. ژوان : حكومرانیه‌كا درێژ یا ل عیراقێ كرى ، و پشته‌ڤانێن زۆر یێن هه‌ین ، و حه‌تا نوكه‌ چه‌ندین پله‌ به‌رز و خودان پوستێن بلند گوهدارێن وینه‌ ، و ب تایبه‌ت ل ده‌زگه‌هێن ئه‌منى و له‌شكه‌رى و دادوه‌رى ، سه‌روكێ مه‌زنترین حزبا شیعى یه‌ ل عیراقێ (حزب الدعوة) ، بهێزترین فراكسیون یا هه‌ى ل په‌رله‌مانێ عیراقێ ، رێڤه‌به‌رێ سیاسى یێ حه‌شدا شه‌عبى یا شیعى یه‌ ، زه‌لامێ ئیرانێ یه‌ ل عیراقێ ، پاره‌كێ زور یێ دده‌ستا دا هه‌ى .. هتد .

6- جهێ داخێ یه‌ هه‌مى خالێن خو یێن هێزێ ب دژى پێكهاتا كوردستانى یێ بكارئیناین و یێ بكاردئینیت :-
– د كونگرێ خو یێ روژنامه‌ڤانى دا ل سلێمانیێ ل باره‌گایێ ئێكه‌تى په‌سنا حه‌شدا شه‌عبى و له‌شكه‌رێ عیراقێ كر و چ به‌حسى پێشمه‌رگه‌ى نه‌كر .
– هه‌ر ئه‌و بوو هه‌ره‌شه‌ ل هه‌رێمێ كرین ئه‌گه‌ر به‌ره‌ڤ سه‌ربه‌خو بونێ بچیت .
– هه‌ر ئه‌و بوو بودجا هه‌رێمێ برى و هێزا دیجله‌ ئینایه‌ سه‌ر سنورێن پارێزگه‌ها كه‌ركوكێ .
– هه‌ر ئه‌وه‌ تاوانبارێ سه‌ره‌كى د كه‌یسا كه‌فتنا میسل و هاتنا داعش دا ، و رێگرێ سه‌ره‌كى یه‌ بو حكوومه‌تا د.حیدرعبادى ، و چه‌ندین ئاریشه‌ و پرسگرێكێن ل عیراقێ چێدبن به‌حسێ وى دگه‌ل دهێته‌ كرن .
– وه‌لائا وى یا بێ توخیب بو ئیرانێ و ده‌وله‌تا (ویلایة الفقیه) ، و نه‌فه‌سا وى یا شیعى یا طائیفى جهێ مه‌ترسیێ یه‌ . و پێتڤیه‌ ب هشیارى و هه‌ستیارى و شه‌فافانه‌ كار دگه‌ل بهێته‌ كرن .

7- به‌رى مالكى د.حیدرعبادى سه‌روك وه‌زیرێ عیراقێ هاتبوو سلێمانیێ و چ پێڤه‌ نه‌هات وهاتنا ئه‌ڤجاره‌ یا مالكى ژى چ پێڤه‌ ناهێت چونكى چ ژ وێ یا جیاواز نینه‌ .. حكوومه‌تا عیراقێ چ نینه‌ بو خو حه‌تا بده‌ته‌ غه‌یرى خوو .

8- هه‌ر كه‌سه‌ك یان لایه‌نه‌ك یێ دهێته‌ هه‌رێما كوردستانێ بو رێككه‌فتنه‌كێ یان خزمه‌ته‌كێ دهێته‌ پایته‌ختێ هه‌رێمێ ، جهێ حكومرانیا هه‌مى هه‌رێما كوردستانێ ، و ده‌رگه‌هێ ره‌سمى یێ هه‌رێما كوردستانێ . نه‌ پارێزگه‌هه‌كا هه‌رێمێ بێی زانین و ئاگه‌هداریا حكوومه‌تێ .

ئه‌رێ تو بێژى هاتنا مالكى تشته‌كێ خێرێ ل مه‌ زێده‌كه‌ت ؟؟!!
ب دیتنا من : نه‌

تێبينى: ئه‌ڤ بابه‌ته‌ بێى چو ده‌ستكارى هاتيه‌ به‌لاڤكرن

ئەڤرۆ نیوز:
مۆئەیەد تەیب پەرلەمانتارێ بەرێ یێ پەرلەمانێ عێراقێ لدۆر چەندین پرسێن گرنگ یێن گرێدایێ ھەرێما کوردستانێ بۆ رۆژناما ئەڤرۆ دانەدیارکرن و گۆت: بەری نوکە شاندەکێ ئێکەتی وگۆرانێ سەرەدانا بەغدا کربوو،چەندین دیدار دگەل لایەنێن شیعی ئەنجامدابوون و دوان دیدارادا سەرکردەیەکێ دیار یێ (حزبا دەعوە) عەلی ئەدیب کو سەرۆکێ فراکسیۆنا دەولەت قانوونێیە ل پەرلەمانێ عێراقێ،دەربارەی چوونا شاندێ ھەڤپشکێ ئێکەتی و گۆرانێ دا گۆتیە، تشتێ دلێ مە گەلەک خۆشکری ئەو بوو،کو بەری نوکە ھەمی گاڤا کورد ئێک ھەلویست بووینە ل سەر ھەقی و نە ھەقیێ دەربارەی ھەرێمێ، لێ نوکە ئەو ئێکرێزی نەما و نوکە دو ھێز ل کوردستانێ ھەنە و لەورا ئەم دێ شێین باشتر یاریێ دگەل ھەرێما کوردستانێ کەین، ھەروەسا پشتی چوونا شاندێ ئێکەتی و گۆرانێ بۆ بەغدا نۆری مالکی ل رۆژا دوشەمبی 18/7/2016 سەرەدانا باژێرێ سلێمانیێ کریە،ھەر چەندە مالکی نوکە سەرۆکێ پارتەکا سیاسیە،کو حزبا دەعوەیە و حەیدەر عەبادی سەرۆکێ حوکمەتێ یە ژ وێ پارتێ،لێ ناکوکی دناڤبەرا ھەردویاندا ھەنە،زێدەتر گۆت:مالکی ئەو بوویە یێ کو بۆدجەیا ھەرێما کوردستانێ بری،لەورا ھەکە وی زیان گەھاندبنە ھەولێرێ و دھوکێ ھەمان زیان یێن گەھاندینە سلێمانیێ ژی،ھەروەسا مالکی دو جاران ھەولداینە کو ھێزێن عێراقی دگەل پێشمەرگێ کوردستانێ بکەڤنە دشەرەکێ مەزن دا،ھەروەسا رێگربوویە کو دستوورێ عێراقێ نەھێتە بجھئینان،ھەردەم ڤیایە کێشە دناڤبەرا ھەرێمێ و بەغدادا دروست ببن،ھەتا نوکەژی ئەو کێشە و ئاریشە دبەردەوامن،لەورا ھاتنا وی بۆ سلێمانیێ ھندێ دگەھینیت کو ئەم پەیامەکێ ددەینە بەغدا کو ئەم نە ئێک ھەلویستین،ئەڤ چەندە مە لاواز نیشا بەغدا ددەت. ناڤھاتی دیارکر ژی:ھاتنا نۆری مالکی بۆ سلێمانیێ چ مفا و باشی تێدا نینە،چونکی نەشێت کێشێن ناڤخۆ یێن ھەرێمێ چارە بکەت،دیسا چارەسەریا وان کێشێن دناڤبەرا ھەرێمێ و بەغدا دڤێت برێیا حوکمەتا ھەرێمێ بیت،نەکو برێیا پارتێن سیاسی بیت،لەورا دڤێت ھەر شاندەکێ بچیتە بەغدا برێیا حوکمەتا ھەرێمێ بیت و نابیت پارتێن سیاسی سەربەخوە بچنە بەغدا،ژبەرکو مالکی پێخۆشە کێشە دناڤبەرا بەغدا و ھەرێمێ مەزنتر لێ بھێن و نەھێنە چارەکرن،ھەروەسا نوکە ل بەغدا ھەول یێن دھێنەدان کو دستوور بھێتە گۆھورینن،لەورا ھەر گۆھورینەکا ددستوورێ عێراقێدا بھێتەکرن دێ ل سەر حسێبا ھەرێما کوردستانێ و مافێ دیمۆکراسیێ ھەمی خەلکێ عێراقێ و بتایبەتی یێ خەلکێ کوردستانێ بیت،ھێشتا دیارکر:چوونا پارێزگەرێ سلێمانیێ بۆ بەغدا و کومبوونا وی دگەل سەرۆک وەزیرێ حوکمەتا عێراقێ دبەرژەوەندیا سلێمانیێ و بەرژەوەندا بلندا ھەرێما کوردستانێ دا نینە و ھەر پەیوەندەیەکا دناڤبەرا بەغدا و ھەرێمێ دا ھەبیت،دڤێت برێیا حوکمەتا ھەرێما کوردستانێ بیت،چونکی ئەو کێشێن دناڤبەرا بەغدا و ھەرێمێ دا ھەین،چ پارتێن سیاسی نەشێن چارەسەر بکەن،چونکی کێشێن مە دگەل بەغدا کێشێن دو حوکمەتا نە و کیشێن دستووری و جێبەجێکرنا سیستەمێ فیدرالیە،لەورا ھەرێما کوردستانێ حوکمەتەکا ھەی و شەرعیەتا خوە یا ھەی ژلایێ خەلکێ ڤە یا ھاتیە ھەلبژاردن،ئەو حوکمەتە نوونەرا راستەقینەیا ھەرێما کوردستانێ یە و دڤێت ھەر پەیوەندیەک برێیا ڤێ حوکمەتێ بیت،ھەر کارەکێ ژدەرڤەی حوکمەتێ بھێتەکرن خزمەتا کوردستانێ ناکەت. مۆئەیەد تەیبی ئەو چەند ژی دیارکر:دڤێت کورد بەرامبەر سیاسەتا دەرڤە و بەرامبەر بەغدا ژی ئێک ھەلویست بن،لەورا ئەو کارتا فشارێ یا کوردان بکاردئینا ئەو ئێکرێزی و ئێک ھەلویستی بوو،بەرامبەر بەغدا،لەورا ھەر دوبەرەکیەکا دناڤ کوردان دا ھەبیت،دێ کوردان ھەمیان لاوازکەت،لەورا پێدڤیە لایەنێن کوردی بەرامبەر بەغدا د ئێکگرتی و ئێک ھەلویست بن،دەربارەی ھەبوونا ھندەک رێکەفتنێن نھێنی یێن ئێکەتی و گۆرانێ دگەل لایەنێن شیعی ناڤبری دیارکر: چو ھێزێن سیاسی نەشێن بناڤێ ھەرێما کوردستانێ رێککەفتنێ دگەل بەغدا بکەن، لەورا ھەکە ئەم ھەرێمەکین دڤێت سیاسەتا مە دگەل بەغدا ئێک سیاسەت بیت و پێدڤە حوکمەتا ھەرێمێ وێ سیاسەتێ دارێژیت،لەورا نابیت پارێزگەھا سلێمانیێ ب تەنا سەرێ خوە رێکەفتنا دگەل بەغدا ئەنجام بدەت،چونکی چو جاران ئەو رێکەفتن سەرناگرن و ناھێنە بجھئینان ژی.