ئەڤرۆ نيوز:
وەزارەتا خواندنا بلند و ڤەکۆلینێن زانستی، ل دووڤ نڤیسارا ژمارە (119908) ل رێکەفتی 9ی تەباخێ، رێنمایێن ژمارە 11 یێن تایبەت ب مەرج و رێنمایێن وەرگرتنا زانکۆ و پەیمانگەھان بۆ سالا خواندنا 2016 – 2017 بەلاڤ کرن و ل گۆر وێ نڤیسارێ قوتابی مافی ھەیە ب تنێ ل کۆلێژەکا حکوومی یان تایبەت بخوینیت، لەورا پێدڤیە ل گەل ھاتنا ناڤان د حەفتیا ئێکێ دا خوە ئێکلا بکەن.
د نڤیسارێ دا ھاتیە دیارکرن کو قوتابی دەرچوویێ کیژ سالێ بیت دشێت داخوازیا خوە پێشکێش بکەت و تەمەنی ھیچ مەرجەک نینە، تنێ ئەو کەسێن دخوازن ل پشکێن ئەندازیاری و پزیشکی بخوینن نابیت تەمەنێ وان ژ 35 سالان زێدەتر بیت.
د رێنمایێن وەزارەتا خواندنا بلند و ڤەکۆلینێن زانستی دا ھاتیە، مەرجە ئەو قوتابیێن کو فەرمانبەرن و دەواما وان یا ھەڤدەمە دگەل دەواما کۆلیژە و پەیمانگەھان، مۆلەتا خواندنێ وەرگرن، چونکی بەرۆڤاژی ل دەمێ دەرچوونێ ھەکە دەرکەفت دەواما وان ھەڤدەمە دگەل دەواما کۆلیژە و پەیمانگەھان وەزارەت باوەرناما وان پەسەند ناکەت.
سەبارەتی بھایێ کرێیا خواندنێ د رێنمایێن وەزارەتێ دا ھاتیە، کو سالانە ل سەرجەم زانکۆ و پەیمانگەھان دێ پێداچوون ب کرێیا خواندنێ دا ھێتە کرن، ھەروەسا ئاماژە کریە ھەکە خێزانەکێ دو قوتابی ھەبن، قوتابیێ ئێکێ دێ پارێ خوە تمام دەت و یێ دویێ دێ نیڤێ دەت، لێ ھەکە سێ قوتابی د خێزانێ دا ھەبن یێ ئێکێ و دویێ دێ پارێخوە تمام دەن و یێ سیێ دێ بێ پارە بیت و ھەکە چار قوتابی د خێزانەکێ دا ھەبن، وی دەمی ئێک قوتابی دێ بێ پارە خوینیت و یێن دی دێ پارێ خوە ب تمامی دەن.
ل گۆر رێنمایێن وەزارەتا خواندنا بلند، قوتابیێن نابینا و خودان پێدڤیێن تایبەت ژی ماف ھەیە داخوازیێن خوە پێشکێش بکەن ل گەل دابینکرنا جھێ خواندن و ھۆڵ و تاقیگەھێن تایبەت بۆ وان.
ھەروەسا د رێنمایان دا ھاتیە کو ئەو پشکێن بتنێ دەرچوویێن ئامادەیی تێدا بھێنە وەرگرتن پێدڤیە ژ سەرجەمێ پلانێ 90% بۆ دەرچوویێن ئەڤ سالە بیت، 10% بۆ دەرچوویێن سالێن بەری نھا بیت.

ئه‌ڤرۆ نيوز:

دپرێس کۆنفرانسەکی دا دوھی رۆژا 8/8/2016ێ سەرۆکاتیا باژێرڤانیا دھۆکێ ئامارێن خوە یێن ھەیڤێن بۆری راگەھاندن و تێدا دیار کر کو پشکا دووڤچوونا پاقژیێ 86 ھزار و 400 تەنێن بەرمایکان راکرینە کو رۆژانە دبوونە 480 تەن و سەرەرایی ڤێ چەندێ چەندین ھوشداری و سزا داینە خودانێن زێدەگاڤیان و رەوانەی دادگەھێ کرینە.
ئیسماعیل مستەفا، بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو د ئەڤ سالە دا 279 زێدەگاڤی ھاتینە لادان ژ وان چار زێدەگاڤی ب رێیا دادگەھێ ھاتینە چارەکرن و گۆت: “رێڤەبەریا باژێرڤانیا رۆژھەلات 204 دەستووریێن ئاڤاھیان و رێڤەبەریا باژێرڤانیا روژئاڤا 175 دەستووری داینە وەلاتیان”.
ناڤھاتی ئاماژە دا وێ چەندێ کو کارگەھا ئەسفلتێ قێرکرن ب رووبەرێ 212 ھزار و 960 مەترێن چارگوشە جادە زفت و قێرکرینە و تەسێن کێمکرنا لەزاتیێ داناینە و 16 ھزار و 47 تەنێن قێری بەرھەم ئیناینە و گۆت: ” رێڤەبەریا ئەندازەیا پارکان ب رووبەرێ 26 ھزار مەتران فریزی و داروبار و گۆل چاندینە و سەرەرایی ڤێ چەندێ پێنج باخچە و ناڤەندێن جادان دروستکرینە و د ھەمان دەم دا 95 ھزار و 65 دار و تراشوک و گۆلێن ھەردەم ژ جۆرێن (لانگستروم و روبینا و بیبی روز و ھەروەسا کەزانیا و شمشار) چاندینە و 180 ھزار گۆلێن بھارێ و 160 ھزار گۆلێن ھاڤینێ و ھزار کیلۆیێن فریزی ل سەنتەرێ باژێری چاندینە”.
ناڤبری خویا کر کو پشکا پۆلیسێن باژێرڤانیێ ژی 21 خانی و زێدەگاڤی راکرینە و زێدەباری ڤێ چەندێ نەە ترۆمبێلێن فرۆتنا فێقی ژی راکرینە و گۆت: “ئەو پرۆژێن د سالا 2016ێ دا ب دووماھی ھاتین سەر ب پرۆژێن گەشەپێدانا ھەرێما ڤە ئەڤە بوون چێکرنا جادێن ناڤخۆ ل تاخێ گەلی و چێکرنا دیوارەکێ پالپشت ل تاخێ ناڤبری، ئەڤ پرۆژە راستەوخۆ ب کۆژمێ 624 ملیۆن و 593 ھزار و 980 دیناران ژ لایێ باژێرڤانیا دھۆکێ ڤە ل سنوورێ باژێرڤانیا رۆژھەلات ھاتینە بجە ئینان”.
بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر کو پرۆژێن رێڤەبەریێن باژێرڤانیێن رۆژھەلات و رۆژئاڤا پێکھاتیبوون ژ ڤەکرنا جادان ب رووبەرێ 51 ھزار و 611 مەترێن دوجای و چێکرنا سولینان ب درێژاھیا 85 مەتران و کونکریتکرنا جادان ب رووبەرێ چار ھزار و 700 مەترێن دوجای و تێکەلکرنا جادان ب رووبەرێ 41 مەترێن دوجای و چێکرنا دیواران ب رووبەرێ 134 مەترێن سێجای و چێکرنا عومبارا 350 مەترێن دوجای و دانانا کێربستوونی ب درێژاھیا دو ھزار و 200 مەتران و دانانا تێکەلوکەکا کونکریتی بۆ پترخزمەتکرنا وەلاتیان دێ ب سەر سەروکاتیا باژێرڤانیا دھۆکێ ڤە بیت.
ناڤھاتی ئاشکرا کر کو 140 گرێبەست ل سەرۆکاتیا باژێرڤانیا دھۆکێ ھاتینە نووکرن و 30 سەر ئێک زێدەکرن ھاتینە ئەنجام دان بۆ (پارچە زەڤی و دوکان و نەمامگە و کوشک و گازینویان ) و گۆت: “955 ملیۆن و 226 ھزار و 500 دینار ژ کریێن مولکێن باژێرڤانیێ ھاتینە”.