ئه‌ڤرۆ نيوز:
دلشاد عومه‌ر رێڤه‌به‌رێ په‌روه‌ردا سلێمانيێ دياركر كو ل رۆژا سێ شه‌مبى تا كو رۆژا پێنج شه‌مبى دێ ئه‌نجامێن قوتابيێن 9 بنه‌رت و 12 ئاماده‌يى هينه به‌لاڤكرن.
قوتابيێن خوشتڤى ب رێيا ڤى لينكى دشێن ته‌ماشه‌ى ئه‌نجامێن خوه بكه‌ن، پشتى كو ئه‌نجام دهێنه راگه‌هاندن.
ئةڤرۆ نيوز:
دادگەها دهۆکێ ئه‌ڤرۆ سزایا بدارڤەکرنێ هەتا مرنێ بسەر بکوژێ مینایێ دا سەپاند.
دادگەها دهۆکێ لگۆرى مادەیێ (٤٠٦) یێ تایبەت ب کوشتنا شقەستا ل یاسایا سزادانا عێراقى سزایا بدارڤەکرنێ هەتا مرنێ بسەر بکوژێ مینا مێهڤانێ دا سەپاند.
ل١٠ێ حوزەیرانا ٢٠١٦ێ زارۆکەك ب ناڤێ “مینا مێهڤان سەعید” د ژیێ ١٨ هەيڤێ دا ل بەر دەریێ مالا خۆ ديار نه‌ما و تاوانبارى بربوو گوندێ بەرئاشێ ل دەڤەرا بەرواریا ل سنورێ پارێزگەها دهۆکێ و پشتى دەهـ ڕۆژان ژ دیار نەمانا وێ تەڕمێ وێ ب پارچە پارچە کرى هاتە دیتن،پاشان بکوژێ مینایێ ژى کو خەلکێ هەمان گوندیە ل تاخێ پیشەسازیێ دهۆکێ هاتە دەستەسەرکرن و دان پێدان ب تاوانا خۆ کر.
ئەڤرۆ نيوز:
ئۆلدارەکێ ئێزدی ل پەرستگەھا لالش بۆ رۆژناما ئەڤرۆ ئاشکرا کر کو دویەم مەزنترین پەرستگەھا ئێزدیان پشتی پەرستگەھا لالش دێ ل وەلاتێ ئەرمینیا ھێتە ئاڤاکرن.
بابە چاویش، ئۆلدارەکێ ئێزدی یە ل پەرستگەھا لالش دیار کر کو ئەڤ پەرستگەھە ل سەر رووبەرەکێ مەزن دێ ھێتە دروستکرن و دێ ھەشت قوبان ب خوە ڤە گریت و بلندترین قوبە ژی دێ ھێنە دانان و گۆت: “ئەڤ پەرستگەھە دێ ل گوندەکێ نێزیکی ئێریڤانا پایتەختێ وەلاتێ ئەرمینیا ھێتە چێکرن”.
د لایەکێ دی دا ناڤھاتی خویا کر کو چەندین مەزارگەھێن خاس و چاکێن دی یێن ئۆلا ئێزدیان ل وەلاتَێن ئورۆپی ھەنە و گۆت: “چەندین ژێدەران دیارکریە کو نێزیکی 22 ملیۆن یۆرۆیان بۆ ئاڤاکرنا ڤێ پەرستگەھێ دێ ھێنە مەزاختن”.
ئەڤرۆ نیوز:
پەیڤدارێ وەزارەتا پێشمەرگەی یا حوکمەتا ھەرێما کوردستانێ ئاشکرا کر کو بڕیارە ل دووماھیا ڤێ ھەیڤێ ئەمریکا مووچێ ھژمارەکا زۆرا ھێزێن پێشمەرگەی بمەزێخیت و ئەڤ پارە دێ وەکو مووچێ ھەیڤانە ب سەر ھێزێن پێشمەرگەی دا ھێتە بەلاڤکرن و گۆت: “ئەڤ پارە بەھرا ھەموو پێشمەرگەی ناکەت ژبەر ڤێ چەندێ ئەڤ پێشمەرگێن دمینن ھەرێم دێ مووچێ وان مەزێخیت”.
جەبار یاوەر، پەیڤدارێ وەزارەتا پێشمەرگەی یا حوکمەتا ھەرێما کوردستانێ بۆ رۆژناما ئەڤرۆ دیار کر کو بەری نوکە شاندەکێ وەلاتێ ئەمریکا سەرەدانا ھەرێما کوردستانێ کریە و د گەل سەرۆکاتیا جڤاتا وەزیران رێکەفتینە ل دۆر ھاریکاریا ھێزێن پێشمەرگە بۆ بەلاڤکرنا مووچێ ھەیڤانە و ئەمریکا ل دووماھیا ڤێ ھەیڤێ دێ 415 ملیۆن دۆلاران وەکو ھاریکاری دەتە وەزارەتا پێشمەرگەی و گۆت: ” ئەڤ ھاریکاریە بەھرا ھەموو پێشمەرگەی ناکەت ژبەر ڤێ چەندێ ئەڤ پێشمەرگێن دمینن ھەرێم دێ مووچێ وان مەزێخیت و ھەموو ھێزێن پێشمەرگەی ئاگەھداردکەین ئەڤ پارە دێ وەکو مووچێ ھەیڤانە بیت و چو زێدەھی ناچیتە سەر مووچێ وان”.
ناڤھاتی ئاماژە دا وێ چەندێ کو ئەڤ پارە ھاریکاریە بۆ قەیرانا دارایی ھەتا وەزارەتا پێشمەرگەی بشێت ھەیڤانە د دەمێ خوە دا مووچەی ب سەر ھێزێن پێشمەرگەی دا بەلاڤ بکەت، چونکی نوکە د شەری دانە ل دژی تیرۆرستێن داعش و گۆت: “چو راستی بۆ وان گۆتنان نینە یێن کو دبێژن ئەڤ پارە دێ ژ بلی مووچەی ل سەر ھێزێن پێشمەرگەی ھێتە بەلاڤکرن”.
ئەڤرۆ نیوز:
زێدەباری زێدەبوونا بەرھەمێ ماسیان د ناڤخوە دا، لێ ھەتا نوکە رێژا بەرھەمێ وان نەگەھشتیە ئاستێ پرکرنا پێدڤیێن ناڤخوە یێن ھەرێما کوردستانێ، بەرپرسەکێ وەزارەتا چاندنێ ل حوکمەتا ھەرێما کوردستانێ پلانا وەزارەتێ بۆ زێدەکرنا باجێ ل سەر ئینانا ماسیان ئاشکرا دکەت.
سیروان سەعید، رێڤەبەرێ سامانێ ماسیان ل وەزارەتا چاندن و ژێدەرێن ئاڤێ یا حوکمەتا ھەرێمێ خویا کر، زێدەبوونا ئاڤێ د بەنداڤان دا ل ھەرێما کوردستانێ کاریگەریێ ل سەر زێدەبوونا رێژا بەرھەمێ ماسیان دروست ناکەت، ژ بەر کو ئەو زێدەبوونە ب وی رەنگی نینە کو ببیتە ئەگەرێ وێ چەندێ ماسی بچنە کووراتیا وان بەنداڤان و نێچیرکرنا ماسیان کێم ببیت.
سیروان ئاشکرا ژی کر، د نوکە دا 60% پێدڤیا ناڤخوە یا ھەرێمی بۆ سامانێ ماسیان ب رێیا حەوز و دەریاچەیان دھێتە دابینکرن و بۆ SNN گۆت: “سالانە ل ھەرێما کوردستانێ دو ھزار و 500 تەنێن ماسیان ژ حەوزێن فەرمی و 500 تەن ژ حەوزێن بێ مۆلەت و ھزار تەن ژی ژ بەنداڤان دھێنە نێچیرکرن”.
دەربارەی دانانا باجێ ل سەر ئینانا ماسیان بۆ ناڤ ھەرێما کوردستانێ رێڤەبەرێ سامانێ ماسیان ل وەزارەتا چاندن و ژێدەرێن ئاڤێ گۆت: “بۆ ئینانا ھەر تەنەکا ماسیان بۆ ناڤ ھەرێمێ دو ھزار دیناروەکو باج ھاتینە زێدەکرن، لێ مە یاداشتەک ئاراستەی وەزارەتا چاندنێ کریە، دا کو داخوازێ ژ وەزارەتا دارایی بکەت، رێژەیا باجێ ل سەر ئینانا ماسیان بھێتە زێدەکرن”.
وەکو دیار سالانە ل ھەرێما کوردستانێ ل دووماھیا ھەیڤا ئادارێ ھەتا دەستپێکا ھەیڤا خزیرانێ نێچیرکرنا ماسیان ب مەرەما دانانا خەرزی و پاراستنا سامانێ ماسیان ل سەرانسەری ھەرێمێ دھێتە قەدەغەکرن.
ئەڤرۆ نیوز:
ئاندرێ سیرینکو بەرپرسیارێ ناڤەندا ڤەکۆلینێن ستراتیژی ل روسیا بۆ ئاژانسا سپۆتینگ یا وی وەلاتی دیار کریە کو پرانیا ژێدەرێن ئابووری یێن داعشێ ژناڤ چووینە و داعش نەشێت وەک جاران پاران بدەتە چەکدارێن خوە ژ بەر ھندێ ژی ب سەدان چەکدارێن داعشێ کو خەلکێ وەلاتێن سوڤیەتا بەرێ نە ڤەگەریانە وەلاتێ خوە و دخوازن دەست ب ژیانەکا ئاسایی بکەن، زانیاریێن ل بەر دەستێ مە ژی نیشا ددەن کو ئێدی داعش نەشێت وەک جاران پارێن باش بدەتە چەکدارێن خوە و ژ بەر ھندێ ژی ئەو ژ داعشێ جودا دبن.
ناڤھاتی د بەردەوامیا ئاخڤتنا خوە دا ئەو یەک ژی دیار کریە کو گەلەک چەکدارێن خەلکێ ئازەربەیجانێ ژ داعشێ جودا بووینە و ڤەگەریانە وەلاتێ خوە، مە زانیاریێن راست و دروست سەبارەت ب وان کەسان ھەنە و مە رادەستی ئالیێن پەیوەندیدار ل ئازەربەیجانێ کریە و دڤێت بەرپرسێن وی وەلاتی ڤەکۆلیێن بەرفرەە ل سەر وان کەسان بکەن و دڤێت ئەو کەسە بۆ دەمەک درێژ ل ژێر چاڤدێریێ بن دا کو چو چالاکیێن تیرۆرستی ل وی وەلاتی نەکەن.
ئاندرێ سیرینکو ئەو یەک ژی دیار کریە کو گەلەک چەکدارێن داعشێ ژ سووریا و عیراقێ درەڤن و دچنە ئەفغانستانێ و ل وێرێ دگەھنە رێکخراوا تیرۆرستی یا خوراسان و ھندەک ژی دگەھنە رێکخراوێن دی و ئەو یەک ژی پشتی ھندێ ھات کو ل سووریێ شەرەکی مەزن ل دژی داعشێ دەستپێ کریە و ل عیراقێ ژی داعشێ گەلەک دەڤەرێن ل ژێر دەستھەلاتا خوە ژ دەست دایی و نەشێت وەکو جاران پارەیی بۆ چەکدارێن خوە دابین بکەت.
ئەڤرۆ نیوز:
پشتی چالاکیێن پێشمەرگێن رۆژھەلات ھێزێن سەربازی یێن ئیرانێ ل سەر سنۆری و چەندین دەڤەرێن دی یێن رۆژھەلاتێ کوردستانێ بنگەھێن سەربازی یێن نوو ئاڤا دکەن و ب گەفان خەلکێ نەچار دکەن ھاریکاریا وان بکەن.
محەمەد ئەحمەدی چاڤدێرێ سیاسی یێ رۆژھەلاتێ کوردستان بۆ رۆژناما ئەڤرۆ دیار کر کو پشتی چالاکیێن پێشمەرگێن رۆژھەلات ھێزێن سەربازی یێن ئیرانێ ل سەر سنۆری و ل دەڤەرێن دی یێن رۆژھەلاتێ کوردستانێ دەست ب ئاڤاکرنا بنگەھێن نوو یێن سەربازی کرینە و ھەروەسا دەست ب پرۆپگاندا ل دژی کوردان دکەن و دبێژن کو پارتی دیموکراتی کوردستان- پارە ژ سعوودیێ وەرگرتینە و شەرێ ھێزێن مە دکەن و دڤێت کورد ل ھەمبەر وێ یەکێ ھشیار بن و ھاریکاریا مە بکەن و گۆت: (چالاکیێن ھێزێن پێشمەرگێن رۆژھەلاتی نھا د جھێ خوە دا بوو و کارتێکرنەکا گەلەک مەزن ل خەلکێ کریە و بۆ رژێما ئیرانێ ژی جارەکا دی ھاتە سەلماندن کو کورد بێ خوەدان نینن و ئەو نەشێن ل گۆر کەیفا دلێ خوە رۆژانە زارۆیێن مە ل سێدارە بدەن).
چاڤدێرێ سیاسی ئەو یەک ژی نەڤەشارت کو چەند رۆژن ب ھزاران ھێزێن سەربازی ب چەکێن گران ل ھەر دو پارێزگەھێن ئورمیێ و سنێ و ل دەڤەرێن چیایی ھاتنە بجە کرن و کار بۆ دروست کرنا بنگەھێن نوو یێ سەربازی دھێتە کرن و ئەو یەک ژی نیشا ددەت کو ئیران گەلەک ژ رەوشا نوو یا رۆژھەلاتا ناڤین و چالاکیێن پێشمەرگێن رۆژھەلاتێ کوردستانێ ترسیایە و ژ بەر ھندێ ژی بلەز دەست ب ئاڤاکرنا بنگەھێن نوو یێن سەربازی دکەن و گەفان ل خەلکێ سەر سنۆری ژی دکەن کو دڤێت ئەو ل دژی پێشمەرگان ھاریکاریا وان بکەن.
ل ئالیێ دی رۆستەم جیھانگیری ئەندامێ مەکتەبا سیاسی یا پارتی دیموکراتی کوردستان- ئیران ژی راگەھاند کو ھەتا ھێرشێن رژێما ئیرانێ ل سەر خەلکێ مە و پێشمەرگەی د بەردەوام بن ھێزێن مە ژی دێ بەرەڤانیێ ل خوە و خەلکی بکەن و ھەتا ئیران رێزێ ل مافێ کوردان نەگریت و سیاسەتا خوە ل ھەمبەر کوردان نەدەتە گوھۆین بێگومان دێ چالاکیێن مە بەردەوام بن و ھێزێن مە دێ ھەر د ناڤ ئاخا رۆژھەلاتێ کوردستانێ دا بمینن.
ئەڤرۆ نیوز:
پشتی تەقینێن دەڤەرا کەڕادەیا بەغدا رەوشا ئەمنیا عێراقێ پتر ئالۆزبوویە و بەرپرسەکێ کوردژی دبێژیت، دەزگەھێن ئەمنیێن عێراقێ مژۆلی پارە خوارنێ نە و چو پلانێن ئەمنی نینە بۆ رێگریکرن ل کریارێن تیرۆرستی، ھەروەسا دیارکر، داعش گەفان لھەرێما کوردستانێ ژی دکەت بۆ ئەنجامدانا کریارێن تیرۆرستی بەلێ دەزگەھێن ئەمنی پلانێن بھێز ھەنە و رێکێ نادەن مەرامێن دوژمنان سەربگرن.
شاخەوان عەبدولا، بڕیاردەرێ لیژنا ئاسایش و بەڕەڤانیێ لپەرلەمانێ عێراقێ بۆ رۆژناما ئەڤرۆ گۆت” ئەگەرێن سەرەکی یێن تەقینێن عێراقێ بۆ شکەستنا چەکدارێن تیرۆرستێن داعش ڤەدگەڕیت، چونکە ھەر دەمێ داعش ل بەرەیێن شەڕی شکەیتن ئینا کریارێن تیرۆرستی ئەنجامدەت ژبۆی کو نیشا خەلکی بدەت ھێشتا مایە، بەلێ یا گرنگتر ئەڤە دەزگەھێن ئەمنیێن عێراقێ زۆر خەمسارن ھەمبەر رەوشا ئەمنی و نەشێن وەکی پێدڤی بەڕەڤانیێ ل رەوشا ئەمنی و تەقینێن تیرۆرستی بگرن، پتریا بەرپرسێن ئەمنی یێن عێراقێ چو پلان نینە و ھەر مژۆلی پارە خوارنێ نە، ژبەرکو ھەمان گەفێن لسەر بەغدا و دەڤەرێن دی یێن عێراقێ ئەو گەف لسەر ھەرێما کوردستانێ ژی ھەنە و تیرۆرستێن داعش چەند کیلۆمەترا ل ھەولێر و دھۆکێ دوورن، بەلێ دەزگەھێن ئەمنیێن ھەرێما کوردستانێ رێگرن ل کریارێن تیرۆرستی و پلانێن بھێز ھەنە بۆ پوچکرنا مەرامێن گروپا تیرۆرستیا داعش، ھەتا نوکە چەندین تیرۆرست و تۆمەتبار ھاتینە دەستەسەرکرن.
شاخەوانی گۆتژی” رۆژێن داھاتی دێ کۆمبوونێن پەرلەمانێ عێراقێ ھێنە دەستپێکرن و وەزیر و بەرپرسێن ئەمنی دێ ھێنە گازیکرن بۆ پەرلەمانی ھەتا رۆنکرنێ بدەن لسەر تێکچوونا رەوشا ئەمنی و تەقینێن ڤێ دوماھیێ، ژبەرکو ئەڤ تەقینێن ل کەڕادەیا بەغدا چێبووین کێم وێنە بووینە و ھژمارەکا زۆرا وەلاتیان تێدا بووینە قوربانی، بەری نوکەژی مە چەندین جارا ھۆشداری دایە حوکمەتا عێراقێ، کو دەزگەھێن ئەمنی ژبەر گەندەلیێ دلاوازن و شیانێن پاراستنا رەوشا ئەمنی نینە، بەلێ حوکمەتا عەبادی گوھداری ئەڤان شیرەتێن مە نەبوویە و نوکەژی رەوش ژدەستا دەرکەفتیە، راستە ھندەک بەرپرس ھاتینە لادان پشتی تەقینێن دەڤەرا کەڕادە، بەلێ دڤێت بھێنە سزادان و لێپرسین دگەلدا بھێتەکرن، نابیت ھەر بەرپرسەکێ خەمساربوو دکارێ خوەدا تنێ بھێتە لادان و چو لێپرسین دگەلدا نەھێنەکرن.
ئەڤرۆ نیوز:
دێ دەولەت بوون ھەر ل سەر دەستێ جەنابێ سەرۆکی ھێتە راگەھاندن چ ب ریفراندووم بیت یان بێ ریفراندووم بیت، چ ھەموو ھێزێن سیاسی ل گەل دا بن یان ل گەل دا نەبن.
چاڤدێرەکێ سیاسی ب گرنگی دبیت پارتی دیموکرانی کوردستان وەک پارتەکا سەرەکی ل گورەپانا سیاسی دەست پێشخەریەکێ بکەت و تەپێ د گورەپانا وێ دا دبیت کو پشتی پەیاما جەنابێ سەرۆکێ ھەرێما کوردستانێ بەرسڤا خوە ھەبیت و کار بکەت بۆ نێزیکبوونا ئالیێن سیاسی ل کوردستانێ.
د.عەبدولحەکیم خسرۆ چاڤدێرێ سیاسی بۆ رۆژناما ئەڤرۆ دیارکر کو پەیاما جەنابێ سەرۆکێ ھەرێما کوردستانێ ب ھەلکەفتا جەژنا رەمەزانا پیرۆز گرنگیەکا ھەرە مەزن ھەبوو بۆ نێزیکبوونا ئالیێن سیاسی ل ھەرێما کوردستانێ و تایبەت ڤێ قوناغێ، چونکە ھندەک پرس ھەنە دڤێن کو دەنگی ل گەل ھەبیت و ھەموو ئالیێن سیاسی تێدا د پشکداربن وەک کودەنگی ل گەل بەغدا و ئیرانێ و ریفراندووم و قەیران، دیسا ھندەک پرس ھەنە دڤێت ل پەرلەمانی بھێنە چارەسەرکرن وەک ئاسایش و پێشمەرگە، لەوما گرنگە پارتێن سیاسی ھەرێما کوردستانێ کومبوونێ پێکڤە ئەنجام بدەن و ئێک ستراتیجی بدانن وەک قانوون و بریار و ھەفکاری و پەیاما جەنابێ سەرۆکی ڤێ قوناغێ گرنگی یا خوە ھەبوویە.
د.عەبدولحکیم خسرۆ ھێشتا ژی گۆت: پێدڤی یە پارتی دیموکراتی کوردستان ب پلە ئێک وەک پارتەکا سیاسی بەرنامەک ھەبیت کا چ دەست پێشخەری ھەیە و بزاڤا بکەت ل گەل ئالیێن سیاسی کومبیت، ھندەک رونشتنێن دەسپێکی ل گەل پارتێن سیاسی ئەنجام بدەت بۆچوون و تێبینێن پارتێن سیاسی ل کوردستانێ وەربگریت کوم بکەن و خالین ھەڤپشک و ناکوکی ل سەر بھێنە جوداکرن و دووڤ دشێن بگەھنە رێکەفتنەکێ.
د.عەبدولحکیم خسرۆ ھێشتا ژی گۆت: پشتی پەیاما سەرۆکێ ھەرێما کوردستانێ دڤێت پارتی پلە ئێک لڤینەکێ بکەت بۆ بەرسڤ دانا پەیاما سەرۆکێ ھەرێما کوردستانێ ئەو ل جەژنا رەمەزانا پیرۆز راگەھاندی، چونکە پەیاما سەرۆکی بۆ ئالیێن سیاسی بوو و پارتی ئێکە ژ ئەوان ئالیێن سیاسی ل کوردستانێ.
چاڤدێرێ سیاسی ل دۆر بۆچوونێن ھندەک ئالیێن سیاسی ل سەر رێخوشکرنا بەری کومبوونا ئالیێن سیاسی ژی گۆت: چ دبیت ھندەک کومبوونێن ھونەری بەری کومبوونا مەزن یا دناڤبەرا سەرکردێن پارتان بھێنە ئەنجام دان و بۆچوونێن ئێک دو وەربگرن و ھندەک لژنێن ھونەریێن ھەڤپشک ل گەل ئێک دو روونە خوار، نا بیتە خوە کێمکرنەکا سیاسی و نە دبیتە دەسکەفتەکێ سیاسی و ئەو لژنە دێ بزاڤا کەن کو ئالیێن سەرداتر ل گەل ئێک کوم بن و ئەڤە دێ بیتە رێ خوەشکەر و ئەڤە دێَ بیتە بنیات، ئەگەر بزاڤا گوران مەرج ھەبن ھەتا کو پەرلەمانەک نە روونیتە خوار و پارتی مەرج ھەبن بەرامبەر سوتنا بارەگایێن وێ گوران لێبورینێ ژ پارتی بخوازیت ھەلبەت بڤی رەنگی نا گەھنە چ رێکەفتنان.
ھەمان چاڤدێرێ سیاسی ئەو ژی گۆت: نوکە تەپە د گورەپانا پارتی دیموکراتی کوردستان دایە وەک پارت و پێدڤی یە دەست پێشخەری ھەبیت بۆ ھەموو ئالیێن سیاسی و خواست و بەرنامە ھەبیت بۆ کومبوونێن ھەڤپشک و ل سەر ئاستێ ھونەری بیت و ھندەک رێکەفتن بھێنەدانان و ئەو بیت بنیات بۆ ھەر رێکەفتنەکا بھێتەدانان، گەنگەشا ھندەک خالان بھێتەکرن.
د.عەبدولحەکیم خسرۆ ئەو ژی گۆت: ھندەک پرسێن نەتەوەی ھەنە دڤێت کو دەنگی ل سەر بھێتەکرن و ئەو دەلیڤە ژ دەست مللەتێ مە نەچیت و ئەڤ دوور کەفتنا ئالیێن سیاسی کارگەریێ ل سەر ئەڤان پرسان نەکەت، وەک سەربەخۆیا کوردستانێ پێدڤی یە سیاسەتەکا ھەڤپشک ھەبیت و ھەموو ئالیێن سیاسی پشکداربن وەک ھەلویستەکێ نەتەوەیی، دیسا نەبتنێ کورد ل سەر ئەڤێ پرسێ بۆچوونا خوە ئێک بگرن بەلکو ھەموو پێکھاتێن دناڤ کوردستانێ دا دژین وەک مەسیحی و تورکمان گرنگە بۆچوونێن وان بھێتە وەرگرتن و ئەڤە پشکێن گرنگن.
ل دووماھیێ د. عەبدولحەکیم خسرۆ گۆت: ھەکە گەھشتە قووناغا دەولەت بوونێ دێ ھەر ل سەر دەستێ جەنابێ سەرۆکی ھێتە راگەھاندن چ ب ریفراندووم بیت یان بێ ریفراندووم بیت، چ ھەموو ھێزێن سیاسی ل گەل دا بن یان ل گەل دا نەبن دێ ھێتەراگەھاند، لێ ئەگەر ھەموو ئالیێن سیاسی و پێکھاتێن کوردستانێ ل گەل جەنابێ سەرۆکی بن گومان نینە دێ ب ھێزتر بیت.
نيشاندان