ئەڤرۆ نیوز:
چاڤدێرەکێ سیاسی ل دۆر وان دەزگەە و لایەنێن وەسا داینە دیارکرن کو پارتی گۆتیە ئێکەتیێ ھەکە ھوون رێککەفتنا خوە ل گەل گۆڕانێ ھەلنەوەشینن، دێ کەینە دو ئیدارەیی بۆ رۆژناما ئەڤرۆگۆت: ئەوێ پارتی دیمۆکراتی کوردستان بنیاسیت باش دزانیت کو پارتی چو جاران ھزر ل دو ئیدارەیێ نەکریە، و باوەری ب دو ئیدارەیێ نینە، ئەڤ پەیڤە ل سەر ئەزمانێ مەلا بەختیاری ھاتیە ل ناڤ ئاخفتنەکا درێژدا، ژبەر ھندێ باوەر ناکەم ھەما وەسا ب روتینی پارتی وەگۆتبیت، ھەروەسا مەرەم ژ رێککەفتنا گۆڕان و ئێکەتیێ یا دیارە کو دێ فراکسیۆنەکێ چێکەن ژ یا پارتی مەزنتر بیت، ئەو ل خەیالا ھندێ نە،کو ئەوان ل 23 خزیرانێ بۆ وان نە چوویە سەر دێ جێبەجێکەن، ھەروەسا گۆران یا گەھشتیە وێ باوەریێ کو یا شکەستی و دڤێت بارێ نافخۆیێ ئێکەتیێ بۆ مفایێ خوە ب کار بینیت.
عەبدولسەلام بەرواری ئەو چاڤدێرێ سیاسیە زێدەتر دبێژیت: پێدڤیە گۆڕان باش ھزرا خوە بکەت، کا چو کریە؟، ھەکە پەشێمان نەبیت، پارتی ل گەل ناروینیت، لێ ھەکە ھات و پارتی ل گەل روینشت ژی، ئەڤە مانا وێ نادەت،کو ھەما پشتی ھنگێ پارتی دێ ل گەل وان رێککەڤیت، ژبەرکو دیتن تشتەکە و رێککەفتن تشتەکێ دی یە، ھەروەسا ل سەر ئێکەتیێ یە ھزرا خوە بکەت،کادێ چاوا بۆ وان چیتە سەر؟،کو ل سەر ھەردو وەریسان یاریا بکەت، سەبارەت پێشێلکرنا رێککەفتنا ستراتیجی یا دناڤبەرا پارتی و ئێکەتیێ دا، ناڤھاتی دیارکر:ئێکەتیێ ل دژی رێککەفتنا ستراتیجی پێنگاڤان دھاڤێت، دەمێ ل ھەلبژارتنێن سالا 2013 ب لیستەکا جۆدا ھاتیە د ناڤ ھەلبژارتنان دا، بەلێ ھەر دەمەکێ وان کار ب وێ رێککەفتنێ ھەبیت دێ بێژن یامای، ھەر چەندە پارتی زێدەتر ژ مافێ ئێکەتیێ یێ دایێ و ئەو پارتیە ل دەڤەرا وان ژ ھەموو تشتان بێ بەھر بوویە.
دەربارەی چێکرنا بەرەیەکێ ل دژی پارتی عەبدولسەلام دبێژیت: ھەکە ئاخفتنێن مەلا بەختیاری ل رۆژا 9 گۆلانا 2016 ل کەنالێ(رووداو) بینینە ھزرا خوە، دێ دیار بیت،کو ئەڤ رێککەفتنا د ناڤبەرا ھەردو یان دا چەندا خرابە، ھەر وی ب خوە گۆت،کو ئەو دگەل نینە، چونکی چێکرنا فراکسیونەکێ و بزاڤ بۆ گوھارتنا یاسایا سەرۆکاتیا ھەرێمێ باش نینە، دیسان پارتی ژی ھەر ئەڤە گۆتیە ئێکەتیێ ل کومبوونا 13 ڤێ ھەیڤێ.
دەربارەی بابەتێ ریفراندۆمێ و سەربەخوەیا کوردستانێ بەرواری گۆت: ئێکەتیێ و گۆرانێ ھەمی شیانێن خوە ب کارئینان ل دژی ریفراندۆمێ و پرۆژێ سەربەخوەیا کوردستانێ، لێ نوکە ھەردو یێن بووینە راستی و ئێدی کەس وێرەکیا ھندێ ناکەت ل دژ رابوەستیت، لەورا دکۆمبوونا خوە دا وان ژی ئەو ئاخفتن کر، ھەروەسا سەبارەت پەرلەمانی ژی پارتی ئاخفتنا خوە یا کری،کو ئەو ژی ئێدی گۆڕان سەرۆکاتیا پەرلەمانی وەرناگریت و بلا یوسف ژی وێ چەندێ ژ سەرێ خوە دەر بکەت، جارەکادی ببیتە سەرۆکێ پەرلەمانێ کوردستانێ.
لدۆر ئەکتیڤکرنا پەرلەمانی چاڤدێرێ سیاسی عەبدولسەلام بەرواری گۆت: ئەکتیڤکرنا پەرلەمانی ھەکە ل سەر بنەمایەکێ موکوم نەبیت باش نینە، ئەڤە ژی پتر دکەڤیتە ل سەر ملێن ئێکەتیێ، چونکی دوور نینە پارتی بشێت 56 دەنگان کوم بکەت، ھەروەسا دوور نینە ئێکەتی و گۆران ژی بشێن ھند دەنگان کوم بکەن، بەلێ ئەڤە دێ ئاریشا ئالۆزتر لێ کەت، ژبەر ھندێ ھەکە ئێکەتی خوە سەر راست بکەت، گۆران و ئەو لایەنێن دی ژی دێ ژ کەلا غەزەبێ ھێنە خوارێ، لێ ھەکە ئەڤەژی نەھێتە کرن،چو چارە نینە، وەکی بابەتێ سەرۆکاتیا ھەرێمێ، ھەر ھوەسا بمینیت ھەتا کو ھەلبژارتنێن بھێن، بەلێ ئەو ژی ھەر پێدڤی ب پەرلەمانی ھەیە.

ئه‌ڤرۆ نيوز، زنار تۆڤى:

پشتى ل به‌ر سينگێ دادگه‌هێ ئاماده‌ نه‌بوويى، دادگه‌هێ بڕيارا ده‌سته‌سه‌ركرنێ بۆ نه‌وشيروان مسته‌فا رێكخه‌رێ گشتيێ بزاڤا گۆڕان ده‌ركر.

ب گۆره‌ى پێزانينێن K24 به‌لاڤكرين، ئه‌گه‌رێ ده‌ركرنا ڤێ بڕيارا دادگه‌ها هه‌ولێر بۆ وێ چه‌ندێ دڤه‌گه‌ريت كو به‌رى نوكه‌ ژ لايێ دادگه‌ها ڤه‌كولينێ ل باژێرێ هه‌ولێرێ گازى كربوو بۆ ڤه‌كۆلينێ، به‌لێ ئاماده‌ نه‌بوويه‌ بچيته‌ دادگه‌هێ، ده‌سپێكا هه‌يڤا خزيرانا ئه‌ڤ ساله‌ دادگه‌ها ڤه‌كولينا هه‌ولێرێ بڕيار دابوو كو نه‌وشيروان مسته‌فا ژ به‌ر وان تۆمارێن ده‌نگى ئاماده‌ى به‌ر دادگه‌هێ ببيت.

د وێ ده‌ربارێ دا، حاكم سامح عوسمان سه‌رۆكێ دادگه‌ها تێهه‌لچوونێ ل هه‌ولێرێ راگه‌هاند كو داواكارێ گشتى سكالا ل سه‌ر نه‌وشيروان مسته‌فاى تۆماركريه‌ ده‌رباره‌ى تۆمارێن ده‌نگى كو تێدا به‌حسێ گه‌فێن كوشتنێ ل قونسول ره‌ڤاندنا هنارتيێن بيانى و ئه‌نده‌زيارێن بيانى ل هه‌ولێرێ دكه‌ت ئه‌و تۆمارا ده‌نگى به‌رى نوكه‌ ژ لايێ چه‌ند ده‌زگه‌هێن راگه‌هاندنێ ڤه‌ هاتيه‌ به‌لاڤكرن.

راگه‌هانديه‌ ژى كو دادوه‌رێ دادگه‌ها ڤه‌كولينێ ل هه‌ولێرێ بڕيارا ئاماده‌كرنا وى ده‌ركربوو، ژ لايێ خوه‌ ژى ڤه‌ نه‌وشيروان مسته‌فا هاتبوو ئاگه‌هداركرن كو ل سه‌ر سينگێ دادگه‌هێ ئاماده‌ بيت و بابه‌ت ل بن ڤه‌كولينێ يه‌ و دڤێت ل ده‌سپێكێ ل به‌ر دادگه‌هێ ئاماده‌ بيت و ئيفادێن خوه‌ بده‌ت، هه‌كه‌ ئاماده‌ نه‌بيت، دادوه‌ر دێ بڕيارا خوه‌ د وێ ده‌ربارێ دا ده‌ت.

چه‌ند ده‌زگه‌هێن راگه‌هاندنا پارتى ديموكراتى كوردستان تۆمارا ده‌نگى يا نه‌وشيروان مسته‌فا رێكخه‌رێ گشتيێ بزاڤا گۆڕان به‌لاڤكربوون كو د وان تۆماران دا ناڤبرى گه‌فێن كوشتنێ ل قونسلێن وه‌لاتان و ئه‌نده‌زيارێن بيانى ل هه‌رێما كوردستانێ دكه‌ت.