ئه‌ڤرۆ:
سه‌ڵاحه‌ددین به‌هائه‌دین ئه‌میندارێ گشتى یێ یه‌كگرتووى ئیسلامى كوردستان د سه‌ره‌دانا خوه‌یا ئه‌ڤرۆ دا بۆ مه‌لبه‌ندێ سێ یێ یه‌كگرتوو راگه‌هاند” دلخوشین ب وێ یه‌كێ كو ل ڤێ ره‌مه‌زانێ سه‌ركردێن گه‌لێ كوردستانێ مزگینیه‌كا خوه‌ش ب خه‌لكێ خوه‌ و گه‌لێ كوردستانێ بده‌ن، ئه‌م ژى وه‌ك یه‌كگرتوو د خزمه‌تا ئاشته‌وایا نیشتمانیداین و به‌رده‌وام بزاڤا بۆ لێكنێزیكرنا سه‌ركردێن كوردستانێ ده‌ین”.
سه‌ڵاحه‌ددین به‌هائه‌دین دیاركرژى: هه‌موو پرس و ئاواتێن گه‌لێ كوردستانێ یێن گرێداى نه‌ ب پێكڤه‌بوون و ئێكمالى و رێكخستنا ناڤ مالا كوردى، له‌وما چێ نابیت ئه‌م ل ئێك نه‌گه‌هین و چاڤه‌رێى ده‌ستكه‌فتێن مه‌زن بكه‌ین و پێنگاڤێن مه‌زن بهاڤێژین”.
سه‌باره‌ت كۆمبوونا لایه‌نێن سیاسى و په‌یاما سه‌رۆك بارزانى، ئه‌میندارێ گشتى یێ یه‌كگرتوو دیاركر” به‌رى كۆمبوونان پێدڤیه‌ ئاماده‌سازى بهێنه‌ كرن و كه‌ش و هه‌وایه‌كێ برایانه‌ دروست ببیت، بۆ وێ یه‌كێ پێكڤه‌ پێنگاڤان بهاڤێژین و به‌رى كۆمبوونێ ژى دڤێت سه‌ركردێن هه‌رێما كوردستانێ نێزیكى ئێك ببن”.
ل دۆر رێككه‌فتنا گۆڕان و ئێكه‌تیێ، سه‌ڵاحه‌ددین به‌هائه‌دین گۆت” دروست نینه‌ ئه‌و رێككه‌فتنه‌ دژى هه‌ر لایه‌نه‌كێ بیت و وان ژى و ئه‌م ژى وه‌سا یێن تێگه‌هشتى، پێدڤیه‌ ئه‌و رێككه‌فتنه‌ بۆ ئێكخستنا ناڤ مال و چاره‌كرنا كێشێن خه‌لكى بیت”.

ئه‌ڤرۆ نيوز، نيوار محه‌مه‌د سه‌ليم:

بڕياره‌ ئه‌ڤرۆ رۆژا شه‌مبى ئه‌ميندارێ گشتيێ ئێكگرتوو ئيسلامى كوردستان سه‌ره‌دانا پارێزگه‌ها دهۆكێ بكه‌ت و ل باره‌گايێ ئێكگرتوو پارێزگارێ دهۆكێ ببينيت.

ب گۆره‌ى ژێده‌ره‌كێ تايبه‌ت بڕياره‌ ئه‌ڤرۆ سپێدێ ئه‌ميندارێ گشتيێ ئێكگرتوو، سلاحه‌دين محه‌مه‌د بهائه‌دين، سه‌ره‌دانا پارێزگه‌ها دهۆكێ بكه‌ت.

هه‌ر ئه‌وى ژێده‌رى دا زانين ژى كو بڕياره‌ چه‌ند لايه‌نێن سياسى ل پارێزگه‌ها دهۆكێ ببينيت و ب مه‌ره‌ما پيرۆزباهى كرنێ بڕياره‌ پارێزگارێ دهۆكێ ژى فه‌رهاد ئه‌ترووشى ببينيت.

ئه‌ڤرۆ نيوز:

رێڤه‌به‌ريا پۆليسێن پارێزگه‌ها دهۆكێ راگه‌هاند كو شڤێدى دو جهێن قومارێ هاتنه‌ گرتن و هه‌وا گرتنا جهێن قومارێ و ده‌سته‌سه‌ركرنا قومارچيان دێ بۆ ده‌مه‌كێ نه‌ديار يا به‌رده‌وام بيت.

رائيدێ مافپه‌روه‌ر هێمن سلێمان، به‌رپرسێ په‌يوه‌ندى و راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ بۆ ئه‌ڤرۆ نيوز گۆت: “ماوێ سێ رۆژايه‌ پۆليسێن دهۆكێ پشكا هه‌وار هاتنێ و چالاكيێن مه‌ده‌نى و هێزا ئاماده‌ هه‌وا ده‌سته‌سه‌ركرنا جهێن قومارێ و خودانێن وان و قومارچيان ده‌سپێكريه‌ و ئه‌ڤ هه‌وه‌ ژى دێ هه‌تا ده‌مه‌كێ نه‌يار يا به‌رده‌وام بيت”.

 رائيدێ مافپه‌روه‌ر زێده‌تر گۆت: “دوهى رۆژا چارشه‌مبى رێكه‌فتى 22ى خزيرانا 2016ێ ئه‌وان ده‌ست ب سه‌ر دو جهێ قومارێ و خودانێن وان و هنده‌ك قومارچيان دا گرتيه‌”.

به‌رپرسێ په‌يوه‌ندى و راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ دا زانين ژى كو ئه‌ڤ كه‌سه‌ ل دووڤ بڕيارا دادوه‌رى هاتينه‌ ده‌سته‌سه‌ركرن و دێ ب گۆره‌ى قانوونێ سه‌ره‌ده‌رى ل گه‌ل وان هێته‌ كرن.