ئه‌ڤرۆ نيوز:
رێڤەبەرێ ئاڤا دھۆکێ ئاشکرادکەت کو دەمژمێرێن بەلاڤکرنا ئاڤا دھۆکێ سال بۆ سالێ بەر ب کێمبوونێ نە و نوکە پرۆژەک ل بەر دەست ھەیە ئەگەر رازیبوون ل سەر بھێتەکرن دێ رەوش بەر ب باشتر چیت و گۆت: تۆرا ئاڤا دھۆک نێزیکی 1000 کیلو مەترانە و 15% مایە ژ بەر قەیرانێ مە نە گوھوریە و ئەڤە ھەموو دھێتە گوھۆرین بۆ بلاستیک و ئەو بۆریێن ئاسنی درزن و ئاڤ دھێتە پیسکرن و ب تایبەت ل ناف کۆلانان.
جەلال جەمیل بەرئاشی رێڤەبەرێ ئاڤا دھۆکێ بۆ رۆژناما ئەڤرۆ گۆت: رەوشا ئاڤێ ل دھۆکێ ب گشتی یا باشە و دبیت تاخەک ژ تاخەکێ دی باشتر بیت و ئەوێ ژی ئەگەرێن خوە ھەنە، دیسا سەرەرایی پرۆژێ ئاڤا دھۆکێ، بەنداڤا دھۆکێ ژی وەک یەدەک و ب تایبەت ل وەرزێ ھاڤینێ ئەم مفایی ژێ وەردگرین و ئەم شیاینە پێدڤیێن خەلکی وەک ئاڤ دابین بکەین، ل چو جھان 24 دەمژمێران ئاڤ نینە و ب تنێ ل شوقێن دابین نەبن کو جھێ ئومبارکرنا ئاڤێ نینە و پشتبەستنێ ل سەر ئاڤێ دکەت و مە گەلەک بزاڤ کرن چارەسەرکرن و ئەڤە دەسپێکا پرۆژان بوو ل دھۆکێ، نوکە گەھشتینە وی ئاستی ھەر پرۆژەکێ دھێت بۆ مە ئەم ل سەر د سەپینین کو دڤێت ئومبارا کومکرنا ئاڤێ بدانیت.
رێڤەبەرێ ئاڤا دھۆکێ نەڤەشارت و گۆت ژی: ئەڤە دو سالە مفا ژ بەنداڤا دھۆکێ وەک ژێدەرێ ئاڤێ دھێتە وەرگرتن، لێ ئەڤ سالە زێدەتر مە مفا ژێ وەرگرتیە و ئەڤە پرۆژەکێ بەرھەفکریە، دیسا مە پێدڤی ب ڤێ ئاڤێ بۆ پشتی ھاتنا پەنابەر و ئاواران بۆ دھۆکێ و دیسا سالانە ژی خەلک ب خوە ژی زێدە دبی.
ھەروەسا خویا کر، ل سالا بۆری ژ سەرجەمێ 48 دەمژمێران ئەم شیاین شەش دەمژمێران ئاڤێ دابین بکەین و ئەڤ سالە ئەو شەش دەمژمێر ژی کێمبووینە و ھەتا چار و نیڤ و پێنچان و ل گەلەک تاخان ھێشتا ھاتینە خوارێ، گۆمان نینە ئەگەر تاخێن نوو بھێنە ڤەکرن دێ مەزاختی ل سەر ئاڤێ زێدەبیت و دێ خشتێ بەلاڤکرنا ئاڤێ کێمتر لێ ھێت، ھەکە ئاواران 28% رێژا ئاکنجیبوونێ زێدەکر پێدڤیە ب ھەمان رێژە خشتێ مە ژی بھێتە خوار و دبیت سال بۆ سالێ نە باشتر بیت.
ئەندازیارێ شارەزا جەلال جمیل بەرئاشی ئەو ژی گۆت: مە پرۆژێ جەمبەرەکات یێ کەڤن ل بەر دەست ھەیە و وەزارەت ل گەل کارگێریا پارێزگەھا دھۆکێ ل سەر ھاتینە ئاگەھداکرن کو ئەگەر مفا ژ ڤی پرۆژەی بھێتە وەرگرتن و ب تایبەت ل ڤان ھەیڤێن ھاڤینێ گومان نینە دێ کاودان و رەوشا ئاڤێ باشتر لێ ھێت.
نە ڤەشارت ژی، ھەتا نوکە مە 57 ھزار ئشتیراک مە ھەنە و سالانە ھەتا سێ ھزاران ل سەر تۆرا ئاڤێ دھێنە زێدەکرن و ئەم حەزناکەین ئەڤە زێدەبن و ئەگەر سیستەمێ ھەژمارێ بھێتە بکارئینان ئانکو عداد، پێشبینی دکەین بگەھیتە 70 ھزار ئشتیراکان، چونکە دبیت ئاڤاھیەکێ مەزن پێدڤی ب گەلەک ھەژماران بیت وەکو جھێن بازرگانی وەک دوکان و مارکێت.
ناڤبری گۆت: ب شێوەکێ بەروەخت دانانا پیڤەران ل دھۆکێ ھاتیە راوستاندن و ل جھێن دی نوکە کارێ ل سەر دھێتەکرن و ل پارێزگەھێن دی ب دووماھی ئینایە و ب تنێ دھۆک مایە، ئەم نزانین خەلک چەند ئاڤێ دمەزێخیت و ئەگەر ئەڤ ئامیرە ھاتبانە دانان دا خەلک ئاڤێ کێم مەزێخیت.
رێڤەبەرێ ئاڤا دھۆک ئەو ژی گۆت: داھاتێ ھەیڤانە یێ ئاڤا دھۆک 400 ملیۆن دینارە و ئەڤ داھاتە ب رێژەکا کێم کێمبوویە و ئەڤە چونکە پارێ ئاڤێ یێ کێمە و خەلک یێ بەرھەڤە وی پارە بدەت، ئەڤ داھاتە دھێتە رەوانەکرن بۆ وەزارەتا دارایی و ئابووری، نوکە پرۆژەک ھەیە 40% وی داھاتی بۆ رێڤەبەریێن ئاڤێ بھێتە مەزاختن و ھەر چەند ھەیڤان ئەڤە بۆ وان پرۆژان ئەوێن ماینە ب رێڤە و خەلکی پێدڤی پێ ھەی کو بھێنە سەخبیرکرن و بەردەوامی ل سەر بھێتەدان.
ھێشتا گۆت: تررا ئاڤا دھۆک نێزیکی 1000 کیلو مەترانە و 15% مایە ژ بەر قەیرانێ مە نە گوھۆری یە و ئەڤە ھەموو دھێتە گوھورین بۆ بلاستیک و ئەو بۆریێن ئاسنی درزن و ئاڤ دھێتە پیسکرن و ب تایبەت ل ناڤ کولانان.
ھێشتا گۆت: سوپاس بۆ خودێ ل سەر پرۆژێن خوە بەردەوامین لێ پلان نینە بۆ چەند سالێن دی، چونکە ھندەک پرۆژە بۆ چەند سالانە و دڤێت پێ گوھۆر تە ھەبیت، ل تاخێن نوو یێ زێدە دبن و ئامیرێن پاقژکرنا ئاڤێ پێدڤی پێ یێن نوونە و پێدڤی ب گوھۆرینێ.
ھێشتا گۆت: د سیستەمێ میلاکی دا ھەکە تە رێژەک ھەبیت و چەند بھێتە کێمکرن دڤێت کەسەک ھەبیت بیێتە جھێ وی و ئەڤ چەند سالە چەندین فەرمانبەرێن مە دھێنە خانەنشین کرن و کەسەک ناھێتە جھێ وان ھەتا 70 جھێن مە د ڤالانە و ھەموو بیاڤان دا کو خانەنشین بووینە و دیسا گرێبەست نەھاتینە نووکرن و ئەڤە ھەموو کارتێکرنە.
نيشاندان