ئەڤرۆ نیوز:
جارا یەکێیە کو ل دادگەھەکا تورکیا بەحسێ پەیوەندیێن د ناڤبەرا دەزگەھێ ھەوالگیریا میڵی یا تورکیا و رێکخستنێن تیرۆرست یێن وەک داعش و ئەلنوسرا دھێتە کرن و چەکدارەکی داعشێ یێ ب ئەسلێ خوە تورک ب بەلگەیان سەلماند کو وان گەلەک چالاکی ب ھەڤکاریا (میت) ئێ ئەنجام داینە.
چەکدارەکی داعشێ یێ ب ناڤێ ئەرسان چەلیک پشتی ل باژێرێ عەنتابێ ھاتیە گرتن ل دادگەھێ راگەھاند کو ب رێیا دەزگەھێ ھەوالگیریا تورکیا ژ باژێرێ کیلیسێ ڤە بەری شەرێ کۆبانێ دەربازی رۆژئاڤایێ کوردستانێ بوویە و گەھشتیە رێزێن ئەلنوسرا و گۆت: (رۆژانە من ل سەر پێشھاتێن د ناڤ ئەلنوسرا و شەرێ ل گەل کوردان زانیاری ددا میتێ و فەرمانێن میتێ ژی من و ھژمارەک ھەڤالێن خوە بجیە دکر، پەیوەندیا مە ب رێیا تەلەفۆن و واتساپێ بو و د مۆبایلا من دا ھەموو نڤیس ھەنە).
د پشکەکا دی یا ئاخڤتنا خوە دا ژی راگەھاند کو ئەرکێ وی یێ سەرەکی فول کرنا چەکدارێن ئەلنوسرا ل دژی کوردان بوو و ھژمارەک بەرپرسێن ئەلنوسرا بەردەوام دەربازێ تورکیا دبن و دیسا ڤەدگەریان سووریێ و گۆت: (ئەز دشێم بێژم پرانیا بزاڤێن ئەلنوسرا ب زانیاریا میتێ دھاتە کرن و مە ژی فەرمانێن تایبەت یێن ئیستخباراتێ بجە دئینا و ئاگاھیا من ژ کۆمبوون و پەیوەندیێن ھەردو ئالیان ھەبوو لێ من نەدزانی ل سەر چ کۆمبوونان ساز دکەن و دەمێ من دیت د ناڤا ئەلنوسرا دا ھژمارەک فەرماندار ناخوازن شەرێ کوردان بکەن و ل گەل کوردان پەیمانان ئیمزا کرن ب زانیاریا میتێ ئەز ژ ناڤ ئەلنوسرا دەرکەڤتم و ل جەرابلوسێ گەھشتمە رێکخراوا داعشێ).
ل سەر ئەرکێ خوە یێ د ناڤ داعشێ دا ژی چەکدارێ تیرۆرست ئەرسان چەلیک راگەھاند کو ناڤی وی یێ د ناڤ داعشێ دا ئەبو موسا بوویە و ژ بەر زانیاریێن وی یێن ل سەر تەکنۆلۆجیا د کاروبارێن تەکنیکی دا ھاتیە ئەرکدار کرن و گۆت: (د ناڤ داعشێ دا ھەموو فەرماندار نە ل گەل تورکیا بوون و ھندەک ژ وان ب نھینی پیلانێن چالاکیان پەقاندنێ ل دژی تورکیا دروست دکرن و من ئەو پیلان ب رێیا واتساپێ ژ بۆ میتێ ئاشکرا کرن و ژ بەر کو ئەز ب ئامادەکرنا بۆمبەیان ھاتبوومە ئەرکدار کرن من بۆمبەیان پوچ دکر و ب سایا من بۆمبێن کو فەرماندارێن داعشێ دشاندنە تورکیا نە د پەقیان و ئاگاھیا میتێ ژ ھەموو کار و چالاکیێن داعشێ ھەبوون).
چەکدارێ داعشێ یێ گرتی د پشکەکا دی یا ئاخڤتنا خوە یا ل دادگەھێ راگەھاند ژی گەلەک زانیاریێن دی یێن تایبەت ل گەل وی دا ھەنە و گۆت: (ھەکە دادگەھا مەزن دەلیڤێ بدەتە من ئەز ئامادەمە ھەموو زانیاریێن خوە پارڤە بکەم و ئەز جھێ گەلەک مادەیێن پەقاندنێ و بۆمبە و چەکێن ڤەشارتی دزانم و ئەز ل ڤێدەرێ ئاشکرا دبێژم کو د دەستێ داعشێ دا چەکێن کیمیاوی ژی ھەنە و پرانیا ڤان چەکێن خوە ئیناینە جەرابلوسێ و ل پێشبەری کلیسێ بجە کرینە و ھژمارەک فەرماندارێن داعشێ دخوازن ڤان چەکان ل دژی تورکیا بکار بینن لێ ھندەک فەرماندار ژی ل دژی ڤێ یەکێ نە).
د داویا ئاخڤتنا خوە دا ژی ئەرسان چەلیک یێ تیرۆرست راگەھاند ژی کو ئەو ژ دادگەھێ دخوازیت وی سەربەست بەردەن ژ بەر کو بێ تاوانە و فەرمانێن میتێ بجە ئینایە و گرێدایێ میتێیە و گۆت: (ئەز بۆ شەرێ پەکەکێ و کوردان چوومە سووریێ و من ئەرکێن خوە بجە ئینانە و دڤێت میت خوەدان ل من دەرکەڤیت ژ بەر کو گەلەک زانیاری ھەنە دڤێت ئەز بدەمە میتێ کو ئەڤ زانیاری د بەرژەوەندا تورکیا دانە).

ئەڤرۆ نیوز:
پشتی چالاکیێن پێشمەرگێن رۆژھەلات ھێزێن سەربازی یێن ئیرانێ ل سەر سنۆری و چەندین دەڤەرێن دی یێن رۆژھەلاتێ کوردستانێ بنگەھێن سەربازی یێن نوو ئاڤا دکەن و ب گەفان خەلکێ نەچار دکەن ھاریکاریا وان بکەن.
محەمەد ئەحمەدی چاڤدێرێ سیاسی یێ رۆژھەلاتێ کوردستان بۆ رۆژناما ئەڤرۆ دیار کر کو پشتی چالاکیێن پێشمەرگێن رۆژھەلات ھێزێن سەربازی یێن ئیرانێ ل سەر سنۆری و ل دەڤەرێن دی یێن رۆژھەلاتێ کوردستانێ دەست ب ئاڤاکرنا بنگەھێن نوو یێن سەربازی کرینە و ھەروەسا دەست ب پرۆپگاندا ل دژی کوردان دکەن و دبێژن کو پارتی دیموکراتی کوردستان- پارە ژ سعوودیێ وەرگرتینە و شەرێ ھێزێن مە دکەن و دڤێت کورد ل ھەمبەر وێ یەکێ ھشیار بن و ھاریکاریا مە بکەن و گۆت: (چالاکیێن ھێزێن پێشمەرگێن رۆژھەلاتی نھا د جھێ خوە دا بوو و کارتێکرنەکا گەلەک مەزن ل خەلکێ کریە و بۆ رژێما ئیرانێ ژی جارەکا دی ھاتە سەلماندن کو کورد بێ خوەدان نینن و ئەو نەشێن ل گۆر کەیفا دلێ خوە رۆژانە زارۆیێن مە ل سێدارە بدەن).
چاڤدێرێ سیاسی ئەو یەک ژی نەڤەشارت کو چەند رۆژن ب ھزاران ھێزێن سەربازی ب چەکێن گران ل ھەر دو پارێزگەھێن ئورمیێ و سنێ و ل دەڤەرێن چیایی ھاتنە بجە کرن و کار بۆ دروست کرنا بنگەھێن نوو یێ سەربازی دھێتە کرن و ئەو یەک ژی نیشا ددەت کو ئیران گەلەک ژ رەوشا نوو یا رۆژھەلاتا ناڤین و چالاکیێن پێشمەرگێن رۆژھەلاتێ کوردستانێ ترسیایە و ژ بەر ھندێ ژی بلەز دەست ب ئاڤاکرنا بنگەھێن نوو یێن سەربازی دکەن و گەفان ل خەلکێ سەر سنۆری ژی دکەن کو دڤێت ئەو ل دژی پێشمەرگان ھاریکاریا وان بکەن.
ل ئالیێ دی رۆستەم جیھانگیری ئەندامێ مەکتەبا سیاسی یا پارتی دیموکراتی کوردستان- ئیران ژی راگەھاند کو ھەتا ھێرشێن رژێما ئیرانێ ل سەر خەلکێ مە و پێشمەرگەی د بەردەوام بن ھێزێن مە ژی دێ بەرەڤانیێ ل خوە و خەلکی بکەن و ھەتا ئیران رێزێ ل مافێ کوردان نەگریت و سیاسەتا خوە ل ھەمبەر کوردان نەدەتە گوھۆین بێگومان دێ چالاکیێن مە بەردەوام بن و ھێزێن مە دێ ھەر د ناڤ ئاخا رۆژھەلاتێ کوردستانێ دا بمینن.