ئەڤرۆ نیوز:
وەزیرێ خواندنا بلند ئاشکرا کر کو سیستەمێ وەرگرتنا قوتابیان ل زانکۆ و پەیمانگەھان دێ گھۆرین ب سەر دا ھێن و پێشبینی دھێتەکرن کو د سالا بھێت دا 60 ھەتا 70 ھزار قوتابی قەستا زانکۆ و پەیمانەھان بکەن.
د. یوسف گۆران وەزیرێ خواندنا بلند و ڤەکۆلینێن زانستی دوھی 31.5.2016 ل زانکۆیا سلێمانیێ دگەل ئەنجوومەنێ وەزارەتێ کۆم بوو و گھۆرینێن سیستەمێ وەرگرتنا قوتابیان ل زانکۆ و پەیمانگەھان شرۆڤە کر و ل گۆر نووترین ئامار کو ژ ئالیێ وەزارەتا پەروەردێ ڤە بۆ سەرۆکایەتیا ئەنجومەنێ وەزیران ھاتیە ئاراستەکرن، ئەڤ سالە نێزیکی 112 ھزار قوتابی دێ پشکداریێ د تاقیکرنێن پۆلا دوازدێ ئامادەیی دا کەن و گۆت “پێشبینی دھێتە کرن کو 60 بۆ 70 ھزار قوتابی دەربچن و قەستا وەزارەتا خواندنا بلند و زانکۆیان بکەن، بێگومان ئەڤ ژمارە دێ گڤاشتنێ ئێخیتە سەر وەزارەت و زانکۆیان”.
د. یوسف گۆران بەحسێ سیستەمێ نوویێ وەرگرتنا قوتابیان ل زانکۆ و پەیمانگەھان کر کو د گھۆرینا وی سیستەمی دا پێدڤیە حەزا قوتابیان بەرچاڤ بھێتە وەرگرتن و گۆت “پێدڤیە کاری بۆ پتر نێزیککرنا کولتورێ باژێران بکەین، ب ئاوایەکی قوتابی پێکڤە ھزر بکەن و گەنگەشێ ل سەر بابەتێن گرنگێن رۆژێ بکەن و ڤەکۆلینێن ھەڤپشک ئەنجام بدەن و پێدڤیە پێنگاڤ پێنگاڤ دەست ب گھۆرینا سیستەمی بکەین، ب تایبەتی ل وان پشک و کۆلیژێن کو گڤاشتن ل سەر نەبیت”.
سەبارەتی بجھئینانا ڤی سیستەمی وەزیرێ خواندنا بلند خویا کر کو پێنگاڤا ئێکێ دێ ب نموونەیەکا بچووک دەست پێ کەن و گۆت “ھەکە ئەم سەرکەتی بووین، دێ سالێن د دووڤ دا پێنگاڤ پێنگاڤ نموونان زێدە کەین، ھەتا دگەھینە وێ ئارمانجێ کو ئارەزوویێن ھەمی قوتابیان بدەستڤە بھێت و نمرە پیڤەرێ دادپەروەریێ بیت”.

ئەڤرۆ نیوز:
ژ بۆ پتر ئاگەھدار بوون ل سەر رەوشا سەقایی و پیڤانا پلێن گەرمێ و رێژا بارانان و ھەروەسا زانینا گھورینکاریێن د سەقایی دا دروست دبن بریارە ل سەرانسەری پارێزگەھا دھوکێ کامیرێن چاڤدێریێ بھێنە دانان.
ل دووڤ نڤیسارەکا رێڤەبەریا کەشناسی و بیڤەلەرزان ل پارێزگەھا دھوکێ کو بۆ دھوکێ ھاتیە ھنارتن تێدا داخاز کریە کو ئاگەھداریا تەڤایا قایمقامی و دەڤەرێن سەر ب پارێزگەھا دھوکێ بھێتە کرن کو ھاریکاربن ل گەل وانا بۆ دانانا کامیرێن چاڤدێریا سەقایی ل جھێن گونجای و پێدڤی ل پارێزگەھا دھوکێ.
ھەردڤێ دەربارێ دا بەھمەن ئەحمەد رێڤەبەرێ ناحیا دێرەلۆک بۆ ئەڤرۆ دیارکر، کو ئەڤ نڤیسارە گەھشتیە دەستێ وانا و نھا ئەڤ کارە ل دێرەلۆکێ ل ژێر بجە ئینانێ دایە و جھەکی گونجای ژی بۆ ھاتیە دیتن.

ئه‌ڤرۆ نيوز:
بۆ ماوی حەفت ھەیڤا پروژێ پرا خانێ ل باژیرێ زاخۆ ھاتیە راوەستان وچ کار تێدا نەھاتیە کرن ونوکە دەست ب خراب کرنا وێ بۆ چارا دویێ ھاتە کرن، نێزیکێ ھەشت ملیون دولارا لێ ھاتیە مەزاختن ژ لایێ کومپانیا زانین ڤە ودێ بۆ ماوی شەش ھەیڤا ئەڤ پرە ب دیزاینەکێ نوو کەفتە دخزمەتا خەلکێ باژیرێ زاخۆ دا
ئەندازیار بژار مونیب سەروکێ شارەوانیا زاخۆ ددیدارەکێ دا بۆ رۆژناما ئەڤرۆ دبێژیت: “ھەر ئەو کومپانیە دێ دوبارە وێ پرێ خراب کەت وئاڤاکەت ژ بەر داکەفتنا وێ بۆ چارا ئێکێ، ئەو پارێ لێ بھێتە مەزاختن دێ کومپانی لێ مەزیخیت ودوسیا وێ ل دادگەھێ یە ھەر گاڤا بەلێندەر ئەگەر بیت دی پارێت خوە خوسارەت بیت وئەگەر ژ دیزاینەری بیت دێ مینت ل دووڤ بریارا دادگەھێ”.
زیدەتر گوت: “ماوێ خراب کرنی 45 رۆژ تا 50 رۆژا یە و ماوێ پرۆژەی شەش ھەیڤن تا نەە ھەیڤان دڤێت ب دووماھی بھێت، ئەڤ پرۆژە ب سەرپەرشتیا رێڤەبەریا رێک وپرا دھێتە بجھە ئێنان”.
ل دووماھیێ ژی داخازکر ھەر پروژەکێ رێک پرا برێیا رێڤەبەریا رێک وپرا بھێتە دروست کرن چۆنکو بسپوریا وانایە وئەگەر دسنورێ مەدا بیت ئەم دێ ھاریکاربن.

ئەڤرۆ نیوز:
چاڤدێرەکێ سیاسی: ململانێ یا حزبان ل کوردستانێ وەکی ھەڤڕکیا زارۆکانە، ھەموو گرۆپەک حەز دکەت دەولەتا کوردی ھەبیت، بەلێ دڤێت ئەو حزب و ئالی دناڤ دابیت و چو حزب حەز ناکەن دەولەتا کوردی ھەبیت ھەکە ئەو دناڤ دا نەبیت.
چاڤدێرەکێ سیاسی بەحسێ ھەڤرکیا پارتێن باشورێ کوردستانێ دکەت، و ب ھەڤڕکیا زارۆکان دناڤ دکەت، و ئاماژە دکەتە وێ چەندێ کو گەلەک جاران ئەڤ ھەڤڕکیە دبیتە مەترسی ل سەر پرسێن نەتەوەیی، دتەوەرەکێ دی دا ھەمان چاڤدێرێ سیاسی بەحسێ رێکەفتنا گوران و ئێکەتیێ دکەت و ب گەلەک درێژ نابینت.
غیاسەدین نەقشەبەندی، چاڤدێرێ سیاسی گۆت: ململانێ یا حزبان ل کوردستانێ وەکی ھەڤڕکیا زارۆکانە، ژ کەربێن ھەڤدو دا ئارمانجێن نەتەوەیی دکەنە گوری ڤێ ململانێ و ھەڤڕکیێ، و بڤێ چەندێ رێخوشکرنێ بۆ ئەجندایێن دەرڤە ئامادە دکەن، کو دزە بکەنە دناڤ گرۆپێن ئانۆیا سیاسیدا، ئەڤرۆ پارتی دیموکراتی کوردستان ھەلگرێ دروشمێ دەولەتا کوردی یە و ریفراندومێ یە و حزبێن دی وەسا تێدگەھن کو دێ پارتی بتنێ دەولەتێ دروست کەت، ئەو دێ بنە دیڤەلانک و دراستیێ دا وەسا نینە، پارتی بناڤێ مللەتێ کورد وەکی ھشیاریەکا نەتەوەیی و خواندنا کاودانێ ئەقلیمی و جیھانێ ڤێ چەندێ دکەت، چو جاران بتنێ ڤی کاری ناکەت، بەلێ پا پڕانا کادرێن پارتی ڤێ چەندێ نیشانادەن، بەلکو ھەڤڕکی و ململانێ نیشا حزبێن دی د دەن و ل بەرامبەر حزبێن دی ژی دھێنە ئازراندن، و ل ئەلتەر ناتیفێن دی دگەرن کو نە دبەرژوەندیا خەباتا رزگاریخوازا مللەتێ کوردان دایە، و چێ دبیت ببنە مەترسیەکا مەزن ل سەر پاشەرۆژا مە.
نەقشەبەندی ھەروەسا دیاکر، حزبێن دی دڤێت بگەھنە وێ باوەریێ کو ئەوا بخوەشی و دیالوگ و پەیوەندیین باش دشێن ژ پارتی وەرگرن، چو جاران بشەر و ئاژاوە و نەخوەشی نەشێن ژ پارتی ببەن، پارتی حزبەکا ب ڕکە، ئەگەر کەفتە ڕکێ چو حزب نەشێن تشتەکی ژی ژێ وەرگرن،
ھەمان چاڤدێرێ سیاسی، ل دۆر نێزیکبوونا گۆڕان و ئێکەتیێ ژی گۆت: ھەموو پێکھاتنەکێ چەند ئارمانج ھەنە، دڤێت مرۆڤ ل سەر پرسگرێکا د ناڤبەرا واندا راوستیت دا بشێت بێی لایەنانە شرۆڤە بکەت، ھەر دو ھەر ئێکن و چو جاران نەبووینە دو، دەرکەفتنا گۆڕان ژ ئێکەتیێ ل سەر بنەمایەکێ ھزری یان ئایدولوجی و یان بۆچوونان نەبوویە، بەلکو ژ بەر دابەشکرنا دەسکەفتان بوویە، ب دەلیڤە دیتنا لاوازیا ئێکەتیێ و بال گەھدانا پارتی و ھەبوونا خالێن لاۆاز و گەندەلیێ، ھێزەک دا گۆڕان کو چو جاران دخەونێ ژیدا نە ددیت، بەلێ پا رەوشا سیاسی ئەڤ راستیە بەرجەستەکر دەما گوران ھاتیە دناڤ حوکمەتێ دا و ھەر ھەمان چەوت و شاشیێن پارتی و ئێکەتیێ کرین دووبارەکرن، ئارمانجا وان ب ئاشکرایی دیار بوو، ھاتنا گۆڕان بۆ ناڤ حوکمەتێ بزاڤەکا مەزن کر پارتی داعویریت، پشتی زانی نەشێت، زڤڕی ئێکەتیێ و یا بزاڤا دکەت ئێکەتیێ داعوریت، و ئەڤە قورچا ئێکێ یە یا گۆڕان ل ئێکەتیێ ددەت، ھەکە ئێکەتی یا ھشیار نەبیت دێ ھێتە داعویران.
ل دۆر پاشەرۆژا ڤێ رێکەفتنێ ژی نەقشەبەندی خوەیاکر، مرۆڤ نوزانیت کا رەوشا سیاسی و ھەرێمی و جیھانی بەر ب چو ئاراستە ڤە دچیت، چونکی ھەموو جورە پێکھاتنەک بوویە باریڤە گرێدایە و ھوسا دیارە بتنێَ پارتی دشێت خواندنا بارێ سیاسەتا جیھانێ دروستی ژ حزبێن دی بکەت، ھەر چەندە ل دەسپێکا گرفتێن نافخوەیی، پارتی شاشیەکا مەزن ب حوکمەتا بنگەە فرەوان کر، ھەروەسا ئێکەتیێ ب ھەموو خەبات و قوربانیدانێ و شەھیدێن خوە ڤە، ب چەند نەفەرێت بێ سەرۆبەرێن گوران دا، بەلێ ئێکەتی وەک حزبەکا دێرین ل سەر ھەڤپەیمانیا خوە ھەرما، چونکی دزانی کو پرۆسا سیاسی بێی ئێکەتی و برێڤەناچیت و پارتی بێی ئێکەتی دێ بەر ب ئاراستەیەکێ نەدیار چیت، ھەڤڕکەکێ دیار و ناسیار باشترە ژ ھەڤیەیمانەکێ نەنیاس و نەدیار کا دێ پێنگاڤا ئایندە چکەت، ھەر پێکھاتنەک ھەکە دبەرژوەندیا بلندا مللەتێ کورد دا نەبیت دێ خەلک نەفرەتێ لێ کەت و پشتراست بە یا دوومدرێژ نابیت و رێککەفتنا ئێکەتی و گۆڕان گەلەک مەرجێن پێکھاتنێن سەرکەفتی تێدا نین، دێ ئێکەتی ئنشقاقێ کەت و ئەڤە حالەتەکێ ساخلەمە دژیێ ھەر حزبەکێ دا، دڤێت ئێکەتی ل ھەولێرێ جارەکا دی بھێتە دامەزراندن و کارتێکرنا ئەجندایێن ئیرانێ و یێن دەڤەرگەریێ ژ سەر راببن، ئێکەتیێن ساخلەم جارەکادی ل گەل پارتی و چەند حزبێن دی پێکاتنەکا دروست بکەن و مە بەر ب سەربەخوەیا کوردستانێ ب بەن.