ئه‌ڤرۆ نيوز:
جڤاتا گشتيا بزاڤا گۆڕان ئه‌ڤرۆ رۆژا سێشه‌مبى د كۆمبوونا خوه دا ب سه‌رۆكاتيا نه‌وشيروان مسته‌فا رێكخه‌رێ گشتيێ بزاڤا گۆران ره‌زامه‌ندى ل سه‌ر پرۆژێ رێكه‌فتنا گۆڕان و ئێكه‌تيێ ده‌ربڕى.
ئەڤرۆ نیو ، نەوزاد زادە ھلۆری:
لێک تێگەھشتنا سیاسی یا دناڤبەرا ئێکەتیا نیشتمانیا کوردستانێ و تەڤگەرا گۆرانێ ل زاردەڤێ بەرپرسێن ھەردولایان دھێتە گوھلێ بون و ئەڤ یەک ژی بویە جھێ دلگرانیا ھندەک ژ کادر و ھەلسوراوێن ئێکەتی و گۆرانێ ، و ل گەل ڤێ یەکێ ژی بالەیێن ئێکەتیێ ژی ناکوکن لسەر رێکەفتنێ و ئیرانێ ژی دڤێت ئەو دناڤەروکا رێکەفتنێ بگەھن.
لگورەی زانیاریێن ژێدەرەکێ ئاگەھدار ل وێ رێکەفتنا دناڤبەرا گۆران و ئێکەتیێ گرنگترین خالێن رەشنوسا بەرھەڤکری یا رێکەفتنامەیێ پێکدھێت ژ ئێکھەلویستی و ئێکدەنگی لسەر پرسێن سیاسیێن کوردستان و عیراقێ و دەڤەرێ و ل گەل رێکخستنا کارێن وان پێکڤە و ئێکھەلویستیا کارێ فراکسونێن گۆران و ئێکەتیێ ل ئاست ئەنجومەنێن پارێزگەە و پەرلەمانێ کوردستان و عیراقێ.
ھەروەسا ئالوگورکرن و دانانا کادرێن ھەردوولایان د پوست و پلەێن حکومەتێ دا ب راوێژیا بەری دەم دناڤبەرا ھەردوولایان دا و ل گەل ئێکھەلویستی لسەر گوھرینا سیستەمێ سیاسیا ھەرێما کوردستانێ ، و ب بووچوونا وان ژ سەروکاتیێ بو پەرلەمانی یان ژی ب سیستەمەکێ تێکەل ژ سەروکایەتی و پەرلەمانی.
خالەکا دن یا رێکەفتنامەیێ کارکرنا وایە بو لامەرکەزیکرنا زێدەتر یا ئەنجومەنێن پارێزگەھان و دەستڤەئینانا دەستھەلاتێن زێدەتر بو وان ئەنجومەنان.
ژلایەکێ دنڤە ژێدەرەکێ نێزیک ژ مەکتەبا سیاسی یا ئێکەتی بو باس دیارکر کو پشکەکا دیار یا کادر و سەرکردە و لایەنگیرێن ئێکەتی ب گومان ڤە سەحا ئەڤێ رێکەفتنێ دکەن و ب ھزرا وان گۆران ب مەرەمەکا تایبەت ڤە لەزێ د ئیمزاکرنا رێکەفتنامەیێ دکەت و ئەنجێندایێن خوەیێن سیاسی ھەنە.
ھەر ل گورەی ئەوی ژێدەری پشکەکا دیار و بەرچاڤ یا ئەندامێن ئێکەتی ئەوێن کو وەکو سەرکردە و ئورگانێن دن کار دکەن ب ھزرا وان وەسایە کو نابیت ھوسا ب ساناھی چاڤگرتنێ ل گورزێن کوژەکێن سیاسیێن دژایەتیێن گۆرانێ بھێتەکرن د بوری دا کو ل ئێکەتیێ جودابوویە و ئێکەتی تاوانبارکری ب پارتی ڤە و گەندەلیێ و ئێکەتی ب بنەمالە ڤە تومەتبارکریە.
ژێدەرێ ئێکەتی ئەو یەک ژی دیارکر کو سەرکردە و کادرێن ئێکەتی وەسا دبینن ئەڤ رێکەفتنا دناڤبەرا گۆران و ئێکەتیێ بتنێ بو ئاراستەکرنا مفایی یە بو ئێکەتی کو دروستکەرا زەمینە سازیێ و دانوستاندن و ئێکدەنگیێ بویە ل گەل پارتی بو ئەنجامدانا چاکسازیێن سەرانسەری ل ھەرێما کوردستانێ ئەگەر نە بتنێ دا وەکو زیانەک ب سەر ئێکەتیێ دا ھێتە خوار.
ژێدەری رونکر ژی کو سەرکردە و کادرێن ئێکەتی ترس ل وێ یەکێ ھەیە گۆران ب مەرەما درۆستکرنا بەرەیەکێ دژی پارتی ئەڤێ رێکەفتنێ ئەنجام ددەت و ب بووچوونێن وان ئەگەر ئێکەتی بچیتە بن ڤێ یەکێ ل وی دەمی دێ کوردستان بەر ب دابەشبوون و ھەلوەشیانێ ڤە چیت کو ئەڤ یەک ژی کارەساتە.
دیارکر ژی کو جێگھرێن سکرتێرێ گشتیی کوسرەت رەسول و بەرھەم سالح د سەرەدانا خودا بولایێ نەوشێروان موستەفا ب ئاشکرایی ئاخفتن لسەر ڤێ یەکێ کریە کو دڤێت رێکەفتنامە یا چاکسازیێ بیت نەک سەنگەربەندی و بزداندنا پلە و پوستان.
ھەر لگورەی زانیارییێن ژێدەرێ ئێکەتی ھەر ئێک ژ مەلا باختیار و مەحمود سەنگاوی و شێخ جەعفەر و شێخ موستەفا و سەعدی پیرە و ئازاد جوندیایی و چەندین ئەندامێن دن یێن سەرکردایەتی ژ وانن کو ب ھزرا وان نابیت رێکەفتنامە بێ مەرج بھێتەکرن.
ھەر لگورەی ئەوی ژێدەری تا نھا دناڤ مەکتەبا سیاسی یا ئێکەتی دا ئەڤ یەک نەھاتیە ئێکلایکرن کا بەرسڤا وان دێ بو پارتی چ بیت و ئێکھەلویست نینە ل بارا راگرتنا بالانسێ دناڤبەرا گۆران و ئێکەتی کو ئەڤێ یەکێ ژی دێ ئاریشەیان درۆستکەت و ھەتا بەرھەڤکرنا ئەڤێ راپورتێ ژی دوو بوچوێن ھەڤدژ ھەنە ، و بو تێگەھتنا خالێن رێکەفتنامەیێ وەسا بریارە شاندەکا ئیرانێ سەرا سلێمانیێ بکەت و ل گورەی ژێدەرەکێ ” باس ” پرانیا کادر ئەندام و لایەنگیرێن ھەردوو لایان ئاگەھدارێ ناڤەروکا ڤێ یەکێ نینە و دەنگێ نارەزایێ ژ ھەردوو لایان دھێتە بھیستن.
ژلایێ خوڤە ھەر ئێک ژ ” سەربەست جیھاد ” ئەندامێ کەمتەبا سیاسی یا ئێکەتی و لسەر تورا جڤاکی یا فەیسبووکێ و ” عومەر عینایەت ” ئەندامێ پەرلەمانێ کوردستانێ ژ فراکسوونا گۆران ل کەنالێن نافخوەیێن کوردستانێ رەخنەیێن توند ل ڤێ یەکێ گرتینە ، و ئەڤە زێدەباری وێ یەکێ کو ” بێگەرد تالەبانی ” ئەنداما سەرکردایەتی ئێکەتی و سەروکا فراکسوونا ئێکەتی ل پەرلەمانێ کوردستانێ د لێدوانەکێ بو باسنیوز دا دیارکر کو ئەڤە رێکەفتنامەیەکا سیاسی یە و ھەردوو لایان ھندەک پرنسیپێن ھەڤپشک ھەنە و ژلایێ ستراتیجی ڤە وەکو ئێکن و دبێژیت ژی : ( ئەم و تەڤگەرا گۆرانێ دوو پارتێن مەزن و خودانا جەماوەر و رێسایێن بەرفەرینە و ژبەرڤی َنابیت 100% ئەوێت دناڤا وان ھەردوو پارتان دا ژ سەرکرد و ئەندام و پشتەڤانێن وان وەکو وان ھزر بکەن )
ژلایەکێ دنڤە ” ئومێد خوشناو ” سەرۆکێ فراکسونا پارتی ل پەرلەمانێ کوردستانێ گوتارەکێ دا کو کوپیەک تایبەت بو ” باس ” فرێکریە دیارکر و دوەختێ ئینشیقاق و مال جوداکرنا گۆرانێ ژ ئێکەتیێ پارتی دیموکراتی کوردستان دلخوش نەبویە ب وێ یەکێ کو حزبا ھەڤپەیمانا پارتی بوویە کو خوەدان ئاریشە بیت و لایەکێ وێ ژ وێ جودا ببیت وەکو چەوا نھا دلخوشا چوونا ناڤا ناڤ مالا خوە کو ئێکەتی یە ھەیە و وەکو پارتەکا کارتێکەر ، ژبەرڤێ نھا بەری ئێکەتی و گۆران د ھەڤدوو گەھشتن و راگەھاندنا ئەوی رێکەفتنامەیێ وەکو دھێتە گوتن ببن پارتی بەراھیێ پیروزباھی لێکریە و دێ کەت ژی )
بەلێ خوشناوی ئاماژە ب وێ یەکێ ژی کریە کو ل گەل ڤێ یەکێ ژی ئەگەر گۆران بھێتە دناڤا رێکەفتنێ دا ئەو رێکەفتن دێ فشار و دژتیا پارتی کەت و بەلێ ب ب پشتراستیڤە رێکەفتنامە ژ سلێمانیێ نابوریت.
ئه‌ڤرۆ نيوز:
وه‌زاره‌تا ژ ده‌رڤه يا ئيرانێ به‌رسڤا داخۆيانيێن مه‌سرۆر بارزانى، شيره‌تكارێ جڤاتا ئاسايشا هه‌رێما كوردستانێ، دا ده‌رباره‌ى پرسا سه‌ربه‌خۆيا هه‌رێما كوردستانێ و راگه‌هاند: ئيران ل گه‌ل ئێكپارچه‌يا ئاخا عيراقێ يه.
د كۆنگره‌كێ رۆژنامه‌ڤانى دا، ده‌رباره‌ى راگه‌هاندنا سه‌ربه‌خۆيا هه‌رێما كوردستانێ پرسياره‌ك ئاراسته‌ى ئاخفتنكه‌رێ ب ناڤێ وه‌زاره‌تا ژ ده‌رڤه يا ئيرانێ هاته كرن كو پێشتر مه‌سرۆر بارزانى، شيره‌تكارێ جڤاتا ئاسايشا هه‌رێما كوردستانێ، راگه‌هاند بوو كو نوكه ده‌مێ راگه‌هاندنا سه‌ربه‌خۆيا هه‌رێما كوردستانێ يه. پرسيار ئه‌و بوو، ئايا هه‌لويستێ ئيرانێ د ڤێ ده‌ربارێ دا دێ چ بيت، د وێ ده‌ربارێ دا به‌رسڤا وان دێ بۆ سه‌رۆكێ هه‌رێما كوردستانێ دا چ بيت ل ده‌مێ سه‌ره‌دانا وى وه‌لاتى؟
د به‌رسڤێ دا ئاخفتنكه‌رێ ب ناڤێ وه‌زاره‌تا ژ ده‌رڤه يا ئيرانێ جابر ئه‌نسارى گۆت: “هه‌لويستێ ئيرانێ سه‌قامگێرى و ئێكپارچه‌يا ئاخا عيراقێ يه كو تێدا به‌رژه‌وه‌نديێن هه‌موو گه‌لێن عيراقێ ب پارێزيت”.
گۆتژى: “مه‌ترسيه‌كا مه‌زن يا ل سه‌ر عيراقێ شه‌رێ داعشه، پێدڤيه به‌رپرس و سياسه‌تمه‌دارێن وى وه‌لاتى د دانوستاندنێن به‌رده‌وام دا بن د پێناڤى ئێكپارچه‌يا ئاخا عيراقێ و سه‌ركه‌فتن ب سه‌ر تيرۆرستێن داعش دا”.
ئه‌ڤرۆ نيوز:
كۆمبوونا لژنا روو ب رووبوونا قه‌يرانێن دارايى هاته پاشخستن و ئه‌ڤه ژى ب گۆره‌ى گۆتنا سه‌رۆكێ فه‌رمانگه‌ها هه‌ماهه‌نگى و دووڤچوونا هه‌رێمێ.
لژنا روو ب رووبوونا قه‌يرانا هه‌موو رۆژێن دوشه‌مبى يان سێشه‌مبى كۆم دبيت و گرنگترين ته‌وه‌رێن گرێداى قه‌يرانا دارايى گه‌نگه‌شه دكه‌ت و ب تايبه‌ت بابه‌تێ گرێداى مووچێ فه‌رمانبه‌ران.
نورى عوسمان، سه‌رۆكێ فه‌رمانگه‌ها هه‌ماهه‌نگى و دووڤچوونا هه‌رێمێ راگه‌هاند: كۆمبوون ناهێته كرن و بۆ حه‌فتيا بهێت هاته پاشخستن.
ئه‌ڤه د ده‌مه‌كى دايه كو وه‌زاره‌تا دارايى و ئاخفتنكه‌رێ ب ناڤێ سه‌رۆكاتيا حوكمه‌تێ راگه‌هاندبوو كو ل 8 يان 9ى ڤێ هه‌يڤێ دێ ده‌ست ب به‌لاڤكرنا مووچێن هه‌يڤا نيسانێ هێته كرن، به‌لێ هه‌تا نوكه چ ديار نينه.
ئەڤرۆ نیوز:
چاڤدێرەکێ سیاسی ئاشکەرا دکەت کو نوکە ل عیراقێ بتنێ کورد تاکە ھێزا بھێزە ژ سنان و شیعان و ھەکە کورد ناف مالیا خوە رێکبێخن دشێن ئەڤێ چەندێ ب چەند خالێن فشارێ ل سەر ئالیێن سیاسی بکەنە دەست کەفت و ب دەست ڤە بینن.
ھەژار محەمەد یوسف چاڤدێرێ سیاسی بۆ رۆژناما ئەڤرۆ گۆت: چوونا خوەنیشاندەران بۆ ناڤ بالەخانا پەرلەمانێ عیراقێ، شکاندنا دەستھەلاتا شەرعی بوو و تایبەت یا پەرلەمانی ل عیراقێ، دیارکر کو تەیارێ سەدری ل پەرلەمانێ عیراقێ نەیێ ب ھێزە و مالکی یێ ب ھێزترە چونکە ھەکە پێداچوونەکێ دسەنگا ھەر دو فراکسیۆنان دا بھێتەکرن کو ھەر دو شیعەنە، سەدری 28 کوسی ھەنە و مالکی 93 کورسی ، دبینم ئەڤە شەڕەکە د ناڤبەرا نوری مالکی و تەیارێ سەدری دا دروست دبیت ل سەر سەنگا دەست ەلاتێ ل دەڤەرێن شیعی بۆ پاشەرۆژێ ل سەر چێبوونا ھەرێما شیعی یان دەولەتا شیعی و ھەر ئیکێ دڤێت خوە دیار بکەت و دەستھەلاتا خوە ل دەڤەران ب سەپینیت و کی دێ بیتە سەرۆک و مەرجەعێ شیعان ل دەڤەرێ چونکە ھەردو تەیارێن سیاسی ل عیراقێ نەچەقێن ئێک دارێ نە، بەلکو ھەر ئێکێ دڤێت سەر یێ دی بکەڤیت”.
ھەمبەر چوونا فراکسیۆنێن کوردستانی بۆ پەرلەمانێ عیراقێ، ھەژاری گۆت” پێدڤیە کورد ناڤمالیا خوە ل کوردستانێ رێکبێخیت و ئەو کێشێن نوکە د ناڤبەرا پارتێن کوردستانی دا بھێنە چارەکرن، دیسا ھەکە کوردان پشتەڤان ھەبن کو نەھێلن بچنە بەغدا، دبینم دبەرژوەندیا کوردان دایە و دێ پاشەرۆژێ مفادار بن، دیسا دڤێت کوردان رێ ھەبن بۆ دیتنا چارەسەریێن ئابووری و ڤەقتیان ژ بەغدا دێ ھێزا مە پتر ل دەڤەرێ دیارکەت کا ھەتا چ رادە دێ شێین خوە بێی بەغدا ب رێڤەبەین، ھەکە ئەم نەشێن ئەڤێن سەری بجە بینن مە کوردان چو رێ نینن و دڤێت جارەکا دی رێیا بەغدا بگرینە ڤە”.
ناڤبری ئەو چەندەژی دیارکر کو ھەتا کورد ڤەگرنە بەغدا ڤە ، دڤێت خوە نەکەنە پشکەک ژ چارەسەریا کێشان ل عیراقێ و کێشێن نوکە ل عیراقێ سەرھلداین دڤێت کورد ڤێ دەلیڤێ بەرچاڤ وەربگرن و ژ دەست نەدەن، چونکە کورد نوکە ل عیراقێ ژ ھەموو ئالیان ب ھێزترن، داعشێ دەڤەرێن سونەیێن عیراقێ یێن کونترۆل کرین و نەشێن چو بکەن و پێدڤی ب ھاریکاریا کوردان ھەیە ژ ھەموو بیاڤان چ پێشمەرگە پشکداری ئازادکرنا مووسل بیت، پتر ژ ملیۆنەکا ئاواران ل کوردستانێ یە و ھەموو خەلکێ پارێزگەھێن سونی نە، دیسان ناکۆکیێن مەزن د ناڤبەرا فراکسیۆن و ئالیێن شیعی دروست بووینە و ئەوان ژی پێدڤی ب ھێزەکا نە شیعی یە ل عیراقێ و ھەر فراکسیۆنەکێ ژلایێ خوە ڤە حەزکە ت ھێزەک ل گەل بیت پتر سەنگا خوە ل پەرلەمانی دیار بکەت و خوە ب سەپینیت و ب تنێ کورد دشێن ئەڤێ سەنگێ ل عیراقێ دیاربکەن، پێدڤیە کورد دەمێ خوە ب ڤێ چەندێ ڤە نەبەن بۆ نێزیکرنا ئالیێن سیاسی و نەبیتە پشکەک ژ چارەسەریێ و لایەنێن شیعی بگەھیننە ئێک و ب ھێز بکەڤن و دژی کوردان ب راوەستن، ھەمان دەم کورد دجە دا ژی نە راوەستن، بەلکو کار بکەن ڤێ دەلیڤێ لبەرچاڤ وەربگرن وخوە ب کەنە دادوەر و ب تنێ دبینم کورد ئەڤێ خالێ بەرچاڤ وەربگرن و فشارەکێ بۆ بەرژوەندیێن خوە بکەن، دێ باشتربیت و چارەسەریا ھندەک کێشان بکەت ل خۆرماتور ودێ سەکەرفتن ئەو بیت، ئەڤ کێشە بێنە چارەسەرکرن.
ئەڤرۆ نيوز:
سەرۆکێ لژنا سوتەمەنی و پیشەسازی ل جڤاتا پارێزگەھا دھۆکێ دیار کر کو ژڤانە ئەڤرۆ کۆمبوونەک ل پارێزگەھێ ل گەل خودانێن پانزینخانان ل دۆر بھای بھێتە ئەنجامدان .
عەبدولسەمەد تێلی ئاشکرا ژی کر کو پێشبینی بەر ب و چەندێ دچن بڕیار ل سەر بازارەکێ ئازاد بھێتە دان، وەک ھەولێر و سلێمانیێ، چونکو ئاریشە ئەوە حوکمەت پانزینێ نادەت و زەحمەتە حوکمەت بھای بدانیتە سەر پانزینێ و بۆ ئەڤرۆ گۆت:( دبیت گران ببیت و کارگێریا پارێزگەھێ ھەموو دەستھەلات یێن ھەین و دێ بریارێ ل سەر دەت).
ل دووڤ زانیاریێن ژ خودانێن پانزینخانان ب دەست ئەڤرۆ کەفتین، ئەو دێ رژدیێ ل سەر وێ چەندێ کەن کو پانزینا ب 575 دیناران ب 650 بھێتە فرۆتن و یا محەسەن ژی ب 750 بھێتە فرۆتن.
ئه‌ڤرۆ نيوز:
ل گۆر پێشبینیێن فه‌له‌كناسان، پشتى ده‌مه‌كێ كێم دێ هه‌سارا عه‌تارد ل هه‌مبه‌ر رۆژێ زڤریت و ئه‌ڤ دیارده ل پڕانیا وه‌لاتان دێ هێته دیتن.
ناسا به‌لاڤكریه كو هه‌سارا عه‌تارد دێ د ناڤبه‌را هه‌سارا ئه‌ردى و رۆژێ را چیت و دیمه‌نێ ده‌ربازبوونا وێ پتر ژ 7 ده‌مژمێران ل پڕانیا ده‌وله‌تان دێ یا به‌رده‌وام بیت.
ئه‌ڤ دیارده ئه‌ڤرۆ ل ده‌مژمێر 2 و 10 ده‌قیقه ب ده‌مێ كوردستانێ دێ ده‌ست پێ كه‌ت، عه‌تارد ژ ئالیێ چه‌پێ یێ رۆژێ دێ به‌ره‌ڤ لایێ راستێ ده‌رباز بیت، د سه‌ده‌سه‌كى دا ئه‌ڤ دیمه‌نه 12 بۆ 13 جاران دروست دبیت و دیتنا ڤى دیمه‌نى پێدڤى ب پێدڤیێن فه‌له‌كناسى یێن تایبه‌ت هه‌یه، چونكو به‌رێخوه‌دانا ئێكسه‌را رۆژێ دێ زیانان گه‌هینیته چاڤان.
ئه‌ڤرۆ نيوز:
ب گۆره‌ى مالپه‌ره‌كێ ئێكه‌تى نشتيمانى كوردستانێ نوكه هه‌ر ئێك ژ بزاڤا گۆڕان و ئێكه‌تى نشتيمانى كوردستان ل سه‌ر وێ چه‌ندێ رێكه‌فتينه كو ببنه ئێك حزب.
مالپه‌رێ SNN يێ ئێكه‌تى نشتيمانى كوردستان ل سه‌ر زارێ ژێده‌ره‌كێ خوه راگه‌هانديه كو دانوستاندن ل سه‌ر رێكه‌فتناما ئێكه‌تى نشتيمانى كوردستان و بزاڤا گۆڕان دا ب دووماهى هاتيه و ئێك ژ پشكداربوويێن كۆمبوونێ دبێژيت: “ره‌شنڤيسێ رێكه‌فتنێ ته‌مام بوويه و ب تنێ ئيمزاكرن ل سه‌ر مايه”.
دايه زانين ژى كو هێشتا ژڤانێ ئێمزاكرنا رێكه‌فتنێ نه‌هاتيه دياركرن، به‌لێ چه‌ند هزره‌ك هه‌نه بۆ راگه‌هاندنا وێ رێكه‌فتنێ ب ره‌نگه‌كێ فه‌رمى.
ئاماژه ب وێ چه‌ندێ ژى كريه كو مه‌ره‌م ژ وێ رێكه‌فتنێ لێك نێزيكبوون و ئه‌نجامدانا كارێ هه‌ڤپشكه د ناڤبه‌را هه‌ردو حزبان دا ب تايبه‌ت ل په‌رله‌مانى و جڤاتان دا.
هه‌ر وه‌كو مالپه‌رێ ناڤبرى به‌لاڤكرى، ميكانيزما كارێ هه‌ڤپشك د په‌رله‌مانێ كوردستانێ و جڤاتا نوونه‌رێن عيراقێ و جڤاتێن پارێزگه‌هان دا هاتيه دياركرن، به‌لێ به‌حس چ ژ سه‌رۆكاتيێن هه‌رێمێ و حوكمه‌ت و په‌رله‌مانى نه‌كريه، ب تنێ ته‌كست ل سه‌ر وێ چه‌ندێ هاتيه كرن كو هاريكاريا هه‌ڤدو بكه‌ن.
ئه‌ڤرۆ نيوز:
ده‌سته‌يا سه‌رۆكاتيا جڤاتا نوونه‌رێن عيراقێ راگه‌هاند كو ئه‌و دخوازن رۆژا سێ شه‌مبى رێكه‌فتى 10ى گۆلانا 2016ێ لژنه‌يێن جڤاتا نوونه‌رێن عيراقێ ده‌ست ب كار ببن و دده‌ته زانين ژى كو هه‌ر ده‌مێ ئاڤاهيێ جڤاتا نوونه‌ران هاته نووژه‌نكرن، په‌رله‌مان ژى دێ ده‌ست ب كار بيت.
ئه‌ڤه د ده‌مه‌كى دايه كو نوونه‌رێن كورد ل جڤاتا نوونه‌رێن عيراقێ بايكوتا روونشتنێن جڤاتێ كريه و راگه‌هانديه كو هه‌تا ب بڕياره‌كا سه‌ركرداتيا كوردى نه‌بيت ئه‌و ڤه‌ناگه‌رنه به‌غدا، سه‌ره‌راى سه‌ره‌دانا سه‌رۆكێ جڤاتا نوونه‌رێن عيراقێ، سه‌ليم جبۆرى، بۆ هه‌رێمێ بۆ رازيكرنا وى.
ته‌ڤگه‌را سه‌در ژى راگه‌هانديه كو نوكه كوتله‌يا ئه‌حرار كو نوونه‌راتيا وان دكه‌ت بايكوتا كريارا سياسى ل عيراقێ كريه هه‌تا كو چاكسازى ل سه‌ر بنه‌مايێ ته‌كنوكرات نه‌هێنه كرن.
ئه‌ڤرۆ نيوز:
سەرۆکێ لیژنا سۆتەمەنیێ ل جڤاتا پارێزگەھا دھۆکێ راگەھاند، ل ھەیڤێن بۆری ژی نێزیکی 13 تانکەرێن پانزینا پیس ھاتبوونە گرتن و 24 وێستگەھێن پانزینێ یێن ھاتنە سزادان و11 وێستگەھێن پانزینێ بۆ ماوەیێن ژێک جۆدا ھاتنە دائێخستن و 13 وێستکەھێن پانزینێ ژی ب کۆژمێن پارەی ھاتنە سزادان. ژ ئالەکێ دی ڤە، سەرۆکێ لیژنا پیشەسازی و وزێ ل جڤاتا پارێزگەھا ھەولێرێ ئاشکرا کر، رەنگە جارەکا دی وەکو بەرێ پانزین بھێتە پۆلینکرن بۆ پانزینا نۆرمال، موحەسەن و سۆپەر، و گۆت ژی: ژ بەر نەبوونا پشتەڤانیا حوکمەتێ ل سەر پانزینێ و بلندبوونا بھایێ پترۆلێ د بازارێن جیھانێ دا، بۆھایێ پانزینێ ل رۆژێن بۆری د بازارێن کوردستانێ دا گرانتر لێ ھاتیە
سەرۆکێ لیژنا سۆتەمەنیێ ل جڤاتا پارێزگەھا دھۆکێ دیار کر، ملیون لترێن پانزینا پیس یێن ھاتینە گرتن و رێ پێ ناھێتە دان ببفروشن و ل ھەیڤێن بۆری ژی نێزیکی 13 تانکەرێن پانزینا پیس ھاتبوونە گرتن و 24 وێستگەھێن پانزینێ یێن ھاتنە سزادان.
عەبدولسەمەد کۆچەر، سەرۆکێ لیژنا سوتەمەنیێ ل جڤاتا پارێزگەھا دھۆکێ بۆ ئەڤرۆ دیار کر، نھا 11 وێستگەھێن پانزینێ بۆ ماوەیێن ژێک جۆدا ھاتنە دائێخستن و 13 وێستکەھێن پانزینێ ژی ب کۆژمێن پارەی ھاتنە سزادان، ئەڤ ھەر 24 وێستگەھێن پانزینێ سەرا نەپێگیری ب رێنمایان و پانزینا پیس یێن ھاتنیە سزادان و گۆت: حەفت جۆرێن پشکنینی بۆ پانزینێ دھێنە کرن، ھەکە جۆرەک دەرنەچیت، ئەو وێستگەە دێ ھێتە سزادان، نوکە دشێم بێژم ل بەرامبەر پارێزگەھێن دێ ھەرێما کوردستانێ، ب رێژەکا گەلەک باش کونترۆل ل سەر کوالێتیا پانزینێ ل دھۆکێ یا ھاتیە کرن.
ناڤبری ئەو ژی دیار کر، ل دھۆکێ ژمارێن تەلەفونێن لیژنا پشکنینا پانزینێ ل وێستگەھان یێن ھاتینە ھەلاویستن، بۆ وێ چەندێ ھەر شوفێرەکێ گازندەک ھەبیت، ئێکسەر پەیوەندیێ ب لیژنا پشکنینا پانزینێ بکەت و رێک نەھێتە دان چو وێستگەە پانزینا پیس بفروشنە وەلاتیان و گۆت ژی: ل پارێزگەھا دھۆکێ 157 وێستگەھێن پانزینێ ھەنە.
عبدولسەمەد ئەو ژی دیار کر، بەردەوام ئەم ھەولددەین گەلەک بازرگان پانزینێ بینن، دا کو ھەڤرکی دروست ببیت و نەھێلین پانزین گران ببیت ل دھۆکێ، چونکو ھەتا رادەیەکێ باش کۆنترول ل سەر ھاتیە کرن.
نافیز ناوپردانی، سەرۆکێ لیژنا پیشەسازی و وزێ ل جڤاتا پارێزگەھا ھەولێرێ بۆ ئەڤرۆ دیار کر، ل گەل دەستپێکرنا بلندبوونا بھایێ پانزینێ د رۆژێن بۆری دا، وان دەست ب ڤەکۆلینێ کریە، چونکو ئەڤە ھەیامەکە پانزین و ئینان و فرۆتنا وان کەفتیە د دەستێ بازرگان و کەرتێ تایبەت دا و حوکمەتا ھەرێمێ چو دەست و پالپشتی تێدا نینە و گۆت: حوکمەتێ چو دەست د بوھایێ وێ دا نینە.
ناڤبری ئاشکرا کر، رەنگە جارەکا دی وەکو بەرێ پانزین بھێتە پۆلینکرن بۆ پانزینا نۆرمال، موحەسەن و سۆپەر، چونکو بەری نھا پانزینخانان ب کەیفا خۆ پانزین پۆلین دکر، لێ ژ نھا وێڤە دێ حوکمەت پۆلین کەت و بۆھایێ بۆ دانیت و ناھێلیت ھەر بازرگانەک ب کەیفا خوە پانزینێ پۆلین بکەت و گۆت ژی: ئەوێن بەری نھا پانزینا نۆرمال ب ناڤێ پانزینا موحەسەن دفرۆتن دێ ھێنە سزادان و چاڤدێریەکا توندتر دێ ل سەر ھێتە دانان.
سەرۆکێ لیژنا پیشەسازی و وزێ ل جڤاتا پارێزگەھا ھەولێرێ ئاشکرا ژی کر، ژ بەر نەبوونا پشتەڤانیا حوکمەتێ ل سەر پانزینێ و بلندبوونا بھایێ پترۆلێ د بازارێن جیھانێ دا، بۆھایێ پانزینێ ل رۆژێن بۆری د بازارێن کوردستانێ دا گرانتر لێ ھاتیە و گۆت ژی: نھا ژ بەر بلندبوونا بۆھایێ دولاری، ئەو پانزینا ژ دەرڤەی وەلاتی دھات، بۆھایێ وێ گرانتر لێ ھات.
نيشاندان